¹ Abrammä Egipto rȩjȩttö̧ rä'opinödo irecuacu u̧ju̧nä̧rö̧ o'ca juiyönä, Néguev rȩjȩra̧'a̧ ppa̧'ä̧chö̧. Lot'inä jahuätöcu 'chi̧nö̧do. ² Abrammä juiyo ru̧hua̧ pinödo. Oro'inä, pärätä'inä, ä̧ji̧mö̧ recuätörö'inä ku̧nä̧ri̧nö̧do. ³ Néguevttö a̧'cuo̧po̧nä̧ ä'ä'chä̧ya̧ ppa̧'ä̧chi̧nö̧do Betel ötahuiyära̧'a̧ i̧rȩbȩhuo̧mȩ jubö päi'önä. Juhuorö kä̧nö̧ i̧hui̧nö̧do Betel ötahuiyäcu, Hai ötahuiyäcu kä'co päte'ö, ä̧cuo̧mȩnä̧ ä'ähuarä aditina'acu. ⁴ Ju̧huȩnȩmä̧ koro ju̧'a̧rö̧ ku icu iyähuome aditinome ji̧na̧'a̧do. Abram juhuorö Tu̧ru̧hua̧ Diosrö eseunu ucuocuinödo. ⁵ Lot'inä jä'o böo Abram ta'anö ru̧hua̧ pinödo. Ovejastö̧rö̧'i̧nä̧, pä̧cä̧yö̧rö̧'i̧nä̧, umöhuäyotörö'inä, odehuiyä'inä ku̧nä̧ri̧nö̧do. ⁶ Ttö̧ja̧cui̧no̧mȩmä̧ mȩji̧yä̧ isä'che rö̧ȩnä̧mä̧ juiyina'ado, ttä̧ji̧mö̧ recuätö ttucua pä'ömä. Ja̧'hua̧nö̧ ja̧'a̧ttö̧ täcö ji̧nä̧ yo̧mȩtȩ ttö̧jö̧ juiyö'a̧nö̧ ji̧na̧'a̧do. ⁷ Abram ä̧ji̧mö̧rö̧ tta̧huä̧rä̧cuä̧huä̧ ttö̧ja̧cu̧, Lot ä̧ji̧mö̧rö̧ tta̧huä̧rä̧cuä̧huä̧ ttö̧ja̧cu̧ rohuähuä'chö ka̧cui̧nä̧tö̧do. Korotö'inä ja̧u̧nu̧ pä̧nä̧ cananeos ttö̧ja̧'i̧nä̧, ferezeos ttö̧ja̧'i̧nä̧ ju̧huȩnȩtä̧ ka̧cui̧nä̧tö̧do. ⁸ Ja̧'hua̧nö̧ ja̧'a̧ koronö mo̧ro̧ Abram pä'inödo Lotrö: ―Ucu'inä, ttö'inä ji̧nä̧ yotöte isotöjä. Ja̧'hua̧nö̧ ja̧'a̧ttö̧ ucu'inä, ttö'inä suräjuä huȩnȩ tucuocu juiyö'a̧nö̧ ja̧'a̧. Ja̧'hua̧ta̧nö̧ ucu cuä̧ji̧mö̧rö̧ tta̧huä̧rä̧cuä̧huä̧ ttö̧ja̧cu̧, ttö chä̧ji̧mö̧rö̧ tta̧huä̧rä̧cuä̧huä̧ ttö̧ja̧cu̧ suräjuä huȩnȩ ttucuocuomenämä adihuoca'a. ⁹ Rȩjȩmä̧ o'ca juiyönä ka̧'a̧ cuȩma̧ pä'ömä. Ttöttömä 'quȩ'i̧pä̧chi̧. Ucu cuieruhua'acu päte'ö cui̧'chö̧ttö̧mä̧, ttö'inä cu̧huo̧jua̧'a̧cu päte'ö chi̧'chä̧cua̧sä̧. Ja̧'hua̧ta̧nö̧ ucu cu̧huo̧jua̧'a̧cu̧ päte'ö cui̧'chö̧ttö̧mä̧, ttö'inä cuieruhua'acu päte'ö chi̧'chä̧cua̧sä̧―. ¹⁰ Lot adiu usäu topinödo Jordán ajettö räopö oto ajehuiyä'inä rö̧ȩnä̧ rö̧ja̧'a̧. Tu̧ru̧hua̧ Dios ö'ätta ji̧nö̧'a̧nö̧ adihuina'ado. Ja̧u̧ oto jäyotonä de'amä Zoar ötahuiyäcu'inä, Egipto rȩjȩ ta'anö ji̧na̧'a̧do. Tu̧ru̧hua̧ Dios Sodoma ötahuiyä'inä, Gomorra ötahuiyä'inä to'ädö icuäcua'a ä'canä Jordán aje jäyotonä adihuina'ado. ¹¹ Ja̧'hua̧nö̧ ja̧'a̧ Lot Jordán aje jäyoto o'ca juiyönä ȩmi̧nö̧do. Ji̧nä̧ yo̧mȩtȩ ttö̧ja̧cuä̧'i̧jo̧mȩttö̧ rä'opö 'chi̧nö̧do kä̧hua̧ räopa'acu päte'ö. Ja̧'hua̧nö̧ 'quȩ'ȩcuä̧chi̧nä̧tö̧do Abram'inä, Lot'inä. ¹² Abram ki̧'i̧nö̧do Canaán rȩjȩnä̧tä̧. Lot i̧hui̧nö̧do Jordán aje jäyoto ö̧ja̧ pä'ö. Ötahuiyä jö̧ a̧'u̧cuä̧ kä̧'chä̧ya̧ 'chi̧nö̧do, Sodoma ötahuiyä tö'cöhuächome jubö päi'önä. ¹³ Sodoma ötahuiyä ttö̧ja̧mä̧ juiyo suronä jȩpö̧ ka̧cui̧nä̧tö̧do, Tu̧ru̧hua̧ Diosrö jarode'ö. ¹⁴ Lot i̧huä̧ji̧ o'ca'a, Tu̧ru̧hua̧ Dios pä'inödo Abramrö: ―Cu̧jo̧mȩttö̧ kä̧mä̧dö̧ adiu topi kä̧hua̧ räopa'acu'inä, kä̧hua̧ mo̧ä̧cha̧'a̧cu̧'i̧nä̧, kä̧hua̧ u̧huo̧jua̧'a̧cu̧'i̧nä̧, kä̧hua̧ ieruhua'acu'inä. ¹⁵ Ja̧huä̧jä̧ rȩjȩ tocu'ä̧jä̧ o'ca juiyönä chi̧yä̧cua̧sä̧ ucuru'inä, ucu cuahuaruhuä'cotörö'inä 'cuäopönä ttö̧ja̧cua̧ pä'ö. ¹⁶ Rȩjȩ i̧sa̧ppȩ jä̧'i̧nö̧'a̧nö̧ recuätörö chi̧yä̧cua̧sä̧ cuahuaruhuä'cotörö. Rȩjȩ i̧sa̧ppȩmä̧ ¿ttö̧'a̧tö̧'a̧nö̧ ja̧'a̧ tä̧ji̧? Ja̧'hua̧nö̧ jä̧'i̧nö̧'a̧nö̧ cuahuaruhuä'cotörömä pa̧ja̧to̧co̧tö̧ ttäcuotö. ¹⁷ Pi̧jä̧ rȩjȩnä̧ otoa'acu'inä, cähuea'acu'inä ä̧rä̧mi̧'ö̧ täi. Ucuru chi̧yä̧cua̧sä̧―. ¹⁸ Abram ojusode isotö tti̧jȩti̧yu̧ttu̧ adicuode ȩmi̧pö̧, ä'ä'chä̧ya̧ i̧hui̧nö̧do Mamre pä'ö mi̧cua̧ ö̧jo̧mȩttö̧, dauhuiyä oi bäreu ka̧cuo̧mȩ, Hebrón ötahuiyä tö'cö, ju̧huȩnȩtä̧ recuo ö̧ja̧ pä'ö. Juhuorötä koro ju̧'a̧rö̧ ku icu iyähuome aditinödo, Tu̧ru̧hua̧ Diosrö ucuotönö.