¹ Matan Paulus, Silwanus, wan Timotius gasan Jamaat di Tesalonika, nang ada dalam Allah Bapa wan dalam Tuhan Yesus Kristus. Anugerah wan damai sejahtera menyertai ikam. ² Kami salalu basyukur lawan Allah gasan ikam sabarataan, wan manyambat ikam dalam doa-doa kami, ³ salalu mangingat gawian iman, usaha kasih, wan katakunan pangharapan ikam di dalam Tuhan kita, Yesus Kristus, di hadapan Allah wan Bapa kita. ⁴ Dingsanak-dingsanak nang dikasihi Allah, tahulah bahwa Sidin sudah memilih ikam. ⁵ Sabab, Injil* kami kada datang ka ikam dalam kata-kata haja, tapi jua dalam kuasa, dalam Roh kudus*, wan lawan kayakinan penuh; nang kaya ikam tahu urang-urang kaya apa kami ini di antara ikam, demi kapantingan ikam. ⁶ Ikam sudah manjadi urang-urang nang manaladani kami wan Tuhan karana ikam manarima firman dalam banyak pandaritaan lawan sukacita dari Roh Kudus, ⁷ supaya ikam manjadi taladan gasan sabarataan urang parcaya di Makedonia wan Akhaya. ⁸ Sabab, matan ikam firman Tuhan bagema kada hanya di Makedonia wan Akhaya, tapi jua di satiap tempat, iman ikam ka Allah sudah tasabar sahingga kami kada parlu bapandir apa-apa lagi. ⁹ Sabab, buhannya saurang bakisah tentang kami, kaya apa ikam manyambu kami, wan kaya apa ikam babulik ka Allah matan barhala-berhala* gasan malayani Allah nang hidup wan bujur, ¹⁰ wan gasan mananti kadatangan Anak Sidin matan surga, nang sudah Sidin bangkitakan matan urang mati, yaitu Yesus, nang manyalamatakan kita matan murka nang pacang datang.