¹ Ja̧u̧nu̧ pä̧nä̧ Sinar ötahuiyä ru̧hua̧mä̧ Amrafel pinödo. Elasar ötahuiyä ru̧hua̧mä̧ Arioc pinödo. Elam ötahuiyä ru̧hua̧mä̧ Quedorlaomer pinödo. Goim ötahuiyä ru̧hua̧mä̧ Tidal pinödo. ² Pitömä rohuäu 'chi̧nä̧tö̧do korome ötahuiyä ruhuotöcu. Ka̧ra̧mä̧ Sodoma ötahuiyä ru̧hua̧mä̧ Bera pinödo. Ka̧ra̧mä̧ Gomorra ötahuiyä ru̧hua̧mä̧ Birsa pinödo. Ka̧ra̧mä̧ Adma ötahuiyä ru̧hua̧mä̧ Sinab pinödo. Ka̧ra̧mä̧ Zeboim ötahuiyä ru̧hua̧mä̧ Semeber pinödo. Ka̧ra̧mä̧ Bela ötahuiyä ru̧hua̧ pinödo. Bela ötahuiyä i̧mi̧mä̧ ja̧'hua̧ta̧nö̧ koro i̧mi̧mä̧ Zoar pä'ö micuina'ado. ³ O'ca toi'önä ca̧ca̧cui̧pi̧nä̧tö̧do Sidim pä̧mä̧rä̧chi̧'o̧mȩ Mar Muerto tö'cö. ⁴ Docenö a̧'ȩ 'cuäoi'önä Quedorlaomer hueö jȩpö̧ ka̧cui̧nä̧tö̧do. Koro a̧'ȩ päi'omenä Quedorlaomerrö jarode'inätödo. ⁵ Ja̧u̧tä̧ a̧'ȩ yabocu a̧'ȩnä̧ Quedorlaomer korotö ruhuotöcu ichö, rohuäu ttujuruhuinä̧u̧do refaítas ttö̧ja̧rö̧ Astarot Karnaim ötahuiyänä ka̧cui̧nä̧tö̧rö̧. Ja̧'hua̧ta̧nö̧ zuzitas ttö̧ja̧ Ham ötahuiyänä ka̧cui̧nä̧tö̧rö̧'i̧nä̧ rohuäu ttujuruhuinä̧u̧do. Ja̧'hua̧ta̧nö̧ emitas ttö̧ja̧ Save-quiriataim ötahuiyänä ka̧cui̧nä̧tö̧rö̧'i̧nä̧ rohuäu ttujuruhuinä̧u̧do. ⁶ Ja̧'hua̧ta̧nö̧ horeos ttö̧ja̧ Seir inähuänä ka̧cui̧nä̧tö̧rö̧'i̧nä̧ rohuähuäyotö rutti'inä̧u̧do Parán ttö̧ja̧ toächomera'a päi'önä. Parán ttö̧ja̧ toächomemä de'a juiyome tö'cönänö ji̧na̧'a̧do. ⁷ Quedorlaomer chutä örohuähua'anä ppä'ädätöcu En-mispat, ja̧'hua̧ta̧nö̧ koro i̧mi̧mä̧ Cades pä'ö micuomecu ppa̧'ä̧chi̧nä̧tö̧do. Rohuäu ttujuruhuinä̧u̧do amalecitas ttö̧ja̧rö̧'i̧nä̧, amorreos ttö̧ja̧rö̧'i̧nä̧ Hazezon-tamar rȩjȩnä̧ ka̧cui̧nä̧tö̧rö̧. ⁸ Ja̧'hua̧nö̧ ja̧'a̧ Sodoma ötahuiyä ru̧hua̧'i̧nä̧, Gomorra ötahuiyä ru̧hua̧'i̧nä̧, Adma ötahuiyä ru̧hua̧'i̧nä̧, Zeboim ötahuiyä ru̧hua̧'i̧nä̧, Bela ötahuiyä ru̧hua̧'i̧nä̧ Sidim pä̧mä̧rä̧chi̧'o̧mȩra̧'a̧ rohuäu 'chi̧nä̧tö̧do. Bela ötahuiyä i̧mi̧mä̧ koro i̧mi̧mä̧ Zoar. ⁹ Jahuätö ji̧mö̧tȩ ruhuä ruhuotömä Juhuorötä rohuähuinätödo Elam ötahuiyä ru̧hua̧ Quedorlaomercu, Goim ötahuiyä ru̧hua̧ Tidalcu, Sinar ötahuiyä ru̧hua̧ Amrafelcu, Elasar ötahuiyä ru̧hua̧ Arioccu. Pa̧ja̧cuä̧nö̧tä̧ ruhuotö ji̧na̧'a̧do. ¹⁰ Sidim pä̧mä̧rä̧chi̧'o̧mȩttö̧ o'ca juiyönä rejuhuiyä ka̧cui̧na̧'a̧do, dö'cähuähua acua'a. Sodoma ru̧hua̧cu̧, Gomorra ru̧hua̧cu̧'i̧nä̧ tö'ipächinätödo. Ttumöhuäyotö'inä döttecuächomenä, rejuhuiyä jacuä mo̧'ä̧chi̧nä̧tö̧do. Korotö ruhuotömä dö'ecuächinätödo inähuära'acu. ¹¹ Quedorlaomermä korotö ruhuotöcu o'ca juiyönä ȩpi̧nä̧tö̧do cuäcuähuä'inä, koro juäi'inä rö̧ȩnä̧ micuäu juäi Sodomanä'inä, Gomorranä'inä ka̧cui̧nö̧ttö̧. Ja̧'hua̧nö̧ ja̧'a̧ juhuorö rä'opö 'chi̧nä̧tö̧do. ¹² Lot, Abram ö̧jä̧hua̧mi̧nä̧ rȩyo̧ Sodoma ötahuiyänä ki̧nö̧rö̧'i̧nä̧ ȩmi̧pi̧nä̧tö̧do. U̧ju̧nä̧rö̧'i̧nä̧ o'ca juiyönä ȩmi̧pi̧nä̧tö̧do. ¹³ Ya̧tȩ ubo tö'ipächö ki̧'ä̧ji̧mä̧ ja̧u̧ o'ca juiyönä ji'äu 'chi̧nö̧do Abram, hebreo ttö̧ja̧ i̧sa̧rö̧. Abrammä Mamre, amorreo ttö̧ja̧ i̧sa̧ idepiyunä, dauhuiyä oi bäreu ka̧cuo̧mȩ ki̧nö̧do. Mamremä Escol'inä, Amer'inä ttuböo pinödo. Jahuätömä korotörö tturohuähua pä'ö Abramcu ppä'ädäcuähuinätödo. ¹⁴ Abrammä ö̧jä̧hua̧mi̧nä̧ rȩyo̧ Lotrö ttȩmi̧pä̧ja̧'a̧ ä̧ju̧cuo̧mȩnä̧, umöhuäyotö ja̧u̧tä̧ ö̧jo̧mȩttö̧ uhuäpächinätörö trescientos dieciocho jo̧mȩnä̧ huo̧juä̧tö̧rö̧ ca̧ca̧to̧po̧'i̧nö̧do. Jahuätöcu Lotrö ȩmö̧ 'chi̧nö̧do Dan ötahuiyä jubö päi'önä. ¹⁵ Abram umöhuäyotörö 'quȩ'ȩpö̧ korotörö'inä kara'acu, korotörö'inä kara'acu hue'inödo yodo. Ja̧'hua̧nö̧ ja̧'a̧ rohuähuäyotö ru'i'inätödo Lotrö ȩmi̧pä̧jä̧tö̧rö̧ Hoba ötahuiyä jubö päi'önä. Hoba ötahuiyämä Damasco ötahuiyättömä kä̧hua̧ u̧huo̧jua̧'a̧cu̧ päte'ö ji̧na̧'a̧do. ¹⁶ Ja̧'hua̧nö̧ ja̧'a̧ o'ca juiyönä ttȩmi̧pi̧nö̧mä̧ ppa̧ttä̧di̧nä̧u̧do, ö̧jä̧hua̧ rȩyo̧ Lotrö'inä, u̧ju̧nä̧rö̧'i̧nä̧, nä̧tö̧rö̧'i̧nä̧, korotörö'inä. ¹⁷ Abrammä ru̧hua̧ Quedorlaomerrö'inä, korotö ruhuotörö'inä rohuäu ujuruhuäji o'ca'a ppa̧huä̧cho̧mȩnä̧, Sodoma ötahuiyä ru̧hua̧mä̧ Save pä'ö micuome pä̧mä̧rä̧chi̧'o̧mȩttö̧ rä'opinödo esehuarö pä'ö. Save pä̧mä̧rä̧chi̧'o̧mȩmä̧ koro i̧mi̧mä̧ ru̧hua̧ pä̧mä̧rä̧chi̧'o̧mȩ pä'ö micuinomedo. ¹⁸ Melquisedecmä, Salem ötahuiyä ru̧hua̧, ji̧nä̧ isocu kada'ca Ru̧hua̧ Tö̧ä̧nä̧hua̧ttö̧'i̧nä̧, ttö̧ja̧ttö̧'i̧nä̧ kä'co päte'ö adicuä i̧sa̧ huinödo. Ja̧u̧'i̧nä̧ rä'opö, pa̧'i̧nä̧, vino isoya'inä i'cächipinödo. ¹⁹ Ja̧'hua̧nö̧ ja̧'a̧ pi̧yȩ huȩnȩnä̧ Tö̧ä̧nä̧hua̧ Dios adihuä juäi iya pä'ö ucuocuinödo Abramrö: ―Tö̧ä̧nä̧hua̧ Dios Ji̧nä̧ isocu kada'ca Ru̧hua̧ mo̧ro̧jä̧'i̧nä̧, pi̧jä̧'i̧nä̧ aditinömä ucuru ppäda pä'ösä. ²⁰ Adiu tucuocu'a̧nö̧ ja̧'a̧ Tö̧ä̧nä̧hua̧ Dios Ji̧nä̧ isocu kada'ca Ru̧hua̧mä̧ cuaboiyotörö cujuruhua pä'ö jȩpi̧nö̧rö̧―. Abrammä aboiyotörö rohuäu icu ppa̧huä̧di̧nö̧ttö̧ to̧mö̧rȩ jähuättömä, ji̧yȩtȩ 'quȩ'ȩpö̧, Melquisedecrö iyinödo. ²¹ Ja̧'hua̧nö̧ ja̧'a̧ Sodoma ru̧hua̧ Abramrö pä'inödo: ―Ttö̧ja̧rö̧tä̧ iyittö. Koro juäimä ucutä ȩpi̧―. ²² Ja̧'hua̧nö̧ ja̧'a̧nä̧ Abram ädätinödo: ―Tu̧ru̧hua̧ Tö̧ä̧nä̧hua̧ Dios Ji̧nä̧ isocu kada'ca Ru̧hua̧ mo̧ro̧jä̧'i̧nä̧, pi̧jä̧'i̧nä̧ aditinörö ucuocu pä'inösä. ²³ Ja̧'hua̧nö̧ ja̧'a̧ttö̧ ucu, Sodoma ru̧hua̧, cuiärettömä ji̧'qui̧cha̧nö̧'i̧nä̧ ȩmo̧cö̧sä̧, “ttö chiyinöttö ucutä ru̧hua̧ juo'inömä” päcu juiyäcua'anö. ²⁴ Yorö'iso koromä pä̧huä̧ juiyäcusä. Chumöhuäyotö ttu̧cuȩ ȩmi̧nö̧sä̧. U̧mä̧tö̧ ttöcu 'chi̧nä̧tö̧mä̧ Aner'inä, Escol'inä, Mamre'inä, jahuätötä ttȩmä̧cuo̧tö̧ jitötä jähuä päi'önä―.