¹ Ji̧yȩnö̧ mö̧ro̧mä̧ ja̧u̧ ttu̧ru̧hua̧ tti̧ä̧nä̧hua̧mä̧ ujurucu, jahuata̧'a̧nö̧ ö̧ä̧'i̧mä̧ ucurä'chunä̧ rö̧ȩpä̧cua̧ ähuettä leviatan pä'ö mi̧cua̧rö̧ täbocötä äcarö no̧ri̧ca̧nö̧ yu'cucanö̧ jȩpu̧ juiächö ma̧'i̧nö̧rö̧, jahuata'a̧nö̧ ja̧u̧mä̧ aje ri̧o̧to deähuoto dubora bu'o suro̧pa̧ ojuo da'ärö cuä'ö icuä̧cua̧do. ² Ji̧yȩnö̧ mö̧rö̧mä̧: jittate uva pättättö vino isoya räecuomȩttö̧ pi̧yȩ ra̧ttä̧cuo̧tö̧. ³ ''TTö, ja̧u̧ Ru̧hua̧, ttötä ja̧'a̧to surojö 'cuä'opu juiyönä̧ tta̧huä̧rä̧cuä̧huä̧ i̧sa̧mä̧; täcö ttötä ja̧'a̧ totopu jȩpu̧mä̧. Ttötä ja̧'a̧ mo̧ro̧i̧nä̧ yodo'i̧nä̧ ttotte'ö juiyönä tta̧'a̧ro̧mä̧ ya̧tȩ'i̧nä̧ jȩpu̧ icu surojuepa'acu. ⁴ ¡Ttömä̧ ra̧huä̧rö̧ ko̧cö̧sa̧, jäque'e ri̧ä̧nä̧, zarza dauhuiyä i̧na̧ so̧'ö̧ dauhuiyä i̧nä̧ ka̧cua̧hu̧e'e! ttömä̧ juätö chabo'iyotömä̧ rohuä'u 'cha̧ji̧sä̧; ttömä̧ juä̧tö̧ o'cato'inä̧rö̧ ca̧ca̧to̧'po̧'ö̧ ji̧nä̧ ji̧yutenä̧ rötopo'ö ocuränä̧ ku'icu chicua'anö̧ huotö; ⁵ ttöcu huȩnȩ jui̧yö̧nä̧ ttesecutömä̧ ttötä tta̧dä̧ra̧ja̧'u̧ jahuta'a̧nö̧ huȩnȩ jui̧ttöttömä̧; ucucumä̧ huȩnȩ jui'ätöjä pä'ö ttucuocuttömä̧. ⁶ Yodoji mo̧ro̧, Jacobttö ihuehui appiyä räopäcua'a; Israel ttö̧ja̧mä̧ tȩa̧ri̧cui̧'ö̧, ba'i'ö; jahuätömä ttu̧huä̧ju̧mä̧ pi̧jä̧ jä̧ttä̧jä̧ pa̧ja̧cuä̧chö̧nä̧ ttirecuächäcuotö." ⁷ ¿TÖ̧Ä̧NÄ̧HUA̧MÄ̧ ro̧'ȩpo̧cö̧ jä̧cua̧ ttaboiyotörömä Jacobcö, Israelcö aboiyotörö ro̧ȩpina'anömä̧? ¿TÖ̧Ä̧NÄ̧HUA̧MÄ̧ Jacobröcö, israelröcö jahuätö ttaboiyotörö cuä'ö tticuina'anömä? ⁸ Ro̧ttȩpa̧ pä'ö ku̧nä̧huo̧mȩ jubö ro̧ȩpä̧cua̧, Israel ttö̧ja̧rö̧mä̧ oto jue'ö icu; Ja̧u̧mä̧ co'epö i̧cuä̧cua̧ rö̧ä̧nä̧ kä̧ru̧'cohuoppanä̧, ka̧hua̧ räopa'acuttö mo̧ro̧ kä̧ru̧'cohuoppanä. ⁹ Pa̧'a̧nö̧ jȩo̧mȩnä̧tä̧, Jacob suronä jȩi̧nö̧mä̧ ro̧ȩcui̧yä̧cua̧'a̧, pi̧yȩ suronä jȩpö̧ ö̧ji̧nö̧ji̧nö̧ u̧huä̧ju̧ siehuächä pä'ömä: inähuiyättö 'ca̧ttö̧ adihuä o'ca i̧sa̧ppȩ tȩa̧ppȩ päiönä jȩpö̧ ja̧'hua̧ta̧nö̧ ppo̧u̧cu̧nä̧ pparö nu'cu'icu jȩpö̧, Asera isä'ca ki̧'i̧pö̧ juiyönä̧tä̧ ja̧'hua̧ta̧nö̧ adiu a̧mȩu̧ ku'icu iyähuome'inä kö̧ juiyähuä'anö. ¹⁰ Ötahuiyä jinomemä ttö̧ja̧ toächometä̧ ka̧'a̧, juä̧nȩ rehuätö ka̧cui̧nä̧tö̧'inä toa'a ja̧'hua̧ta̧nö̧ dea jui̧yä̧jä̧ jarottia'a jä̧i̧nö̧anötä̧. Juorötä cuänö kö̧ päcäyä i̧tti̧mä̧, ja̧'hua̧ta̧nö̧ juä̧nȩtä̧ ä'i'ö uhuä'che 'chäönö. ¹¹ Dau änajui̧yä̧ jopächomenä, ja̧u̧mä̧ te'chö i̧cuä̧huä̧cuä̧. Na̧ttö̧ ichi'ö ja̧u̧mä̧ ocuränä̧tä̧ ku tti̧cuä̧cuä̧, pitö ttö̧ja̧mä̧ huo̧jä̧chi̧o̧co̧tö̧. Ja̧'hua̧nö̧ ja̧'a̧ttö̧ uhuäbeinömä rȩrö̧jö̧nä̧mä̧ toiyä̧cua̧ jahuätörömä, ja̧'hua̧ta̧nö̧ aditinömä retopömä ppä̧di̧yä̧cua̧ jahuätörömä. ¹² Jiyȩnö̧ mo̧ro̧ pätecuächomȩnä̧ ja̧'u̧ TÖ̧Ä̧NÄ̧HUA̧ Eufrate ajettö rötädipu kä̧mä̧dö̧ ya̧mu̧ ote adiutä pojopu ttu̧ju̧na̧'pä'ö jȩttä̧'i̧na̧'a̧nö̧ jȩä̧cua̧ ajiya pä̧i̧cu̧nä̧ jurunä̧ ichä'ina̧'a̧nö̧ jä̧cua̧'a̧ Egiptottömä̧ ja̧'hua̧ta̧nö̧ ucumä̧, Israel ttöja̧, yä̧tȩ'i̧nä̧ ö̧ji̧pö̧ juiyönä ya̧tȩ pu̧nä̧ ca̧ca̧cuä̧cuo̧tö̧jä̧to. ¹³ Jiyȩnö̧ mo̧ro̧mä̧ trompeta pä̧i̧cu̧nä̧ pputta'a rä̧mi̧pcua̧'a̧, ja̧'hua̧nö̧ jo̧mȩnä̧ Asiria rȩjȩra̧'a̧ttö̧ rötädipu hua'ö icu kä̧nö̧ ttichäcuotöto, ja̧'hua̧ta̧nö̧ oto'o Egipto rȩjȩra̧'a̧ttö̧'i̧nä̧ ttichäcuotö, jahuätömä TÖ̧Ä̧NÄ̧HUA̧RÖ̧ ucuo tettähuäcuotö Jerusalén mö̧ä̧'ca surojö juiyottö̧.