¹ "Jacoo jarodätö ppö̧'ä̧tö̧hue" pi̧yȩ ji̧na̧'a̧ TTÖ̧Ä̧NÄ̧HUA̧ pä'ö u̧ju̧ni̧nö̧mä̧. "Juätömä jȩtta̧ pä'ö amöcuädätö, ja̧'hua̧nö̧ ja̧'a̧nä̧ Ttö huedocötä, jahuätö ttö̧ja̧mä̧ ko̧ro̧jä̧ ttö̧ja̧cu̧ ppättädäcuähua pä'ö a̧mö̧cuädätö, ja̧'hua̧nö̧ ja̧'a̧nä̧ Ttö cha̧'cua̧ru̧hua̧ juȩpä̧ro̧co̧u̧, ja̧'hua̧nö̧ jo̧mȩnä̧mä̧ surojö hua'are rö̧'ä̧dä̧tö̧ yabocutä. ² Juätömä Egiptora̧'a̧ 'chä̧nö̧ tti̧mȩjä̧hua̧ pä'ö amöcuädinätö, ja̧'hua̧nö̧ ttamöcuäda'anä Ttö juedepatö pä'ömä jä'epocotö pinä̧tö̧. Juätömä Faraón ppädatö pä'ötä a̧mö̧cuä̧rä̧tö̧ ja̧'hua̧ta̧'a̧nö̧ ttö̧ji̧pa̧ pä'ötä Egipto ru̧hua̧ ujurunä hueometä̧. ³ Ja̧'hua̧nö̧ jȩtti̧na̧'a̧ttö̧mä̧, Faraón ppädatö pä'ö ttesehuina'amä ttödäpareta̧ jä̧cua̧'a̧ dä'ä ttötta pä'ötä, ja̧'hua̧ta̧'a̧nö̧ dajahuächö ttö̧ja̧ pä'ömä̧ Egipto ru̧hua̧ hueome jacuämä tta̧'cua̧ adihuocö jueitä jä̧cua̧'a̧, ⁴ tti̧tti̧mö̧ ä̧cuo̧mȩnä̧ ruhuämä surojö, a̧mä̧cö̧ adicuä ttö̧ja̧tä̧ jä̧cua̧'a̧ Zoánnä ka̧cuä̧tö̧mä̧ ja̧'hua̧ta̧'a̧nö̧ huettö jiäcuähuä ttö̧ja̧ ichinä̧tö̧ ji̧na̧'a̧ Haneesra̧'a̧ttö̧. ⁵ Juätö o'catoi'önä dä'ä ttu'ecuotö ttäcuotö ppättädoco̧u̧ kä̧nö̧ korotö ttö̧ja̧ttö̧mä̧ ötähuätö ttö̧ja̧ttö̧ korotö ttö̧ji̧pö̧nä̧ ppä'ädocotö ji̧na̧'a̧ juätömä dä'ätä ttu'ähuotö ji̧na̧'a̧ suro isotä huinätö̧nä̧do." ⁶ Neguevttö de'a ruhuä ä'canä 'cuä̧o̧pä̧cuȩ juä̧jä̧ rȩjȩnä̧ huȩnȩ'i̧nä̧ ja̧'hua̧ta̧'a̧nö̧ pä̧i̧'i̧nä̧, möäyaju'i̧nä̧, i̧sa̧'i̧nä̧, o'catoi'önä ärä ä̧ca̧tö̧'i̧nä̧, jahuätömä ttöäre rö̧ä̧nä̧ micuäu ttȩpi̧ya̧tö̧ pä'ömä ttujuru iyätömä murotö̧ ji̧na̧'a̧, ja̧'hua̧ta̧'a̧nö̧ ttöäre rö̧ä̧nä̧ micuäumä̧ camello abo oyu 'cä̧tȩ rötö huȩnö̧ bo'epö ȩpa̧tö̧, ja̧'hua̧nö̧ huotörömä ttö̧ja̧mä̧ yorö'iso re topö ppä'ädäcuähuocotö pinä̧tö̧. ⁷ Tocu pä'ö ji̧na̧'a̧ttö̧ jua'amä Egipto ötahuiyä ttö̧ja̧ ppättädömä yorö'iso micuähuocö ji̧na̧'a̧; ja̧'hua̧nö̧ ji̧yä̧cu̧, Ttö huopinö̧sä̧, Raabrö juajutä ja̧'a̧ jitä pä̧ju̧mä̧. ⁸ Jitä topö, huȩyu̧ti̧ kä'ca jo̧mȩttö̧ kö̧jo̧mȩttö̧ yodäte dau isodänä, a̧'a̧ huȩyu̧ti̧jó cuyärubanä , recuo kö̧nä̧ hua'adö ku̧nä̧huä̧cua̧'a̧nö̧ ji̧yȩnö̧ mo̧ro̧ päomenä isopäi'önä pä'ö tti̧huȩyu̧ti̧nö̧ ji̧nö̧ pä'ö ba'epö tottomenä isopäi'önä ji̧na̧'a̧ ja̧'a̧dä̧ pähuäcua'anö. ⁹ A̧'a̧ pitö ttö̧ja̧mä̧ jarodäcuähuä ttö̧ja̧ ji̧na̧'a̧, ppo̧'ä̧tö̧ yaparehuätö, ppo̧'ä̧tö̧ jarodäcuähuä ttö̧ja̧ ttä̧ju̧cua̧ pä'ocotö TTÖ̧Ä̧NÄ̧HUA̧ huo̧juȩcuä̧'i̧nä̧. ¹⁰ Jahuätömä to̧ä̧rä̧cuä̧huä̧ ttö̧ja̧rö̧mä̧: "Yorö'iso to'cuätucuó" ja̧'hua̧ta̧'a̧nö̧ Dios i̧huȩnȩ ji'ähuätörömä; isopäi'önä Dios i̧huȩnȩmä̧ jicuähuätucuätö ujuturumä; ucuocuätucuitöjó yapare huȩnȩtä̧ rö̧'ä̧di̧pö̧nä̧nö̧ ji'ähuitö ujuturumä, ä'canä̧mä̧ ja̧'hua̧nö̧ 'cuäopäcuotöjä pähuätä. ¹¹ 'Quȩ'i̧pä̧chä̧tu̧cui̧ mä̧nä̧ttö̧mä̧, mä̧nä̧ ji̧'qui̧jä̧mä̧ttö̧mä̧ rä'epächö 'quȩ'i̧pä̧chä̧tu̧cui̧; Israel ttö̧ja̧ surojuttö 'quȩ'ȩpö̧ ku̧nä̧huo̧tö̧ttö̧mä̧ tta̧'cua̧ huȩnȩrä̧cuä̧huä̧ i̧sa̧rö̧mä̧ jicuähuätucuo 'coruchi'ätucui ujutu tä'cattömä." ¹² Ja̧'hua̧nö̧ ji̧yä̧cu̧ Israel ttö̧ja̧ttö̧ 'quȩ'ȩpö̧ ku̧nä̧hua̧mä̧ pä'ö: Dä̧bö̧ pi̧yȩ huȩnȩ ya̧cuo̧cuä̧rä̧tu̧cua̧'a̧ttö̧ ja̧'hua̧ta̧'a̧nö̧ surojötä pä̧i̧tä̧ iso ja̧'a̧ päcuätucua'attö ja̧u̧ juäitä, ¹³ pi̧yȩ surojö hua'aremä ucuturutä pätecuächa'a korojuei 'cuäö juäittö a̧di̧cuo̧'ta̧ ja̧'hua̧nö̧ jo̧'ta̧ ma̧o̧mȩnä̧ ppere'cua päi'önä maojuei jä̧'i̧nö̧'a̧nö̧ jo̧'ta̧, isode räbänä ttusäyuta pä'ö tticuäu o'ca'a jahuächomenä ri'ädi'ö maächa̧'a̧ jäi'nö̧'a̧nö̧ jö̧nä̧, mo̧ä̧cho̧mȩnä̧mä̧ kä'coromettö̧ mo̧ä̧cha̧'a̧ jä̧'i̧nö̧'a̧nö̧ 'cuäopäcua'a yotäcutä." ¹⁴ Ja̧u̧tä̧ redä'cattö a̧di̧cuo̧'ta̧ pparächi'önä i̧cuä̧cua̧; ja̧u̧mä̧ täcö ro̧ȩpä̧ri̧yä̧cua̧, ja̧'hua̧nö̧ jo̧mȩnä̧ ja̧u̧ o̧'ta̧hui̧yä̧ 'cä̧tȩttö̧ yo̧'ta̧tȩtä̧ dö'ö i̧cuä̧cua̧; ja̧u̧mä̧ esecuocö jä̧cua̧, dö'ö icuäjomettö a̧'u̧cu̧nä̧tä̧'i̧nä̧ po̧cui̧cuo̧ca̧'a̧ jä̧cua̧'a̧ ocurä i̧sa̧ppȩ ttöcacuo'a pä'ö'i̧nä̧, ajiyä rejuttö huättopa pä'ö'i̧nä̧. ¹⁵ Ja̧'hua̧nö̧ ja̧'a̧ pi̧yȩ ja̧'a̧ TTÖ̧Ä̧NÄ̧HUA̧ Dios, Israel ttö̧ja̧ttö̧ surojö jui'a̧ jö̧nä̧ 'cä̧'ȩpö̧ ku̧nä̧hua̧mä̧ pä'ö: Ttöcu ppa̧'a̧chö̧mä̧ ja̧'hua̧ta̧'a̧nö̧ ucutu 'cua̧'cua̧ cu̧huȩnȩrä̧tu̧cu̧ttö̧mä̧ ra̧huä̧pi̧jö̧ttö̧mä̧ cu̧ji̧pä̧cuo̧tö̧jä̧; huiro jö̧nä̧tä̧ ja̧'hua̧ta̧'a̧nö̧ cua̧'cua̧ ku̧huȩnä̧rö̧tä̧ ja̧cua̧'a̧ cujurumä. Ja̧'hua̧nö̧ ja̧'a̧nä̧ ucutumä jo̧mȩnö̧mä̧ ko̧co̧tö̧ pinä̧tö̧jä̧. ¹⁶ Ucutumä pä'inä̧tö̧jä̧: I̧so̧cö̧, ujutumä dötecuächäcuotöjä ca̧ba̧yu̧tö̧ juruhuätönä̧ huä̧nö̧ jopö ti̧'chä̧cuo̧tö̧jä̧, ja̧'hua̧nö̧ ucutu döcuecuächätucuomenämä ja̧'hua̧ta̧'a̧nö̧ ujutumä ca̧ba̧yu̧tö̧ juruhuätö huä̧mȩ huä̧nö̧ ti̧'chä̧cuo̧tö̧jä̧, ja̧'hua̧nö̧ jopätörö ruhui'ätömä ttujuruhuäcuotö . ¹⁷ Mil jo̧mȩnä̧ huotö döttecuächäcuotö ya̧tȩ ttä'cattö cuä'ö icua pä'ö yepä'chä̧cuä̧u̧mä̧; ji̧mö̧tȩnö̧ huotö ttö̧ja̧ cuä'ö tticua pä'ö yettepȩ'ä̧u̧mä̧ ucutumä ducuecuächäcuotöjä̧ ya̧tȩ bandera i̧so̧'quȩ kä̧'i̧nö̧'a̧nö̧ jö̧nä̧tä̧ mö̧ö̧'ca ju'tättömä täcö juruhuätöjä pä'ö 'cha'adö ru̧nä̧huä̧ta̧ cuȩta̧ cuȩta̧ rö̧'a̧nö̧ jä̧cua̧'a̧ mö̧ä̧'ca ju'tättömä." ¹⁸ Ji̧nä̧ TTÖ̧Ä̧NÄ̧HUA̧MÄ̧ tta̧'ä̧rö̧ kö̧ ucuturu re kä̧nö̧ tta̧'ä̧rö̧ kö̧, ja̧u̧ ja̧'hua̧nö̧ hua̧mä̧ rȩrö̧jö̧nö̧ topäcuähuocotörö re kä̧cuä̧huä̧ ppäda pä'ötä hua̧ ja̧u̧mä̧. Ja̧'hua̧nö̧ ja̧'a̧ TTÖ̧Ä̧NÄ̧HUA̧ Diosmä jȩtti̧nö̧ttö̧ topö adihuomenä̧ jȩpö̧; jitö o'catoi'önä ja̧u̧ru̧ tta̧'ä̧rä̧tö̧mä̧ adiunä jö̧nä̧tä̧ päcuotö ja̧u̧mä̧. ¹⁹ Ja̧'ha̧nö̧ ja̧'a̧, ötahuiyä ttö̧ja̧mä̧ a̧'cua̧rö̧ ttö̧jä̧cuo̧tö̧ Siónnä, Jerusalénnä ja̧'hua̧ta̧'a̧nö̧ ucutumä ajuähuocotö cuäcuotöjä yabocumä. Ja̧u̧mä̧ isopäi'önä 'cuäopönä re kö̧ ucuturumä, ajau huopönö cuajahuätucuomenä̧mä̧. Ji̧yȩnö̧ päi'omenä̧ cuajahua'a ä̧ju̧cu̧ ä̧dä̧tä̧cua̧jä̧tó. ²⁰ Ja̧'hua̧nö̧ jo̧mȩnä̧ TTÖ̧Ä̧NÄ̧HUA̧ ucuturumä̧ iyö ubara ttuhuähuä pantä̧ ja̧'hua̧ta̧'a̧nö̧ tta̧'cua̧ tta̧'ȩcu̧ kä̧cuä̧huä̧ ajiyatä, ja̧'hua̧nö̧ jȩa̧'a̧nä̧, cu̧ru̧hua̧ huo̧juȩcuä̧ i̧sa̧mä̧ yorö'iso dajahuächocö jä̧cua̧ chutämä yabocumä̧, ja̧'hua̧nö̧ ja̧'a̧nä̧ ucutumä to'cuäcuotöjä Cu̧ru̧hua̧tu̧cu̧ huo̧juȩcuä̧ ttö̧ja̧sa̧rö̧ ucututä cui'äretucunä̧. ²¹ Cuä̧ja̧huiyätucunä cuä̧ju̧cuä̧cuo̧tö̧jä̧ ji̧yȩtȩ ucuocu huȩnȩ ucutu cuä'catucuttö pä'a: Pi̧mä̧ ja̧'a̧tó mä̧nä̧mä̧, juä̧mä̧ mä̧nä̧nä̧ täi ja̧u̧cu̧," ji̧yȩnö̧ cu̧huo̧jua̧'a̧cu̧'i̧nä̧ cu'ohuecu'i̧nä̧ ppa̧cuä̧cho̧mȩnä̧mä̧. ²² Ucutumä suronä cuäcuotöjä tätähuä'ca a̧'u̧cuä̧ juäi pärätättö ttä̧rä̧dä̧cuä̧huä̧'camä ja̧'hua̧ta̧'a̧nö̧ korojuei a̧'cua̧juä̧ orottö da'ö icuähuä. Ucutumä ihua rä̧nö̧ ppättecuä'pi ja̧'a̧nö̧tä̧ do'opö cuicuäcuotöjä. Ucutu jahuätörö jicuähuäcuuotöjä: "tö'ipächätucui poröttömä pä'ö." ²³ Ja̧u̧tä̧ ajiya i̧yä̧cua̧mä̧ cuähuä jäcuä jähuä o̧du̧'i̧nä̧, o̧bi̧ a̧jui̧yä̧'i̧nä̧, o̧'qui̧yä̧'i̧nä̧ ba'ö ru'ipö buo juoa pä'ö ajiya iyömä rȩjȩ cu̧ju̧nä̧cua̧jä̧ pä'ö, ja̧'hua̧ta̧'a̧nö̧ pan'i̧nä̧, ire'i̧nä̧ cuähuä o'cajuiyönä rö̧ä̧nä̧ rȩjȩttö̧ ba'ö böojuomenä̧ u̧huä̧ju̧ huȩju̧nä̧ päi'önä ja̧'hua̧ta̧'a̧nö̧ u̧huä̧ju̧ 'tahuähuä'i̧nä̧ rö̧ä̧nä̧ kä̧cua̧'a̧ ji̧yȩnö̧ mo̧ro̧mä̧ cuä̧ji̧mö̧ pä̧cä̧yu̧mä̧ ttucuä'cua rö̧ä̧nä̧ ko̧mȩ kä̧nö̧ ttucuäcuotö. ²⁴ Pä̧cä̧yu̧ bärepätö'i̧nä̧ mö̧rö̧ttö̧'i̧nä̧ jitö rȩjȩ isä'cua ttu̧ju̧nä̧ pä'ö 'cuä'ädinä̧tö̧mä̧ ttucuäcuotö nö̧'ȩpö̧ paranä jua'opö huättähuäcänä'i̧nä̧. ²⁵ O'cajuiyönä möä'quiyurömä ju'toju jö̧ o'canä juiyo ju'toju o'camä aje o̧rä̧ rö̧jä̧cua̧'a̧ ja̧'hua̧ta̧'a̧nö̧ ajehuiyämä pö̧nä̧ mo̧ä̧cua̧'a̧, ji̧yȩnö̧ mo̧ro̧ rö̧ä̧nä̧ cuättäu pä̧nä̧mä̧ ji̧yȩnö̧ ju'toju totta pä'ö ku̧nä̧huäcä mo̧ä̧cho̧mȩnä̧mä̧. ²⁶ Yodo kä̧huä̧ i̧tȩa̧u̧mä̧ mo̧ro̧ kä̧hua̧ jö̧ta'anö kä̧dȩpä̧cua̧'a̧, ja̧'hua̧ta̧'a̧nö̧ mo̧ro̧ kä̧hua̧mä̧ ttu̧mö̧ ji̧mö̧tȩnö̧ ja̧'a̧nä̧ koromöttö̧ todäre mo̧ro̧ jo̧mȩnä̧. TTÖ̧Ä̧NÄ̧HUA̧ 'quȩ'ȩpö̧ icuina̧'a̧ttö̧mä̧ ji̧nä̧ yotöte pätti'önä jȩä̧cua̧ umöhuäyotörömä ja̧'hua̧ta̧'a̧nö̧ ttöttahuiyä pärutenä päi'önä ubara ttuttinömä ttö̧'i̧pä̧cuo̧tö̧ ttöttahuiyämä. ²⁷ Topi, TÖ̧Ä̧NÄ̧HUA̧ i̧mi̧mä̧ juiyo otottö ichina'a, ö'ä'i̧nä̧ 'cuäo'önä ja̧'hua̧ta̧'a̧nö̧ isoppa de'ähuoppacu änämä ö̧ra̧huä̧rö̧ su̧'pȩnö̧ hua̧, i̧nȩnä̧mä̧ ocumatä̧ hua̧tä̧ ku icu cuo'ö icu'anö̧tä̧ hua̧. ²⁸ A̧'cua̧ru̧hua̧mä̧ aje suhuädia'a jä̧'i̧nö̧'anö hua̧ ttu̧ru̧pä̧'quȩ kada'ca jubö rȩbȩu̧nä̧ pi̧jä̧ ötahuiyä pa̧ja̧cu̧nä̧ ka̧cuä̧tö̧rö̧ ppa̧huȩcuäcänä ppa̧huȩpä̧cua̧ si'epö icua pä'ömä. Ötahuiyä ttö̧ja̧ ttäquiyänä ku̧nö̧ ji̧yȩtȩ yabocu räopächönä chiyäcua'anö. ²⁹ Ucutumä cu̧ju̧nä̧rä̧cuo̧tö̧jä̧ ji̧yȩtȩ ra̧huä̧huä̧, ji̧yȩnö̧ yodo pä'cärinä̧ eseunö surojö juiyönö 'quȩcuä̧ totta pä'ö, ja̧'hua̧ta̧'a̧nö̧ tta̧mi̧so'quinä esehuächi'önä̧nö̧'i̧nä̧ jäyänä pä̧nö̧ TTÖ̧Ä̧NÄ̧HUA̧ idepiyu de'a ma̧rä̧nä̧cu̧ ya̧tȩ i̧'cha̧'a̧ jä̧'i̧nö̧'a̧nö̧ Israel inähuäcu. ³⁰ TTÖ̧Ä̧NÄ̧HUA̧MÄ̧ jȩä̧cuo̧tö̧ o'catoi'önä ujuru'i̧nä̧ i̧huȩnȩ pä̧i̧cu̧nä̧ ra̧huä̧ri̧pö̧nä̧ ttä̧ju̧cu̧nä̧ päi'önä ja̧'hua̧ta̧'a̧nö̧ i̧jȩpä̧cua̧ öjo kä̧ru̧'coppa juruhuoppanä cäepa'a ö̧'ä̧i̧'i̧nä̧, ja̧'hua̧ta̧'a̧nö̧ o̧cu̧ma̧nä̧'i̧nä̧ cu'upä urohuomȩnä̧ kä̧dȩpa̧'a̧ jä̧'i̧nö̧'a̧nö̧ kä̧ru̧'coppa'inä, ajiya rö̧ä̧nä̧ ichönä ajiya ote'i̧nä̧ mo̧ro̧jä̧ttö̧ ichö mo̧jä̧ttö̧ mo̧ö̧nä̧. ³¹ Ä'canämä TTÖ̧Ä̧NÄ̧HUA̧ i̧huȩnȩ huoa'a ucuocua'a rä̧mi̧pö̧nä̧, Asiriamä si'epö 'turu icuähuäcua'a, ja̧u̧mä̧ cuä̧cuä̧ä̧cua̧ huo̧dö̧hua̧ cuätta'a jä̧'i̧nö̧'a̧nö̧. ³² TTÖ̧Ä̧NÄ̧HUA̧MÄ̧ ya'utenä cuä'ö i̧so̧'quȩnä̧ ro̧ȩpo̧mȩnä̧ jä̧cua̧'a̧do̧ cuähuäba'i̧nä̧ arpaí̧nä̧ ttu'pora'a rä̧mi̧pa̧'a̧ jacuänä. Ja̧u̧mä̧ ö̧ro̧huä̧huä̧cua̧ jahuätucumä. ³³ Ja̧'hua̧nö̧ ja̧'a̧ ju̧huȩnȩmä̧ isotörö cuä'äö icuähuome päi'önä jo̧mȩnö̧ yorätetö ku̧nä̧huo̧mȩ ji̧na̧'a̧ mo̧ täbocutä päi'önä. Ru̧hua̧rö̧ iso jö̧nä̧ ja̧'a̧ pä'ö jo̧mȩnö̧ jȩpö̧ ku̧nä̧huo̧mȩdo̧ ju̧huȩnȩmä̧, ja̧'hua̧ta̧'a̧nö̧ Diostä täcunä'inä cähueönä jȩpi̧nö̧ Ja̧u̧ i̧mi̧'i̧nä̧ u'chunö̧ jö̧nä̧ jo̧mȩnö̧ ca̧ca̧tö̧ ötinome ocurä'inä, dauhuiyä'i̧nä̧. Ja̧u̧ TTÖ̧Ä̧NÄ̧HUA̧ a̧mi̧yuppa'i̧nä̧ jomenötä̧ azufre aje i̧sä̧rä̧ jä̧'i̧nö̧'anö mo̧'ö̧ rö̧nä̧ cuäopäcua̧ ocurämä.