¹ Mo täbocö o'ca toi'önä tti̧huȩnȩ ji̧nä̧ ji̧yȩtȩtä̧ ucuocuinätödo. ² Jahuätö kä̧hua̧ räopa'acu rä'opö tti̧'cho̧mȩnä̧, pämäroppä po̧cui̧pi̧nä̧tö̧do Sinar rȩjȩra̧'a̧ttö̧. Ju̧huȩnȩtä̧ ka̧cui̧nä̧tö̧do. ³ Ko̧ro̧nö̧ mo̧ro̧ pä'ähuinätödo ka̧ra̧rö̧'i̧nä̧, ka̧ra̧rö̧'i̧nä̧: ―Jitämä redä'ca ȩnö̧ ocuränä ȩttö̧ taditätucuaja. Ja̧'hua̧nö̧ ja̧'a̧ redä'ca ocuränä ȩttö̧ adicuä'ca ku̧nu̧, dö'cähuähuanä tätopö aditinätödo. ⁴ Ja̧u̧nu̧ o'ca'a pä'inätödo: ―Ötahuiyä tadita ichätucui. Ja̧'hua̧ta̧nö̧ korode isode ju'toju mo̧ro̧jä̧ra̧'a̧ päi'önä jode'inä taditätucuaja. Korotö o'ca toi'önä ttu̧huo̧juä̧cua̧'a̧nö̧ jȩtä̧tu̧cua̧ja̧. Ja̧'hua̧ta̧nö̧ ja̧'a̧tä̧ra̧'a̧ tipperecuächö juiyäcua'a̧nö̧― täbocö ttö̧ja̧ ja̧'hua̧nö̧ pä'inätödo. ⁵ Ja̧'hua̧nö̧ ja̧'a̧ Tu̧ru̧hua̧ Dios mȩyȩhui̧'ö̧ topinödo ötahuiyä'inä, korode isode ju'toju isode'inä jahuätö ttö̧ja̧ ttadita'a. ⁶ Pä'inödo: ―Pitö ji̧nä̧ yotöte isotö. Ja̧'hua̧ta̧nö̧ ji̧nä̧ ji̧yȩtȩ tti̧huȩnȩ ucuocuätö. Ja̧'hua̧nö̧ ja̧'a̧ttö̧ amöcuädätö pi̧yȩ adicuämä. Ja̧'hua̧nö̧ ja̧'a̧ttö̧ jitämä jitötä ttamöcuädömä koro juäi'inä jȩttö̧'a̧nö̧ ja̧'a̧. ⁷ Ti̧mȩyȩhuä̧tu̧cua̧ tti̧huȩnȩ pö̧nä̧ tiyä'chatö. Ka̧ra̧ a̧hua̧ru̧hua̧ ucuocua'amä yorö'iso ä̧ju̧cu̧ juiyäcua'a̧nö̧―, pä'inödo Dios. ⁸ Ja̧'hua̧nö̧ ji̧na̧'a̧do Tu̧ru̧hua̧ Dios pi̧jä̧ o'ca juiyönä pperetö icuinömä. Jahuätömä ja̧'hua̧nö̧ ja̧'a̧ttö̧ ötahuiyä ttadita pättäjimä jaropi'inätödo. ⁹ Ja̧u̧ ötahuiyättö Tu̧ru̧hua̧ Dios tti̧huȩnȩ pö̧nä̧ iyä'chö icuinödo pi̧jä̧ o'ca juiyönä ka̧cuä̧tö̧rö̧. Ja̧'hua̧nö̧ ja̧'a̧ttö̧ ja̧u̧ ötahuiyämä micuina'ado Babel pä'ö. Juhuorötä pperetö icuinä̧u̧do pi̧jä̧ o'ca juiyönä. ¹⁰ Pitö ji̧na̧'a̧do Sem ahuaruhuä'cotö pinätö̧mä̧. Aje suhuädina'attömä todäre a̧'ȩ o'ca'a, Sem cien a̧'ȩ u̧ju̧nä̧ro̧mȩnä̧, i̧tti̧ Arfaxad uhuäpächinödo. ¹¹ Arfaxad uhuäpächinö o'ca'a, Sem ji̧nä̧ juhua'a yabo quinientos a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do, u̧mä̧tö̧rö̧'i̧nä̧, nä̧tö̧rö̧'i̧nä̧. ¹² Arfaxad treinta y cinco a̧'ȩ ku̧nä̧ri̧nö̧do, i̧tti̧ Sala uhuäpächinö pä̧nä̧. ¹³ Sala uhuäpächinö o'ca'a, Arfaxad ji̧nä̧ juhua'a yabo cuatrocientos tres a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do u̧mä̧tö̧rö̧'i̧nä̧, nä̧tö̧rö̧'i̧nä̧. ¹⁴ Sala treinta a̧'ȩ ku̧nä̧ri̧nö̧do i̧tti̧ Heber uhuäpächinö pä̧nä̧. ¹⁵ Heber uhuäpächinö o'ca'a, Sala ji̧nä̧ juhua'a yabo cuatrocientos tres a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do u̧mä̧tö̧rö̧'i̧nä̧, nä̧tö̧rö̧'i̧nä̧. ¹⁶ Heber treinta y cuatro a̧'ȩ ku̧nä̧ri̧nö̧do, i̧tti̧ Peleg uhuäpächinö pä̧nä̧. ¹⁷ Peleg uhuäpächinö o'ca'a, Heber ji̧nä̧ juhua'a yabo cuatrocientos treinta a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do u̧mä̧tö̧rö̧'i̧nä̧, nä̧tö̧rö̧'i̧nä̧. ¹⁸ Peleg treinta a̧'ȩ ku̧nä̧ri̧nö̧do, i̧tti̧ Reu uhuäpächinö pä̧nä̧. ¹⁹ Reu uhuäpächinö o'ca'a, Peleg ji̧nä̧ juhua'a yabo doscientos nueve a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do u̧mä̧tö̧rö̧'i̧nä̧, nä̧tö̧rö̧'i̧nä̧. ²⁰ Reu treinta y dos a̧'ȩ ku̧nä̧ri̧nö̧do i̧tti̧ Serug uhuäpächinö pä̧nä̧. ²¹ Serug uhuäpächinö o'ca'a, Reu ji̧nä̧ juhua'a yabo doscientos siete a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do u̧mä̧tö̧rö̧'i̧nä̧, nä̧tö̧rö̧'i̧nä̧. ²² Serug treinta a̧'ȩ ku̧nä̧ri̧nö̧do i̧tti̧ Nacor uhuäpächinö pä̧nä̧. ²³ Nacor uhuäpächinö o'ca'a, Serug ji̧nä̧ juhua'a yabo doscientos a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do u̧mä̧tö̧rö̧'i̧nä̧, nä̧tö̧rö̧'i̧nä̧. ²⁴ Nacor veintinueve a̧'ȩ ku̧nä̧ri̧nö̧do i̧tti̧ Taré uhuäpächinö pä̧nä̧. ²⁵ Taré uhuäpächinö o'ca'a Nacor ji̧nä̧ juhua'a yabo ciento diecinueve a̧'ȩ jo̧mȩnä̧ ki̧nö̧do. Ja̧'hua̧ta̧nö̧ ji̧nä̧ korotö i̧tti̧mö̧rö̧ ku̧nä̧ri̧nö̧do u̧mä̧tö̧rö̧'i̧nä̧, nä̧tö̧rö̧'i̧nä̧. ²⁶ Taré setenta a̧'ȩ ku̧nä̧ri̧nö̧do i̧tti̧mö̧ Abram'inä, Nacor'inä, Harán'inä ttuhuäpächinö pä̧nä̧. ²⁷ Pitö ji̧na̧'a̧do Taré ahuaruhuä'cotö pinätö̧mä̧, Tarémä Abram'inä, Nacor'inä, Harán'inä ttä'o pinödo. Haránmä Lot jä'o pinödo. ²⁸ Jä'o Taré 'corupäi'äcua'a ä'canä 'corupä'i'inödo i̧tti̧ Harán. Uhuäpächinome Ur ötahuiyättö Caldea rȩjȩttö̧ 'corupä'i'inödo. ²⁹ Abrammä ki̧nö̧do Sarai pä'ö micuajucu. Nacormä Milca pä'ö micuajucu ki̧nö̧do. Milcamä Haránminä ittiju'caju pinäjudo, Isca uböa. ³⁰ Saraimä ki̧tti̧mö̧ to'inäjudo. ³¹ Taré rä'opinödo Ur ötahuiyä Caldea rȩjȩttö̧, Canaán rȩjȩra̧'a̧ i̧'cha̧ pä'ö. Chutäcu o'ipinödo i̧tti̧ Abramrö'inä, i̧tti̧ Haránminä rȩyo̧ Lotrö'inä, Abram irecua Sarairö'inä. Ja̧'hua̧nö̧ ja̧'a̧ Harán ötahuiyänä rȩbȩu̧, ju̧huȩnȩtä̧ ka̧cui̧nä̧tö̧do. ³² Taré 'corupä'i'inödo Harán ötahuiyättö doscientos cinco a̧'ȩ uju̧nä̧ro̧mȩnä̧.