¹ Wayah matan bahari, ada nabi-nabi palsu di antara umat Allah, nang kaya wayah ni gin ada jua guru-guru palsu di antara buhan kam nang awan sambunyi-sambunyi maajarakan ajaran-ajaran nang marusak, bahkan manyangkal Tuhan nang sudah manabus buhannya sahingga mandatangakan kahancuran nang sakatika atas diri buhannya surangan. ² Wan, akan ada banyak urang nang maumpati cara hidup buhannya nang kada bamoral, wan gara-gara buhannya tu, jalan nang lurus tu dihujat. ³ Awan sarakah buhannya maambil untung matan kam awan pandiran-pandiran nang mambunguli; hukuman gasan bagiannya sudah disiapakan tumatan bahari kala pasti kada ditunda-tunda atawa dilupa akan. ⁴ Sabab, amun Allah haja kada manahan diri pas buhan malaikat badusa, melainakan manimbai buhannya ka dalam naraka wan manyarahakan buhannya ka dalam rantai kagalapan gasan ditahan sampai wayah panghakiman, ⁵ wan amun Allah jua kada manyayangi dunia matan bahari kala kacuali Nuh, seorang pambawa habar kabanaran awan tujuh urang lainnya, tapi mandatangakan air bah ka atas dunia nang kada manganal Allah; ⁶ wan amun Allah mahukum kota Sodom wan Gomora awan cara mahancurakan kadua kota ngintu manjadi dabu, wan manjadiakan buhannya gasan cuntuh tentang apa nang kena terjadi ka urang-urang jahat nang hidup di masa nang akan datang; ⁷ wan amun Allah manyalamatakan Lot, urang benar ngintu, nang mandarita karena cara hidup nang najis matan urang-urang nang kada manganal hukum, ⁸ (samantara haja, Lot hidup di tangah-tangah buhannya satiap hari, wan jiwanya nang benar mandarita karena maitihi wan mandangar parbuatan-parbuatan jahat nang inya itihi wan dangar;) ⁹ maka Allah pasti tahu kaya apa malapasakan urang-urang benar matan pancubaan wan manahan urang-urang jahat gasan dihukum wayah hari panghakiman, ¹⁰ khususnya babuhannya nang mamuasakan tubuhnya awan kainginan buruknya, wan nang maremehakan pamarintah. Awan lancang banar wan sombong, guru-guru palsu ngintu kada takutan mahina makhluk-makhluk nang mulia, ¹¹ padahal buhan malaikat, nang jauh labih kuat wan perkasa pada buhannya, kada manyambati buhannya di hadapan Allah ¹² Guru-guru palsu ni nang kaya binatang kada baakal, nang dilahirakan gasan ditangkap wan dibunuh; buhannya mahujat nang kada buhannya ngerti, nang kena dibinasakan gawi buhannya surangan; ¹³ buhannya ditimpa kejahatan gasan upah parbuatan jahat buhannya. Babuhannya maanggap bamabuk-mabukan pas tangah hari sebagai kesenangan. buhannya tu noda wan cala, nang bersukaria dalam muslihat buhannya katika makan sama-sama buhan pian. ¹⁴ buhannya baisi mata nang penuh nafsu perzinaan wan kada kawa berhenti babuat dosa, buhannya manggoda urang-urang nang lamah jiwanya, wan hati buhannya sudah talatih dalam keserakahan. Buhannyu tu anak-anak nang terkutuk! ¹⁵ buhannya maninggalakan jalan nang lurus wan maikuti jalan nang sesat, yaitu jalan Bileam bin Beor, nang suka manarima upah gasan parbuatannya nang jahat. ¹⁶ Namun, inya mandapat taguran nang karas atas pelanggarannya matan saikung keledai bisu, tapi kawa bapandir awan suara manusia sehingga menghentiakan perbuatan gila nabi tu. ¹⁷ babuhannya ni nang kaya banyu mata nang karing wan nang kaya kabut disapu ulih badai. kegelapan nang paling pekat sudah disadiaakan gasan buhannya. ¹⁸ Awan perkataan nang sombong, tapi kosong, buhannya manjarat urang-urang nang sudah lapas matan babuhan nang hidup dalam kesesatan awan perbuatan-perbuatan daging wan pencabulan. ¹⁹ Guru-guru palsu ngintu manjanji akan kabinasaan, padahal buhannya tu gin adalah budak kabinasaan. Sabab, apa ja nang sudah mangalahakan sesorang, keinyalah urang tu diperbudak. ²⁰ Sabab, amun buhannya sudah dilapas akan matan pencemaran dunia nang jahat malalui pengenalan Tuhan wan Juru selamat kita, Yesus Kristus, tapi kamudian babulik lagi kapada dunia nang jahat ngintu wan dikuasai ulihnya, maka buhannya akan manjadi labih buruk pada nang sabalumnya. ²¹ Akan labih baik lagi amun buhannya kada pernah tahu jalan nang lurus tu, daripada imbah mengenalnya buhannya babulik matan hukum suci nang sudah dibarii gasan buhannya. ²² buhannya ni marupakan gambaran paribahasa: " Anjing baulik kapada muntahannya surangan" wan babi nang sudah dibarsih akan, babulik pulang ka kubangan lumpur