¹ "Kamudian, Kerajaan Surga pacang diumpamakan awan sepuluh gadis nang maanggung pelita-pelitanya wan baisur gasan badapat mempelai lalakian. ² Lima di antara buhannya adalah bungul wan lima nang lainnya adalah bijaksana. ³ Wayah nang bungul itu maanggung pelita-pelitanya, buhannya kada maanggung minyak lawan inya. ⁴ Namun, nang bijaksana maanggung minyak dalam guci halus lawan awan pelita-pelita buhannya. ⁵ Wayahini, wayah mempelai lalakian itu bakaina kadatangannya, buhannya sabarataan mangantuk wan guring. ⁶ Namun, wan rahatan kadap ada kuciakan, mempelai lalakian datang! Bangsullah gasan manyambutnya!' ⁷ Kamudian, sabarataan gadis itu bangun wan merapikan pelita-pelita buhannya. ⁸ Wan nang bungul bapadah lawan nang bijaksana, 'Julunglah lawan kami sahimpil minyakmu sabab pelita-pelita kami babaya padam.' ⁹ Cagar tapi, nang bijaksana manyinggai, 'Kada, kada pacang mayu gasan kami wan ikam. Labih baik, baisurlah lawan nang manjual minyak wan tukarlah gasan awakmu saurang.' ¹⁰ Pahadangan buhannya baisur gasan manukar, mempelai lalakian itu datang, wan buhannya nang sadi, babuat baimbay awan inya ka perjamuan kawin, wan lawang dilingkup. ¹¹ Limbah itu, datang pula gadis-gadis lainnya wan bapadah, 'Tuan, tuan! Urakakanlah hagan kami.' ¹² Cagar tapi, inya manyinggai, 'Sabujurnya, aku bapadah lawan ikam, aku kada maminandui ikam.' ¹³ Ulih sabab itu, bailan-ilanlah sabab ikam kada tahu hari atawa wayahnya." Paumpamaan tentang Tiga Palayan ¹⁴ "Sabab, Kerajaan Surga sama kaya sasaurang nang cagar baisur ka luak negeri, nang mamanggil ulun-ulunnya wan manjulung ampunnya lawan buhannya. ¹⁵ Lawan nang saurang, inya maunjuk 5 talenta, lawan nang lainnya, 2 talenta, wan lawan nang lainnya yamin, 1 talenta. Masing-masing sasuai kasanggupannya. Kamudian inya baisur. ¹⁶ Urang nang manerima 5 talenta itu langsung baisur, wan malalahakan talenta itu, wasn inya manghasilakan 5 talenta yamin. ¹⁷ Damikian jua urang nang manerima 2 talenta, inya menghasilakan 2 talenta yamin. ¹⁸ Cagar tapi, urang nang manerima 1 talenta itu baisur manggali libak di tanah, wan mahinipakan uang tuannya. ¹⁹ Lawas limbah itu, tuan matan ulun-ulun itu datang wan maadakan pambilangan awan buhannya. ²⁰ Urang nang imbah manerima 5 talenta itu manghadap wan maanggung 5 talenta yamin, ujarnya, 'Tuan, engkau manjulung 5 talenta lawan aku. Janaklah, aku imbah menghasilakan 5 talenta yamin.' ²¹ Tuannya bapadah lawan inya, 'Bingking bangat, ulun nang baik wan setia. Ikam setia awan idabul-idabul kacil, aku pacang maanggung ikam atas rahat idabul, babuatah ka dalam sukacita tuanmu.' ²² Wan, urang nang manerima 2 talenta jua manghadap wan bapadah, 'Tuan, engkau manjulung 2 talenta lawan aku. Janak, aku imbah manghasilakan 2 talenta yamin.' ²³ Tuannya manyinggai, 'Bingking bangat, ulun nang baik wan setia. Ikam setia awan idabul-idabul kacil, aku pacang maanggung ikam atas rahat idabul, babuatlah ka dalam sukacita tuanmu.' ²⁴ Kamudian, urang nang manerima 1 talenta jua manghadap wan bapadah, 'Tuan uku tahu engkau urang nang hajam, menuai di wadah nang engkau kada mahambur, wan mangumpulakan di wadah nang engkau kada manyebarkah banih. ²⁵ Sabab itu, aku gair, wan baisur wan mahinipakan talentamu di dalam tanah. Lihat, engkau baampun napa nang manjadi ampunku.' ²⁶ Namun, tuannyamanyinggai wan bapadah lawan inya, 'Ikam ulun nang jahat wan kulir! Ikam tahu bahwa aku menuai di wadah nang aku kada mahambur wan mangumpulakan di wadah nang aku kada manyebarkan banih. ²⁷ Sabab itu, baurang ikam manyimpan uangku di bank wan wayah aku bulik, aku pacang manerima ampunku bulik awan kambangnya. ²⁸ Ambillah 1 talenta itu matan inya wan julung lawan inya, nang baampun 10 talenta itu. ²⁹ Sabab, satiap urang nang baampun pacang di julung yamin, wan inya pacangan bakalimpakakan. Cagar tapi, matan urang nang kada baampun, bahkan napa nang inya ampun pacangan diambil. ³⁰ Hamputakanlah ulun nang kada baguna itu ka dalam kakadapan nang bangat pakat. Di wadah itu pacangan ada tangisan wan kertak gigi.'" Penghakiman Ulih Anak Manusia ³¹ "Wayah Anak Manusia datang dalam kemuliaan Inya, wan para malaikat lawan Inya, limpat Inya pacang duduk di takhta kemuliaan Inya. ³² Sabarataan bangsa pacang dikumpulakan di intangan Inya, wan Inya pacang mailahakan buhannya asa matan nang lain, kaya gembala nang mailahakan domba matan kambing-kambing. ³³ Wan, Inya pacang maandakakan domba-domba di sabalah kanan Inya, wan kambing-kambing di sabalah kiri. ³⁴ Kamudian Raja pacang bapadah lawan buhannya nang di sabalah kanan Inya, 'Marilah, ikam nang diberkati ulih Abah-Ku, warisilah Kerjaan nang disadiakan gasan ikam matan pamulaan dunia. ³⁵ Sabab wayah Aku Lapar, ikam maunjuk Aku makan. Aku haus wan ikam maunjuk aku kinum. Aku urang asing wan ikam manyaru Aku babuat. ³⁶ Aku talanjang wan ikam maudakakan Aku pakaian. Aku garing wan ikam majanaki Aku. Aku di panjara wan ikam databg lawan Aku. ³⁷ Limpat, urang bujur itu pacang manyinggai Inya, 'Tuhan, bila kami majanak Engkau lapar wan maunjuk Pian makan, atawa haus wan maunjuk Pian kinum? ³⁸ Bila kami majanak Engkau saurang asing wan manyaru Engkau babuat, atawa talanjang wan maudakakan Engkau pakaian? ³⁹ Bila kami majanak Engkau garing atawa di panjara wan kami datang lawan Pian?' ⁴⁰ Raja itu pacang manyinggai, 'Aku bapadah nang sabujurnya lawan ikam, dimapa ikam malakukannya tahadap asa matan dingsanak Aku nang bangat kacil naya, ikam malakukannnya gasan Aku.' ⁴¹ Kamudian, Inya pacang bapadah jua lawan buhannyanang di sabalah kiri Inya, 'Baisurlah matan intangan Aku, ikam nang takutuk, ka dalam api abadi nang imbah disadiakan gasan satan wan malaikat-malaikatnya. ⁴² Sabab, Aku lapar wan ikam kada maunjuk Aku makan. Aku haus wan ikam kada maunjuk Aku kinum. ⁴³ Aku urang asing wan ikam kada manyaru Aku babuat; talanjang wan ikam kada maudakakan Aku pakaian; garing wan di panjara, wan ikam kada majanak Aku.' ⁴⁴ Kamudian, Inya pacang manyinggai, buhannya, Aku bapadah nang sabujurnya lawan ikam, dimapa ikam kada malakukan tahadap asa matan buhannya nang bangat kacil naya, ikam kada malakukannya lawan Aku.' ⁴⁵ Wan, buhannya naya pacang baisur ka dalam panghukuman kekal, tapi urang-urang bujur ka dalam kahidupan kekal."