¹ Koronö mo̧ro̧ Tu̧ru̧hua̧ Dios pä'inödo Abramrö: ―Jaropi'i cui̧rȩjä̧'i̧nä̧, ucu cuahuaruhuärö'inä, cuä'ominä ahuaruä'cotörö'inä korojä̧ra̧'a̧ cui̧'cha̧ pä'ö, ttö chi̧jȩpa̧cu̧. ² Jȩchä̧cua̧sä̧ ucuru'inä, cuahuaruhuärö'inä recuätö ttö̧ja̧cua̧ pä'ö. Ucuru adiu ppä̧dä̧dä̧cua̧sä̧. Ucu cui̧mi̧nä̧ recuätö ttä̧ju̧cu̧nä̧ jȩchä̧cua̧sä̧. Ja̧'hua̧ta̧nö̧ ucu korotörö ppä̧cu̧huä̧dä̧cua̧jä̧. ³ Ppä̧dä̧dä̧cua̧sä̧ ucuru ppättädäcuotörömä. Ja̧'hua̧nö̧ ja̧'a̧nä̧ ucuru suronä jȩttä̧cuo̧tö̧rö̧mä̧ ttö'inä jahuätörö ro̧dȩpä̧cua̧sä̧. Ucunätä ppä̧dä̧dä̧cua̧sä̧ pi̧jä̧ o'ca toi'önä ttö̧ja̧rö̧―. ⁴ Abram Harán ötahuiyättö rä'opinödo, Tu̧ru̧hua̧ Dios hueinö ta'anö. Harán ötahuiyättö räopinö pä̧nä̧ setenta y cinco a̧'ȩ ku̧nä̧ri̧nö̧do. Lot'inä ja̧u̧cu̧ 'chi̧nö̧do. ⁵ Abrammä irecua Sarairö'inä, ö̧jä̧hua̧mi̧nä̧ rȩyo̧ Lotrö'inä o'ipinödo. Ja̧'hua̧ta̧nö̧ o'ca juiyönä koro juäi u̧ju̧nä̧rö̧'i̧nä̧, chutä umöhuäyotörö'inä Harán ötahuiyättö ȩmi̧nä̧u̧ru̧mä̧ o'ipinödo. Rä'opinätödo Canaán rȩjȩra̧'a̧ 'chä̧nö̧. Ja̧'hua̧nö̧ ja̧'a̧ttö̧ Canaán rȩjȩra̧'a̧ rȩbȩhui̧nä̧tö̧do. ⁶ Ju̧huä̧jä̧ rȩjȩ o'ca juiyönä 'cuä'opö 'chi̧nö̧do, Siquem ötahuiyära̧'a̧ i̧rȩbȩhuo̧mȩ jubö päi'önä. Ju̧huȩnȩ More pä'ö micuomemä dau rö̧äi ki̧no̧mȩdo. Ja̧u̧nu̧ pä̧nä̧ cananeo ttö̧ja̧ ja̧huä̧jä̧ rȩjȩnä̧ ka̧cui̧nä̧tö̧do. ⁷ Juhuorö Tu̧ru̧hua̧ Dios Abramrö i̧jȩcui̧nö̧do. Pä'inödo: ―Pi̧jä̧ rȩjȩmä̧ chi̧yä̧cua̧sä̧ ucu cuahuaruhuä'cotörö―. Ja̧'hua̧nö̧ ja̧'a̧ttö̧ Abram koro ju̧'a̧rö̧ ku icu iyähuome aditinödo, Tu̧ru̧hua̧ Dios juhuorötä i̧jȩcui̧nö̧rö̧ ucuotönö. ⁸ Juhuorö rä'opö i̧hui̧nö̧do inähuära'a. Juhua'atä ki̧nö̧do. Betel ötahuiyämä kä̧hua̧ räopa'acu ji̧na̧'a̧do. Hai ötahuiyämä kä̧hua̧ ma̧ä̧cha̧'a̧cu̧ ji̧na̧'a̧do. Betelttö'inä, Haittö'inä kä'co päte'ö ki̧nö̧do Abrammä. Juhuorötä koro ju̧'a̧rö̧ ku icu iyähuome aditinödo. Ja̧'hua̧nö̧ jȩpö̧, Tu̧ru̧hua̧ Diosrö eseunu ucuocuinödo. ⁹ Ja̧'hua̧ta̧nö̧ Abram ji̧nä̧ yabocu Néguev rȩjȩra̧'a̧cu̧ 'chi̧nö̧do. ¹⁰ Ja̧u̧nu̧ pä̧nä̧ rö̧ȩnä̧ ppäi ttu'inätödo ja̧huä̧jä̧ttö̧. Abram Egipto rȩjȩra̧'a̧ i̧hui̧nö̧do juhua'atä recuonänö ö̧ja̧ pä'ö, cuäcuähuä'inä juiya'attö. ¹¹ Egiptora'a i̧rȩbȩhuä̧cua̧'a̧ tö'cöhuächi'omettö, Abram pä'inödo irecua Sarairö: ―Ä̧ju̧cui̧. Ttömä huo̧jua̧sä̧ ucurumä isaju a̧'cua̧cua̧ju̧jä̧. ¹² Egipto rȩjȩ ttö̧ja̧mä̧ ucuru topö pättäcuotö: “Paju isajumä pide irecua”. Ja̧'hua̧nö̧ pä'ö, ttörö cuä'ö tticuäcuotö, ucutä cu̧ji̧pi̧ya̧ttö̧ pä'ö. ¹³ Ja̧'hua̧nö̧ ja̧'a̧ttö̧ ttörö adiu 'cuäopäcua'anö, ttörö cuä'ö tticu juiyäcua'a̧nö̧ päcuhuaja, “Ttömä ja̧u̧ öjähuajusä” pä'ö―. ¹⁴ Abram Egipto rȩjȩra̧'a̧ i̧rȩbȩhuo̧mȩnä̧, Egipto rȩjȩ ttö̧ja̧ topinätödo Sarairö juiyo adiu ka̧'cua̧cua̧'a̧. ¹⁵ Egipto rȩjȩ ru̧hua̧ ippeye ruhuotö'inä topinätödo jahuäjumä adiu ka̧'cua̧cua̧'a̧. Jahuäju adiu ka̧'cua̧cua̧'a̧ Egipto rȩjȩ ru̧hua̧rö̧ adiu ucuocu ji'ähuinätödo. Ja̧'hua̧nö̧ ja̧'a̧ Egipto rȩjȩ ru̧hua̧ ojusodera'a ttȩmi̧pi̧nä̧cua̧do. ¹⁶ Sarairö topö, Egipto rȩjȩ ru̧hua̧ adiu jȩpi̧nö̧do Abramrö. Mippoönä iyinäcudo ovejatö̧rö̧'i̧nä̧, pä̧cä̧yö̧rö̧'i̧nä̧. Umöhuäyotörö hueinäcudo u̧mä̧tö̧rö̧'i̧nä̧, nä̧tö̧rö̧'i̧nä̧, burrotö̧ u̧mä̧tö̧rö̧'i̧nä̧, nä̧tö̧rö̧'i̧nä̧, camellotö̧rö̧'i̧nä̧. ¹⁷ Egipto rȩjȩ ru̧hua̧ Sarairö ȩmä̧ja̧'a̧ttö̧, Egipto rȩjȩ ru̧hua̧rö̧'i̧nä̧, chutäcu ka̧cui̧nä̧tö̧rö̧'i̧nä̧ surojö 'cuäopa pä'ö jȩpi̧nö̧do Tu̧ru̧hua̧ Dios. ¹⁸ Ja̧'hua̧nö̧ ja̧'a̧ttö̧ Egipto rȩjȩ ru̧hua̧mä̧ Abramrö icha jittähua pä'ö hue'inödo. Abramrö pä'inödo: ―¿Dä̧bö̧ ttörö jȩcu̧'ä̧jä̧ttö̧ pi̧yȩmä̧? ¿Dä̧bö̧ ttörö päcuhuoca'a jä̧ttö̧ pajumä ttö chirecua pä'ö? ¹⁹ ¿Dä̧bö̧ ttörömä jicuhuähuäjättö chöjähuaju pä'ö? Ttö chi̧tti̧mö̧ tta̧ju̧ päi'önä chȩmö̧'a̧nö̧ jä̧ja̧'a̧. Pajusä cuirecuamä. Ȩpö̧ täiju―. ²⁰ Ja̧'hua̧nö̧ ja̧'a̧ Egipto rȩjȩ ru̧hua̧ hue'inödo umöhuäyotörö Egipto rȩjȩttö̧ rättopächa huetta pä'ö Abrahamrö'inä, irecuarö'inä, u̧ju̧nä̧rö̧ o'ca juiyönä.