¹ Adiu jȩpö̧mä̧ to'e'ächö, ja̧'hua̧nö̧ ja̧'a̧ ja̧u̧rö̧ ya̧tȩ'i̧nä̧ a̧mö̧cuädocö jä̧cua̧, ja̧'hua̧ta̧nö̧ Ttö̧ja̧ jȩtä̧cuo̧tö̧jä̧ pä'ö ttesecuinömä 'choicuäcua'a, ja̧'hua̧nö̧ ja̧'a̧nä̧ ya̧tȩ'i̧nä̧ huo̧jui̧'o̧cö̧ jä̧cua̧ adiu jȩpö̧rö̧ surojö 'choipo'ächa'amä. ² Huȩnȩ juiyönä do'ächätömä, 'coru pätti'omenämä huȩnȩ juiyönä̧tä 'cuä'ächi'ö pä̧tö̧, jitö jueö huȩnȩnä̧ 'chä̧tö̧mä̧. ³ Ja̧'hua̧nö̧ ja̧'a̧nä̧ Märi isaju ki̧tti̧mö̧'i̧nä̧, kirecuo pocöcu jȩpä̧'chä̧ju̧ ki̧tti̧mö̧'i̧nä̧ ja̧'hua̧ta̧nö̧ ka̧mö̧nä̧ pa̧ja̧tö̧ kidepä iyä'chäcuähuäju ki̧tti̧mö̧'i̧nä̧ pocu ichätucui. ⁴ ¿Dijä̧ttö̧ ucututtö eseu ya̧'a̧huȩ'ö̧mä̧? ¿Cuätucu rö̧'ä̧dö̧ cuine ineränö jȩpä̧'chä̧tö̧mä̧ dirö ya̧cuä̧huȩ'ä̧tu̧cua̧'a̧ttö̧? ¿Ucutumä pä̧i̧'i̧nä̧ yapareäcuähuä'i̧nä̧ i̧tti̧mö̧mä̧cö̧jä̧? ⁵ Ucututä ucuo te'ähuätöjä robles dau'i̧nä̧ dauhuiyä ojiyä ja̧'tu̧huö̧'i̧nä̧ dȩa̧'a̧ a'ömä, ucutumä cui̧tti̧mö̧tu̧ru̧ ajiya'i̧nä̧ joomettö̧, inähuä isäju dȩa̧'a̧ttö̧ cuä'äu icuätöjä. ⁶ Pä̧mä̧roppä päi'omȩttö̧ ajiya räopoyamä ucuru cuieruhuätucu jähuä ja̧'a̧nä̧ iyähui'ina'a. Ja̧u̧mä̧ ucutu cuesehuätu ja̧'a̧. Ucutumä cua̧huȩtu̧cu̧ ja̧u̧nä̧ totopinä̧tö̧jä̧ ja̧'hua̧ta̧nö̧ u̧huä̧ju̧ otetä iyätöjä. ¿Pi̧yȩ jȩ'cuä̧tu̧cu̧mä̧ chesehua'anö ja̧'a̧ tä̧ji̧? ⁷ Ucutumä aditäjättöjä cuätucuäcomemä mu̧ä̧'ca̧ huä̧mȩ; u̧cu̧tu̧'i̧nä̧ 'chä̧jä̧tö̧jä̧ ju̧hua̧'a̧ mu̧'ä̧'ca̧ huä̧mȩ ku̧i̧cu̧ cui̧ya pä'ö. ⁸ Äpate abo ja̧'hua̧ta̧'a̧nö̧ do'ächäcuähuome ucutumä ru̧tä̧ttö̧jä̧ a̧'cua̧juhuä̧; u̧cutu̧mä̧ ja̧ro̧'cui̧'i̧nä̧tu̧cuä̧cu̧sä̧, cö̧sä̧'u̧ i̧cui̧nä̧tö̧jä̧, ja̧'hua̧ta̧'a̧nö̧ 'chä̧'a̧chi̧nä̧tö̧jä̧; jȩpi̧nä̧tö̧jä̧ cuä̧'ä̧tu̧cuo̧mȩ'i̧nä̧ cä̧huȩ'u̧nä̧, Juä̧tu̧cu̧'i̧nä̧ ȩsȩcui̧nä̧tö̧jä̧; cuä̧tu̧cuo̧mȩ'i̧nä̧ ku̧'qui̧nä̧tö̧jä̧; Ucutumä topinätöjä cu̧ju̧nä̧rä̧tu̧cu̧. ⁹ tta̧'cua̧ huȩnȩri̧nä̧tö̧ u jä̧huä̧; ja̧'hua̧ta̧'a̧nö̧ ru̧'ä̧nä̧ a̧mȩ'u̧. huȩ'i̧nä̧tö̧ huä̧huo̧tö̧rö̧ oto; ucutumä mejehuäjättöjä hua'are rejunä. ¹⁰ 'cuächi'inätö oto cuächö ttihuä ja̧'a̧, ja̧'hua̧'a̧nö̧ ja̧'a̧nä̧ u̧cu̧tu̧mä̧ yo̧ri̧so̧ pä'ocöttö pinätöjä; juiyo surojö̧. U̧cu̧tu̧mä̧ po̧cui̧pi̧nä̧tö̧jä̧ cä̧cuä̧huä̧ cu̧mu̧tu̧nä̧; ja̧'hua̧'a̧nö̧ ja̧'a̧nä̧, u̧cu̧tu̧mä̧ yo̧ri̧so̧ 'cuä̧chi̧'o̧co̧ ttö̧jä̧, ¹¹ ¿Dirö cua̧'cua̧ rocuecua'attö? ¿Dirö yecuecuätucua'attö̧, yaparetö rö̧ä̧nä̧ suronä jȩpi̧nö̧rö̧, Ttörö'i̧nä̧ cua̧mö̧cuädätu juiyönä? Isopäi'önä̧tä̧ Ttö recuo mo̧ro̧ 'corujueinä ki̧nö̧sä̧, ucutumä täcö Ttörömä ye'ecuocotöjä. ¹² Adiunä̧ cu̧ji̧nö̧'i̧nä̧, o'cajuiyönä jȩ'cui̧nö̧'i̧nä̧ Ttötä ji̧dä̧huä̧cua̧sä̧, ja̧'hua̧nö̧ jidähua'anä̧ jahuätömä ppättädococu cuä̧cua̧jä̧. ¹³ Cu̧ä̧nä̧huo̧tu̧cu̧ o'ca cu̧ca̧ca̧ti̧nä̧tu̧cu̧ ppädatucuacu pä'ö huo'cuäcuotöjä. Ppättadajueimä isoppatä oto ȩpä̧cuä̧u̧jä̧, juättoppamä o'catoi'önä̧rö̧ oto ȩpä̧cua̧'a̧. Ja̧'hua̧nö̧ ja̧'a̧nä̧'i̧nä̧ Ttönä dajahuächö ki̧'i̧pö̧mä̧ i̧rȩjä̧ pä̧i̧'ä̧cua̧ ja̧'hua̧ta̧nö̧ Ttö chö̧jo̧mȩ mö̧ä̧'ca'i̧nä̧ ȩmä̧cua̧. ¹⁴ Ja̧'u̧mä̧ pä̧cua̧to: ¡ jare'önä jȩpu̧ aditätucuijo, aditätucuijo! ¡ juä̧mä̧ mä̧nä̧ pȩjö̧ pporö icuätucui o'cajuiyönä̧ inä̧nhuiyä tto̧'ȩpä̧rö̧ pȩjö̧ pporö icuätucui ttö chötahuiyä mä̧nä̧nä̧ ! '' ¹⁵ pi̧yȩ ja̧'a̧ bu''o ju'ttoju hua̧ pä̧'ö̧mä̧, chu 'cuä'opunä̧ i'co̧ nä̧' kö̧mä̧ ja̧'u̧ i̧mi̧mä̧ surojö hua'are jui̧'a̧:'' ttö̧mä̧ kö̧sä̧ ttu̧huä̧mȩnä̧ surojö juiyomȩ, chu a̧'cua̧ru̧hua̧ jacuänä ö̧jä̧cu̧ re, topu a̧ja̧hua̧ro̧nä̧ jahuata'a̧nö̧ tta'cua diyapätö tta'cua̧ru̧hua̧nä̧ ppa̧'a̧dö̧ a̧'cua̧rö̧ ttö̧ja̧pä'ö , jahuata'a̧nö̧ tta̧'cua̧ tta̧ȩcuä̧tö̧ tta̧mi̧'iso'quinä ppa̧'a̧dö̧ ttö̧ja̧ pä'ö. tta̧'cua̧ru̧hua̧nä̧ jareönä̧ ppä̧'a̧dö̧ a̧'cua̧rö̧ ttö̧ja̧pä'ö. ¹⁶ A̧'a̧ ttömä̧ 'cuä'opunämä̧ ji̧dä̧huä̧ri̧yä̧cua̧sä̧, ja̧hu̧ta̧'a̧nö 'cuä'opunä̧mä̧ chö̧ra̧huä̧ri̧yä̧cua̧sä̧to, jahua'a̧nö̧ jȩchö̧ttö̧mä̧ ttö̧ja̧sä̧ a̧'cua̧ru̧hua̧mä̧ chä'ca jö̧mȩ diyapächi'ö tahuipa'anö̧ ja̧'a̧, tta̧'cua̧rö̧mä̧ ttötä jȩpu̧ chiyinö̧. ¹⁷ surojö hua'aretä jȩpu̧ ttujuruhuina̧'a̧ttö̧, Ttömä̧ ra̧huä̧ri̧pi̧'ȩnö̧sä̧, jahuata'a̧nö̧ ro̧'dȩpi̧ȩnä̧'u̧; ttö chi'ä i̧nä̧ dajö icuahuinösä, ra̧huä̧rȩ'ö̧ ki̧ȩnö̧sä̧, ja̧hua̧'a̧nö̧ ja̧'a̧nä̧ ja̧'u̧mä̧ ami̧so'quinä̧ a̧mu̧cuä̧dö ma̧na̧mä̧ o'ca'acu ppa̧'a̧chö̧ icuinö̧. ¹⁸ Ucu cuamöcuädömä topä'ujösä, ja̧'hua̧nö̧ ja̧'a̧nä̧ aditö chi̧cuä̧cua̧sä̧. Ttömä o'ipö kä̧nö̧ tta̧'cua̧ ttȩmö̧nä̧ jȩpö̧ kä̧nö̧ ja̧u̧rö̧ ajahuätörömä po juottö ppä̧dä̧dcua̧sä̧, ¹⁹ ja̧'hua̧ta̧nö̧ Ttömä ttättö u̧huä̧ju̧ rä̧dȩpä̧cua̧sä̧. HUȩnȩ juiyönä kä̧cuä̧huä̧mä̧ jitö oto kä̧tö̧rö̧ kä̧cua̧'a̧ ja̧'hua̧ta̧nö̧ jitö tö'cönä̧nö̧ kä̧tö̧rö̧'i̧nä̧ pä'ötó TÖ̧Ä̧NÄ̧HUA̧MÄ̧, Ttö̧ötä aditö chicuäcuotö. ²⁰ Ja̧'hua̧nö̧ ja̧'a̧nä̧ suropätömä aje rö̧o̧to ppahua'a jä̧'i̧nö̧'a̧nö̧ huotö, yorö'iso ttö̧jä̧mä̧do̧ca̧'a̧tä̧, juoya ajiyamä idicuähua jö̧nä̧tä̧ juoächa'a. ²¹ Suronä jȩpä̧tö̧rö̧mä̧ huȩnȩ huiyönä kö̧cuä̧huä̧ juiya'a. Pä'ötó Diosmä.