¹ Dari tatuha jemaah gasan Gayus, nang ulun kasihi dalam kabanaran. ² Dingsanak ulun nang ulun kasihi, ulun badoa mudahan pian baik-baik haja dalam sabarataan hal, mudahan awak wan jiwa pian sihat-sihat. ³ Ulun himung banar waktu dingsanak-dingsanak datang wan basaksi tentang kabanaran hidup pian, kaya apa wayah hini pian hidup dalam kabanaran. ⁴ Kadada kahimungan nang liwar ganalnya daripada mandangar anak-anak ulun hidup dalam kabanaran. ⁵ Dingsanak ulun nang terkasih, pian setia banar menggawi gawian gasan urang nang kada pian pinandui. ⁶ Buhannya sudah basaksi di hadapan jemaah. Pian menggawi nang baik bila manulung buhannya manarusakan parjalanan nang sasuai wan kahandak Allah. ⁷ Sabab, buhannya sudah tulak demi Ngaran itu, kada manarima napa-napa dari urang-urang nang kada parcaya. ⁸ Ulih nitu, kita patut manulung urang-urang nang kaya buhannya hingga kita jadi kawan pelayanan gasan kabanaran. ⁹ Ulun sudah manulis surat ka jemaah, tapi Diotrefes, nang paharatnya diantara buhannya, kada hakun manarima kami. ¹⁰ Karana ngitu, kalu ulun datang, ulun managur kesalahan inya, nang mamfitnah kami awan baucap nang kada baik! Kada itu haja, inya jua kada mau manarima babuhan dingsanak wan mangucilkan buhannya matan jemaah. ¹¹ Dingsanak nang ulun kasihi, jangan maumpati nang jahat, umpatilah nang baik haja. Urang nang babuat baik berasal dari Allah, tapi urang nang jahat, balum malihat Allah. ¹² Sabarataan urang nang basaksi nang baik tentang Demetrius, bahkan kabenaran menampaiakan kaya itu. Kami jua basaksi, wan pian jua tahu kasaksian kami nang bujur. ¹³ Banyak nang handak ulun tuliskan gasan pian, tapi ulun kada hakun manuliskan lawan pena wan tinta. ¹⁴ Ulun handak lakas batamuan wan bapanderan bahadapan lawan pian. ¹⁵ Damai wan Sejahtera gasan pian. Sampaiakan jua salam kami gasan sabarataan dingsanak di situ.