¹ Topätucui, TÖ̧Ä̧NÄ̧HUA̧MÄ̧ rȩjȩ o'cajuiyö si'epö i̧cuä̧cua̧, toönä̧tä̧ päi'önä̧, rȩjȩmä̧ ttö̧ȩpä̧cua̧'a̧ ja̧'hua̧nö̧ jo̧mȩnä̧ juȩnȩ ka̧cuä̧tö̧mä̧ döttecuächäcuotö. ² O'catoi'önä̧tä̧ yo̧mȩtȩnä̧ ttichäcuotö, ötahuiyä ttö̧ja̧'i̧nä̧, sacerdote huotucu; ttu̧mö̧huäyotö'i̧nä̧ tturuhuotucu; ttu̧mö̧huäyotö nä̧tö̧'i̧nä̧ tturuhuotö nä̧tu̧cu̧; ȩmä̧huä̧ ttö̧ja̧'i̧nä̧ iyähuä ttö̧ja̧cu̧; pärätä pärohuätö'i̧nä̧ ttö̧'ä̧ro̧huä̧u̧cu̧; yabonä̧nö̧ ttiyatö pä'ö pärohuätö'i̧nä̧, mippotätucu. ³ Rȩjȩmä̧ o'cajuiyötä si'epö i̧cuä̧huä̧cuä̧jä̧ ja̧'hua̧ta̧nö̧ ka̧cu̧mä̧ o'cajuiyötä ȩmö̧ icuähuäcua'a; juhua'amä TÖ̧Ä̧NÄ̧HUA̧ pa̧'a̧nö̧ päina'attö̧. ⁴ Rȩjȩ jo̧ä̧jä̧mä̧ ja̧huä̧jä̧nä̧ ka̧cu̧mä̧ joächächa'a, ttö̧ja̧mä̧ ttujuruhua'anä, juiyupächätö, ttö̧ja̧ ttucuo ucuohuäjätömä toepächäcua'a. ⁵ Rȩjȩmä̧ ttö̧ja̧ suronä̧ jȩttö̧ttö̧ surojuoächa'a, juhua'a hueähuä huȩnȩ ttucuotocomettö̧, jȩtta̧ pä'ö hueähui'inö̧'i̧nä̧ ucuotocotö pinä̧tö̧ ja̧'hua̧ta̧nö̧ esecu ucuocuinö 'cuäopönä kä̧cuȩ'i̧nä̧ 'to'ocu icuinä̧tö̧. ⁶ Ja̧'hua̧nö̧ ja̧'a̧ttö̧ juä̧jä̧ rȩjȩmä̧ surojä̧jä̧ pä'ö ku̧nä̧huä̧jä̧tä̧ ja̧cua̧'a̧, Juȩnȩ ka̧huä̧tö̧ ttö̧ja̧mä̧ huȩnȩ huotö jö̧nä̧tä̧ to̧ttä̧cuä̧ö̧. Juä̧jä̧ rȩjȩnä̧ ka̧cuä̧tö̧mä̧ rȩjȩtä̧ u̧cui̧'ä̧u̧, ja̧'hua̧nö̧ jo̧mȩttö̧ a̧'u̧cu̧nä̧tä̧ ka̧cui̧pä̧tö̧. ⁷ Vino jareö'inä̧ joächächa'a, ja̧u̧ vinomä̧ surojuoächa'a, O'catoi'önä̧ 'ta̧misoquinä̧ esecuinö̧mä̧ tta̧'cua̧tä̧ tta̧huȩpa̧'a̧. ⁸ tteseunä̧ rä̧mipunä̧ yȩä̧huä̧'i̧nä̧ 'coruchi'ö ka̧mä̧da̧'a̧, ja̧'hua̧ta̧nö̧ pä'cäri jȩpö̧ tteseu'inä; lira pä̧i̧cu̧nä̧ 'porächö'inä̧ yabonö̧mä̧ rä̧mi̧po̧ca̧'a̧ jä̧cua̧'a̧. ⁹ Jahuätömä̧ täcö vino'i̧nä̧ ahuocotö ttäcuotö ja̧'hua̧ta̧nö̧ ra̧huä̧huä̧'i̧nä̧ ra̧'o̧co̧tö̧ ttäcuotö, juhua'atäcu ni̧yö̧ ajiya jitö ttahuoyamä̧ reoyatä jäcuoya. ¹⁰ Ötahuiyä suronä̧ jȩpö̧ ttö̧jö̧mä̧ siepö i̧cuä̧huä̧cuä̧; o'cajuiyönä ttoju odemä mi̧ȩcuä̧ra̧'a̧ ja̧'hua̧ta̧nö̧ juiya'a. ¹¹ Mä̧ni̧yä̧nä̧mä̧ ttajahuä'atä rä̧mi̧pa̧'a̧ ttahuoya a̧tti̧ poyanä; pi̧jä̧nä̧ kä̧nö̧ eseu ttöjäjimä beipä'chäu yo̧ö̧tä̧ jä̧u̧. ¹² Ötahuiyänämä juiya'a, ja̧'hua̧ta̧nö̧ apatiyä jinö'i̧nä̧ juiya'a po̧ö̧cu̧nä̧tä̧ pparuhuächinä̧'a̧. ¹³ Pa̧'a̧nö̧tä̧ ja̧cua̧'a̧ pi̧jä̧ o'cajuiyönä ttö̧ja̧ ttö̧jo̧cu̧ o̧du̧nä̧mä̧, olivo dau yä̧ö̧ tticua'a jä̧i̧nö̧anötä̧, uvas u̧huä̧ju̧ huä̧jö̧ o'ca'a isächa jä̧i̧nö̧anötä̧. ¹⁴ Ja'huätömä ra̧'ö̧nö̧ huottäcuotö TÖ̧Ä̧NÄ̧HUA̧ öadihuä, dä'ähuotättömä röänä eseunu huottäcuotö. ¹⁵ Ja̧'hua̧nö̧ ja̧'a̧nä̧, kä̧hua̧ räopa'acuttumä ttesehuäcuotö TÖ̧Ä̧NÄ̧HUA̧TÄ̧, ja̧'hua̧ta̧'a̧nö̧ dä'ähuoto kä'co i̧sä̧sa̧ttö̧mä̧ TÖ̧Ä̧NÄ̧HUA̧ öädihuätä huottäcuotö, Israél TÖ̧Ä̧NÄ̧HUA̧RÖ̧TÄ̧. ¹⁶ Ruhuäcuiyä pa̧ja̧cu̧na̧ ra̧ttö̧mä̧ ä̧ju̧cuä̧tö̧jä̧. "Ya̧tȩtä̧ ja̧'a̧ adihuä isamä! "Ja̧'hua̧nö̧ ja̧'a̧nö̧ tömä pä'inösä: " Rö̧ä̧nä̧tä̧ suronä jä̧cu̧sä̧, rö̧ä̧nä̧tä̧ suronä jä̧cu̧sä̧, tö hue! Yapare jȩpä̧tö̧mä̧ ji'ähuätömä yaparetä huotö; iso päi'önätä, yapäre jȩpä̧tö̧mä̧ adihuomenätä yapare jȩpä̧tö̧." ¹⁷ Jua̧jä̧ rȩjȩnä̧ ka̧cuä̧tö̧mä̧ tta̧huä̧rä̧u̧jä̧ yecuecuätucu'inä reju'inä ja̧'hua̧ta̧'a̧nö̧ cuä̧tȩcuä̧tu̧cu̧'i̧nä̧. ¹⁸ Ä̧ju̧cu̧ ye'ecueö jo'cuttömä macua̧chä̧cua̧jä̧ reju jacuätä, jua'attö räcuopomenämä cuätȩcuappanätä̧ cui̧ri̧pä̧cua̧jä̧. ja̧'hua̧nö̧ ja̧'a̧ttö̧ pi̧jä̧ttö̧ huetta pe'ö jȩpä̧tö̧'i̧nä̧ yettecui'acuotö moro̧ jä̧ttö̧ ajiya rö̧ȩnä̧ ichomenä. ¹⁹ Pä̧'i̧cu̧nä̧ tti̧ȩpo̧mȩna̧ 'toröhuipu pperecuächönä rȩjȩmä̧. ²⁰ Ttö̧ja̧sä̧ tä̧ä̧mu̧ jä̧i̧nö̧'a̧nö̧ jä̧cua̧a̧ rȩjȩmä̧ ja̧'hua̧nö̧ boreacuaa. Ja̧'hua̧nö̧ ä̧mä̧cö̧ ma̧ä̧chä̧cu'a̧a̧ ucutu suronä jȩ'cuä̧tu̧cu̧mä̧ ja̧'hua̧nö̧ ja̧'a̧ttö̧ ä̧rä̧mi̧yä̧cuȩi̧. ²¹ Rä̧bȩhuä̧cua̧'a̧ ji̧yȩnö̧ TTÖ̧Ä̧NÄ̧HUA̧ ö̧tä̧bo̧ttö mo̧ro̧ su̧ro̧da̧'u̧ru̧ ru̧huo̧tö̧ru̧ ju̧'to̧ju̧ isottörö, ja̧'hua̧ta̧'a̧nö̧ pi̧jä̧ rȩjȩ ru̧huo̧tö̧rö̧ pi̧jä̧tö̧. ²² Ju̧huȩnȩtä̧ ca̧ca̧cu̧ ttö̧jä̧co̧tö̧, kä̧rȩnȩ pä̧jä̧tö̧ rȩju̧nä̧-nä̧i̧nä̧, ja̧'hua̧ta̧'a̧nö̧ ttö̧'ä̧co̧tö̧ mu̧ȩcua̧'a̧ kä̧rȩnä̧ pä̧cuä̧huo̧mä̧; juȩnȩ o'ca'a recuó mo̧ro̧ jö̧mȩnä̧ ttö̧ttä̧bo̧ttä̧cuo̧tö̧. ²³ Ja̧'hua̧'a̧nö̧ ja̧'a̧ttö̧ yodo kähuamä yo̧'ä̧chi̧'ä̧cua̧'a, ja̧'hua̧ta̧'a̧nö̧ mo̧ro̧ kä̧hua̧'i̧nä̧ yo̧'ä̧chi̧'ä̧cua̧'a, ja̧'hua̧'a̧nö̧ ja̧'a̧ TTÖ̧Ä̧NÄ̧HUA̧ curä i̧sa̧ huȩ'ä̧cua̧ dea Sion-nä ja̧'hua̧ta̧'a̧nö̧ Jerusalen-nä'i̧nä̧, ju̧hua̧'mä̧ ö̧tahuiyä ttö̧jä̧ buo'isotö to'ta pä'ö TTÖ̧Ä̧NÄ̧HUA̧ ösärö.