¹ Tö̧ä̧nä̧hua̧ Dios ä̧cuo̧mȩnä̧ uhuäbe'inö mo̧ro̧ji̧yä̧'i̧nä̧, pi̧jä̧'i̧nä̧. ² Ja̧'hua̧nö̧ ji̧na̧'a̧nä̧ pi̧jä̧mä̧ huä̧na a̧'cua̧tta̧ jö̧nä̧tä̧, koro ju'huotö'inä, koro juäi'inä jui̧yä̧jä̧tä̧, i̧sä̧jä̧ jö̧nä̧mä̧ jo̧co̧jä̧tä̧ juoächinä̧jä̧.† Täcunä ro̧ya huämenämä yo̧'ö̧tä̧ yo̧i̧na̧'a̧. Ja̧'hua̧ta̧nö̧ A̧'cua̧ru̧hua̧ Diosmä ajiya huä̧mȩnä̧ttö̧ cä̧yu̧cuä̧rö̧ ri̧nö̧. ³ Ja̧'hua̧nö̧ ja̧'a̧ Tö̧ä̧nä̧hua̧ Dios pä'inö: ―Tȩa̧huä̧chi̧'ö̧nä̧ pä'i'i―. Päomenä, tȩa̧huä̧chi̧'i̧na̧'a̧. ⁴ Tö̧ä̧nä̧hua̧ Diosmä tȩa̧u̧ adihua'atä topinö. Ja̧'hua̧nö̧ ji̧yä̧cu̧ Tö̧ä̧nä̧hua̧ Diosmä tȩa̧u̧mä̧ yo̧ö̧ttö̧ i̧mi̧cu̧nä̧ 'quȩ'ȩpö̧ ku̧ni̧nö̧. ⁵ Tö̧ä̧nä̧hua̧ Dios o'inö tȩa̧u̧mä̧ mo̧ro̧ pä'ö. Yo̧ö̧mä̧ yodo pä'ö o'inö. Ja̧'hua̧nö̧ ni̧pä̧ro̧mȩcu̧'i̧nä̧ yo̧ȩi̧ ja̧'a̧cu̧'i̧nä̧ päi'äjimä äcuomenä mo̧ro̧ päi'omenä ji̧na̧'a̧. ⁶ Ja̧u̧nu̧ o'comenä Tö̧ä̧nä̧hua̧ Dios pä'inö: ―Ajiya rö̧jo̧mȩttö̧ huäose jö̧nä̧tä̧ pä'i'i. Koroyattö'inä, koroyattö'inä 'quȩ'ȩcuä̧chö̧ huäose jö̧nä̧ jo̧mȩ kö̧nä̧ pä'i'i― pä'inö. ⁷ Ja̧'hua̧nö̧ huäose jo̧mȩ aditomenä, 'quȩ'ȩpö̧ rö̧ni̧nö̧ koroya ajiya huäose jo̧mȩ dea'anä rö̧nä̧. Ja̧'hua̧ta̧nö̧ ju'toju ajiyamä huäose jo̧mȩ huämenä rö̧nä̧ 'quȩ'ȩpö̧ rö̧ni̧nö̧. Ja̧'hua̧nö̧ pääjimä ja̧'hua̧nö̧tä̧ ji̧ni̧yä̧cu̧. ⁸ Tö̧ä̧nä̧hua̧ Dios o'inö ja̧u̧ huäose jo̧mȩmä̧ mo̧ro̧ji̧yä̧ pä'ö. Ja̧'hua̧nö̧ ni̧pä̧ro̧mȩcu̧'i̧nä̧ yo̧ȩi̧ ja̧'a̧cu̧'i̧nä̧ päi'äjimä todäre mo̧ro̧ päi'omenä ji̧na̧'a̧. ⁹ Ja̧'hua̧nö̧ ja̧'a̧ Tö̧ä̧nä̧hua̧ Dios pä'inö: ―Mo̧ro̧jä̧ dea'a roya ajiya ji̧nä̧ yo̧mȩtȩ pä'i'ö jo'ächi'ö i̧jȩcuä̧chi̧'ö̧ rȩjȩtä̧ pä'i'i― pä'inö. Ja̧'hua̧nö̧ pääjimä ja̧'hua̧nö̧tä̧ ji̧ni̧yä̧cu̧. ¹⁰ Ajiya joomemä rȩjȩ pä'ö o'inö Tö̧ä̧nä̧hua̧ Dios. Ajiya ji̧nä̧ yo̧mȩtȩ päi'äjimä duboriyu bäreu pä'ö o'inö. Ja̧u̧ jä̧ji̧mä̧ Tö̧ä̧nä̧hua̧ Diosmä adihua'atä topinö. ¹¹ Ja̧'hua̧nö̧ ja̧'a̧ Tö̧ä̧nä̧hua̧ Dios pä'inö: ―Rȩjȩttö̧ o'ca juiyönä baumä ba'ipö kä̧hui̧. Pättiyumä cuähuä u̧huä̧ju̧ huȩjö̧ kä̧hui̧. O'ca juiyönä de'attö u̧huä̧ju̧mä̧ huȩjö̧ kä̧hui̧, u̧huä̧ju̧'i̧nä̧ ji̧yȩtä̧ jähuä u̧huä̧ju̧tä̧ huȩjö̧nä̧― pä'inö. Ja̧'hua̧nö̧ pääjimä ja̧'hua̧nö̧tä̧ ji̧ni̧yä̧cu̧. ¹² Ja̧'hua̧nö̧ ja̧'a̧ rȩjȩttö̧ ba'ipö ka̧cu̧ oi jö̧nä̧ jö̧mä̧ u̧huä̧ju̧'i̧nä̧ huȩji̧na̧'a̧, mȩji̧yä̧'i̧nä̧ u̧huä̧ju̧ ji̧yȩtä̧ jähuä u̧huä̧ju̧tä̧ huȩjö̧nä̧. Dauhuiyä'inä rȩjȩttö̧ ba'i'ö u̧huä̧ju̧ huȩji̧na̧'a̧, u̧huä̧ju̧ jacuä jähuämä ji̧yȩtä̧ jähuänätä ȩcö̧nä̧. Ja̧u̧ jä̧ji̧mä̧ Tö̧ä̧nä̧hua̧ Diosmä adihua'atä topinö. ¹³ Ja̧'hua̧nö̧ ni̧pä̧ro̧mȩcu̧'i̧nä̧ yo̧ȩi̧ ja̧'a̧cu̧'i̧nä̧ päi'äjimä huäbodäcuä mo̧ro̧ päi'omenä ji̧na̧'a̧. ¹⁴ Pa̧'a̧nö̧ ji̧na̧'a̧ pa̧ja̧cuä̧nö̧ mo̧ro̧mä̧. Tö̧ä̧nä̧hua̧ Dios pä'inö: ―Mo̧ro̧ji̧yä̧ttö̧ huäose jo̧mȩmä̧ tejädönätä rö̧jä̧tu̧cui̧, mo̧ro̧mä̧ yodottö'inä i̧mi̧cu̧nä̧ 'quȩȩcuä̧cha̧ pä'ö. Ja̧u̧ tejädömä i̧jȩcuä̧ päi'önä ka̧cua̧ pä'ö, a̧'ȩ räopa pä'ö'inä, du'huo räopa'a'inä ttu̧huo̧juä̧cua̧'a̧nö̧, mo̧ro̧'i̧nä̧, a̧'ȩ'i̧nä̧ kä̧cua̧'a̧nö̧. ¹⁵ Ja̧'hua̧ta̧nö̧ ja̧u̧ tejädömä, mo̧ro̧jä̧ttö̧mä̧ huäose jo̧mȩttö̧ rȩjȩra̧'a̧cu̧ kä̧dȩpö̧nä rö̧jä̧tu̧cui̧― pä'inö Tö̧ä̧nä̧hua̧ Dios. Ja̧'hua̧nö̧ pääjimä ja̧'hua̧nö̧tä̧ ji̧ni̧yä̧cu̧. ¹⁶ Ja̧'hua̧nö̧tä̧ tejädö juäi bäreu jähuämä, todäre jähuä aditinö, abonänö kä̧dȩpö̧nä̧ tejädömä mo̧ro̧tä̧ hue'ö ki̧ya̧rö̧ pä'ö, ja̧'hua̧ta̧nö̧ pabonänötä kä̧dȩpö̧nä̧ tejädömä yodotä hue'ö ki̧ya̧rö̧ pä'ö. Ja̧'hua̧ta̧nö̧ si̧ri̧'cö̧rö̧'i̧nä̧ aditinö. ¹⁷ Tö̧ä̧nä̧hua̧ Dios ja̧u̧ tejädömä mo̧ro̧jä̧ttö̧ huäose jo̧mȩtä̧ rö̧ni̧nö̧, rȩjȩra̧'a̧cu̧ tejädiyarö pä'ö. ¹⁸ Ja̧'hua̧ta̧nö̧ ji̧yȩtȩmä̧ mo̧ro̧tä̧ hue'ö ki̧ya̧rö̧ pä'ö aditinö, koromä yodotä hue'ö ki̧ya̧rö̧ pä'ö, tȩa̧u̧mä̧ yo̧ö̧ttö̧ 'quȩ'ȩcuä̧chö̧ ki̧ya̧rö̧ pä'ö. Ja̧u̧ jä̧ji̧mä̧ Tö̧ä̧nä̧hua̧ Diosmä adihua'atä topinö. ¹⁹ Ja̧'hua̧nö̧ ni̧pä̧ro̧mȩcu̧'i̧nä̧ yo̧ȩi̧ ja̧'a̧cu̧'i̧nä̧ päi'äjimä pa̧ja̧cuä̧nö̧ mo̧ro̧ päi'omenä ji̧na̧'a̧. ²⁰ Ja̧'hua̧nö̧ ja̧'a̧ Tö̧ä̧nä̧hua̧ Diosmä pä'inö: ―Ajiya acu o̧du̧nä̧ttö̧mä̧, tta̧'cua̧rö̧ ku̧nä̧rä̧tö̧ recuätöttö suhuädi'önätä rö̧jä̧tu̧cui̧. Ja̧'hua̧ta̧nö̧ rȩjȩ huämenämä, mo̧ro̧jä̧ttö̧ huäose jo̧mȩmä̧ ppi̧yu̧tä̧ co̧'ä̧rä̧tu̧cui̧― pä'inö. ²¹ Tö̧ä̧nä̧hua̧ Diosmä jacuoto isotö bärepätörö'inä ja̧'hua̧ta̧nö̧ o'ca toi'önä tta̧'cua̧rö̧ ku̧nä̧rä̧tö̧ bo̧rȩpi̧'ä̧rä̧tö̧rö̧'i̧nä̧ ajiya acu o̧du̧nä̧mä̧ jitötä isotöcutä ttö̧jo̧mȩttö̧ suhuädi'önä uhuäbe'inö. Ja̧'hua̧ta̧nö̧ o'ca toi'önä ppi̧yu̧ru̧mä̧, jitötä isotöcutä ttö̧jö̧nä̧ uhuäbe'inö. Ja̧u̧ jä̧ji̧mä̧ Tö̧ä̧nä̧hua̧ Diosmä adihua'atä topinö. ²² Ja̧'hua̧nö̧ ja̧'a̧ Tö̧ä̧nä̧hua̧ Dios adiunä pä'ö ucuocu u̧ju̧ni̧nä̧u̧: ―Cui̧tti̧mö̧mä̧ recuätö juottächönä pö̧ttä̧chä̧rö̧ ye'äu recuächätucui. Duboriyu bäreu ajiya acu o̧du̧nä̧ttö̧mä̧ suhuädi'önätä kä̧tu̧cui̧. Ja̧'hua̧ta̧nö̧ rȩjȩ huä̧mȩnä̧ttö̧mä̧ ppi̧yu̧mä̧ ye'äu recuächätucui― pä'inö. ²³ Ja̧'hua̧nö̧ ni̧pä̧ro̧mȩcu̧'i̧nä̧ yo̧ȩi̧ ja̧'a̧cu̧'i̧nä̧ päi'äjimä ji̧mö̧tȩnö̧ mo̧ro̧ päi'omenä ji̧na̧'a̧. ²⁴ Ja̧'hua̧nö̧ ja̧'a̧ Tö̧ä̧nä̧hua̧ Dios pä'inö: ―Tta̧'cua̧rö̧ ku̧nä̧rä̧tö̧, rȩjȩttö̧mä̧ pöttächö kä̧tu̧cui̧, ucututä isotöcutä. Pä̧cä̧yö̧'i̧nä̧, do'ähuätö'inä, de'a isotö juruhuätö'inä pöttächö kä̧tu̧cui̧ ucututä isotöcutä― pä'inö. Ja̧'hua̧nö̧ pääjimä ja̧'hua̧nö̧tä̧ ji̧ni̧yä̧cu̧. ²⁵ Ja̧'hua̧nö̧ jö̧nä̧tä̧ Tö̧ä̧nä̧hua̧ Diosmä de'a isotö juruhuätörö'inä jitötä isotöcutä ttö̧jö̧nä̧ aditinö. Pä̧cä̧yö̧rö̧'i̧nä̧ jitötä isotöcutä ttö̧jö̧nä̧ aditinö. Ja̧'hua̧ta̧nö̧ o'ca toi'önätä rȩjȩnä̧ kä̧tö̧rö̧mä̧ jitötä isotöcutä ttö̧jö̧nä̧ aditinö. Ja̧u̧ jä̧ji̧mä̧ Tö̧ä̧nä̧hua̧ Diosmä adihua'atä topinö. ²⁶ Ja̧u̧nu̧ o'ca'a Tö̧ä̧nä̧hua̧ Dios pä'inö: ―Jitämä ttö̧ja̧rö̧ tadita, ujututä ta̧'cua̧juä̧ huotörö, ujutu jö̧ ta'anö huotötä ttö̧jö̧nä̧. Dubora rö̧orattö po̧i̧rö̧'i̧nä̧, ju'tojunä co̧'ä̧rä̧tö̧rö̧'i̧nä̧, pä̧cä̧yö̧rö̧'i̧nä̧, rȩjȩ jä̧ttä̧yä̧jä̧'i̧nä̧, o'ca toi'önätä rȩjȩnä̧ kä̧tö̧rö̧mä̧ hue'ö ttö̧ja̧ja̧― pä'inö. ²⁷ Ja̧'hua̧nö̧ ja̧'a̧ttö̧ Tö̧ä̧nä̧hua̧ Diosmä ttö̧ja̧rö̧ uhuäbe'inö, chutä a̧'cua̧juä̧ huotörö. Uborö'inä, isajuru'inä chutä Dios a̧'cua̧juä̧tä̧ huotörö uhuäbe'inö.† ²⁸ Ja̧'hua̧nö̧ ja̧'a̧ Tö̧ä̧nä̧hua̧ Dios adiunä pä'ö ucuocu u̧ju̧ni̧nä̧u̧: ―Cui̧tti̧mö̧mä̧ recuätö juottächönä pö̧ttä̧chä̧rö̧ ye'äu recuächätucui. Rȩjȩmä̧ suhuädi'önätä kä̧tu̧cui̧. Rȩjȩmä̧ huecuhuätucu ucuotönätä jȩpö̧ kä̧tu̧cui̧.† Ja̧'hua̧ta̧nö̧ dubora rö̧orattö po̧i̧rö̧'i̧nä̧, ju'tojunä co̧'ä̧rä̧tö̧rö̧'i̧nä̧, o'ca toi'önä a̧'cua̧rä̧tö̧ rȩjȩnä̧ kä̧tö̧ tta̧'cua̧rö̧ ku̧nä̧rä̧tö̧rö̧'i̧nä̧ hue'ö kä̧tu̧cui̧― pä'inö. ²⁹ Juhua'a yabonö Tö̧ä̧nä̧hua̧ Dios pä'inö: ―Topätucui. O'ca juiyönä rȩjȩttö̧ jacuä jähuättö bau'inä, ja̧'hua̧ta̧nö̧ o'ca juiyönä dauhuiyä u̧huä̧ju̧ jacuä ote ȩca̧'a̧nä̧ huä̧jö̧'i̧nä̧ cu̧cuȩ cuähuätucu päi'önä iyösä. ³⁰ Ja̧'hua̧ta̧nö̧ o'ca toi'önä de'a isotö juruhuätörö'inä, o'ca toi'önä ju'tojunä co̧'ä̧rä̧tö̧rö̧'i̧nä̧, o'ca toi'önä rȩjȩnä̧ kä̧tö̧rö̧'i̧nä̧, tta̧'cua̧rö̧ ku̧nä̧rä̧tö̧rö̧mä̧ o'ca juiyönä ja̧'tu̧u̧nä̧ bau juäimä ttu̧cuȩ päi'önätä iyösä― pä'inö. Ja̧'hua̧nö̧ pääjimä ja̧'hua̧nö̧tä̧ ji̧ni̧yä̧cu̧. ³¹ Tö̧ä̧nä̧hua̧ Diosmä ja̧'hua̧nö̧ aditäjimä, juiyo adihua'atä topinö o'ca juiyönätä. Ja̧'hua̧nö̧ ni̧pä̧ro̧mȩcu̧'i̧nä̧ yo̧ȩi̧ ja̧'a̧cu̧'i̧nä̧ päi'äjimä ko̧ro̧mö̧ttö̧ ya'ute mo̧ro̧ päi'omenä ji̧na̧'a̧.