¹ Ä̧ju̧cui̧ pi̧yȩ, Jacob ojusode, ju'ätö huo̧ttä̧'u̧mä̧ Israel i̧mi̧nä̧, ja̧'hua̧ta̧'a̧nö̧ rä̧bȩhui̧nä̧tö̧ Juda ahuaruhuä o'cötö; ucutumä TTÖÄNÄHUÄ ahuaruhuä pä̧ttä̧u̧jä̧ ju̧hua̧'a̧mä̧ jä̧'ȩpä̧ttö̧jä̧ Israel TTÖÄNÄHUA DIOS-RÖ, ja̧'hua̧'a̧nö̧ ja̧'a̧nä̧ i̧so̧ ja̧'a̧nä̧mä̧'cö̧ ja̧'hua̧ta̧'a̧nö̧ pätetö päjita'anö-mäcö. ² Ja̧'hua̧'a̧nö̧ ja̧'a̧nä̧ juä̧tö̧mä̧ o'ähuätö jitötä ttöja̧jä̧ surojö juiyönä cä'epu cu̧nä̧huo̧mä̧ ötahuiyöä ja̧'hua̧ta̧'a̧nö̧ ucu'o teähuätö Israel ttöja̧ TTÖ̧Ä̧NÄ̧HUA̧ DIOS-RÖ. Curä RU̧HUA̧ pä'ö mi̧cua̧ I̧MI̧MÄ̧. ³ TTÖ̧MÄ̧ pä'inösä 'coromä mo̧ tä̧bocuttä; ja̧u̧ TTÖ chätö rä'opinömä, ja̧'hua̧ta̧'a̧nö̧ TTÖ ttu̧huo̧hua̧ pä'ö jȩchi̧nö̧mä̧; juȩnȩ o'ca'a-mä TTÖTTÄ jȩpi̧nö̧sä̧, ja̧'hua̧ta̧'a̧nö̧ juä̧tö̧mä̧ 'cuä̧'o̧pu̧ i̧chi̧nä̧tö̧, ⁴ Ju̧hua̧'a̧mä̧ TTÖMÄ huo̧jui̧nö̧sä̧ u̧cu̧ru̧mä̧ pä̧'i̧cua̧ pä'ömä, cu̧ru̧pä̧'cä̧to̧ cui̧dȩpä̧mä̧ 'qui̧yö̧nä̧ co̧rä̧'u̧o̧na̧ jä̧i̧nö̧'a̧nö̧, ja̧'hua̧ta̧'a̧nö̧ ucu cu'ocorämä bronce a̧'cua̧ru̧nä̧, ⁵ Ja̧'hua̧'a̧nö̧ ja̧'a̧nä̧, TTÖMÄ pä̧dä̧'cua̧sä̧ u̧cu̧ru̧mä̧ 'cuä̧'o̧pä̧cuä̧ ä̧'ca̧ji̧tä̧ TTÖMÄ jiähuinö̧sä̧ ucurumä, juhua'amä päcu juiya pä'ö. ¡TTÖ yapare chi'änähua jȩ'ä̧ja̧'a̧! ja̧'hua̧ta̧'a̧nö̧ TTÖ a̧'cua̧ju̧'ä̧ 'co̧di̧nö̧ ja̧'hua̧ta̧'a̧nö̧ TTÖTTÄ 'cha̧'cua̧ju̧'ä̧ co̧rä̧'u̧ ku̧i̧cu̧huä̧ huȩ'ä̧ji̧ pi̧yȩmä̧. ⁶ Ucumä pi̧yȩ ä̧ju̧cui̧nö̧jä̧; topi o'cajuiyönä pi̧yȩmä̧ isopäi'önä ja̧'a̧, ja̧'hua̧nö̧ ja̧'a̧ ucumä ¿Ttö isopäi'önä pädömä jȩpö̧ cuicuäcua'a? Jitä porö yabocumä pi̧yȩ jareö chi̧jȩpä̧cu̧jä̧, to'cu juiyönä dajö ku̧nä̧huä̧. ⁷ Ja̧'hua̧nö̧ ja̧'a̧ recuoca'atä, ja̧u̧ jähuämä uhuähuächi'äcua'a, ja̧'hua̧ta̧nö̧ pi̧yȩ pä̧nä̧mä̧ ja̧u̧ ötö'cömä ä̧ju̧cuo̧cö̧ pä'ijöjä, ja̧'hua̧nö̧ ja̧'a̧ttö̧ ucumä päcu juiyönä jä̧cua̧'a̧, A̧, ja̧u̧ työ'cömä huo̧jua̧sä̧. ⁸ Ucumä yorö'isotä ä̧ju̧cuo̧cö̧ pä'ijöjä; ucumä jerupinöjä; ja̧u̧ tö'cömä cuä̧ju̧cu̧ juiyönä̧tä̧ järiyähuächina̧'a̧ cuä̧ja̧mä̧. Ja̧'hua̧nö̧ ja̧'a̧ttö̧, Ttömä huo̧jui̧nö̧sä̧ ucumä juiyo ya̧pa̧rȩhua̧jä̧ pä'ömä, juhua'atäcu cuhuäpächinomettö kä̧mä̧dö̧ cu̧'ä̧i̧tä̧ kä̧'i̧jä̧cu̧jä̧. ⁹ Chimi öadihuänä̧ churuhuomä chi̧yi̧pä̧cua̧sä̧, ja̧'hua̧ta̧nö̧ Ttötä chuocuonä̧ chȩpä̧cua̧sä̧ si'epö chicuarö pä'ö. ¹⁰ Topittö, Ttötä töcö chi̧cui̧nä̧u̧, ja̧'a̧hua̧nö̧ ja̧'a̧nä̧ plata jä̧'i̧nö̧'a̧nö̧mä̧cö̧; Ttötä töcu icuinö̧sä̧ tta̧'cua̧ tta̧ttȩcu̧ ocuränä. ¹¹ Ttötä jähuänä, Ttötä jähuänä, jȩchä̧cua̧sä̧; ja̧'hua̧nö̧ ja̧'a̧ ¿Tocu jȩpö̧ chiyähua'anöttö̧ chi̧mi̧ ucuo juiyönä jȩtta̧'a̧nä̧mä̧? Ttömä yorö'iso ya̧tȩrö̧'i̧nä̧ iyocö chä̧cua̧sä̧ chusärömä. ¹² Ttörö jä'etucui, Israel ttö̧ja̧, Ttö huochäcumä; Ttötäsä; Ttömä ä̧cuo̧mȩnä̧'i̧nä̧ röjinä̧'i̧nä̧ hua̧sä̧. ¹³ A̧ chu̧mö̧mä̧ rȩjȩnä̧ 'chu̧huä̧rö̧nä̧ kä̧mä̧dä̧cua̧'a̧, ja̧'hua̧ta̧nö̧ chu̧mö̧ chu̧huo̧jua̧'a̧cu̧nä̧ i̧sä̧mö̧mä̧ mo̧ro̧jä̧ra̧'a̧cu̧ pperecuächäcua'a; Ttö huo̧chä̧u̧mä̧, yo̧mȩtȩnä̧ ttä̧rä̧mi̧'ä̧cuo̧tö̧. ¹⁴ ¡ O'cato'inä ucutu ji̧nä yo̧metȩ päiö ä̧ju̧cuä̧tu̧cui̧! ¿ Dijä̧ttö̧ ucututtö pi̧yȩ jiähuinömä? TÖ̧Ä̧NÄHUA̧ pääcutä iso jo̧ȩpä̧cua̧ Babilonia ttö̧ja̧rö̧ amucuädinömä. Juo̧u̧tä̧ TÖ̧Ä̧NÄHUA̧ i̧mi̧nä̧ ȩpu̧ isó jo̧ȩpä̧cua̧ Caldeo ttö̧ja̧rö̧'i̧nä̧. ¹⁵ Ttötä ucuocuinösä̧, a̧'a̧ juo̧u̧ru̧'i̧nä̧ ttötä ä̧tȩ pinösä̧, ttötä i'cächinösä̧ juo̧u̧ru̧mä̧, ja̧'hua̧nö̧ ja̧'a̧ttö̧ juo̧u̧mä̧ adiunätä̧ kädä̧cua̧. ¹⁶ Ä̧ju̧cui̧ pi̧yȩ, ttö chö̧ja̧'a̧cu̧ ichiö: ttö ucuocuinösä̧ yähuäinä ä̧cuo̧mȩnäji̧tä̧ päi'önä; ttö juȩnȩtä̧ chö̧jä̧cua̧sä̧ päö korojuei 'cuäopenä'inä. Ja̧'hua̧nö̧ ja̧'a̧ttö̧ TÖ̧Ä̧NÄHUA̧ ttörö hueinäcu̧sä̧ Ädihuä Ä̧'cua̧ru̧hua̧rö̧. ¹⁷ Ucuru ppädäcuähuä i̧sa̧, TÖ̧Ä̧NÄ̧HUA̧ Israel ttö̧ja̧ ttu̧ru̧hua̧ surojö jui̧'a̧mä̧ pi̧yȩ pä'ö: "Ttötä ja̧'a̧ CU̧Ä̧NÄ̧HUA̧TU̧CU̧ Diosmä, Ja̧u̧mä̧ ucutu jȩ'cuä̧tu̧cu̧ isojuoönä̧ huo̧juȩtö̧, ja̧u̧tä̧ ja̧'a̧ cui̧'cha̧ pähuächinä̧mä̧nä̧ o'ipömä̧. ¹⁸ ¡Ttö huedö huȩnȩ cucuotinöttö̧mä̧! Huȩnȩ juiyönä kä̧cuä̧huä̧'i̧nä̧ ja̧'hua̧ta̧nö̧ ttöäre rö̧ä̧chä̧cuä̧huä̧'i̧nä̧ aje huerächä'inö'a̧nö̧, juhua'atäcu ra̧huä̧pi̧jo̧mȩttö̧ ki̧'ä̧cuä̧huä̧mä̧ aje rö̧o̧to ppahua'a jä̧'i̧nö̧'a̧nö̧. ¹⁹ Cui̧tti̧mö̧mä̧ recuätö ttäcuotö rȩba̧ jä̧'i̧nö̧'a̧nö̧, ja̧'hua̧ta̧nö̧ cui̧tti̧mö̧ tti̧tti̧mö̧mä̧ rȩba̧ i̧sa̧ppȩ jä̧'i̧nö̧'a̧nö̧ ttirecuäcuotö; tti̧mi̧pi̧yä̧mä̧ 'to'opö icuähuoca'a si'epö'i̧nä̧ icuähoca'a jä̧cua̧'a̧ Ttö chä'ca jo̧mȩttö̧mä̧. ²⁰ ¡Babilonia ttö̧ja̧ rä'opächäctucui! ¡Caldeas ttö̧ja̧ dö'ecuächätucui! ¡Rö̧ä̧nä̧ rä̧mi̧pö̧nä̧ huopönö ji'ähuätucui! ¡Pi̧yȩ ttu̧huo̧juä̧cua̧'a̧nö̧ pi̧jä̧ o'cajuiyötä rättopönä jȩpi̧tö̧! Ji'ähuitö TÖ̧Ä̧NÄ̧HUA̧TÄ̧ u̧mö̧huä̧ya̧ Jacobrö mitö ȩmi̧nö̧mä̧. ²¹ Juätö a̧di̧ro̧co̧u̧ pinä̧tö̧ Ja̧u̧ de'a jui̧yä̧jä̧nä̧ oipa'anä'i̧nä̧; Ja̧u̧mä̧ inähuättö ajiya räopoya juätö ttäunä jȩpi̧nö̧; Ja̧u̧mä̧ inähuänä cuäomenä ja̧'hua̧ta̧nö̧ ajiya'i̧nä̧ räopina'a. ²² Suropätörömä̧ huȩnȩ juiyönä kä̧cuä̧huä̧mä̧ juiya'a, pä'ötó TÖ̧Ä̧NÄ̧HUA̧MÄ̧.