¹ Ja̧u̧nu̧ o'ca'a, bo̧yu̧cu̧ topinösä̧, ja̧'hua̧nö̧ tochomenä ya̧tȩ ttö̧ja̧sa̧rö̧ pa̧ja̧cuä̧ i̧sa̧bä̧ u̧ju̧nä̧ra̧'a̧ topinö̧sä̧. ² Ttömä pä'inö̧sä̧: ¿Ucumä tó cui̧'chä̧ttö̧? Ja̧'hua̧nö̧ pädäcu ja̧u̧mä̧ päinä̧cu̧sä̧: Jerusalén pa̧ja̧tö̧ öcähue'inä öoto'inä chu̧huo̧jua̧ pä'ö. ³ Ja̧u̧ cä'ädi'ö ángel ttöcu ucuocuäjimä i̧hui̧'i̧nö̧, i̧hui̧a̧'a̧nä̧ ka̧ra̧ ángel rä'o'inö ja̧u̧cu̧ ö'ätecuächa pä'ö. ⁴ Ángelttö̧ ta̧ju̧ päi'önä hua̧mä̧ pä'inö ja̧u̧rö̧: Jopächi ja̧u̧ mö̧ä̧ya̧cu̧ cucuocua; päcuaröjä: Jerusalénmä ttö̧ja̧ ttirecua'attö̧ ja̧'hua̧ta̧'a̧nö̧ de'a isotö'inä ju̧huȩnȩ ttö̧ja̧cua̧'a̧ttö̧ ttoecuoca'a huäosenö̧tä̧ jä̧cuo̧mȩ. ⁵ Ja̧'hua̧nö̧ ja̧'a̧ Ttömä (TÖ̧Ä̧NÄ̧HUA̧MÄ̧ pa̧'a̧nö̧ pä'ö) jäyänä ttoecuäbämä ocurä jä̧'i̧nö̧'a̧nö̧ chä̧cua̧sä̧, ja̧'hua̧ta̧'a̧nö̧ Ttömä chä̧cua̧sä̧ juhuȩnȩ ucuo u̧ru̧hua̧ jö̧nä̧. ⁶ ¡Tähuä ti̧'chä̧tu̧cua̧! cu'ohuetucu ja̧'a̧cu̧ dö'ecuächätucui. Pa̧'a̧nö̧ huäjunä ji'äutó TÖ̧Ä̧NÄ̧HUA̧MÄ̧. Ja̧'hua̧nö̧ ja̧'a̧ttö̧ pi̧jä̧ jä̧ttä̧jä̧tä̧ Ttömä pperetö chicuinä̧u̧! Pa̧'a̧nö̧ huäjunä ji'äutó TÖ̧Ä̧NÄ̧HUA̧MÄ̧ ⁷ ¡Tätucui! Siónttömä dö'ecuächätucui, ucutu Babilonia ötahuiyänä ka̧cuä̧tö̧mä̧!" ⁸ Ja̧'hua̧nö̧ ja̧'a̧ ja̧u̧nu̧ o'ca'a TÖ̧Ä̧NÄ̧HUA̧ o'cajuiyönä ju̧ru̧hua̧mä̧, ucuotönä hueinä̧cu̧sä̧ ttö̧ja̧ ucu cuiäre jȩpö̧ icuinä̧tö̧rö̧, ja̧'hua̧nö̧ ja̧'a̧ttö̧ ucuru surojuo'epörömä, ¡Dios i'äre jacuä rö̧ä̧nä̧ ra̧huä̧pi̧jo̧mȩ mȩ'ö̧ ja̧'a̧! TÖ̧Ä̧NÄ̧HUA̧ pi̧yȩ jȩpä̧ji̧'ca̧, Ja̧u̧mä̧ pä'inö: ⁹ Ttötätä jahuätörö si'epö icu chumö cä̧dȩpä̧cua̧sä̧, ja̧'hua̧nö̧ jo̧mȩnä̧ a̧mä̧cö̧ ttaditönä huehuettinä̧u̧tä̧ ttiäremä 'cho̧tti̧pä̧cuä̧u̧". Ja̧'hua̧nö̧ ttö̧huo̧juä̧cuo̧tö̧ ttörömä TÖ̧Ä̧NÄ̧HUA̧ o'cajuiyönä ju̧ru̧hua̧tä̧ hueinäcu̧ pä'ö. ¹⁰ ''¡Rä̧tä̧tu̧cua̧ esehunö̧ Sión ittijuru, tä'ku tu'köhuächa'ato ttö chichähuomȩmä̧ ucutucu chu̧ja̧ pä'ö cu̧'cä̧tȩtu̧cu̧nä̧! TÖ̧Ä̧NÄ̧HUA̧MÄ̧ pä̧'a̧nö̧ cuäkä'conö̧ jiähu." ¹¹ Ja̧u̧ o'ca'a Recuätö ttö̧ja̧ ttö̧'cä̧'ca̧cua̧tö̧ ja̧u̧ mo̧ro̧mä̧ TÖ̧Ä̧NÄ̧HUA̧RÖ̧MÄ̧. ja̧hua̧nö̧ pä'ö: " ja̧'hua̧nö̧ ja̧'a̧mä̧ juättömä̧ juotächähuotu ttö chäcuaruhuä jo̧nä̧tä̧; ja̧'hua̧nö̧ ja̧'a̧ttö̧ ttötä jä̧hua̧'a̧ ucututä cu̧'cä̧tȩtu̧cu̧nä̧ chu̧jä̧cua̧mä̧" juä̧'a̧nö̧ jo̧mȩnä̧ ucutumä̧ cu̧huo̧juä̧huo̧tö̧jä̧ TÖ̧Ä̧NÄ̧HUA̧ O'cajuyunä̧ ju̧ru̧cuä̧mä̧ hueäji ucuturu pä'ömä̧. ¹² Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ hueähuä huȩnȩ pä'ö jȩpo̧ ku̧nä̧huä̧tö̧ Judarömä̧ iyähuäcuä'a jua̧jä̧ rȩjȩ suröju juiyäjämä̧ i̧rȩjä̧ pä'iönä̧, ja̧'hua̧ta̧nö̧ juȩnȩ yabonä̧nö̧ pä̧'a̧nö̧ ȩmä̧cuä̧ chutä Jerusaléntö̧mä̧. ¹³ korunä̧ cä̧huä̧to̧cui̧, O'catoi'önä jinä̧yotute juotumö̧ TÖ̧Ä̧NÄ̧HUA̧ äka jo̧mȩtö̧mä̧, ja̧hua̧nö̧ ja̧'a̧ ja̧u̧mä̧ porächu yȩnȩtȩ suroju juiyomȩtö̧.