¹ TÖ̧Ä̧NÄ̧HUA̧MÄ̧ ttörö pä'inö: ''Ȩmo̧po̧'i̧ dau isodä yodäte riodättö ja̧'hua̧ta̧nö̧ juodänä̧ cui̧huȩyu̧ta̧ja̧, ' Maher Shalal Hash Baz pä'ö. ² Ttötä jidähuäcua̧sä̧ iso ju̧huȩnȩ jittähuäcuo ttörö ttötä ucuocu isopäi'önä̧ jidähua'a jä̧'i̧ņa̧'a̧nö̧tä̧, Urias sacerdote adicuä i̧sa̧ ji̧na̧'a̧, ja̧'huata̧nö̧ Jeberequías ittiimä̧ Zacarias jina̧'a. ³ Ttömä̧ topu 'chi̧nö̧söä̧ Dios i̧huȩnȩ jiäcuähuä̧ isajuru, jahuajumä̧ muchaju ji̧na̧'a̧ ja̧u̧nu̧ o'comȩnä̧ ji'̧qui̧cha̧hua̧rö̧ uhuabecuinä̧ju̧. ⁴ A̧'a̧ ä'canä̧ ji̧'qui̧cha̧hua̧ ucuocu juiyäitäto: Ttö chä'o, ja̧'hua̧ta̧nö̧ ttö cha̧ju̧ pä'ö juiyä'itä, Damasco ötahuiyä järe rö̧ä̧i̧nä̧tä̧ Samariattö curä rohuä'u järe 'cho'icuämä̧ Asiria ru̧hua̧tä̧ 'cho'ipu ȩmi̧pä̧cuȩ. ⁵ CHÖ̧Ä̧NÄ̧HUA̧MÄ̧ pä'öjita'anö ucuocuäji ttörö: ⁶ "Pitö ttö̧ja̧mä̧ unichi'inätö Siloé aje ma'ö̧ kome'inä, ja̧'hua̧nö̧ jȩpö̧ eseutä ko̧cuä̧tö̧ Remalías ji̧tti̧ Rezincu̧tä̧, ⁷ ja̧'hua̧nö̧ ja̧'a̧ttö̧ TTÖ̧Ä̧NÄ̧HUA̧MÄ̧ i'cächometä̧ päi'a'a aje rö̧o̧to, juruhuoto ja̧'hua̧ta̧'a̧nö̧ rö̧ä̧nä̧. Räopäcua'a ajehuiyä rä̧jo̧mȩttö̧mä̧ ja̧'hua̧nö̧ jo̧mȩnä̧ ajehuiyä'inä jäyotä juiyönä sujuädi'äcua'a." ⁸ Ajemä juatädäcua'a Judá jacuättö kä̧mä̧dö̧, suhuädi'ömä ju'tojunä 'cuäo'äcua'a, ttu̧ru̧pä̧'chȩnä̧ rä̧bȩhuo̧mȩ jubu. Ujuäbä setächi'äcua'a pi̧jä̧ pa̧ja̧cuä̧chö̧nä̧, Emanuel." ⁹ Ucutu, ttö̧ja̧mä̧, TTÖTÄ toädö chicuäcuotöjä. Ä̧ju̧cuä̧tu̧cui̧, ucutu o'catoinä cui̧rȩjä̧tu̧cu̧ o'to ka̧cuä̧tö̧: curä curohuähuätucua pä'ö jo̧mȩnö̧ jȩpä̧tö̧jä̧, ja̧'hua̧nö̧ ja̧'a̧nä̧ TTÖTÄ ja̧'a̧ ucuturu iso juo̧dȩpä̧cua̧mä̧; curohuähuätucua pä'ö jo̧mȩ cujätucua'a̧nö̧ TTÖTÄ jä̧cua̧'a̧ iso juo̧dȩpä̧cua̧mä̧. ¹⁰ Ji̧yȩ amucuädö jȩpö̧ cu̧nä̧tu̧cui̧, ja̧'hua̧nö̧ ja̧'a̧nä̧ iso jö̧nä̧mä̧ jȩ'cui̧yä̧cuo̧tö̧jä̧; hueähuä jȩpä̧tu̧cui̧, ja̧'hua̧nö̧ ja̧'a̧nö̧ iso jö̧nä̧mä̧ jȩ'cui̧yä̧cuo̧tö̧jä̧, Dios ujutucu ö̧ja̧'a̧ttö̧. ¹¹ TTÖ̧Ä̧NÄ̧HUA̧ ttörö ucuohuäji, ujurucu ttörömä, ja̧'hua̧ta̧nö̧ ro̧'ȩpö̧nö̧ päcusä jahuätö jȩttö̧'a̧nö̧mä̧ jȩ'cuä̧. ¹² Jahuätö ye'ecu ttucuocu'anömä cucuocuó ucumä, ucutumä yehuecuätuhuä jahuätö yettecumä, ja̧'hua̧ta̧nö̧ yehuä'chömä cu̧jä̧tu̧cuä̧ . ¹³ Ucutumä TÖ̧Ä̧NÄ̧HUA̧ surojö jui̧'a̧rö̧ ucuotö kä̧tu̧cui̧; JA̧U̧RU̧RU̧TÄ̧ ye'ecu kä̧tu̧cui̧ ja̧'hua̧ta̧nö̧ JA̧U̧RU̧ ye'ecuähuätä ku̧nä̧rä̧tu̧cui̧. ¹⁴ Ja̧u̧tä̧ ja̧'a̧ surojöttö 'quȩ'ȩpu̧ ku̧nä̧huo̧mȩ ppa̧huä̧chä̧cua̧mä̧; ja̧'hua̧nö̧ ja̧'a̧nä̧ Ja̧u̧tä̧ jä̧cua̧to ido'qui yo'quitenä̧ ppettocuächäcuo'quimä̧, Israel ojusode todere o'cajuiyönä, ja̧hua̧ta̧nö̧ ja̧u̧tä̧ jä̧cua̧'a̧to 'cärihuä ku̧to̧bu̧ jä̧'i̧nö̧'a̧nö̧ hua̧mä̧ Jerusalén ötahuiyä ttö̧ja̧rö̧. ¹⁵ Juo'quinä̧ recuätö tti̧ȩppä̧cuo̧tö̧to, jahuata'a̧nö̧ mo̧ttä̧cuo̧tö̧ taipu'inä̧ ttatipäcuottöto, ja̧'hua̧ta̧nö̧ jȩtti̧yö̧nä̧ päi'önä̧ jȩpu̧ tto'epu 'chuädäcuähuäcuotö juätömä̧. ¹⁶ Ttö hueähuä huȩnȩ isopäi'önä ucuocu huedinö̧mä̧ isäbanä jȩpu̧ hua̧'a̧dö̧ nö̧'cä̧dö̧ ku̧ni̧jo, j'hua̧ta̧nö̧ iyä'chijo ttö jittähua päö huedinäu̧ru̧. ¹⁷ Ttö̧mä̧tta̧dä̧rä̧cua̧sä̧to̧ ja̧u̧ chu̧ru̧hua̧rö̧tä̧, ja̧u̧ ja̧'a̧ Jacob oju'isodettö ö'ä dajö icuinö̧mä̧; ttömä̧ ja̧u̧ru̧ tta̧dä̧rä̧cua̧sä̧. ¹⁸ Topi, ttö chi̧tti̧mö̧'i̧nä̧ juätörömä̧ ja̧u̧ TÖ̧Ä̧NÄ̧HUA̧ huo̧juȩtö̧ iyinä̧u̧ ja̧'hua̧ta̧nö̧ Israel ttöja̧ TTÖ̧Ä̧NÄ̧HUA̧ o'cajuiyönä ju̧ru̧hua̧ ttö̧ja̧ ttierujuei jȩä̧cuä̧huä̧ i̧sa̧ ja̧'a̧, ja̧u̧mä̧ kö̧ Sion mu̧ä'canä̧. ¹⁹ Ja'hguätö pättäcuotö ucuru: "Jä'epätucui jä̧cuä̧ huo̧juä̧tö̧jä̧ pä'ätörö ja̧'hua̧ta̧'a̧nö̧ ma̧ri̧mu̧rö̧'i̧nä̧,"Jitö yapare ucuocu jacuänä jitö jȩttö̧tä̧ jȩpä̧tö̧. Ja̧'hua̧nö̧ ja̧'a̧nä̧, ¿TTÖ̧Ä̧NÄ̧HUA̧RÖ̧ jättäpöjuiyö'anä ja̧'a̧ tä̧ji̧? Ja'huätömä jättepä'anö ja̧'a̧ 'corujuo'ächinätö̧rö̧ ji̧nä̧ a̧'cua̧rä̧tö̧ to̧ttä̧ra̧'a̧nä̧? ²⁰ ¡Hueähuä huȩnȩ päöta'anä ja̧'hua̧nö̧ jȩtta̧'a̧ topö ittähuäcua'anö! ja̧'hua̧nö̧ jö̧ jittäujuiyöttömä,tȩa̧u̧ jui'ö yo̧ä̧ba̧ jacuänä cuettächa'a jä̧'i̧nö̧'a̧nö̧ huotö. ²¹ Ja'huätömä pi̧jä̧tö̧mä̧ rö̧ä̧nä̧ suräutä 'cuättopäcuotö ja̧'hua̧nta̧'a̧nö̧ ttu̧cuä̧ ttö̧'i̧nä̧ ppäi ttutäcuotö. Ttucua ppä̧ö̧rö̧jä̧u̧, ttö̧ro̧huä̧rä̧cuo̧tö̧ ttu̧ru̧hua̧rö̧ ja̧'hua̧ta̧'a̧nö̧ TTÖ̧Ä̧NÄ̧HUA̧ Diosrö'inä, ju'tojucu bo̧yu̧cu̧ totto̧mȩnä̧mä̧. ²² Pi̧jä̧ rȩjȩttömä̧ su̧ro̧jä̧u̧ huotta'atä tottäcuotö, yo̧ä̧u̧ rö̧ä̧nä̧ tta̧'cua̧ tta̧ttȩcua̧'a̧.Ja'hutömä ȩcuo̧tö̧ täcuotö rȩjȩ yo̧ä̧jä̧ ra̧'a̧cu̧tä̧