¹ Matan Paulus, rasul Yesus Kristus nang dipilih oleh kahandak Allah sasuai lawan janji kahidupan nang ada dalam Yesus Kristus. ² Gasan Timotius, anak nang tarkasih. Anugerah, belas kasih, wan damai sajahtra matan Allah, Bapa, wan Yesus Kristus, Tuhan kita. Nasihat gasan Tarus Mahabarakan Injil ³ Ulun sanantiasa basyukur lawan Allah, nang ulun layani awan hati nurani nang barasih kaya nang digawi oleh nini moyang ulun, waktu ulun mangingat ikam dalam doa-doa ulun siang wan malam. ⁴ Waktu ulun mangingat banyu mata ikam, ulun handak malihat ikam supaya langkap sukacita ulun. ⁵ Ulun diingatakan lawan iman ikam nang tulus, nang partama-tama hidup dalam nini ikam Lois, wan uma ikam Eunike, wan ulun yakni wayahini hidup dalam ikam jua. ⁶ Alasan inilah, ulun mangingat ikam supaya tarus mangobarakan karunia Allah nang ada pada diri ikam malalui panumpangan tangan ulun. ⁷ Sabab, Allah kada manjulung ka kita roh katakutan, malainkan roh kakuatan, kasih, wan panguasaan diri. ⁸ Jadi, kada boleh malu basaksi manganai Tuhan kita atawa manganai ulun, tahanan Sidin. Akan tatapi, oleh kuasa Allah umpati mandarita demi Injil. ⁹ Sidinlah nang sudah manyalamatakan kitawan mangiau kita lawan sambatan kudus, bukan karana parbuatan kita, malainkan karana tujuan wan anugarah Sidin saurang nang sudah dijulung lawan kita dalam Yesus Kristus sabalum dunia ada. ¹⁰ Wayahini, hal ini sudah manjadi nyata malalui kadatangan juru Salamat kita Yesus Kristus nang sudah mahapus kamatian wan mambawa kahidupan wan kakakalan malalui Injil. ¹¹ Oleh Injil inilah, ulun ditunjuk jadi pangkhotbah, rasul, wan guru. ¹² Nitulah sababnya, ulun mandarita kaya wayahini. Namun, ulun kada supan karana ulun tahu lawan siapa ulun parcaya wan ulun yakin bahwa Sidin kawa ja manjaga apa nang sudah Sidin parcayakan lawan ulun sampai hari nitu datang. ¹³ Pingkutilah pokok-pokok ajaran sihat nang sudah ikam dangar matan ulun dalam iman wan kasih nang ada dalam Yesus Kristus. ¹⁴ Lawan Roh Kudus nang badiam di dalam kita, jagalah babujur-bujur harta baharga nang sudah di parcayakan lawan ikam. ¹⁵ Ikam tahu kanyataannya bahwa sabarataan nang ada di Asia sudah bapaling dari ulun, di antara buhannya adalah Figelus wan Hermogenes. ¹⁶ Kiranya Tuhan mangaruniakan belas kasih ka saisi rumah Onesiforus karana inya rancak manyagarakan ulun wan kada supan karana pamanjaraan ulun. ¹⁷ Sabaliknya, waktu sampai di Roma, inya samangat banar mancari ulun wan batamuan lawan ulun. ¹⁸ Kiranya Tuhan manuntun supaya inya manamukan belas kasih dari Tuhan pada hari nitu, nangkaya ikam tahu barapa banyak palayanan nang sudah inya julung gasan ulun di Efesus.