¹ Tö̧ä̧nä̧hua̧ Dios adihuä juäi iya pä'ö ucuocu pä'inödo Noérö'inä, i̧tti̧mö̧rö̧'i̧nä̧, “Recuätö cui̧tti̧mö̧rö̧ ye'ähuätucui, pi̧jä̧ pa̧ja̧cnä̧ ye'äu ttö̧ja̧cuä̧cua̧'a̧nö̧ jahuätöttö. ² Pi̧jä̧ o'ca juiyönä ka̧cuä̧tö̧ de'a isotömä ucuturu topö ye'ecu ttö̧ttä̧huä̧cuo̧tö̧. O'ca toi'önä de'a ka̧cuä̧tö̧rö̧'i̧nä̧, ju'toju co̧'ä̧rä̧tö̧rö̧'i̧nä̧, rȩjȩnä̧ do'ähuätörö'inä, ajenä ka̧cuä̧tö̧rö̧'i̧nä̧ ucuturu iyösä, jahuätö tturuhuotö päi'önä cu̧ja̧cuä̧tu̧cua̧ pä'ö. ³ Pä'äji pättiyu ka̧cu̧ chiyinö ta'anö, jitä'inä o'ca toi'önä a̧'cua̧rä̧tö̧rö̧ iyösä, cu̧'o̧tö̧ päi'önä. ⁴ Ja̧'hua̧nö̧ ja̧'a̧nä̧ ttidepämä ttucuojacu cucuätucuä', ttucuojanä ka̧'a̧ttö̧ tta̧'cua̧rö̧mä̧. ⁵ Ya̧tȩ ka̧ra̧rö̧ cuä'ö icuttumä, ttötä ro̧dȩpä̧cua̧sä̧ 'corupäi'önätä. Ja̧'hua̧ta̧nö̧ de'a ru̧hua̧'i̧nä̧ ttö̧ja̧ i̧sa̧rö̧ cuä'ö icuttumä, ttötä ro̧dȩpä̧cua̧sä̧ 'corupäi'önätä. ⁶ Ya̧tȩ ka̧ra̧rö̧ cuä'ö icuttumä, korotötä ja̧u̧ru̧ cuä'ö tticuäcuotö, ttö̧ja̧mä̧ ttötä jö̧ ta'anö huotörö chaditina'attö. ⁷ Ja̧'hua̧nö̧ ja̧'a̧nä̧ recuätö cui̧tti̧mö̧rö̧ ye'ähuätucui, pi̧jä̧ pa̧ja̧cu̧nä̧ ye'äu ttö̧ja̧cuä̧cua̧'a̧nö̧ jahuätöttö,” pä'inö Dios. ⁸ Juhua'a yabo Tö̧ä̧nä̧hua̧ Dios pä'inödo Noérö'inä, i̧tti̧mö̧rö̧'i̧nä̧: ⁹ “Jitämä ucurutä ji'äu ku̧nu̧sä̧ ucuru iso päi'önä jȩchä̧cuȩ huȩnȩmä̧, ucuturu'inä, cuahuaruhuä'cotörö'inä. ¹⁰ Ja̧'hua̧ta̧nö̧ o'ca toi'önä ucutucu huoi'cattö rä'opäjätörö, ju'toju co̧'ä̧rä̧tö̧rö̧'i̧nä̧, ttö̧ja̧ ttä̧ji̧mö̧rö̧'i̧nä̧, de'a ka̧cuä̧tö̧rö̧'i̧nä̧, o'ca toi'önä pi̧jä̧nä̧ ka̧cuä̧tö̧rö̧mä̧ ucuturu'inä, cuahuaruhuä'cotörö'inä iso päi'önä jȩchä̧cuȩ huȩnȩ ji'äu ku̧nu̧sä̧. ¹¹ Ucurutä ji'äu ku̧nu̧sä̧ ucuru iso päi'önä jȩchä̧cuȩ huȩnȩmä̧. Pä'äji ta'anömä ttö̧ja̧rö̧'i̧nä̧, de'a isotörö'inä be'epäjipö icuocösä aje suhuädi'önämä. Jitä pä'äji ta'anömä pi̧jä̧ o'ca juiyönä jacuoto päi'önä aje suhuädi'a'a topocotö ttäcuotö. ¹² Ucuturu'inä, o'ca toi'önä de'a isotörö'inä 'cuäopönä ucuru iso päi'önä jȩchä̧cuȩ huȩnȩ jiähua'a pä'ö jä̧cuȩmä̧ huäyärobötä. ¹³ Chöäre huäyärobö ajiya isoppanä ku̧nu̧sä̧. Pädäji'anö aje pä'äji ta'anö suhuädi'ö juiyäcua'a pä'ö ttö̧ja̧ ttu̧ni̧chi̧'ö̧ juiya pä'ö kä̧cua̧'a̧nö̧. ¹⁴ Ajiya isoppamä chi'cächomenä, chöäre huäyärobö o'ca toi'önä tottönä uhuähuäcua'a. ¹⁵ Huäyärobö tochomenä, cha̧mö̧cuä̧dä̧cua̧sä̧ ucuru iso päi'önä jȩchä̧cuȩ huȩnȩmä̧. Pä'äji ta'anö be'epäjipö icuocösä aje suhuädi'önämä pä'ö ucuturu'inä, o'ca toi'önä a̧'cua̧rä̧tö̧rö̧'i̧nä̧. ¹⁶ Chöäre huäyärobö ajiya isoppanä tochomenä, cha̧mö̧cuä̧dä̧cuasä iso päi'önä jȩchä̧cuȩ huȩnȩmä̧, ucuturu'inä, o'ca toi'önä a̧'cua̧rä̧tö̧ pi̧jä̧nä̧ ka̧cuä̧tö̧rö̧'i̧nä̧. ¹⁷ Ucuturu'inä, o'ca toi'önä pi̧jä̧nä̧ ka̧cuä̧tö̧rö̧'i̧nä̧ ttö iso päi'önä jȩchä̧cuȩ huȩnȩ jiähuä̧cuȩmä̧ chöäre huäyärobötä,” pä'inödo Dios Noérö. ¹⁸ Noé i̧tti̧mö̧ huoi'cattö rä'opinätömä pitö ji̧na̧'a̧do: Sem'inä, Cam'inä, Jafet'inä. Cammä Canaán jä'o pinödo. ¹⁹ Pitö ji̧na̧'a̧do Noé i̧tti̧mö̧ huämetucuä pinätö̧mä̧. Jahuätö ttahuaruhuä'cotöttö pi̧jä̧ o'ca juiyönä pperecuächinätödo. ²⁰ Noémä pättiyu adicuä i̧sa̧ pinödo. Uva pätta ku̧ni̧nö̧do. ²¹ Koronö mo̧ro̧ Noé vino isoya au tä̧'ä̧mä̧chö̧ ä̧ta̧ jui'ö ri̧nö̧do, ojusode jacuä. ²² Canaán jä'o Cammä, jä'o Noé ä̧ta̧ jui'ö ö̧ra̧'a̧ topö, ö̧bö̧o̧tö̧ ta̧ju̧ru̧ ji'äu 'chi̧nö̧do. ²³ Ja̧'hua̧nö̧ ja̧'a̧ Sem'inä, Jafet'inä i̧sä̧ta̧ rö̧ä̧ta̧ ttu'upi'canä setädäcuäu huä̧nä̧u̧, ttä'orö ucuotö kara'acu topö ttabo ja̧'a̧cu̧ kärä'chi'ö 'chä̧nö̧, ttä'orö mö̧'ȩpi̧nä̧tö̧do, ttä'o ä̧ta̧ jui'ö ö̧ra̧'a̧ tottö juiya pä'ö. ²⁴ Tä̧'ä̧mä̧chä̧ji̧'ca̧ porächi'ö, i̧tti̧ röji ru̧hua̧ jȩä̧ji̧mä̧ huo̧jui̧nö̧do Noé. ²⁵ Pä'inödo: “Canaánrötä suronä 'cuäopäcua'anö. Canaánmä ahuaruhuä huettötä adicuä i̧sa̧ päi'önä ö̧jä̧cua̧,” pä'inödo Noé. ²⁶ Juhua yabo pä'inödo: “Eseunu ucuocusä Chu̧ru̧hua̧ Diosrö, Sem'inä Ö̧ä̧nä̧hua̧rö̧, Canaánmä Sem hueötä adicuä i̧sa̧ päi'önä ö̧ja̧ pä'ö hue'irö. ²⁷ Jafet i̧rȩjä̧ttö̧'i̧nä̧ abonänö rö̧ä̧jä̧ iyäcua'a̧nö̧ Tö̧ä̧nä̧hua̧ Dios. Ja̧'hua̧ta̧nö̧ ja̧u̧tä̧ Jafet ahuaruhuä'cotö Sem ahuaruhuäcu ttö̧ja̧cuä̧cua̧'a̧nö̧. Canaánmä Jafet hueötä adicuä i̧sa̧ päi'önä ö̧jä̧cua̧'a̧nö̧,” pä'inödo Noé. ²⁸ Aje suhuädinö o'ca'a, Noé juhua'a yabo trescientos cincuenta a̧'ȩ hua̧ ki̧nö̧do. ²⁹ Noé o'ca juiyömä novecientos cincuenta a̧'ȩ u̧ju̧nä̧ro̧mȩnä̧, 'corupä'i'inödo.