¹ Ya̧tȩ ttö̧ja̧sa̧ ki̧nö̧ Uz rȩjȩnä̧ ja̧u̧ i̧mi̧mä̧ Job pä'ö micuinö̧, Ja̧u̧ Jobmä̧ surojö'i̧nä̧ jȩpo̧cö̧ ja̧'a̧ jueö huȩnȩtä̧ jȩpö̧mä̧, Diosrömä̧ ucuotinö̧ ja̧'hua̧nö̧ ucuotö surojuttömä 'cä̧'i̧pä̧chi̧nö̧. ² Ja̧u̧ i̧tti̧mö̧ uhuäpächinä̧tö̧ u̧mä̧tö̧mä̧ sietenö ji̧na̧'a̧ ja̧'hua̧ta̧'a̧nö̧ nä̧tö̧mä̧ huämetucuätä, ³ Ja̧u̧ ä̧ji̧mö̧rö̧mä̧ ku̧nä̧ri̧nö̧ ovejastö̧mä̧ siete milnö jo̧mȩnä̧, camellostö̧rö̧mä̧ tres milnö̧ jo̧mȩnä̧, pä̧cä̧yu̧ ta̧ju̧pö̧nä̧ huotömä quinientosnö̧ jo̧mȩnä̧, bö̧rö̧ba̧tö̧rö̧mä̧ quinientosnö̧ jo̧mȩnä̧ ja̧'hua̧ta̧'a̧nö̧ u̧mö̧huäyotörömä̧ recuätörö. Ja̧u̧ ttö̧ja̧sa̧mä̧ ju̧huȩnȩ kä̧hua̧ räopa'acu ka̧cuä̧tö̧ttö̧'i̧nä̧ abonänö̧ rö̧ä̧nä̧ ru̧hua̧ pinö. ⁴ I̧tti̧mö̧ ya̧cu̧pö̧nä̧ ttiya pä'ö pätetö ku̧nä̧huä̧ mo̧ro̧ päi'omenä̧, ja̧u̧mä̧ ttojusode pönä pä'cäri jȩtta̧ pä'ö. Jahuätömä hue'inä̧tö̧ ttö̧jä̧hua̧tö̧ huämetucuä nä̧tö̧rö̧ ottäjiyatö pä'ö hue'inä̧tö̧, cuä̧nö̧'i̧nä̧ au'i̧nä̧ 'cuättopa pä'ö jahuätucu. ⁵ Pä'cäri beipächö̧ mo̧ro̧ päi'omȩnä̧, Jobmä̧ jahuätörö huottäjiyarö pä'ö hue'inö̧ ja̧'hua̧nö̧ jȩpö̧ surojö juittönä̧tä̧ jȩpö̧ i̧cui̧nä̧u̧. Ja̧u̧mä̧ mo̧ro̧ juoöta'anö porächi'änö ja̧'hua̧nö̧ porächö mipponä̧ iyähuä iyi'änö i̧tti̧mö̧ yotucupönä jähuänä̧ ja̧u̧mä̧ pa̧'a̧nö̧ pä'ättö: " Chi̧tti̧mö̧mä̧ surojö jȩpä̧tö̧ 'cua̧ra̧'a̧, ja̧'hua̧ta̧'a̧nö̧ Diosrö ttamöcuädönä suronä pä'ätö 'cua̧ra̧'a̧ pä'ö." Jobmä pi̧yȩmä̧ 'cuäopönä̧tä̧ jȩpi̧nö̧. ⁶ Ja̧'hua̧nö̧ ja̧'a̧ ya'ute mo̧ro̧ ichinä̧tö̧ Dios i̧tti̧mö̧ huotömä̧ TÖ̧Ä̧NÄ̧HUÄ̧ ä'ca jo̧mȩ i̧jȩcu̧ ko̧ro̧nö̧ jä̧'i̧ta̧'a̧nö̧. Ja̧'hua̧ta̧nö̧ Ähuettä'i̧nä̧ jahuätucu ichinö̧. ⁷ TÖ̧Ä̧NÄ̧HUA̧MÄ̧ ähuettärö pä'inö̧: "¿Tottö cuichättö̧?" Ja̧'hua̧nö̧ päcu TÖ̧Ä̧NÄ̧HUA̧RÖ̧ ähuetämä̧ ädätö pä'inö̧: "Pi̧jä̧ rȩjȩ jä̧ttä̧yä̧jä̧ cueächäru̧ kä̧'i̧jö̧'ca̧, ja̧'hua̧ta̧'a̧nö̧ pä̧cuä̧däjä̧'i̧nä̧ cueächö kä'ijö̧ca̧. ⁸ "TÖ̧Ä̧NÄ̧HUA̧MÄ̧ ähuetärö pä'inö̧: ¿Chu̧mu̧huä̧yä̧ Job ötö'cömä̧ tocu cuämu̧huädättö̧? I̧Isopäi'önä pi̧jä̧ rȩjȩnä̧mä̧ ja̧u̧ ja̧'a̧nö̧ hua̧'a̧mä̧ toa, ja̧u̧ ya̧tȩ ja̧'a̧nö̧ suröju'i̧nä̧ jȩpo̧cö̧ pä'ijumä̧ jueönä̧tä̧ jȩpo̧ kö̧mä̧ ya̧tȩ Diosrö ucuotö ja̧'hua̧ta̧nö̧ surojuttö'inä̧ 'cä̧'i̧pä̧chu̧mä̧." ⁹ Ja̧'hua̧nö̧ ja̧'a̧ ähuetämä̧ TÖ̧Ä̧NÄ̧HUA̧RÖ̧ ädätö pä'inö̧: ''¿Jobmä̧ ji̧yȩtȩ ppädäcuähuä juiyönä ucuota'anö̧ ja̧'a̧ Diosrömä̧? ¹⁰ ¿Ji̧yȩtȩ ja̧u̧ ippeyänä tto'epö ku̧no̧cö̧ pinö, ojusode jäyänä̧'i̧nä̧, ja̧'hua̧ta̧nö̧ chutä ö'äre ka̧cuo̧mȩ o'cajuiyönä̧ ttoecuächunä̧mä̧? Ucumä̧ ppäcuädä'ijäcu aditähuänämä̧, Ja̧'hua̧ta̧nö̧ ä̧ji̧mu̧ ppä̧cä̧yu̧rö̧'i̧nä̧ yabonö̧ yottäunä̧ jȩpä̧'i̧jö̧jä̧ ja̧huä̧jä̧ rȩjȩnä̧mä̧. ¹¹ ja̧'hua̧nö̧ ja̧'a̧nä̧ jitämä̧ jo'tojucu cumö̧ cä'epu o'cajuiyunä̧tä̧ u̧ju̧nä̧rö̧mä̧ mȩ'i̧, isopäi'önä̧ surönä̧ pä'ö juiyäcu pä'ö ucu cui'ä'ca jo̧mȩttö̧ ¹² TÖ̧Ä̧NÄ̧HUA̧MÄ̧ ähuetärömä pä'inö̧: "U̧ju̧nä̧rö̧mä̧ o'cajuiyönä̧ topirö, ucu cumönä̧tä̧ kä̧'a̧. ja̧'hua̧nö̧ ja̧'a̧nä̧ a̧'cua̧rö̧mä̧ mȩcuä̧rö̧." ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ ö̧jo̧mȩttö̧mä̧ ti'ipächinö̧ ähuettämä̧. ¹³ Ya'ute mo̧ro̧ 'cuäopinä'a̧ Job i̧tti̧mu̧ nä̧ttö̧'i̧nä̧ u̧mä̧ttö̧'i̧nä̧ cuinätö̧ ja'huatanö vino'inä au pȩji̧nä̧tö̧ ttubuo ä'canä i̧sa̧ ojusodettö. ¹⁴ Ya̧tȩ huȩnȩ jiäcuäcuä i̧sa̧ ichö pä'inö Job-rö: ''Cuä̧ji̧mö̧ pä̧cä̧yö̧mä 'cuȩ'cu̧ ko̧cuä̧tö̧ ja̧'hua̧ta̧'a̧nö̧ burrotö̧'i̧nä̧ juȩnȩtä̧ ppeyänä 'cuä̧nö kä̧cuä̧tö̧. ¹⁵ Ja̧'hua̧nö̧ ja̧'a̧nä̧ Sabeo ttö̧ja̧ ichi'ö ttȩmi̧pä̧jä̧u̧ jahuätömä cumuhuäyotörö cuä'äu icuäjätö curä'chunä. Ttö katätä tö'ipächäjisä ucuru jidähua pä'ö. ¹⁶ Ja̧'hua̧nö̧ ja̧'a̧ ja̧u̧ ji̧nä ucuocua'anä, ka̧ra̧'i̧nä̧ ichi'ö pä'inö: Mo̧ro̧jä̧ra̧'a̧ttö̧ Dios ocurämä mo̧a̧'a̧ ja̧'hua̧nö̧ ja̧'a̧ttö̧ o̧huȩja̧ttö̧mä̧ cuo'ö icuäjätö ja̧'hua̧ta̧'a̧nö̧ cumuhuäyotö'inä. Ttö katätä tö'ipächäjisä ucuru jidähua pä'ö. ¹⁷ ''Ja̧'hua̧nö̧ ja̧u̧ ji̧nä ucuocua'anä ka̧ra̧'inä ichi'ö pä'inö: Caldeo ttö̧ja̧ huäbosacuänä jo̧me ichi'ö rohuäu'icu ȩmi̧pä̧jä̧tö̧ cameyu̧tu̧ru̧mä̧, ja̧'hua̧ta̧nö̧ cumuhuäyotörö'inä cuäcuäpö icuäjätö curä'chu so̧ä̧'chunä. Ttö katätä tö'ipächäjisä ucuru jidähua pä'ö.'' ¹⁸ Ja̧u̧ ji̧nä̧ jiahua'anä, ka̧ra̧'inä ichi'ö pä'inö: "Cui̧tti̧mö̧ u̧mä̧tö̧ ja̧'hua̧ta̧'a̧nö̧ cui̧tti̧mö̧ nä̧tä̧'i̧nä̧ cuä̧nö̧ pȩjä̧tö̧ vino isoja au pä̧nö̧ ttubuo ojusodenä. ¹⁹ Kä̧ro̧'co̧ppa isode 'chu̧huä̧ro̧mȩ'i̧nä̧ pparächi'önä pä̧'i̧cu̧nä̧ döäja'a de'a jui̧yä̧jä̧ra̧'a̧cu̧ttu̧ ichö. Ja̧'hua̧nö̧ dö'ö isode jö̧rä̧chi̧'a̧ ja̧'a̧ muöyotörö, ja'huätömä 'coru pä'i'äjätö. Ttö ka̧tä̧hua̧tä̧ tö'ipächäjisä ucuru jidähua pä'ö." ²⁰ Ja̧'hua̧nö̧ ä̧ju̧cu̧ Job ä̧rä̧mi̧'ö̧, ö̧'ca̧tä̧huä̧ta̧ serocu icuinö, uhuo'che'inä 'cui'äu icu, ö'ä rȩjȩcu̧ ma̧'ä̧mö̧, u̧ru̧hua̧ Diosrö ucuo te'ähuinö. ²¹ Pä'inö: "Chuhuäpächomemä juiyönätä̧ ichinösä̧, ja̧'hua̧ta̧'a̧nö̧ juiyönätä̧ ppa̧dä̧chä̧cua̧sä̧ jua'amä. TÖ̧Ä̧NÄ̧HUA̧TÄ̧ ja̧'a̧ iyinömä, ja̧u̧ TÖ̧Ä̧NÄ̧HUA̧TÄ̧ ja̧'a̧ 'cho'ipäjimä. TÖ̧Ä̧NÄ̧HUA̧TÄ̧ imitä̧ ja̧'a̧ ppädäcuähuämä." ²² Pi̧yȩ pa̧'a̧nö 'cuäopömä, Job-mä surönä'inä jȩpo̧cö̧ pinö, Diosrö'inä ucutä ja̧'a̧ ttörö suronä jȩpö̧mä̧ pä'ocö pinö.