¹ Ji̧yȩtȩ Tiro ttö̧ja̧rö̧ pähui'inö huȩnȩ: Huopätucui ucutumä Tarsis huoi'quiyu; isopäi'önä cuojuduhuiyätucu'i̧nä̧, huoi'quiyu rä̧mä̧do̧mȩ'i̧nä̧ juiya'a; Chipre ötahuiyättö jahuätörömä ji'ähuinä̧tö̧. ² 'Coruchi'ö ka̧cuä̧tu̧cui̧ ucutu aje jäyoto ka̧cuä̧tö̧mä̧, Sidón ttö̧ja̧ jare iyähuä ttö̧ja̧, aje rö̧o̧tonä cue'ächätömä, ucuru ruhuotö juocuätucunä jȩpi̧nätö. ³ Sijorttö u̧huä̧ju̧ otenä aje rö̧o̧tonä kätö ȩpi̧nätö, Nilo aje ttö̧ja̧ u̧huä̧ju̧ ttö̧ca̧ca̧ctö̧mä̧ yabonä̧nö̧ ttȩmö̧nä̧ ppädina̧'a̧ ja̧'hua̧ta̧'a̧nö̧ ja̧u̧ cuähuämä ko̧ro̧jä̧ ttö̧ja̧ mitö ttȩmi̧nö̧. ⁴ Sidón ttö̧ja̧mä̧ dä'ä ttuttäcuotö pä'ö ucuocuina̧'a̧ aje rö̧o̧to juruhuotomä̧. Ja̧u̧mä̧ pä'ö Ttömä mu̧cha̧ juo'ö o'ca juo'ocö pinö̧sä̧, ja̧'hua̧ta̧nö̧ u̧mä̧tö̧ mu̧ä̧yotörö'i̧nä̧ nä̧tö̧ mö̧ä̧yotörö'i̧nä̧ pöttädocö pi̧nö̧sä̧. ⁵ Ji̧yȩnö̧ huȩnȩ Egiptora̧'a̧ rȩbȩhui̧po̧mȩnä̧ jahuätömä tta̧'cua̧ tta̧'ȩcui̧nä̧tö̧, Tiro ttö̧ja̧ jähuänä. ⁶ Tarsis ötahuiyära̧'a̧cu̧ kähuächätucui, ucutu aje jäyoto ka̧cuä̧tö̧mä̧ ajahuätucui. ⁷ ¿Pi̧yȩmä̧ ucuru 'cuäopina̧'a̧ ötahuiyä ttö̧ja̧mä̧ esehuätucui ja̧u̧ kada'camä täbocu ttö̧ja̧cui̧nö̧ ja̧'a̧, ttö̧jä̧pi̧yä̧mä̧ oto korotö tti̧rȩjä̧ra̧'a̧ ttö̧ja̧cua̧ pä'ö ȩpi̧nä̧u̧? ⁸ ¿Di ji̧na̧'a̧ttö̧ Tiro ttö̧ja̧rö̧ to'ija̧'a̧cu̧ a̧mö̧cuädinö̧mä̧, ruhuo huettönä̧ iyinä̧tö̧rö̧mä̧, jahuätö tti̧tti̧mö̧ ji̧na̧'a̧ jare iyä ttö̧ja̧ pinä̧tö̧mä̧, jahuätö jare iyähuä ttö̧ja̧ jo̧ca̧'a̧ ji̧na̧'a̧ ja̧huä̧jä̧ttö̧ ucuotäcuähuotö pinä̧tö̧mä̧? ⁹ TÖ̧Ä̧NÄ̧HUA̧ o'ca juiyönä ju̧ru̧hua̧mä̧, pa̧'a̧nö̧ a̧mö̧cuädö ku̧ni̧nö̧ ucuo tettäu'inä ucuo tettäu juiyönä jȩa̧ pä'ö, ja̧'hua̧ta̧'a̧nö̧ o'cajuiyönä̧ ja̧huä̧jä̧ttö̧ ttujuru ucuo tettähuä'ijö'i̧nä̧ dä'ä ttuhuepatö pä'ö. ¹⁰ Cuidepiyuttö rȩjȩ sa'i, ya̧tȩ nilo ajenä sahuaja'anö̧, Tarsis ttö̧ja̧. Täcö Tiro ötahuiyänä̧mä̧ juiya'a cuäcuähuä iyähuämä. ¹¹ TÖ̧Ä̧NÄ̧HUA̧MÄ̧ u̧mö̧ te'ädinö aje rö̧o̧to huä̧mȩnä̧, ja̧'hua̧nö̧ jȩpö̧ ruhuo hueähuä̧mä yȩ'ȩpö̧ icuinö̧. Ja̧u̧mä̧ Fenicia ttö̧ja̧rö̧ ji̧yȩtȩ hue'inö, 'quiyönä aditö ku̧nä̧huo̧mȩ si'epö tticua pä'ö. ¹² Ja̧u̧mä̧ pä'inö̧ ucumä esehuocö cuä̧cua̧jä̧ pä'äjita'anömä, ucutu Sidón tti̧tti̧mö̧ uborö jerupätömä ko̧ro̧jä̧ ttö̧ja̧tä̧ suronä jȩpö̧ huettäcuotöjä; ä̧rä̧mi̧'i̧, Chipre kä'co i̧sä̧sa̧ 'cuäcuo'a; ju̧huȩnȩ 'cuäcuo'öttö'i̧nä̧ 'cuä'ächi'ö cujuru cuȩmo̧mȩmä̧ jui̧cuä̧cua̧jä̧." ¹³ Caldeas ttö̧ja̧ ttidepiyu topi. Pitö ttö̧ja̧ pinä̧tö̧mä̧ täcö toa'a, Asiria ttö̧ja̧mä̧ tti̧rȩjä̧ ji̧no̧mȩmä̧ de'a jui̧yä̧jä̧nä̧ de'a isotö ttö̧jo̧mȩ jö̧nä̧tä̧ pärohuächinome. Jahuätömä̧ ju'toju to̧pä̧rö̧ pä̧cuä̧huo̧mȩ äräbe'ö ku̧ni̧nä̧tö̧; jahuätömä ruhuode'i̧nä̧ si'epö icu kä̧nö̧ ju̧huȩnȩmä̧ pparopö tticuomenä isäsamä u'chu jö̧nä̧tä̧ ki̧'i̧no̧mȩ. ¹⁴ Tarsisttö huoi'catä huopätucui; isopäi'önä̧tä̧ dajahuächö cu̧ji̧pä̧tu̧cua̧ pä'ö ji̧no̧mȩmä̧ si'epö icuähua'a. ¹⁵ Ji̧yȩnö̧ mo̧ro̧ päi'omenä Tiro ötahuiyämä setentanö̧ a̧'ȩ jo̧mȩnä̧ unichi'äcuähuome jä̧cuo̧mȩ, ya̧tȩ ru̧hua̧ u̧mo̧ro̧ mo̧ro̧ jä̧'i̧ja̧'a̧nö̧. Setentanö a̧'ȩ jo̧mȩ beipächomenä, Tiro ötahuiyämä ji̧yȩtȩ 'cuäopäcua'a nä̧tö̧ ttidepä micuänä̧ iyä'chäcuähuätö ra̧ttö̧ jä̧'i̧ja̧'a̧nö̧tä̧. ¹⁶ Arpa pättö ȩmo̧po̧'ö̧, ötahuiyära̧'a̧cu̧ täi, ucu cuidepä micuänä iyä'chöcuähuäjumä, adiu 'porö rö̧ä̧nä̧ ra̧'i̧jó, ucuru ttamöcuädi'äcua'anö̧. ¹⁷ Setentanö̧ a̧'ȩ o'ca'amä ji̧yȩtȩ 'cuäopäcua'a, TÖ̧Ä̧TÄ̧HUA̧ Tiro ttö̧ja̧rö̧ ppäda'atä ja̧'hua̧nö̧ ja̧'a̧ jahuäjumä pä'äjita'anö̧ pärätä rättepäcuotö yajute kidepä micuänä iyä'chäcuähuäju kaditähuänä, ja̧'hua̧nö̧ ja̧'a̧ jahuäjumä ja̧huä̧jä̧ttö̧ ruhuonä̧ hue'ätörö ppä̧'ä̧dä̧rö̧ kaditäcuaju. ¹⁸ Kaditomenä pärätä rö̧ä̧nä̧ doächömä TÖ̧Ä̧NÄ̧HUA̧RÖ̧ iyähuä ju̧nä̧tä̧ 'cä̧'ȩpö̧ ku̧ju̧nä̧cua̧ju̧. Pärätä ca̧ca̧tö̧ rutähuomemä rutähuocö jä̧cuȩ, kaditomenä yabonänö päi'äjimä TÖ̧Ä̧NÄ̧HUA̧ ä'ca jo̧mȩ aditö ka̧cuä̧tö̧rö̧ iyähuäcua'a ja̧'hua̧ta̧'a̧nö̧ ttu̧cuä̧'i̧nä̧ bepächö juiyönä̧ juhua'atäcu jahuätörömä ttö̧'ca̧tä̧huä̧ti̧yu̧ adiu'i̧nä̧ iyähuäcua'a.