¹ Pi̧yȩ ja̧'a̧ TÖ̧Ä̧NÄ̧HUA̧ pojopö i̧ju̧ni̧nä̧cu̧ Cirorö päömä, u̧huo̧jua̧'a̧cu̧nä̧ i̧sä̧mö̧nä̧ Ttömä 'chu̧dä̧rä̧cu̧, ja̧u̧ ä'ca jo̧mȩttö̧ ttö̧ja̧rö̧ si'epö chicua pä'ö, ruhuotörö ttucuo ko̧sä̧huä̧cha̧ pä'ö juhua'atäcu ja̧u̧ ä'ca jo̧mȩttö̧ äpate badepa pä'ö, 'cuäopönä̧tä̧ bahuecua'atä bahuecua'a kä̧cua̧'a̧nö̧. ² Ttömä cuä'canä 'chi̧'chä̧cua̧sä̧ ja̧'hua̧nö̧ 'chä̧nö̧ mö̧ä̧'quiyö'i̧nä̧ chöyoretäcua̧sä̧; äpate bronce adicuatemä ppo̧u̧cu̧ päi'önä jȩchä̧cua̧sä̧ ja̧'hua̧ta̧nö̧ cuoräu o̧juä̧'i̧nä̧ ppo̧u̧cu̧ päi'önä 'torö chi̧cuä̧cua̧sä̧, ³ juhua'atäcu rö̧ä̧nä̧ micuäu huähuocö'i̧nä̧ ja̧'hua̧ta̧nö̧ daju rötähuä rö̧ä̧nä̧ micuä'i̧nä̧ chi̧yä̧cua̧jä̧ Ttötäsä TTÖ̧Ä̧NÄ̧HUA̧ cui̧mi̧nä̧ huopö Israel ttö̧ja̧rö̧ ttu̧ru̧hua̧mä̧ pä'ö cu̧huo̧juä̧cua̧'a̧nö̧. ⁴ TTÖ repechäcu Jocob'rö adihua pä'ö ja̧hua̧ta̧nö̧ TTÖTÄ pojopö chȩmi̧nä̧u̧ Israel, TTÖ huochä̧cu̧jä̧ ucu cui̧mi̧nä̧ chiya pä'ö ucuonä kä̧cuä̧huä̧, ji̧nä̧ cu̧huo̧jo̧co̧cu̧ cha'anä. ⁵ TTÖTÄ ja̧'a̧ TÖ̧Ä̧NÄ̧HUA̧MÄ̧, ka̧ra̧mä̧ toa'a; ka̧ra̧ Diosmä toa'a TTÖTÄ ja̧'a̧. TTÖTÄ ja̧u̧ curättö kiyönäcu̧ju̧nä̧ jȩchä̧cua̧jä̧, ji̧nä̧ cu̧huo̧jo̧co̧cu̧ cha'anä; ⁶ ttö̧ja̧ ttu̧huo̧jä̧cua̧'a̧nö̧ kä̧cua̧ räopomȩttö̧ kä̧mä̧dö̧ ja̧'hua̧ta̧nö̧ kä̧cua̧ mo̧ä̧cho̧mȩ ju̧bu̧ kä'ädö ka̧ra̧ Diosmä toa'a TTÖTÄ ja̧'a̧: TTÖTÄ ja̧'a̧ TÖ̧Ä̧NÄ̧HUA̧MÄ̧, ja̧'hua̧nö̧ ja̧'a̧ttö̧ ka̧ra̧mä̧ toa'a. ⁷ TTÖMÄ uhuäbeösä tȩa̧u̧'inä ja̧'hua̧ta̧nö̧ yo̧'ö̧'i̧nä̧; TTÖMÄ kächösä eseäcuähuä ja̧'hua̧ta̧nö̧ surojuoepö'inä hua̧sä̧; TTÖTÄ ja̧'a̧ TÖ̧Ä̧NÄ̧HUA̧MÄ̧, Pi̧yȩ o'cajuiyönä jȩpö̧mä̧. ⁸ ¡Ucuturu mo̧ro̧jä̧ttö̧, ajiya 'cua̧rö̧nä̧ mo̧ä̧cua̧'a̧! Ro̧ȩcuä̧mä̧. Rȩjȩtä̧ 'cuhuo̧'i̧'ä̧cua̧'a̧, tta̧'cua̧rö̧ttö̧ ki̧'i̧cuä̧ bacuá pä'ömä ja̧'hua̧nö̧ ja̧'a̧ttö̧ ro̧ȩcuä̧mä̧ ja̧u̧tä̧cu̧ bacuähua'a. TTÖ TÖ̧Ä̧NÄ̧HUA̧, hua̧tä̧ chu'äbe'inö pi̧yȩ todäre jö̧mä̧. ⁹ ¡Äyo ja̧u̧hue churutä aditinörö̧ pä'ä'chöhue, ja̧u̧mä̧ pi̧jä̧nä̧ttö̧ 'cä̧nä̧ri̧ju̧ jä̧'i̧nö̧'a̧nö̧ hua̧ 'cä̧nä̧ri̧ o̧yu̧ pi̧jä̧ttö̧ öänä ko̧cuo̧mȩ jä̧'i̧nö̧'a̧nö̧ hua̧! 'Cänariyumä cu̧ru̧tä̧ a̧di̧ti̧nö̧rö päa'anö: ¿Däje jȩa̧'a̧ jä̧ttö̧? ko̧ro̧nö̧mä̧ ¿Cuaditähuämä 'chuhuädäcuähuome juiya'a ponamä? ¹⁰ Äyo ja̧u̧hue jä'o pä'ömä: ¿Dä̧bu̧ chuhuäpächina'a̧ jä̧ttö̧? ko̧ro̧no̧mä̧ ja̧ju̧ru̧ pä'ömä, ¿Dä̧bu̧ ja̧'hua̧nö̧ cuhuäbecuinättö̧ttö̧? ¹¹ Pa̧'a̧nö̧ päinö TÖ̧Ä̧NÄHUA̧: Israel TTÖ̧Ä̧NÄHUA̧ uhuäbeö ku̧ni̧nö̧ surojö'inä jui̧'a̧mä: ¿Da̧ pe'ö jäcuepätucuättö chi̧tti̧mu̧rö̧ jȩchä̧cuȩ'i̧mä̧? ¿ Ucu huecuäcusä ttö chu̧mu̧nä̧ chadita pe'ö? ¹² Ttö chumutä̧ teödinö̧sä̧ moro̧ji̧yä̧nä̧mä̧ ja̧'hua̧nö̧ ja̧'a̧ttö̧ ttötä hueinö̧sä̧ si̧ri̧'co̧to̧rö̧mä̧ o'cato'inä rȩjȩtö̧rö̧mä̧. Ttötä aditinö̧sä̧ pi̧jä̧'i̧nä̧ ja̧'hua̧ta̧'a̧nö̧ jua̧jä̧ ttö̧tä̧ uhuäbe'inö̧sä̧ ttö̧ja̧sä̧rö̧'i̧nä̧. ¹³ Ttö̧mä̧ porädinö̧sä̧ Ciro-rö ucuotönö, ja̧hua̧ta̧'a̧nö̧ ttö̧ttä̧ cu̧mä̧nä̧ chö̧yo̧ro̧tä̧cua̧mä̧ o'cajuiyönä. Ja̧u̧mä a̧di̧ttä̧cua̧ TTÖ̧ chojusode bäreu ötahuiyä; ja̧u̧tä̧ o̧'ä̧cua̧mä̧ ka̧ra̧'a̧ ottipinäu̧ru̧ ppa̧huä̧dä̧cua̧'a̧mä̧ 'to̧ju isodenä tticha pä'ö́, juhua'amä mittömäcö ja̧'hua̧ta̧'a̧nö̧ pärätä iyömä̧cö̧, pä'ö TTÖ̧Ä̧NÄ̧HUA̧ curä i̧sä̧. ¹⁴ Pi̧yȩto TTÖ̧Ä̧NÄ̧HUA̧ pä'ömä: Egipto ttiäre rö'änä ttöju̧nä̧rö̧-mä̧ ja̧'hua̧ta̧'a̧nö̧ järe ttö̧ju̧nä̧rö̧ Etiopia ttö̧ja̧ juhuätö Sabeos ttö̧ja̧cu̧, u̧mä̧tö̧ tto̧'oto otopätö, tti̧cä̧chä̧cu̧'ottö ucu cu̧jo̧mȩcu̧. Juä̧ttö̧mä̧ ucu cu̧mu̧huä̧yo̧tö̧ ttä̧cottö. Juättömä co'ca'anä tti'chäco̧tö̧, co̧rä̧u̧sä̧ ra̧'a̧. Juhuä̧ttö̧mä̧ ja̧rȩyö̧ pätti'äcotö ucurumä ja̧'hua̧ta̧'a̧nö̧ ta̧ja̧huȩ'ä̧cua̧jä̧ pä'ö: " Isopä'iönä DIOS-MÄ̧ ucutäcu kö, ja̧'hua̧ta̧'a̧nö̧ toa'a ca̧ra̧-mä̧ ja̧u̧ jö̧'a̧nö̧ hua̧mä̧." ¹⁵ Isopä'iönä Ucutä ja̧'a̧ ya̧tȩtä̧ DIOS-MÄ̧ dajaumä, Irael TTÖ̧Ä̧NÄ̧HUA̧ DI̧O̧S-MÄ, ppädäcuä̧huä̧ i̧sä̧. ¹⁶ Jahuätö o'catoi'önä̧ dä'ä ttuttäcuotö ja̧'hua̧ta̧nö̧ ttucuo'i̧nä̧ jui'ätötä ttö̧jä̧cuo̧tö̧; jitö ya̧tȩ a̧'cuä̧juä̧'ca 'co̧'ö̧ aditätömä ttucuo jui'ätötä ttö̧jä̧cuo̧tö̧. ¹⁷ Ja̧'hua̧nö̧ ja̧'a̧nä̧ Israel ttö̧ja̧mä̧ Ja̧u̧ TÖ̧Ä̧NÄ̧HUA̧TÄ̧ rä̧huä̧pi̧jö̧ttö̧ rä'epö icu ppädäcuotö, ppädäcuähuä beipocö jähuänä; ucutumä yorö'iso dä'ä ttu'ocotö cuäcuotöjä ja̧'hua̧ta̧nö̧ cucuotucu'i̧nä̧ jui'ätömä jö̧nä̧mä̧. ¹⁸ Pi̧yȩ ja̧'a̧ TÖ̧Ä̧NÄ̧HUA̧ päömä, mo̧ro̧jä̧'i̧nä̧ pi̧jä̧'i̧nä̧ uhuäbe'inömä̧, isopäi'önätä̧ Dios ja̧'a̧, uhuäbe'inömä̧, Ja̧u̧tä̧ ja̧'a̧ 'quiyönä ku̧ni̧nö̧mä̧. Ja̧u̧mä̧ uhuäbe'ocö pinö to̧ä̧jä̧tä̧ ka̧ pä'ömä, ja̧u̧ ja̧jueimä ja̧huä̧jä̧nä̧ ttö̧ja̧cua̧ pä'ötä ku̧ni̧nö̧: "Ttötä ja̧'a̧ TTÖ̧Ä̧NÄ̧HUA̧MÄ̧, ka̧ra̧mä̧ toa'a. ¹⁹ Yo̧ä̧huä̧i̧nä̧mä̧ ucuocuocö pä'ijösä, dajahuächö kä̧cuä̧huo̧mȩttö̧mä̧cö̧; Jacob i̧tti̧mö̧rö̧mä̧ pä'ocö pinö̧sä̧: ¡Yaparetä cusätucuäcusä! TTÖTÄSÄ TTÖ̧Ä̧HUA̧MÄ̧, ucuotönö ucuocumä; Ttö pädömä adihuäjuei huȩnȩ ja̧'a̧. ²⁰ ¡Ca̧ca̧cu̧ pȩjä̧mö̧'cötö ichätucui! ¡Ji̧nä̧ yo̧mȩtȩ pä'i'ätucui, ucutu ttö̧ja̧ ttö̧'quȩtȩ dajahuächö kä̧cuä̧tö̧mä̧! Jahuätömä huo̧juä̧chä̧cuä̧huä̧mä̧ jui'ätö, jitö isotö tta̧cua̧juä̧ cue'ädätömä ja̧'hua̧ta̧nö̧ tätähuä o'ca surojöttö ttö̧ji̧pö̧nä̧ ppädoco'catä jä̧'ȩpä̧rä̧tö̧. ²¹ Pocu ichö ji'ähuätucuittö TTÖRÖ, jä̧ji̧ tochä i̧jȩpä̧tu̧cui̧ttö̧! yoräteunä ji'ähuätucui. ¿Tidejä̧ttö̧ i̧jȩpi̧nö̧mä̧ pi̧yȩ mo̧ täbocutä päi'önä? ¿Di jä̧ttö̧ ji'ähuinömä? ¿ TTö mäcö̧ ji̧na̧'a̧, CU̧Ä̧NÄ̧HUA̧TU̧CU̧? To̧a̧'a̧ ka̧ra̧ cu̧'ä̧nä̧hua̧tu̧cu̧ ttö'anö hua̧mä̧, CU̧Ä̧NÄ̧HUA̧TU̧CU̧ yaparehuocö ja̧'jua̧ta̧'a̧nö̧ pädäcuähuä i̧sa̧; TTö'anö hua̧mä̧ ka̧ra̧'i̧nä̧ yorö'iso toa'a. ²² Ttörö ppa̧'a̧chä̧tu̧cui̧ ja̧'hua̧nö̧ jö̧ttö̧tä̧ surojöttö cu̧ji̧pä̧cuo̧tö̧jä̧, pi̧jä̧ pa̧ja̧cu̧nä̧; TTÖTÄSÄ CU̧Ä̧NÄ̧HUA̧TU̧CU̧MÄ, ka̧ra̧mä̧ toa'a. ²³ TTÖ cha̧mo̧nä̧ jähuätä pä'äusä, ucuocusä ttötä jä̧cuä̧ pädinö̧tä̧, ja̧u̧mä̧ pärou'inä icuähuocö. TTÖ chä'cajometä ja̧rȩyu̧nu̧ pätti'äcuotö o'catoi'önä, ya̧cu̧pö̧nä̧ jȩtä̧cuo̧tö̧jä̧ pättäcuotö. ²⁴ ja'huätömä ttörö pättäcuotö: TÖ̧Ä̧NÄ̧HUA̧NÄ̧TÄ̧ ka̧'a̧ ki̧'i̧cuä̧mä̧ ja̧'hua̧ta̧'a̧nö̧ ttujuru'inä."O'catoi'önä ja'huätömä dä'ä ttuttäcuotö, Jitä ja̧u̧ru̧ ttöjö'cö juiyönä topätömä. ²⁵ TÖ̧Ä̧NÄ̧HUA̧NÄtÄ̧ o'catoi'önä Israél ttö̧ja̧mä̧ ttö̧ji̧pä̧cuo̧tö̧; ja'huätömä ttesehuäcuotö ja̧u̧ru̧.