¹ Sión ttö̧ja̧rö̧ repeda'attö 'coruchi'ömä̧ ko̧cö̧ chä̧cua̧sä̧, ja̧'hua̧ta̧nö̧ Jerusalén ttö̧ja̧ adiunä jä̧cua̧á̧nö̧ 'coruchi'ocö chä̧cua̧sä̧, adiu jȩä̧cuä̧huä̧ i̧jȩcuä̧cho̧mȩ jubö, juhua'atäcu ki̧'ä̧cuä̧huä̧mä̧ tejähuore adiu kä̧dȩpö̧nä̧ cuoa'a jä̧'i̧nö̧'a̧nö̧. ² Ko̧ro̧jä̧ ttö̧ja̧mä̧ adihuomenä jȩ'cu̧mä̧ tottäcuotö, ja̧'hua̧ta̧nö̧ hueähuä ruhuä'i̧nä̧ cusärö tottäcuotö. Cuimimä jareö cuimi o̧ttä̧cua̧jä̧, ja̧u̧ cui̧mi̧mä̧ TÖ̧Ä̧NÄ̧HUA̧TÄ̧ ȩmö̧ o̧ä̧cua̧. ³ Ja̧'hua̧ta̧nö̧ TÖ̧Ä̧NÄ̧HUA̧ u̧mö̧nä̧mä̧ kä̧cua̧'a̧ puttähuä juiyö a̧'cua̧cuähuä, juhuata'atäcu kä̧cua̧'a̧ Dios u̧mö̧nä̧mä̧ ji̧yȩtȩ jueö jähuä cäyuhuä'ca jä̧'i̧nö̧'a̧nö̧ jö̧. ⁴ Ucurumä pättöjuyäcuotö "Icuicuaju" jö̧nö̧mä̧, ja̧'hua̧ta̧nö̧ rȩjȩ'i̧nä̧ ttö̧ja̧ "to̧ä̧jä̧" jö̧nö̧mä̧, ja̧'hua̧nö̧ ja̧ jueimä, juȩnȩmä̧ ottäcuomä "Ttöchöjö'cönä jö̧mä̧ juȩnȩtä̧ ka̧'a̧ ja̧'hua̧ta̧nö̧ rȩjȩ'i̧nä̧ ttö̧ja̧cuä̧jä̧" jö̧nä̧tä̧, juhua'amä TÖ̧Ä̧NÄ̧HUA̧TÄ̧ jä̧cua̧'a̧ttö̧ ucuru pä̧huä̧cui̧'ö̧mä̧, ja̧'hua̧ta̧nö̧ rȩjȩmä̧ jahuätucutä ö̧ja̧'a̧ttö̧. ⁵ Isopä'iönä̧, ya̧tȩ mu̧ä̧yä̧ irecua mu̧äyaju to̧'a̧ jä̧'i̧nö̧'a̧nö̧, ucu cui̧tti̧mu̧mä̧ jahuata̧'nö̧tä̧ jarotti'äcuotö ucurumä̧, ja̧hua̧ta̧'a̧nö̧ ö̧jä̧cuo̧ju̧ i'quiräyäjuru ku̧nä̧rö̧ esehuä'inä'anötä, ucu cui̧'ä̧nä̧hua̧ DI̧O̧SMA̧ ȩsȩhua̧cua̧ u̧cu̧ru̧mä̧. ⁶ Jerusalen ötahuiyä tto̧'ȩpä̧rö̧'o̧bi̧ ju̧'tta̧mä̧ to̧'ä̧rä̧cuä̧huä̧ ttö̧ja̧rö̧ ku̧ni̧nö̧sä̧ to̧ttä̧ra̧pä'ö; mo̧ro̧'i̧nä̧ , yodo'inä̧ 'corunä̧mä̧ ji̧yä̧cu̧'ä̧to. Ucutu cui̧ä̧nä̧hua̧rö̧ cua̧'cua̧ huȩnä̧rö̧ jȩpu̧ 'chä̧tö̧mä̧ cä'conä̧mä̧ cäcuädi'ätucuo. ⁷ Ja̧'u̧ 'cuächia'anä̧mä̧ ja̧'a̧tä̧mä̧ to'cuätucuo ja̧u̧tä̧ jerusalen ötahuiyä pä'äji'tä̧'a̧nö̧ jaretö icuomȩ jubu jahuata'a̧nö̧ pi̧jä̧ rȩjȩttö̧mä̧ tu̧ru̧hua̧rö̧ eseu ra̧huä̧huä̧ ra̧cuä̧tu̧cua̧ja̧. ⁸ TÖ̧Ä̧NÄ̧HUA̧ u̧huo̧jua̧'a̧nä̧ u̧mu ujurucu cäepu päinö: '' isopä'önä chi̧yi̧yä̧cua̧sä̧ ttaboyotörömä ttu̧cuȩ cuähuä u̧huȩju̧ttö̧mä̧. Ko̧ro̧ jä̧ttö̧ ichinätö̧mä̧ ucutu cuaditinä tucuoya jareoya vinottö̧mä̧ ttahuiyäcuotö. ⁹ Ja̧'hua̧nö̧ ja̧'a̧ttö̧ jitö ttö̧cuȩ cuähuä kö̧nä̧tö̧mä̧, ttucuäcuotö ja̧'hua̧nö̧ ja̧'a̧nä̧ TÖ̧Ä̧NÄHUA̧RÖ̧ ttesehuäcuotö, ja̧'hua̧ta̧'a̧nö̧ jitö uva u̧huä̧ju̧ ca̧ca̧tä̧tö̧mä̧, ttähuäcuotö vino isoya CHI̧Ä̧NÄHUA̧ surojö jui̧a̧ ojusode äcattö. ¹⁰ ¡Ichätucui, apatiyä ko̧mecu̧ ichätucui! ¡ttö̧ja̧ ttö̧mänä jo̧menö̧ jȩpu̧ aditö ku̧nätu̧cui̧! ¡adittö, aditö ku̧nä̧tu̧cui̧ mä̧nä̧! ¡inähuiyä pporö icuätucui! ¡cäepu ku̧nä̧tu̧cui̧ bandera'isä̧ta̧ tottä pe'ö pi̧ja̧ ruhuäcuiyänä ca̧cuä̧tö̧! ¹¹ Topätucui, TÖ̧Ä̧NÄ̧HUA̧MÄ̧ pi̧jä̧ ruhuäcuiyä pa̧ja̧cu̧nä̧ ji'äu: "Sión ittijurumä ji'ähuätucui: ¡Topätucui, ucuru surojöttö ku̧ji̧pö̧nä̧ ppä'ädö täcö ichö! Toppätucui, iyäcu cuȩmä̧cuȩmä̧ ja̧u̧nä̧tä̧ ka̧'a̧, ja̧'hua̧ta̧nö̧ i̧yä̧cuȩmä̧ ä'canä ji̧ä̧huä̧cua̧jä̧". ¹² Juätömä o̧ttä̧cua̧jä̧: "Ttö̧ja̧ surojö jui'ätömä TÖ̧Ä̧NÄ̧HUA̧TÄ̧ ppä̧di̧nä̧u̧ ja̧'a̧,"Ju̧huȩnȩmä̧ ottäcuome "Pä̧huä̧ ttuhuähuome; jja̧u̧ ötahuiyämä icuicuocome jö̧nä̧tä̧.