¹ Pi̧yȩ pä'öto̧ TTÖ̧Ä̧NÄ̧HUA̧MÄ̧: " Mo̧ro̧jä̧mä̧ TTÖ̧ chuo̧mȩ, Ja̧'hua̧ta̧'a̧nö̧ rȩjȩmä̧ TTÖ̧ chi̧dȩ'ä̧cä̧ chö̧jä̧pu̧ chöta pä'ö, ¿Tojä̧tö̧, ja̧'hua̧'a̧nö̧ ja̧'a̧, TTÖ̧ cho̧ju̧ isode cuaditätucuäcuomȩmä̧ ucutu? ¿Tȩnȩjä̧tö̧ yȩnȩtä̧mä̧ ju̧huȩnȩ TTÖ̧ cuä̧'ä̧chi̧'u̧ chö̧'a̧ pä̧'ö̧mä̧? ² Chö̧mu̧ttä̧ jȩä̧'a̧ pi̧yȩ o'ca juyönä; ja̧'hua̧'a̧nö̧tä̧ ja̧'a̧ttö̧ ko̧ro̧ juȩ'i̧nä̧ rä̧bȩhuä̧ja̧'a̧mä̧, pi̧yȩtä̧ ja̧'a̧ TTÖ̧Ä̧NÄ̧HUA̧ pä'ömä. pide ja̧'a̧ ubo TTÖ̧ ca̧cu̧'ä̧mu̧ tochäcumä, ja̧'a̧ttä̧ hua̧ ja̧'hua̧ta̧'a̧nö̧ ja̧ro̧pi̧'i̧nö̧ su̧ro̧nä̧ jȩi̧nö̧mä̧ a̧'cua̧rö̧hua̧nä̧, ja̧'hua̧ta̧'a̧nö̧ tti̧ä̧'u̧ TTÖ̧ chi̧ȩnȩ ä̧ju̧co̧mȩnä̧. ³ Päcäyärö cuä'ö icumä, ttö̧ja̧sa̧rö̧'i̧nä̧ cuä'ö icu; ovejarö cuä'ö icumä, ahuiri u̧ru̧pä̧'quȩ'i̧nä̧ meropö icu; ttöäre iyähuä u̧huä̧ju̧ ote iyätömä cuchi ucuojatä ttiyäcuotö; a̧mö̧cuädö 'chopönä a̧mȩu̧ iyätömä surojötä ucuotätö ja̧'a̧. Jahuätömä tta̧mö̧ ttamöcuäda'acu jȩpä̧tö̧ ja̧'hua̧ta̧nö̧ jahuätömä su̧ro̧tä̧cuä̧huä̧tä̧ esehuätö. ⁴ Ja̧'hua̧nö̧ jȩttö̧ta'anö Ttö'i̧nä̧ jitörötä ro̧ȩcuä̧ pojopö chu̧ju̧nä̧cua̧sä̧; Ttömä jahuätö yettecunä jö̧ chi̧'cä̧chä̧cua̧sä̧ juhua'amä huochomenä ya̧tȩ'i̧nä̧ ädätoca'a ji̧na̧'a̧ttö̧; Chucuocuomenä ya̧tȩ'i̧nä̧ ä̧ju̧cuo̧ca̧'a̧ ji̧na̧'a̧ttö̧. Jahuätömä Ttö tochomenä surojötä jȩpi̧nä̧tö̧ ja̧'hua̧ta̧nö̧ Ttö chuju'cocutä pojopö ȩmi̧nä̧tö̧." ⁵ TÖ̧Ä̧NÄ̧HUA̧ i̧huȩnȩ ä̧ju̧cuä̧tu̧cui̧, ucutumä̧ i̧huȩnȩ ä'cattömä̧ ttö̧'ä̧huä̧tö̧jä̧: Tta̧mö̧nä̧ ttö̧jä̧hua̧tö̧mä̧ kö'cocotö ja̧'hua̧ta̧nö̧ Chi̧mi̧nä̧ eseäcuähuättö̧mä̧ ya'ocuätö pä'ötó: TÖ̧Ä̧NÄ̧HUA̧MÄ̧ ucuo tȩttä̧huä̧cua̧, ja̧'hua̧nö̧ jo̧mȩnä̧ ja̧u̧ eseumä totäcuotöjä, Ja̧'hua̧nö̧ ja̧'a̧ jahuätömä dä'ä ttuttunä̧tö̧ jȩpö̧ ku̧nä̧hu̧pcuo̧tö̧. ⁶ Pä̧i̧cu̧nä̧ rä̧mi̧pö̧mä̧ curä ötahuiyära̧'a̧ttö̧ tturohuähua'a rä̧mi̧pa̧'a̧, Dios ö̧jo̧dettö rä̧mi̧pö̧mä̧, TÖ̧Ä̧NÄ̧HUA̧ aboiyotörö micuä jȩa̧'a̧ rä̧mi̧pa̧'a̧. ⁷ Kuhuäbecuäcua'a ä'canä, uhuäbecuäju, ku̧cuä̧ba̧ barahuäcua'a ä'canä, uhuäbecuäju ki̧tti̧rö̧. ⁸ ¿Dijä̧ttö̧ ja̧'hua̧nö̧ ja̧'a̧ ä̧ju̧cui̧nö̧mä̧? ¿Dijä̧ttö̧ ja̧'hua̧nö̧ öcuäopa'a topinömä? ¿Ya'ute mo̧ro̧tä̧ uhuäpächö'anä ja̧'a̧ pi̧jä̧mä̧? ¿Jurunätä ruhuäcuiyä so̧bu̧cua̧nö̧ jö̧nä̧ ttö̧jo̧cuä̧mu̧'a̧nö̧ ja̧'a̧? Ja̧'hua̧nö̧ ja̧'a̧nä̧, Jerusalénmä tä'cö uhuäbecuäcua'a, Ja'huäjumä täcö kuhuäbecuäcuaju ki̧tti̧mö̧rö̧. ⁹ ¿Ji̧'qui̧cha̧hua̧ uhuäpächa pä'ö chi'chächa pä'ätöjä ji̧'qui̧cha̧hua̧rö̧ chi'chächa pä'ocotöjä? Ja'epö TÖ̧Ä̧NÄ̧HUA̧MÄ. ¿Uhuäpächa'atä chi'chächa pä'atöjä ja̧'hua̧nö̧ jö̧ttö̧mä̧ i'chächocösä? Ja'epö CU̧Ä̧NÄ̧HUA̧TU̧CU̧MÄ. ¹⁰ ¡Jerusalencu̧ esehuätucui ja̧'hua̧ta̧'a̧nö̧ ja'huätörö esehuätucui, ucutu o'catoi'önä repe'ätömä; esehuätucui ja'huätucutä, o'catoi'önä juätuhue pä'inätömä ja'huätörö! ¹¹ Ucutumä atate isoya sucuädi'ätucunä au cuesehuäcuotöjä; atate ajötä ta̧ttä̧rä̧cuo̧tö̧jä̧; ucutumä juätetötä cuähuäcuotöjä sucuädi'ätucunä ja̧'hua̧ta̧'a̧nö̧ juu̧ öadihuä i̧jȩpa̧'a̧ttö̧tä̧ cuesehuäcuotöjä. ¹² Pa̧'a̧nö̧ pä'ö TÖ̧Ä̧NÄ̧HUA̧MÄ̧: "ttöäre rö̧ä̧chö̧nä̧ ttö̧ja̧ pä'ö huedö'anäta päi'a'a aje ma'ö̧ ka̧'a̧ jä̧'i̧nö̧'a̧nö̧, ja̧'hua̧ta̧'a̧nö̧ järe ku̧nä̧rä̧cuä̧huä̧'i̧nä̧ pi̧jä̧ o'cajuiyönä ttu̧ju̧nä̧rö̧nä̧ aje su'adi'ö huerächa'a ja̧'i̧nö̧'a̧nö̧, ucutumä ja'huätö ttippeyättötä cuahuäcuotöjä, ucuturu cä'epö ttȩpä̧cu̧o̧tö̧, ja̧'hua̧nö̧ ttȩpä̧u̧ cuihue'quiyutucunä tö'ö cuesehuäcuotöjä. ¹³ Isaju ki̧ttyi̧rö̧ kesehuaa'a jä̧'i̧nö̧'a̧nö̧, TTÖMÄ̧ ja̧'hua̧nö̧ kesehuäcuotöjä, ja̧'hua̧nö̧ Jerusalenttö̧'i̧nä̧. ¹⁴ Ucutumä pi̧yȩ to'cuäcuotöjä ja̧'hua̧nö̧ ja̧'a̧ttö̧ cuamiso'quitumä esehuächiäcua ja̧'hua̧nö̧ ja̧'a̧ttö̧ pääjita'anö cujuru cuhuemäcuo̧tö̧jä̧. TÖ̧Ä̧NÄHUA̧ i̧jȩpä̧cua̧ ujuru umuhuäyotö cuätucua'attö, ja̧'hua̧nö̧ ja̧'a̧nä̧ Juo̧u̧tä̧ i̧jȩpä̧cuä̧'u̧jä̧ öjö'cocömä aboyotörö. ¹⁵ To'cuäcuotöjä, TÖ̧Ä̧NÄHUA̧ ichaa ucuräcu äre carucänä ja̧'hua̧nö̧ ja̧'a̧nä̧ i̧chä̧cua̧ kä̧rö̧ o'coppa juröhuoppacu cuupä örohuaa jä̧i̧'a̧nö̧ ja̧'hua̧nö̧ jȩpu̧ i̧'cä̧chä̧cua̧ öjö'cocömä ocurä juruhuächiö tejädö cuo'önä. ¹⁶ TÖ̧Ä̧NÄHUA̧TÄ̧ ro̧ȩpä̧cua̧ ocuränätä̧ ja̧'hua̧ta̧'a̧nö̧ ucurä'chunätä̧ ttö̧ja̧rö̧mä̧. Jitö TÖ̧Ä̧NÄHUA̧ ro̧ȩpä̧cu̧ä̧'u̧mä̧ juiyo recuätö ja'a. ¹⁷ Juätömä jitötä kä'ecuättö ja̧'hua̧ta̧'a̧nö̧ jȩpä̧tö̧ ji̧tö̧tä̧ kä̧'ȩcu̧ cu̧nä̧huä̧tö̧, ju̧hua̧'a̧mä̧ ji̧tö̧tä̧ do̧ttä̧cha̧ pä'ö päbaränä, jȩpu̧ juȩnȩ kä̧'co̧ cö̧ru̧ juä̧tö̧-mä̧ cu̧chi̧ idepä cuätörö ja̧'hua̧ta̧'a̧nö̧ ko̧ro̧ su̧ro̧ttö̧ i̧si̧ri̧'cu̧tu̧ru̧."Juä̧tö̧mä̧ ya̧u̧tȩ rö̧ji̧ tti̧chä̧co̧tö̧, pi̧yȩ ja̧'a̧ TTÖ̧Ä̧NÄ̧HUA̧ pä'ömä. ¹⁸ Ja̧'hua̧'a̧nö̧ ja̧'a̧ TTÖ̧MÄ̧ huo̧jua̧sä̧ ucu jȩ'cuä̧ji̧mä̧ ja̧'hua̧ta̧'a̧nö̧ cua̧mu̧cuä̧du̧mä̧. Cuä̧'opä̧cu̧'ä̧mä̧ i̧cha̧'a̧ ja̧'u̧nö̧ TTÖ̧ chuö̧ca̧ca̧ttä̧cua̧sä̧ ocato'iönä tti̧rȩjä̧-nä̧ ca̧cu̧'ä̧ttö̧'i̧nä̧ ja̧'hua̧ta̧'a̧nö̧ ko̧ro̧ tti̧huȩnȩ u̧co̧cuä̧ttö̧'i̧nä̧. Ju̧huä̧ju̧mä̧ ki̧chä̧co̧ju̧ ja̧'hua̧ta̧'a̧nö̧ tottäcotö TTÖ̧ chöadihuä säru'u. 19. ¹⁹ TTÖ̧MÄ̧ chu̧ju̧nä̧cua̧sä̧ yaute tottönä sujuru ju'ättö. Ja̧'hua̧'a̧nö̧ ja̧'a̧ TTÖ̧MÄ̧ huȩdä̧cua̧sä̧ ki̧'i̧pi̧nä̧tö̧rö̧ ju̧huä̧töttö̧ ttidepiyu pu̧nä̧: Tarsis, Fut, ja̧'hua̧ta̧'a̧nö̧ Lud, ppo'ähuä ttö̧ja̧ ttu̧'co̧po̧bu̧ setädättö, Tubal, Javan, ja̧'hua̧ta̧'a̧nö̧ rȩjȩ a̧jȩ jäyoto oto ca̧cuä̧tö̧ ttö̧rö̧'i̧nä̧ ttä̧ju̧co̧mȩ yoriso totocö̧mȩ chu̧ju̧ru̧. Ju̧huä̧ttö̧mä̧ ji̧ttä̧huä̧co̧tö̧ TTÖ̧ chujuru pi̧jä̧ ttö̧ja̧rö̧. ²⁰ Jahuätömä ttö̧jä̧hua̧tö̧ o'catoi'önä̧rö̧ ttö̧ja̧ o'catoi'önä̧ttö̧mä̧ ttö̧ja̧cui̧no̧mȩcu̧ ottipäcuotö, TÖ̧Ä̧NÄ̧HUA̧RÖ̧ ttöäre iyä jö̧nä̧. Juätömä̧ caballotö̧nä̧'i̧nä̧, carucätta'i̧nä̧, mulastö̧nä̧'i̧nä̧ ja̧'hua̧ta̧nö̧ camellotö̧nä̧'i̧nä̧ ttichäcuotö Ttö chö̧jä̧'ca mö̧ä̧'cara̧'a̧cu̧, pä'ö TÖ̧Ä̧NÄ̧HUA̧MÄ̧. Ja̧'hua̧nö̧ jo̧mȩnä̧ Israel ttö̧ja̧mä̧ ttöäre iyähuä u̧huä̧ju̧ ote tti'cächäcuotö TÖ̧Ä̧NÄ̧HUA̧ ö̧jo̧dera̧'a̧cu̧ i̧so̧'ta̧ tȩo̧'ta̧nä̧. ²¹ Pitöttö yotötettömä, sacerdote ttönä'inä ja̧'hua̧ta̧nö̧ Levís ahuaruhuättö'i̧nä̧ pojopö chȩmä̧cua̧sä̧ pä'ö TÖ̧Ä̧NÄ̧HUA̧MÄ̧. ²² Isopäi'önä̧ ja̧'hua̧nö̧ jö̧ta'anö mo̧ro̧jä̧ ja̧rȩä̧jä̧'i̧nä̧, rȩjȩ ja̧rȩä̧jä̧'i̧nä̧ cha̧di̧tä̧jä̧mä̧ Ttö chä'ca jo̧mȩ 'cuäopönä̧tä̧ kö̧nä̧ jȩchä̧cua̧sä̧, pi̧yȩ ja̧'a̧ TÖ̧Ä̧NÄ̧HUA̧ huäjunä jiäumä, ja̧'hua̧nö̧tä̧ cui̧tti̧mö̧tu̧cu̧mä̧, tti̧mi̧'i̧nä̧ 'cuäopönä̧tä̧ kä̧cua̧'a̧. ²³ Jitä ichö kä̧hua̧nä̧, jitä 'cuä'ächi'ö pä̧cuä̧huä̧ mo̧ro̧ i̧chä̧cuȩ mo̧ro̧mä̧, ttö̧ja̧mä̧ o'catoi'önä̧tä̧ ttichäcuotö ttihue'quiyönä Chä'ca jo̧mȩ kä̧mä̧dö̧ ttesehua pä'ö. ²⁴ Jahuätömä rättopäcuotö ja̧'hua̧nö̧ rä'opö ttö̧ja̧ ttucu rohuähuätö tto'co jähuä pa̧'a̧ ttottäcuotö, juhua'amä mi̧yu̧ ja̧u̧rö̧ cuätömä hua'ö icuocotö ttäcuotö, ja̧'hua̧ta̧nö̧ ocurä jahuätörö ku icuarämä nahui̧pocarä jä̧cuarä, juhua'atäcu ttidepämä o'cajuiyönä̧tä̧ su̧ro̧tä̧cuä̧huä̧tä̧ jä̧cuȩ.