¹ Damasco ötahuiyana̧ ttö̧ja̧ ttu̧huo̧ju̧nä̧ 'cuä'opäcuȩ ötö'cö jiäu u̧ju̧ninö̧ huȩnȩ. ² Aroes öäre ötahuiyamä̧ jaroiäcuähuäcuomȩto. Pi̧yȩ o̧du̧na̧mä̧ oveja̧tö̧, pä̧cayö̧ 'cuä'ächö ttö̧'ö̧jä̧cuo̧mȩ, jahuata'a̧nö̧ yä̧tȩ'i̧nä̧ yepä'chiyä̧cua̧to juätörömä̧. ³ ötahuiyä ttö̧ja̧ ttabo'iyotöttö ttöji̧pa̧pe'ö ttö̧ȩpa̧rö̧ obimä̧ Efrain toepächönä jȩpu̧ i̧cuä̧cuȩ, Damasco ruhuonä̧ hue'ätörö'i̧nä̧, jahuat'ä̧nö̧ Aranttö̧ a̧u̧cuo̧tö̧tä̧ ka̧cui̧pi̧nä̧rö̧'i̧nä̧ -- Israel ttö̧ja̧ ttöadihuä a̧'cua̧rö̧nä̧ jä̧cuä̧'a̧---- pi̧yȩ ji̧na̧'a̧ curä rohuäu juruhuätö . TTu̧ru̧huä̧ tti̧ä̧nä̧hua̧ ji̧ä'u u̧ju̧ni̧mä̧. ⁴ Ji̧yȩnö̧ mö̧rö̧mä̧ 'cuä'opäcua'ato Jacob öadihuä ji̧nö̧mä̧ yoyonö 'chänö̧ ränö beipächäcu'ato, jahuata'a̧nö̧ idepänä bäreunä ö̧ji̧nö̧mä̧ si̧ä̧huä̧chä̧cua̧to. ⁵ Pi̧yȩmä̧ jä̧cua̧'a̧to̧ yä̧tȩ cuä̧huä̧ ku̧ä̧huä̧ ru̧huä̧ u̧huä̧ju̧ ocha mä̧mä̧ttö̧ 'chu'äda'a 'cuipa'a jäi̧nö̧'a̧nö̧, Ja̧hua̧ta̧'a̧nö̧ u̧huä̧ju̧ ote upiyämä̧ öjonä̧ ma̧ma̧tö̧ ca̧ca̧to̧'ö̧ hua'adö ' tto'ä̧cua̧. Refraim ötahuiyä pämä̧roppättö u̧huä̧ju̧'u otetä pojopu icu ttottä'i̧nä̧'a̧nö̧ jȩpu̧ ö̧ca̧ca̧tä̧cua̧to. ⁶ A̧'u̧cu̧nä̧tä̧ ttö̧jo̧cui̧'ä̧cuo̧tö̧, ja̧'hua̧nö̧ ja̧'a̧nä̧, Olivo dau ttaditö o'ca'a jä̧'i̧nö̧'a̧nö̧: ä̧na̧jui̧yä̧ huä̧mȩcu̧mä̧ ta'are huäba'acuänö̧cö̧ jo̧mȩnä̧ aceitunas jua'a huä̧mȩ ä̧na̧jui̧yä̧nä̧mä̧, pa̧ja̧cuä̧nä̧ ji̧mu̧tȩnö̧cö̧ ä̧na̧jui̧yä̧ ju'toju jähuä u̧huä̧ju̧ rö̧ä̧nä̧ juȩjö̧ - pa̧'a̧nö̧ pä'ö TÖ̧Ä̧NÄ̧HUA̧MÄ̧ Israél ttö̧ja̧'i̧nä̧TÖ̧Ä̧NÄ̧HUA̧MÄ̧. ⁷ Ji̧yȩnö̧ mo̧ro̧ päi'omenä, ttö̧ja̧mä̧ ppa̧ttä̧chä̧cuo̧tö̧ jitörötä aditinörö̧, ja̧'hua̧nö̧ jo̧mȩnä̧ o'catoi'önä tottäcuotö Israélttö surojö jui̧'a̧rö̧. ⁸ Ja'huätömä tätähu'cacumä topocottö ttäcuoptö, tta̧mo̧nä̧ ttu̧mu̧nä̧ ttaditähuämä, topocotö ttäcuoptö ttödo'chenä ttaditinömä, Asera ka̧'u̧cuä̧ tätähuä'ca ja̧'hua̧ta̧'a̧nö̧ kä̧hua̧ a̧'u̧cuä̧ tätähuä'ca'inä. ⁹ Ji̧yȩnö̧ mo̧ro̧ päi'omenämä ötahuiyä ucuounä kö̧cu̧'i̧nä̧ jarotti'äcuotö möä'quiyu ju'tätä, Israél ttö̧ja̧ tti̧chä̧u̧ jarotti'inöta'anö ja̧u̧nu̧ ji̧nö̧ta'anö toächome jö̧nä̧tä̧ pärohuächäcuome. ¹⁰ Cu̧ru̧hua̧tu̧cu̧ Dios ucuturu ppä'ädörömä unichi'inä̧tö̧jä̧, ja̧'hua̧ta̧nö̧ ido'qui 'quiyönä cu̧ju̧nä̧ jȩo̧'quimä ya'ocuinä̧tö̧jä̧. Ja̧'hua̧nö̧tä̧ ucutumä adiu a̧'cua̧cu̧ ku̧nä̧tö̧jä̧, ja̧'hua̧nö̧ ku̧ju̧nä̧tu̧cua̧'a̧ uva a̧na̧jui̧yä̧ttö̧mä̧ surojötä huȩjä̧cua̧'a̧, ¹¹ cu̧ju̧na̧'a̧, bahuäja'a u̧huä̧ju̧ huȩju̧ mo̧ro̧mä̧. A̧'u̧cua̧'a̧tä̧ o'ca'a u̧huä̧ju̧mä̧ böo juoäcua'a, ja̧'hua̧nö̧ böojuoa'anä re ttȩmä̧u̧ mo̧ro̧mä̧ to̧ȩ'ä̧chö̧cuȩ ja̧'hua̧nö̧ jo̧mȩnä̧ tta̧cuä̧ro̧cö̧ jä̧ji̧tä̧ 'cuäopäcua'a. ¹² ¡Jati! ¡Ttö̧ja̧ recuätö duruttä̧rä̧cuo̧tö̧, aje de'ähuoto ppahua'a durua jä̧'i̧nö̧'a̧nö̧, ja̧'hua̧ta̧nö̧ ttö̧ja̧ jurunä ichätö ajiya jurunä ichö suädia'a jä̧'i̧nö̧'a̧nö̧! ¹³ Ttö̧ja̧ jurunä tticha'a rä̧mi̧pä̧cua̧'a̧ ajiya jurunä huerächa'a ucuocuä'inö'anö, ja̧'hua̧nö̧ ja̧'a̧nä̧ Dios ö̧ra̧huä̧ri̧'ä̧cua̧. Jahuätömä oto döttecuächäcuotö ja̧'hua̧nö̧ jo̧mȩnä̧ isä'cua hua'ö icuä'cua möä'ca ju'tättö isoppanä ȩmi̧pa̧'a̧ jä̧'i̧nö̧'a̧nö̧ ja̧'hua̧ta̧nö̧ kä̧rö̧'coppanä isä'cua kärähua'a jä̧'i̧nö̧'a̧nö̧. ¹⁴ ¡Ni̧pä̧chi̧mȩnä̧, topätucuittö, ra̧huä̧pi̧ja̧'a̧! ¡Mo̧ro̧ päi'äcua'a ä'canä ja̧u̧mä̧ toepoa'a! Pa̧'a̧nö̧ 'cuäopa pä'ö ja̧'a̧ jitö ujuturu ya'opö icuätörömä, pi̧yȩtä̧ ttȩmä̧cuo̧tö̧ jitö nä̧u̧cuä̧rä̧cuä̧huä̧ ttö̧ja̧mä̧.