¹ Yo̧mȩtȩ pamä̧roppä ötö'cö 'cuä'o̧päcue adiu pä'ö amu̧cuädö toinö̧: ¿Ti̧yȩ a̧mö̧cuädö ucutu o'cato'iönä odehuiyä dȩ'a̧'a̧ cui'̧chi̧nä̧tu̧cuä̧ttö̧? ² ¿Ötahuiyära̧'a̧ korojuei rö̧ä̧nä̧ rä̧mi̧pa̧'a̧ pä'ö ji̧na̧'a̧, ötahuiyä ttö̧ja̧ pä'cäri jȩtta̧ pä̧'ö̧ ji̧na̧'di̧? cuahuaruhuä hua'ö tticua pä'ömä̧ curä'chunä̧mä̧cö̧ ji̧na̧'a̧ ja̧'hua̧ta̧nö̧ juätömä̧ ttabo'iyotörö ttörohuähuomȩ kä'cottö hua'ö icuocotö pinä̧tö̧. ³ O'cato'iönä̧ ucutu curuhuotucu ji̧nä̧ jiyutenä̧ dö'ecuächinä̧tö̧, ja̧'hua̧nö̧ ja̧'a̧nä̧ 'chuttädinä̧u̧ 'po'obu yobute'inä̧ 'pottoca'atä; juätö o'catoi'önärö ji̧nä̧ jiyutenä̧ ca̧ca̧tö̧ ku̧no̧po̧'ö̧ 'chuttädinä̧'u̧, juätömä̧ täcö juiyo oto dö'ecuächinä̧tö̧jä̧ pätta'anä̧. ⁴ Jua'a yabocumä̧, ttö̧mä̧ pä'inö̧sä̧: ''Ttörömä̧ to̧'cuä̧rä̧tu̧cuä̧ttö̧, ttömä rö̧ä̧nä̧ rettö chajahuäcua̧sä̧ barahuächi'äcu; adiunä̧ pä'ö'i̧nä̧ teyodö jicuähuättö ttö chidepiyu ttö̧jä̧ tti̧tti̧mö̧ nä̧tö̧ttö̧cö̧ si'epu tticuäji ucuocumä̧.'' ⁵ Ko̧ro̧nö̧ mo̧ro̧mä̧ pätecuächa'a recuätö TÖ̧Ä̧NÄ̧HUA̧TÄ̧ jȩa̧'a̧ jarodö pate'ö ra̧'a̧ jopä'chö huotta pä'ö, meje'ca pämäroppänä 'cuä̧o̧pä̧cuä̧ tottönä, räbiyä'inä pparächa'a, ttö̧ja̧ huottömä de'a'inä rä̧mi̧pö̧nä̧. ⁶ Elam umuhuäyotö su̧ro̧do̧u̧ ttupopä ȩjä̧ba'inä ȩmä̧ttö̧, ca̧hua̧yu̧tu̧ dottö'oca'inä ja̧'hua̧ta̧'a̧nö̧ ca̧hua̧yu̧tu̧nä̧ huȩjä̧ttö̧'i̧nä̧, Kir su̧ro̧do̧u̧'i̧nä̧ ttȩnä̧ro̧mȩttä̧ rohuäu ttoecuäbi huäjunä ȩmä̧tö̧. ⁷ 'Cuäopäcua'a cui̧rȩjä̧ meje'ca pämäromemä su'huädi'äcua'a ca̧hua̧yu̧tu̧ dottö'oca'inä ja̧'hua̧ta̧'a̧nö̧ ca̧hua̧yu̧tu̧nä̧ huȩjä̧ttö̧'i̧nä̧, Ca̧hu̧yu̧tu̧nä̧ hu̧jä̧tö̧mä̧ jo̧mȩnö̧ ttö̧jä̧cuo̧tö̧ rättopä pä'ö. ⁸ Judá ttö̧ja̧rö̧ tta̧huä̧rä̧'i̧jä̧mä̧ tta̧'a̧ro̧'cö̧ jä̧cua̧; Ja̧'hu̧nö̧ jo̧mȩnä̧ ucutumä jiyenö mo̧ro̧mä̧ curä rohuäcuähuä pȩjodetä tta̧'a̧ri̧nä̧tö̧jä̧. ⁹ Ucutumä topinätöjä David iäre otahuiya bahuecuome'inä, rö̧ä̧nä̧ ji̧na̧'a̧, ja̧'hua̧nö̧ jo̧mȩnä̧ ucutumä ajiya'inä huä'inätöjä dȩ'a̧nä̧ acuomettö̧. ¹⁰ Ucutumä Jerusalén isode usähuinä̧tö̧jä̧, ja̧'hua̧ta̧nö̧ ucutumä isode kä'ö icuinä̧tö̧jä̧ tto̧ȩcuä̧räbä 'quiyönä cuaditätucua pä'ö. ¹¹ Ucutumä aditinä̧tö̧jä̧ tobärenä ttoepö ajiya rö̧nä̧ra̧ pä'ö täbo'cö ri̧no̧mȩ. Ja̧'hua̧nö̧ ja̧'a̧nä̧ ucutumä amucuädocotö pinä̧tö̧jä̧ pi̧yȩ ötahuiyä aditinörö̧mä̧, täbocötä amucuädö ku̧ni̧nö̧rö̧. ¹² O'ca juiyönä ru̧hua̧ Su̧ro̧da̧u̧ ttu̧ru̧hua̧ Dios ja̧u̧nu̧ ttajau mo̧ro̧ huopinö, tta̧'cua̧ tta̧ttȩcu̧ pänä, ttuhuo'che ttikiräu pänä, ja̧'hua̧ta̧nö̧ kiyö otta ttö̧ca̧tä̧u̧ pä̧nä̧ . ¹³ Topi ja̧'hua̧nö̧ ja̧'a̧nä̧, to'ijicu jȩpä̧tö̧, pä'cäritä eseu, pä̧cä̧yö̧rö̧ huä'ö ja̧'hua̧ta̧nö̧ ovejattö̧rö̧ ku'icu iyö, idepä cuä̧nö̧ jja̧'hua̧ta̧nö̧ a̧tti̧poya a'u; tucuätucua pä'ö ja̧'hua̧ta̧nö̧ tacuätucua , yo̧ä̧i̧ mo̧ro̧mä̧ 'corujuotächäcuotöjä. ¹⁴ Piyemä o'cajuiyä ru̧hua̧ su̧ru̧da̧u̧ TÖ̧Ä̧NÄ̧HUA̧ Dios ijȩpö̧ ttörö ucuocuinö: ''Jueönämä, pi̧yȩ suronä jȩttä̧ji̧mä̧ ja̧'a̧tä̧mä̧ topo̧'cö̧sä̧, 'coru juottächö o'ca'a'inä.'' pä'ö o'cajuiyönä ju̧ru̧hua̧ TÖ̧Ä̧NÄ̧HUA̧MÄ̧. ¹⁵ TÖ̧Ä̧HUA̧ o'cajuiyönä ju̧ru̧hua̧mä̧ pi̧yȩ pä'ö: ''to'cua tä'i piyȩ tta̧huä̧rä̧cuä̧huä̧ ttö̧ja̧sa̧rö̧ to̧cu̧'a Sebna pä'ö micua̧rö̧, ja̧'hua̧ta̧nö̧ päcuaröjä̧: ¹⁶ ''¿Däje jȩpu̧ cu̧jä̧ttö̧ pȩnȩmä̧, di hueäjäcuttö cua̧mö̧ pajatö cuhuapare reju sacua pä'ömä hua'are reju ju'toju jo̧mȩmä̧ cuadita pä'ömä ja̧'hua̧ta̧nö̧ inähuänä 'cuä'ächi'ö cu̧'ä̧cuo̧mȩ 'ta'ö aditömä? ¹⁷ Topi, ja̧'u̧ TÖ̧Ä̧NÄ̧HUA̧ täcö kö̧ do'opu icuacu pä'ötä, ja̧u̧mä̧ ubo ju̧ru̧hua̧, täcö dȩa̧'a̧cu̧ i̧nȩpu̧ do'opu icuacupä'ötä hua̧jä̧; ja̧'u̧ 'chuädäcua̧jä̧ tä̧bi'̧i̧ pä̧cui'önä. ¹⁸ Ja̧u̧tä̧ isopäi'önä̧ käräutä, kärä'utä ku̧ju̧nä̧ kärö i̧cuä̧cua̧jä̧, ja̧'hua̧nö̧ 'toruba te'chä'u tticuähua'a ja̧ji'̧a̧nö̧ ko̧ro̧jä̧ rȩjȩrä̧'a̧cu̧ te'ächö i̧cuä̧cua̧jä̧ yorätehuächi'önä̧. Juä̧jä̧ra̧'a̧ttö̧tä̧ hua'ö cui̧cuä̧cua̧jä̧, ja̧'hua̧ta̧nö̧ juȩnȩ ka̧cuä̧cua̧'a̧ cui'äre caruquiyä'inä̧ kujuru öadihuä ucuo tecuähuinö̧mä̧; ¡ucutä jä̧cua̧'a̧ cu̧ru̧hua̧ ojusodettö dä'ä ttucuȩpä̧cua̧mä̧! ¹⁹ 'Ttötä ki'opu chi̧cuä̧jä̧to cuaditähuära̧'a̧ ja̧'hua̧nö̧ cu̧jo̧mȩ'i̧nä̧. Ucutä jä̧cua̧'a̧ kä'ö icuähuäcua̧mä̧. ²⁰ Ji̧yȩnö̧ mo̧ro̧ päi'omenämä 'cuäopäcua'a TTÖTÄ huo̧chä̧cua̧sä̧ chu̧mu̧huä̧ya̧ Hilcías i̧tti̧ Eliaquimrö̧. ²¹ Tötä chö̧'ca̧tä̧cua̧ ucu cu̧'ca̧tä̧huä̧ta̧ tunicattö ja̧'hua̧ta̧'a̧nö̧ ja̧u̧ru̧ chu̧huä̧nä̧cua̧sä̧ pö̧jä̧ta̧mä̧, ja̧'hua̧nö̧ jȩpö̧ cucuo jä̧'i̧jö̧mä̧ 'cuä'epö chi̧cuä̧cua̧sä̧ u̧cu̧ cu̧mu̧nä̧tä̧. Ja̧u̧tä̧ jä̧cua̧'a̧ Jerusalennä ko̧cuä̧tö̧ ttä'o jö̧nä̧ jä̧cua̧ ja̧'hui̧a̧ta̧'a̧nö̧ Judá ttö̧ja̧'i̧nä̧. ²² TTÖTÄ cu'upi'canä chö̧tä̧cua̧jä̧ David ojusode bahuecuahui'inä; ja̧u̧tä̧ ba̧huȩpä̧cua̧, ja̧'hua̧nö̧ jo̧mȩnä̧ ya̧tȩ'i̧nä̧ mö̧ȩpö̧ jui̧yä̧cua̧, ja̧u̧tä̧ mu̧ȩpä̧cua̧ ja̧'hua̧nö̧ jo̧mȩnä̧ ya̧tȩ'i̧nä̧ bahuepö jui̧yä̧cua̧. ²³ Ttötä jue'önä̧ juepu chu̧ju̧nä̧cua̧sä̧to, ya̧ri̧tȩ cuorä'u i̧sa̧ri̧ pporächi'ö juiyönä̧ kö̧'a̧nö̧, jahuata'a̧nö̧ ja̧'u̧tä̧ jä̧cua̧'a̧ jä'o oju'isode ö'adihuänä̧ pä̧nö̧ ppä̧huä̧chä̧cua̧to. ²⁴ Juätö o'cato'iönä̧ ja̧'u̧tä̧ ö̧'adihuänä̧ ttö̧ri̧pä̧cuo̧tö̧ jä̧'o oju'isodetömä̧, ja̧'u̧ttö̧tä̧ tȩa̧ri̧cu̧ bahuäcua'a ja̧hua̧ta̧'a̧nö̧ ahuruhuä kotö'i̧nä̧, ppö̧'ö̧ o̧ttä̧hui̧yä̧ttö̧ rötadipu kämädö bäreu 'cä̧nä̧ri̧'o̧yu̧ttu̧ cä'ädö. ²⁵ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ ji̧yȩnö̧ mo̧ro̧ 'cuäopäcuȩ pa̧'a̧nö̧ ji'äu, 'quiyönä pȩ'o̧pö̧ ku̧nä̧hua̧ri̧mä̧ 'choähuächö, 'te'ähui'ömä ma̧ä̧chä̧cua̧'a̧ ja̧'hua̧ta̧nö̧ ö̧a̧mȩcä ja̧u̧nä̧ kä̧ji̧mä̧ si'epö icuähuäcua'a, ja̧'hua̧nö̧tä̧ TÖ̧Ä̧NÄ̧HUA̧MÄ̧ ucuocuäji.