¹ !Ucutu pi̧jä̧nä̧ kä̧tö̧ o'catoinä ichö adiunä ä̧ju̧cuä̧tu̧cui̧! Pi̧jä̧ su̧ppȩ päinä kä̧tö̧mä̧ ttä̧ju̧cua̧nö̧ ja̧'a̧, ja̧'hua̧ta̧nö̧ juä̧jä̧ttö̧ ka̧cu̧mä̧ o'cajuiyönä. ² TÖ̧Ä̧NÄ̧HUA̧MÄ̧ o'catoinärö̧ tti̧rȩji̧jä̧ pö̧nä̧ ka̧cuä̧tö̧rö̧mä̧ ami suräcu, ja̧'hua̧ta̧nö̧ umuhuäyotö o'catoinä̧cu̧ juiyo ami suräcu; JA̧U̧TÄ̧ siepö i̧cuä̧hua̧ o'cajuiyönä, JA̧U̧MÄ̧ iyö ku̧nö̧ cuä'ö tticua pä'ötä. ³ 'Coru juoächätö ttidepämä do'opötä icuähuäcua'a. 'Corujuoächätö ttidepä cuahuoppamä o'cajuiyönä̧tä̧ rä̧cua̧'a̧; ttucuojamä muä'quiyunä̧tä̧ 'cucuächäcua'a. ⁴ Mo̧ro̧jä̧ si̧ri̧'cö̧ o'catoinä mo̧ttä̧chä̧cuo̧tö̧, ja̧'hua̧ta̧nö̧ mo̧ro̧jä̧mä̧ to̧rä̧dö̧ icuähuäcua'a pergamino 'cua̧rö̧nä̧tä̧; ja̧'hua̧ta̧nö̧ si̧ri̧'cö̧mä̧ mo̧tä̧chä̧cuo̧tö̧, uva isojä mo̧ä̧cha̧'a̧ jä̧i̧nö̧'anö ja̧'hua̧ta̧nö̧ higos ojiyä jo̧mȩnö̧ te'ö higuera'ttö mo̧ä̧chä̧'a̧ jä̧i̧nö̧anö. ⁵ Mo̧ro̧jä̧ra̧'a̧ttö̧ chucurä'chu suädi'önä au cädomenä; Topittö, ja̧hua̧nö̧ jo̧mȩnä̧ Edom ötahuiyänä imeyȩhuä̧cua̧, Ttö si'epö chicuatö pä'ötä 'cä̧'ȩpö̧ chu̧ju̧ni̧nä̧u̧rö̧. ⁶ TÖ̧Ä̧NÄ̧HUA̧ ucurä'chumä ttucuojatä era'a ja̧'hua̧ta̧nö̧ huö̧mȩnä̧mä̧ ö̧a̧dehuatä ra̧'a̧, ovejas i̧tti̧ ucuoja'i̧nä̧ cabras ucuoja'i̧nä̧ era'anä̧ ovejas ubo ö̧jä̧cuorätenä̧mä̧ ö̧a̧dȩhuatä rö̧nä̧ra̧'a̧. Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ Bosrattö i̧sa̧rö̧ cuä'ö i̧cuä̧cua̧ ja̧'hua̧ta̧nö̧ Edom rȩjȩttö̧mä̧ rö̧ä̧nä̧ cuä̧huä̧cua̧. ⁷ De'a pä̧cä̧yu̧mä̧ jahuätucutä cuä'äu icuähuäcuotö ja̧'hua̧ta̧nö̧ pä̧cä̧yu̧ mö̧ä̧yotömä tä̧mö̧cu̧. Tti̧rȩjä̧mä̧ ttucuojattötä cu̧dä̧cua̧'a̧, ja̧'hua̧ta̧nö̧ rȩba̧ i̧sa̧ppȩmä̧ ttö̧a̧dȩttö̧tä̧ a̧drhuä̧cua̧'a̧. ⁸ Ja̧'hua̧nö̧ ja̧'a̧ ji̧yȩnö̧ mo̧ro̧mä̧ TÖ̧Ä̧NÄ̧HUA̧ ro̧ȩpa̧ pä'ö pätetö ku̧ni̧nö̧ ja̧'hua̧ta̧nö̧ ya'ute a̧'ȩnä̧mä̧ juȩnȩ Sionnä. ⁹ curä ttörohuähuina̧'a̧ttö̧ micuä jȩä̧cua̧. Edom ajehuiyämä̧ mä̧nihuatä pärohuächäcua'a rȩjȩ i̧sa̧ppȩmä̧ asufre i̧sa̧ppȩtä̧ päiäcua'a, ja̧'hua̧ta̧nö̧ rȩjȩmä̧ mä̧nihua jä̧'i̧nö̧'a̧nö̧ duähuatä pärohuächäcua'a. ¹⁰ Cuoäcua'a mo̧ro̧ yodo'i̧nä̧ 'cuä'oiönä̧; ocurä isoppamä̧ 'chahuächäcua'a 'cuä'opunä; 'teyu jä̧cua̧'a̧ ttahuaruhuä jua'a yabocu ttahuaruhuärö'i̧nä̧ juä̧jä̧ rȩjȩnä̧mä̧ toä̧cuä̧jä̧ ya̧tȩ pä'ö'i̧nä̧; yä̧tȩ'i̧nä̧ 'cuä̧'o̧pi̧yä̧cua̧ juȩnȩnä̧, 'cuä̧'opunä̧ yori'isotä päi'önä̧. ¹¹ Ja̧'hua̧nö̧ ja̧'a̧nä̧ de'a ruhuä ppu̧ä̧po̧'i̧tä̧ co̧ttä̧rä̧cuo̧tö̧ juȩnȩmä̧; juararatä ka̧ra̧ cuervotä ttä̧'ti̧yu̧ ppä'ö ttu̧huȩnä̧cuö̧tö̧ juȩnȩ. Ja̧u̧tä̧ odehuiyä mö̧'ä̧chö̧ toeino̧mȩ huämȩnä̧ korojui isappänä̧ tti̧ȩpä̧cua̧ i̧sä̧mä̧ huä̧mȩnä̧ ö̧'ä̧ta̧ pä'ömä̧ ja̧'hua̧nö̧ ja̧'a̧ cu'upäte surojuo'ächinö̧ pä̧ja̧cuä̧te'i̧nä̧. ¹² Ruhuo adiu hueä'ijätömä̧ juittäcuotö tturuhuo huetta pä'ömä̧, ja̧'hua̧ta̧nö̧ ruhuotö tti̧tti̧mö̧mä̧ micuähuocotö ttacuotö. ¹³ So̧ä̧'cuatä a̧ttä̧di̧'ä̧cua̧'a̧ ruhuodemä ja̧'hua̧ta̧nö̧ 'quiyönä ttoecuäbättömä̧ so̧ä̧'cuatä a̧ttä̧di̧'ä̧cua̧'a̧. A̧hua̧ri̧tö̧tä̧ ttö̧jä̧cuo̧mȩ juhua'atäcu ppi̧yu̧ tä̧mö̧tä̧ ttö̧jo̧mȩ jö̧nä̧ jä̧cuo̧mȩ. ¹⁴ De'a isotötä ja̧'hua̧ta̧nö̧ a̧hui̧ri̧tö̧ pä̧i̧cuä̧tö̧tä̧ ttö̧ja̧cua̧'a̧ po̧cui̧cuä̧cuo̧mȩ, juhua'atä cabrastö̧mä̧ de'a isotö ttö̧jä̧cuo̧tö̧ juätö ttö̧'cä̧tȩnä̧mä̧. Yodo ppi̧yu̧tä̧ ju̧huȩnȩmä̧ ttö̧jä̧cuo̧tö̧mä̧, ja̧'hua̧ta̧nö̧ juätö 'cuä'ächi'ö ttö̧jo̧mȩ jö̧nä̧tä̧ jä̧cuo̧mȩ. ¹⁵ Pepepeyutö̧mä̧ ttä̧'ta̧ huȩnö̧, ttiä'i̧nä̧ rötö tti̧tti̧mö̧rö̧ ttö'cäräcuotö ja̧'hua̧ta̧nö̧ tti̧tti̧mö̧ tta̧ttä̧rä̧cuo̧tö̧. Ja̧'hua̧ta̧nö̧ jä̧cua̧'a̧, juorötä po̧cui̧cuä̧cua̧'a̧ ppi̧yu̧ pa̧rȩtö̧ tti̧rȩcua̧mö̧cu̧ ttö̧ja̧cua̧'a̧tä̧ po̧cui̧cuä̧cua̧'a̧. ¹⁶ TÖ̧Ä̧NÄ̧HUA̧ i̧huȩnȩ huȩyu̧cuä̧ttö̧ ucuocui; pi̧yȩttö̧mä̧ yorö'iso hueyecuoca'a jä̧cua̧'a̧. Ya̧tȩ'i̧nä̧ irecua toönämä ki̧'o̧cö̧ jä̧cua̧; ja̧'hua̧nö̧ ja̧'a̧ i̧huȩnȩnä̧tä̧ hue'ö u̧ju̧ni̧nä̧cu̧, ja̧'hua̧ta̧nö̧ a̧'cua̧ru̧hua̧tä̧ ji̧nä̧ yo̧mȩtȩ päi'önä jȩpi̧nö̧. ¹⁷ Ttö̧jä̧cuo̧mȩmä̧ pätecuächönä icu toäcuähuänä̧ icu topinö̧ ja̧'hua̧ta̧nö̧ u̧mö̧nä̧mä̧ isappänä pa̧ja̧tö̧. Jahuätömä 'cuäopönätä̧ ju̧huȩnȩtä̧ ttö̧jä̧cuo̧tö̧; tti̧tti̧mö̧ juhua'a yabo tti̧tti̧mö̧'i̧nä̧ ju̧huȩnȩtä̧ ttä̧jä̧cuo̧tö̧.