¹ Topittö, TÖ̧Ä̧NÄ̧HUA̧ u̧mö̧mä̧ bȩo̧co̧mö̧ ja̧'a̧ ucuturu ppäda pä'ömä, ä̧ja̧'i̧nä̧ järiyähuocö ä̧ju̧cu̧ juiya pä'ömä. ² Ucutu surojö jȩ'cuä̧tu̧cu̧mä̧, ja̧'hua̧nö̧ ja̧jjueimä Diosttötä 'quȩ'i̧pä̧chi̧nä̧tö̧jä̧ ja̧'hua̧ta̧nö̧ ucutu surojö jȩ'cuä̧tu̧cu̧mä̧ I'ä to'cu juiyätucunä̧tä̧ 'quȩ'ȩpö̧ icuinä̧u̧jä̧ ja̧'hua̧ta̧nö̧ ä̧ju̧cu̧ juiyönä̧tä̧. ³ Ja̧'hua̧nö̧ ja̧'a̧ cu̧mö̧tu̧cmä̧ ttucuotä tuhuecuächina'a cudo'chetucu'i̧nä̧ surojötä ja̧'a̧, cuätucunä̧mä̧ yaparetä ucuocuätöjä ja̧'hua̧ta̧nö̧ cui̧nȩtu̧cu̧mä̧ surojötä ucuocua'a. ⁴ Ya̧tȩ'i̧nä̧ adihuomenä jȩä̧cuä̧huä̧mä̧ huopocö ja̧'hua̧ta̧nö̧ ya̧tȩ'i̧nä̧ isopäi'önä huȩnȩ jähuänämä ppäda pä'ömä a̧mö̧cuädocö. Jahuätömä micuähuocö huȩnȩtä̧ tta̧'cua̧ huȩnä̧rä̧tö̧ ja̧'hua̧ta̧nö̧ yaparetä ucuocuätö; jahuätömä surojötä muchotö juo'ätö ja̧'hua̧ta̧nö̧ surojötä o'cajuo'ätö. ⁵ Jahuätö ä̧ca̧ iä niyecuä rötätö ja̧'hua̧ta̧nö̧ ä̧hui̧yo'ö äcoppatä äcätö. Ya̧tȩ ja̧u̧ iä cumä 'coru juo̧ä̧chä̧cua̧ ja̧'hua̧ta̧nö̧ jiyäte tte'ö cuicuäjittömä̧, ä̧ca̧ iyättömä niyö ä̧ca̧tö̧tä̧ rä'opätö. ⁶ Juätö tti̧jȩta̧mä̧ ttö̧'ca̧tä̧hua̧ pä'ömä juiyäcua'a, ja̧'hua̧ta̧nö̧ ji̧yȩtȩ aditähuämä amönä pa̧ja̧tö̧'i̧nä̧ ttoecu juiyönä. Juätö taditähuä surojötä jä̧cua̧'a̧ ja̧'hua̧ta̧nö̧ suronä jȩttö̧mä̧ juätö ttu̧mä̧ ka̧'a̧. ⁷ Ttö̧jä̧pö̧mä̧ surojöra̧'a̧cu̧ jo̧ä̧u̧ ja̧'hua̧ta̧nö̧ suronä jȩpo̧co̧tö̧rö̧ cuä'äu tticua pä'ö jopätö. Surojö jȩtta̧ pä'ötä a̧mö̧cuädätö; rö̧ä̧nä̧ surojötä jȩpö̧ si'epö icuätö. ⁸ Jahuätömä unichä̧rö̧ kä̧cuä̧huä̧mä̧ jerupätö ja̧'hua̧ta̧nö̧ tta̧mö̧cuädömä adihuomenä̧mä̧ a̧mö̧cuädocotö. Jahuätömä jueö huȩnȩmä̧ jȩpo̧co̧tö̧; yotöte juȩnȩnä̧ 'chä̧tö̧mä̧ huȩnȩ juiyönä kä̧cuä̧huä̧mä̧ jerupätö. ⁹ Ja̧'hua̧nö̧ ja̧'a̧ttö̧ adihuomenä jȩä̧cuä̧huä̧mä̧ ujututtömä ototä ka̧'a̧. Ujutumä tȩya̧u̧tä̧ tta̧tä̧ra̧'a̧nä̧ yo̧u̧tä̧ topätöjä; juäjunä jö̧tä̧ ttösa'anä yo̧ö̧nä̧tä̧ 'chä̧tö̧jä̧. ¹⁰ Ujutumä ä̧to̧cä̧tö̧ jö̧nä̧tä̧ isode räbänä ti̧huä̧rä̧tö̧jä̧, jitö topocotö 'cua̧rö̧nä̧tä̧. Ujutumä dudupätöjä̧ mo̧ro̧ kä'co ni̧pä̧cha̧'a̧ jä̧'i̧nö̧'a̧nö̧tä̧, juruhuätö ttö̧'cä̧tȩttö̧mä̧ ujutumä 'coro juo'ächätö jö̧nä̧tä̧ huotöjä. ¹¹ Ujutumä osotö 'cua̧rö̧nä̧ 'chi̧yu̧pä̧tö̧jä̧ ja̧'hua̧ta̧nö̧ ajahuätöjä unucu 'cua̧rö̧nä̧; ujutumä adiu jȩä̧cuä̧huä̧ tta̧'ä̧rä̧tö̧jä̧, ja̧'hua̧nö̧ ja̧'a̧nä̧ yorö'iso juiya'a ppädatö pä'ömä, yorö'isotä ujututtömä ototä ka̧'a̧. ¹² Ja̧'hua̧nö̧ ja̧'a̧, ujutu rö̧ä̧nä̧ suronä jȩtö̧tä̧ i̧jȩcuä̧cha̧'a̧ ucu cuä'ca jo̧mȩttö̧mä̧ ja̧'hua̧ta̧nö̧ ujutu suronä̧ jȩtö̧tä̧ ja̧'a̧ ji̧ä̧huä̧rö̧mä̧ ja̧'hua̧nö̧ jo̧mȩnä̧ suronä̧ jȩtö̧mä̧ huo̧juä̧huä̧tö̧jä̧. ¹³ Ujutumä ra̧huä̧ri̧pi̧nä̧tö̧jä̧ TÖ̧Ä̧NÄ̧HUA̧RÖ̧ ä̧ppö̧tä̧rö̧ ja̧'hua̧ta̧nö̧ Ja̧u̧ttö̧ 'cä̧'i̧pä̧chö̧tä̧. Ujutumä suronä jö̧tä̧ ucuocuinä̧tö̧jä̧ ja̧'hua̧nö̧ jo̧mȩnä̧ 'cä̧'i̧pä̧chi̧nä̧tö̧jä̧ ta̧mi̧so'quinä suronä ucuocutä ja̧'hua̧ta̧nö̧ yapare ucuocutä. ¹⁴ Adihuomenä jȩä̧cuä̧huä̧mä̧ o'ca'acutä ppa̧huä̧chä̧chi̧na̧'a̧ ja̧'hua̧ta̧nö̧ jueö huȩnȩmä̧ otonä̧tä̧ ka̧'a̧; isopäi'önä huȩnȩmä̧ 'cuä'ächi'ö pä̧cuä̧huo̧mȩttö̧ tto̧ȩpä̧ra̧'a̧ juhua'atäcu jueö huȩnȩmä̧ ichö juiyönä̧ ja̧'a̧. ¹⁵ Juäjunä kä̧cuä̧huä̧mä̧ ototä töipächina'a ja̧'hua̧ta̧nö̧ ya̧tȩ surojöttö 'cä̧'i̧pä̧chä̧ji̧rö̧mä̧ a̧mö̧nä̧ pa̧ja̧tö̧tä̧ po̧ya̧ juo'ecu. TÖ̧Ä̧NÄ̧HUA̧MÄ̧ toinä̧cu̧ ja̧'hua̧nö̧ jo̧mȩnä̧ TÖ̧Ä̧NÄ̧HUA̧MÄ̧ kö'cocu pinö adihuomenä jȩä̧cuä̧huä̧ juiyiyäcu. ¹⁶ Ja̧u̧ toomenä ya̧tȩ ubo'i̧nä̧ toina'a ja̧'hua̧nö̧ ji̧yä̧cu̧ jä'epö ä̧ju̧cui̧nö̧ ya̧tȩ'i̧nä̧ toa'a jä'epö ä̧ju̧cua̧ pä'ömä. Ja̧'hua̧nö̧ jo̧mȩttö̧ Öjonä Ja̧u̧cu̧ ki̧'ä̧cuä̧huä̧ huȩnȩ i'cächäji juhua'atäcu jueö huȩnȩmä̧ 'chu̧'ä̧ri̧nö̧. ¹⁷ Ja̧u̧mä̧ jueö jähuä 'ca̧tä̧cuähuäya jä̧'i̧na̧'a̧nö̧ jö̧nä̧ rö̧ni̧nö̧ ja̧'hua̧ta̧nö̧ uyunämä ki̧'ä̧cuä̧huä̧ cäyuhuä'ca huȩni̧nö̧. Ja̧u̧mä̧ a̧mö̧nä̧ pa̧ja̧tö̧ 'ca̧tä̧cuä̧hui̧nö̧ micuä jö̧nä̧ jȩä̧cuä̧huä̧ ja̧'hua̧ta̧nö̧ ä'cuoyäcuähuä ȩpö̧ ca̧tä̧cuä̧huä̧ta̧ jä̧'i̧na̧'a̧nö̧ jö̧nä̧. ¹⁸ Ja̧u̧mä̧ jȩttä̧ji̧ micuämä mitinö̧ rö̧ä̧nä̧ ra̧huä̧rö̧ ro̧'ȩpö̧ aboiyotörömä, micuä'i̧nä̧ jȩpö̧ aboiyotörömä, kä'co o̧sa̧nä̧ kä̧tö̧rö̧'i̧nä̧ jȩtti̧nö̧ micuämä ro̧ȩpä̧cua̧. ¹⁹ Ka̧hua̧ ma̧ä̧cha̧'a̧cu̧ttö̧mä̧ TÖ̧Ä̧NÄ̧HUA̧ i̧mi̧mä̧ yettecuäcuotö ja̧'hua̧ta̧nö̧ ka̧hua̧ räopa'acuttömä usärötä kä̧cua̧'a̧; ja̧'hua̧nö̧ ja̧'a̧ ja̧u̧mä̧ tti̧ȩpö̧ ȩmi̧pa̧'a̧ jä̧'i̧nö̧'a̧nö̧ i̧chä̧cua̧, Dios amiyuppa kiopa'anä̧tä̧. ²⁰ Ya̧tȩ ppädäcuähuä i̧sa̧ i̧chä̧cua̧ Siónra̧'a̧ttö̧ ja̧'hua̧ta̧nö̧ Jacob ahuaruhuä suronä jȩtti̧nö̧ cä'ädi'ö ppa̧ttä̧cho̧mȩnä̧tä̧ pä'ötó TÖ̧Ä̧NÄ̧HUA̧MÄ̧. ²¹ Ttö chutö'cömä, pi̧yȩ ja̧'a̧ jahuätucu Ttö esecu chucuocumä, pä'ö TÖ̧Ä̧NÄ̧HUA̧MÄ̧-- Ttö cha̧'cua̧ru̧hua̧mä̧ ucutunä kö̧ ja̧'hua̧ta̧nö̧ chi̧huȩnȩ'i̧nä̧ cuätucunä ku̧ni̧nö̧sä̧, cui̧tti̧mö̧tu̧cu̧ ttättö'i̧nä̧ töipächoca'a jä̧cua̧'a̧ ja̧'hua̧ta̧nö̧ juhua'a yabo tti̧tti̧mö̧ttö̧'i̧nä̧, pä'ö TÖ̧Ä̧NÄ̧HUA̧MÄ̧ jitä pä̧nä̧'i̧nä̧ ja̧'hua̧ta̧nö̧ 'cuäopönä̧tä̧.