¹ Ja̧u̧nu̧ pä̧nä̧ ya̧tȩ Leví ahuaruhuä'cotöttö isa̧ irecua päi'önä ȩminö̧do. Yaju'inä Leví ahuaruhuä'cotöttö isaju jina̧'a̧do. ² Ja̧u̧nu̧ o'ca'a möchaju pä'i'inäjudo. Uborö uhuäbecuinäjudo. A̧dihua̧ uhuäpächa'a topö, kä̧hua̧tö̧ huämetucuä jo̧mȩnä̧ räjepoca'a dajö kicuinäcudo kojusodenä. ³ Juhua'a yabonö dajö icuähuä juiyinäcuado. Ja̧'hua̧nö̧ ja̧'a̧ttö̧ mära jä̧'inö̧'a̧nö̧ jö̧ttö̧ pöttähuä̧cä̧ ȩmö̧, tätinäjudo dö'cäu juäittö. Jahuä̧cä̧ jacuä kitti̧rö̧ ȩnö̧, Nilo ajenä isä'cua 'quȩtȩ rö̧ninä̧ju̧do. ⁴ Ji'quicha̧hua̧ uböa otonänö kä̧nö̧, kö̧jä̧hua̧rö̧ däje jȩtta̧ pä'ö topä̧rinä̧ju̧do ku̧huo̧jua̧ pä'ö. ⁵ Ja̧'hua̧nö̧ ja̧'a̧ Egipto rȩjȩ ru̧hua̧ ittiju Nilo ajera'a aje i'ö 'chinä̧ju̧do, kumöhuäyotö nä̧tö̧mä̧ aje jäyotonä cuettächa'anä. Ru̧hua̧ ittiju pöttähuä̧cä̧ ajenä isä'cua 'quȩtȩ ra̧'a̧ topö, kumöhuäyajuru hue'inäjudo ki'cächa pä'ö. ⁶ Pöttähuä̧cä̧ ba'epö, ji'quicha̧hua̧rö̧ topinäjudo. Ajuähuiyäcua re rö̧jä̧chi'ö̧nä̧ topinäjudo. Hebreos ttö̧ja̧ isa̧ itti̧, a̧'cua̧ra̧'a̧ pä'inäjudo. ⁷ Ja̧'hua̧nö̧ ja̧'a̧ ji'quicha̧hua̧ uböamä ru̧hua̧ ittijuru pä'inäjudo: ¿Katate acuaju hebreos ttö̧ja̧ isajuru kicha pä'ö huochopo'äjato? ji'quicha̧hua̧rö̧ katate kajarö pä'ö, pä'inäjudo. ⁸ A̧, täi päjinäcuado ru̧hua̧ ittiju. Ja̧'hua̧nö̧ huejäcua, jahuäju möäyajumä ji'quicha̧hua̧ ja̧ju̧ru̧ o'ö 'chinä̧ju̧do. ⁹ Ja̧'hua̧nö̧ ji'quicha̧hua̧ ja̧ju̧ kichomenä, ru̧hua̧ ittiju pä'inäjudo: Piderö ȩpi.̧ Cuatate cuajiyattö. Ttö chimitäcuajujä. Ja̧'hua̧nö̧ päjäcua, ji'quicha̧hua̧rö̧ ȩpö̧, katate ajö pöttädinäjudo. ¹⁰ Ja̧u̧nu̧ o'ca'a ji'quicha̧hua̧ böo juomenä, ja̧ju̧mä̧ ȩpö̧ iyinäjudo ru̧hua̧ ittijuru. Ru̧hua̧ ittiju yajutä kitti̧ päi'önä pöttädinäjudo. Ja̧u̧ imimä̧ o'inäjudo Moisés pä'ö. Ajettö chȩminä̧cu̧ pä'ö o'inäjudo Moisés pä'ömä. ¹¹ Moisés böo juo'inö'ca̧, ahuaruhuä hebreos ttö̧ja̧ ttaditome do'ächö 'chinö̧do. Juiyo pä̧icu̧nä̧ ttadita'a topinödo. Ja̧'hua̧ta̧nö̧ Egipto rȩjȩ ttö̧ja̧ isa̧ Moisés a̧hua̧ru̧hua̧ hebreos ttö̧ja̧ isa̧rö̧ cuäcuäa'a topinödo. ¹² Korotö totta'acu pä'ö adiunä toä'chomenä toiyäcu, Egipto rȩjȩ ttö̧ja̧ isa̧rö̧ cuä'ö icu, rȩba̧nä̧ dajö icuinäcudo. ¹³ Pä'äji ta'anö koro mo̧ro̧ do'ächö 'chinö̧do juhua'atä. Ja̧'hua̧nö̧ ja̧'a̧ hebreos ttö̧ja̧ ta̧ju̧ ttörohuähua'a topinödo. Suronä jȩpä̧jiŗ ö̧ pä'inödo: ¿Dä̧bö̧ cua̧hua̧ru̧hua̧rö̧ cuäcuäcu'a'attö? ¹⁴ Ja̧'hua̧nö̧ ja̧'a̧nä̧ ka̧ra̧ ädätinödo: ¿Di jä̧ttö̧ ucuru hue'inömä ujutu tu̧ru̧hua̧ päi'önä ujuturu tä̧bo̧cuä̧ isa̧ cu̧ja̧ pä'ö? ¿Ttörö'inä cuä'ö cuicua pä'ö amöcuädöjä tä̧ji,̧ Egipto rȩjȩ ttö̧ja̧ isa̧rö̧ cuä'ö cuicuäji ta'anö? Moisés ja̧u̧ huȩnȩ ä̧ju̧cu̧, ye'inödo. “Iso päi'önä ttö jȩchä̧jimä̧ huo̧juä̧chi'ä̧tö̧ a̧'cua̧ra̧'a̧ pä'ö,” amöcuädinödo. ¹⁵ Ja̧'hua̧nö̧ ja̧'a̧ ru̧hua̧ u̧huo̧juä̧chi'o̧mȩnä̧, Moisésrö cuä'ö tticua pä'ö hue'inödo. Ja̧'hua̧nö̧ ja̧'a̧nä̧ Moisésmä Egipto rȩjȩ ru̧hua̧ttö̧ tö'ipächinödo, Madián rȩjȩra̧'a̧ ö̧ja̧ pä'ö. Juhua'attö ajiya reju jäyä pä̧mä̧dinö̧do. ¹⁶ Juhua'attö Madián rȩjȩnä̧ ya̧tȩ ru̧hua̧ kinö̧mä̧, itti̧mö̧ nä̧tö̧rö̧ ko̧ro̧mö̧ttö̧nö̧ ta̧ju̧ru̧ ku̧nä̧rinö̧do. Jahuätö ajiya huä'ö ichinätödo rejuttu. Ja̧'hua̧nö̧ ja̧'a̧ ajiya a̧cuo̧'ta̧ suhuädi'önä tototta pä'ö ichinätödo, ttä'o ä̧jimö̧ ovejatö̧ ttahua pä'ö. ¹⁷ Ja̧'hua̧nö̧ ja̧'a̧ korotö ovejatö̧rö̧ tta̧'ä̧rä̧tö̧mä̧ ichi'ö, nä̧tö̧rö̧ ya'opö icuinätödo. Ja̧'hua̧nö̧ jiy̧ ä̧cu̧ Moisés ä̧rä̧mi'ö̧, nä̧tö̧rö̧ ppä'ädö 'chinö̧do, ajiya iya pä'ö ttä̧jimö̧rö̧. ¹⁸ Jahuätö nä̧tö̧mä̧, ttä'o Jetro ö̧jo̧mȩ ttichi'iyäcu, jä'epö ä̧ju̧cuinä̧u̧do: ¿Dä̧bö̧ jurunätä cuichäjätucuättö jitä mo̧ro̧mä̧? ¹⁹ Jahuätö ädätinätödo ttä'orö: Egipto rȩjȩ ttö̧ja̧ isa̧ ppä'ädäji ovejatö̧rö̧ tta̧huä̧rä̧cuä̧huä̧ ttö̧ja̧ ujuturu ya'opö tticuiyäcu. Ajiya'inä huä'ö iyäji tä̧jimö̧ ttahua pä'ö. ²⁰ Ttä'omä itti̧mö̧rö̧ pä'inödo: Ja̧'hua̧nö̧ jö̧ttö̧mä̧, ¿to ö̧jä̧ttö̧ ja̧u̧mä̧? ¿Dä̧bö̧ katä jarocu ipäjätucuäröttö? Ji'ähuäjätucuirö ujutucu u̧cuȩ ucua. ²¹ Ja̧'hua̧nö̧ ji'äu tti̧huä̧jä̧cu̧, Moisés eseunu kinö̧do Jetro ojusodenä. Ja̧u̧mä̧ ittiju Séforarö hue'inödo Moisés irecua päi'önä. ²² Ja̧u̧nu̧ o'ca'a Séfora kitti̧rö̧ uhuäbecuinäjudo. Moisésmä ja̧u̧ru̧ o'inödo Gersón pä'ö. Ja̧u̧ imimä̧ päa'a “Ttömä ichä̧cuä̧hua̧sä̧ korotö tti̧rȩjä̧nä̧ pä'ö”. ²³ Ja̧'hua̧nö̧ ja̧'a̧ recuo jinö̧ o'ca'a Egipto rȩjȩ ru̧hua̧ 'corupä'i'inödo. Israel ttö̧ja̧ juiyo pä̧icu̧nä̧ ttaditönä huettä̧rä̧u̧ tta̧'cua̧ tta̧'ȩcu̧ huopinätödo. Ja̧'hua̧nö̧ huottömä Tö̧ä̧nä̧hua̧ Diosrö rȩbȩhuina̧'a̧do. ²⁴ Ja̧'hua̧nö̧ ja̧'a̧ Tö̧ä̧nä̧hua̧ Dios jahuätö huottömä ä̧ju̧cu̧, amöcuädinödo Abrahamrö'inä, Isaacrö'inä, Jacobrö'inä jitörö iso päi'önä jȩä̧cuȩ huȩnȩ. ²⁵ Tö̧ä̧nä̧hua̧ Dios Israel ttö̧ja̧ ubara ttutta'a re rö̧jö̧nä̧ topinödo.