¹ ¡Ucutuhue ötahuiyä ttö̧ja̧rö̧ cuä'äu icuätömä! Yapareäcuähuätä jo̧mȩnö̧ huotöjä ja̧'hua̧ta̧'a̧nö̧ tti̧rȩjä̧tä̧ nä̧u̧cuinätö̧jä̧, ja̧huä̧jä̧nä̧mä̧ ttö̧ja̧rö̧ cuä'ähuä̧tö̧tä̧ ttu̧jä̧jä̧ ja̧'a̧. ² Ja̧'hua̧nö̧ ja̧'a̧nä̧ jitä cuäcuätta'atä ja̧'hua̧ta̧'a̧nö̧ ö̧jä̧pö̧ o'ca kärächa'atä rä̧mi̧pa̧'a̧ juhua'atäcu carucätta cahuayu doätta ttöa'atä. ³ Cahuayutö̧nä̧ huä̧nö̧ curä rohuähuätö ja̧'a̧, curä'chu kä̧dȩpä'chunä, dacuodä saruhuodänä, hua'ö icuäjätörö u'chu jö̧nä̧ ca̧ca̧tö̧ rutähua'a, rö̧ä̧nä̧ pa̧ja̧cuä̧ juiyönä, rohuähuätömä jahuätucu äcuä'chächätö. ⁴ Pi̧yȩmä̧ 'cuäopa'a nä̧tö̧ muäyotö a̧'cua̧cuä̧tö̧ mä̧nä̧ ruhuä jȩttä̧'cho̧mȩnä̧, märipä huo̧juä̧tö̧mä̧, korojä̧ ttö̧ja̧rö̧ ttidepä iyä'chäcuähuätö ja̧'hua̧ta̧'a̧nö̧ ttö̧ja̧mä̧ ttumäri'änä jȩpä̧'chä̧tö̧. ⁵ Topätucui, Ttömä ku'cocösä ucu jȩ'cu̧mä̧ pa̧'a̧nö̧ pä'ö su̧ro̧da̧u̧ TTÖ̧Ä̧NÄ̧HUA̧MÄ̧, cuireba i̧sä̧ta̧ cä̧dȩpä̧cua̧sä̧ cuä'ca jo̧mȩttö̧, ttö̧ja̧ cu̧dä̧pä̧rȩ tottönä chi̧jȩpä̧cua̧jä̧, dä'ä ttucumä ruhuotörö'inä i̧jȩcuä̧chä̧cua̧'a̧. ⁶ Idicu surojömä ucurutä chi̧cuä̧cua̧jä̧ ja̧'hua̧ta̧'a̧nö̧ ttu̧su̧ro̧tä̧cu̧ jö̧nä̧tä̧ jȩchä̧cua̧jä̧; pärotö chicuäcua̧jä̧ o'toi'önä tottäcu cunä̧tä̧. ⁷ "Cuäopäcua'a o'catoi'önä ucuru topätömä dö'ecuächö kä̧nö̧ pättäcuotö: Nínive ötahuiyämä kä'ö tticuäcuotöjä̧; ¿Ditä jä̧cua̧'a̧ttö̧ ja̧u̧ ötahuiyä amöcuädö ajahuäcua̧mä̧? ¿Torö chu̧'o̧cui̧'ä̧cua̧'a̧jä̧ttö̧ ucu cuajahuome ppä̧dä̧cua̧rö̧mä̧. ⁸ Ninive, ¿Ucumä Tebas ötahuiyä Nilo aje 'cä̧tȩ jo̧mȩ huȩju̧ jäyänämä ajetä rö̧nä̧ro̧mȩ, aje rö̧o̧totä cähueächi'ome, ja̧u̧ ötahuiyämä aje dä'ähuototä tto̧ȩpä̧rö̧ttö̧'i̧nä̧ abonänö hua̧jä̧? ⁹ Ja̧u̧ru̧ ujuru jö̧nä̧ 'chu̧huä̧ri̧nö̧mä̧ Etiopía'inä, Egipto'inä ji̧na̧'a̧ ja̧'hua̧ta̧'a̧nö̧ beipächome'inä juiyina̧'a̧; ja̧u̧cu̧ esecuinä̧tö̧mä̧ Fut ötahuiyä ttö̧ja̧'inä, Libia ötahuiyä ttö̧ja̧'inä ji̧na̧'a̧. ¹⁰ Ja̧'hua̧nö̧ ja̧'a̧nä̧ Tebas ttö̧ja̧mä̧ ttȩpi̧nä̧u̧; cärenä ttö̧ti̧nä̧u̧, ppo̧'ä̧tö̧rö̧mä̧ ppo̧u̧cu̧ cui'ö icuinä̧tö̧ ma̧ni̧yä̧ra̧'a̧cu̧ doächi'äcuähuomettö̧, ttaboiyotömä ucuo ku̧nä̧rä̧tö̧ tti̧mi̧nä̧ korojuei icu topinä̧tö̧ ja̧'hua̧ta̧'a̧nö̧ o'catoi'önä ucuo ttö̧ja̧ pinä̧tö̧mä̧ a̧mä̧cö̧ jähuä ttaditönätö hue'ö ttu̧ju̧ni̧nä̧u̧. ¹¹ Ucu'inä tä̧cuä̧mä̧chä̧cua̧jä̧, cudajuächa pä'ö jȩ'cuä̧cua̧jä̧ ja̧'hua̧ta̧'a̧nö̧ ucumä cuaboiyotöttö yo̧mȩtȩ cudahuächa pä'ö cu̧sä̧cua̧jä̧. ¹² O'cajuiyönä ucu cujurumä higos dauhuiyä jä̧'i̧nö̧'a̧nö̧ jä̧cua̧'a̧, u̧huä̧ju̧ jo̧mȩnö̧ jö̧, yȩ'ȩpö̧ tticuomenä ucua pä'ö hua̧ ä jacuä ma'a̧ jä̧'i̧nö̧'a̧nö̧. ¹³ Topittö, ttö̧ja̧ ucutu cu̧'cä̧tȩtu̧cu̧nä̧ ka̧cuä̧tö̧mä̧ nä̧tö̧ jö̧nä̧tä̧ huotö; cui̧rȩjä̧ äpate karate'inä. karate'inä bachächipaja'a cuaboiyotö ttä'ca jo̧mȩttö̧mä̧, käcuorä odiyämä ocurätä kuhuö icuäja'a. ¹⁴ Ttoecuäcuome ajiya huä'ö ku̧nä̧ji̧, cuabo jähuä tto'ecu ku̧ju̧ni̧nö̧mä̧ yabonö̧tä̧ adiu jȩpö̧ ku̧ni̧, redä'canä do'ächi'ö, jahuä'ca 'cuȩ'cui̧; reda'ca räecuo̧ca̧ ȩmi̧. ¹⁵ Ucumä juhuorötä ocurä ku i̧cuä̧cua̧jä̧, ja̧'hua̧ta̧'a̧nö̧ curä'chutä si'epö i̧cuä̧cua̧jä̧. Märäcäyu̧ mö̧ä̧yotö ttucuia'a ja̧'i̧nö̧a̧nö̧ o'cajuiyötä ttucui'äcuotö. Ucutumä yabonö yo'ähuächätucui mä̧rä̧cä̧yu̧ möäyotö jä̧'i̧nö̧'a̧nö̧, täcö jo̧mȩnö̧ huotö jö̧'a̧nö̧. ¹⁶ Cuiäretucu iyähuäme yabonö rö̧ä̧chi̧na̧'a̧ si̧ri̧'cö̧ mo̧ro̧jä̧ rö̧jä̧tö̧ jö̧'a̧nö̧, ja̧'hua̧nö̧ ja̧'a̧nä̧ mä̧rä̧cä̧yu̧ möäyotömä̧ rȩjȩmä̧ jȩpö̧ icuätö ja̧'hua̧nö̧ jȩpi̧'i̧pötä co'ächätö. ¹⁷ Ucu cumöhuäyotöttö ruhuotömä, maräcä̧yu̧ jo̧mȩnö̧ huo̧tö̧ ju̧'a̧nö̧, Su̧ro̧da̧u̧ tturuhuotömä mä̧rä̧cä̧yu̧ isäyunä isäyu jö̧'a̧nö̧ ka̧cuä̧tö̧ ötahuiyä ttoecuäbinä diya̧tȩ jö̧ mo̧ro̧mä̧. Ja̧'hua̧nö̧ ja̧'a̧nä̧ mo̧ro̧ kä̧hua̧ räo'omenä dö'ecuächö co'ächätö ya̧tȩí̧nä̧ ieruhuomecu. ¹⁸ Asiria ru̧hua̧, cuä̧ji̧mö̧rö̧ tta̧'ä̧rä̧tö̧mä̧ ä'ecuätö; ucutöttö ruhuotömä 'cuä'ächi'ö pȩjä̧mä̧tö̧. Cumöhuäyötömä möä'quiyura̧'a̧cu̧ pperecuächätö ja̧'hua̧nö̧ ja̧'a̧ toa'a ya̧tȩ ö̧ca̧ca̧tö̧'a̧nö̧ hua̧. ¹⁹ Cutta huahuächa pä'ömä juiyäcua'a. Cuttamä rö̧ä̧nä̧nö̧ ra̧huä̧pi̧jä̧tta. O'catoi'önä ucu cutu'cö huȩnȩ ttä̧ju̧cuo̧mȩnä̧ eseu 'pȩttä̧cuo̧tö̧. ¿Di̧jä̧ttö 'cuäopönä surojöttö dajacuächinö.