¹ Pi̧yȩ ja̧'a̧ Moisés i̧huȩnȩ ucuocuinö o'catoi'önä Israel ttö̧ja̧rö̧ Jordán ajettömä kä̧hua̧ räopa'acunä de'a jui̧yä̧jä̧ttö̧, Jordán aje pämäroppä päi'omettö̧, Suf'inä, Parán'inä, Tófel'inä, Labán'inä, Hazerot'inä ja̧'hua̧ta̧'a̧nö̧ Dizahab'inä rȩjȩttö̧. ² Horeb mö̧ä̧'cattö kä̧mä̧dö̧ Cades barnea ötahuiyä jubömä̧ oncenö̧ mo̧ro̧ 'chä̧cuä̧huo̧mȩ ji̧no̧mȩ, Seír mö̧ä̧'cara̧'a̧ 'chä̧cuä̧huä̧mä̧ mä̧nä̧nä̧ 'chä̧nö̧mä̧. ³ Cuarentanö a̧'ȩ o'ca'a kä̧hua̧tö̧mä̧ oncenö huotö päi'omenä, Egipto rȩjȩttö̧ rättopinö̧ pätecuächö kä̧hua̧ttö̧ ä̧cuo̧mȩnä̧ mo̧ro̧ Moisésmä Israel ttö̧ja̧rö̧ ji'ähuinö, jitö jȩttä̧cuȩ o'cajuiyönä TÖ̧Ä̧NÄ̧HUA̧ hueinö̧mä̧. ⁴ Pi̧yȩmä̧ 'cuäopina̧'a̧ TÖ̧Ä̧NÄ̧HUA̧ amorreos ttö̧ja̧ ttu̧ru̧hua̧ Sehón Hesbón ötahuiyänä ku̧cu̧'inä ja̧'hua̧ta̧'a̧nö̧ Basán rȩjȩttö̧ Astarot en Edrei ötahuiyänä ku̧ ru̧hua̧ Ogcu'inä urohuähuinö o'ca'a ⁵ Moab ręjęttö Jordán aje yabonättö, Moisésmä̧ jȩttä̧cuȩ kä̧mädö̧ ji'ähuinö pa̧'a̧nö̧ pä'önö̧: ⁶ TÖ̧Ä̧NÄ̧HUA̧ cu̧ä̧nä̧hua̧tu̧cu̧ Dios mä Horebttö ujuturu ucuocumä pą'ąnö̧ pä'inö: Ucutumä recuo mo̧ro̧ ka̧cuä̧'i̧jä̧tö̧jä̧ pi̧yȩ mö̧ä̧'quiyunämä. ⁷ Amorreos ttöją ttidepiyu möä'quiyura̧'a̧ tätucui ją'huątą'a̧nö̧ juhuoröttömä tö'cönä Jordán ajettö pämäroppa päi'ome rȩjȩ cähueächi'ome o'cajuiyönä, möä'quiyötä päi'ome, rȩjȩ juiächi'ome Neguevttömä aje jäyotonä, Cananeos tti̧rȩjä̧nä̧ ją'huątą'a̧nö̧ Líbanonä̧'įnä, juoröttömä oto Éufrates aje jubö. ⁸ Topötucui, cui̧rȩjä̧tu̧cu̧mä̧ ucutu cuä'catucu jo̧mȩ ku̧ni̧nö̧sä̧; ja̧huä̧jä̧nä̧ dodepipö ka̧cuä̧mä̧tu̧cui̧ TÖ̧Ä̧NÄ̧HUA̧ i̧mi̧nä̧ huȩnȩtö̧ cuä'o Abraham minärö'inä, Isaac minärö'i̧nä̧ ja̧'hua̧ta̧'a̧nö̧ Jacob mi̧nä̧rö̧'inä jahuätörö iya päinä̧jä̧ra̧'a̧ ja̧'hua̧ta̧'a̧nö̧ jahuätö tti̧tti̧mö̧rö̧'inä. ⁹ Ttömä ucutucumä ucuocuinösä̧ ja̧u̧nu̧ pänämä: TTÖ katätämä chu̧dä̧ri̧ya̧'a̧nö̧ jä̧cu̧sä̧ ucuturumä. ¹⁰ Topätucui jitä mo̧ro̧ ucuturumä CUÄ̧NÄ̧HUA̧TU̧CU̧ Diosmä yo'epö icuinäu̧jä̧ mo̧ro̧jä̧ si̧ri̧'cö̧ jö̧'ta'anötä̧. ¹¹ ¡Cuä̧do̧ttö̧ minä TTÖ̧Ä̧NÄ̧HUA̧ Diostä, jua'a yabocu rö̧cuä̧chä̧tu̧cu̧nä̧ jȩ'a̧cuo̧tö̧jä̧, adi̧unätä̧ ppä'ädö, CHUTÄ jȩchä̧cua̧sä̧ päinöta'anö!. ¹² ¿Tta'anö ttö katätä ämä'cö juä'i chȩpa̧ päcuätucuä, ucutu cua̧'cua̧ tta̧cuȩcuä̧tu̧cu̧'inä cuesehuätucuoca'amä?. ¹³ Ja̧'hua̧nö̧ jö̧ttö̧mä̧ ȩmi̧ yotöte isäsattö ya̧cu̧nä̧ro̧ adiunä huo̧juȩcu̧nä̧ huotörö, ttötä jȩchä̧cua̧sä̧ ucutu curuhuotö pätti'önä. ¹⁴ Ucututä ttörö ädätö pä'inätö̧jä̧: Cucuocuäjimä adihua'a ujutu jȩta̧ pä'ömä. ¹⁵ Ja̧'hua̧nö̧ ja̧'a̧ttö̧, ttahuaruhä o'cotö u päi'önä ko̧cuä̧tö̧ttö̧ ȩmi̧nö̧sä̧, ttö̧ja̧ huo̧juä̧tö̧ttö̧'i̧nä̧, ttö̧ja̧ ucuounä ko̧cuä̧tö̧ttö̧'i̧nä̧, ucutu curuhuotö jö̧nä̧ jȩpi̧nö̧sä̧, milnö jo̧mȩnä̧ tu̧ru̧hua̧ jo̧nä̧, cien'nö jo̧mȩnä̧ huea pä'ö'inä, cincuentanö ttu̧ru̧hua̧ jö̧nä̧'i̧nä̧, dieznö jo̧mȩnä̧ ttu̧ru̧hua̧ jö̧nä̧'i̧nä̧, yotucunä ttahuaruhä o'cotö tturuhuotucu jö̧nä̧'i̧nä̧. ¹⁶ Ttötä hue'inösä to̧ä̧rä̧cuä̧huä̧ ttö̧ja̧rö̧'i̧nä̧ ja̧u̧nu̧ pä̧nä̧mä̧, pa̧'a̧nö̧ pä'ö: Ä̧ju̧cuä̧tu̧cui̧ ji̧nä̧ yotöte isotötä pättä'chäcuähua'a, jueönätä pä'ätucui jahuätöä tti̧jä̧hua̧tu̧cu̧ pättö'chäcuäumä , ja̧'hua̧ta̧'a̧nö̧ i̧chä̧cuä̧huä̧ jahuätucu kö̧'i̧nä̧. ¹⁷ Ucutumä pidemäcö̧ pidetä ja̧'a̧ pä'ö'inä päcuätucuä; ä̧ju̧cuä̧tu̧cui̧ ji̧'qui̧cha̧hua̧rö̧'i̧nä̧ buorö'inä yoräteunätä. Ya̧tȩrö̧'i̧nä̧ yecuäcuätucuä, Diostä ja̧'a̧ ro̧ȩpä̧cua̧mä̧. Ji̧nä̧ yo̧mȩtȩ adihuomenä päcujuiyätucuttumä, ichätucui cho̧jo̧mȩcu̧, ttämä chä̧ju̧cuä̧cua̧sä̧, ¹⁸ Ttötä huȩdä̧cua̧sä̧ ja̧u̧nu̧ pä̧nä̧ jȩcu̧'ä̧tu̧cua̧'a̧nö̧ jö̧mä̧. ¹⁹ Otonä 'cuäopinätö̧jä̧ Horeb deattömä ja̧'hua̧nö̧ ja̧'a̧ttö̧ 'chi̧nä̧tö̧jä̧ dea juiyome o'cajuiyönä surojomenä topinätö̧jä̧ ucutumä, amorreos ttö̧ja̧ tti̧rȩjä̧nä̧ mu̧ä̧'qui̧yu̧nä̧ rä̧mä̧nä̧, ujutu TÖ̧Ä̧NÄHUA̧ DIOS hueäjita'anö; ja̧'hua̧nö̧ ja̧'a̧ttö̧ rȩbȩhui̧nä̧tö̧jä̧ Cades Barneara̧'a̧. ²⁰ Ji̧dä̧hui̧nä̧'u̧jä̧: cuichätucua pe'ö amorreos tti̧rȩjä̧ mö̧ä̧'qui̧yura̧'a̧nä̧, ujutu TÖ̧Ä̧NÄHUA̧ DIOS hueinöta̧'a̧nö̧. ²¹ Ä̧ju̧cu'ä̧tu̧cui̧, CUÄ̧NÄHUA̧TU̧CU̧ DIOS ucuturö i̧yä̧u̧jä̧ cui̧rȩjä̧tu̧cu̧; tätucui, TÖ̧Ä̧NÄHUA̧ ȩmu̧'a̧nö̧ ȩmä̧tu̧cui̧, cuätucu DIOS, ucuocuinöta̧'a̧nö̧ ucuturu; yecuecuätucuä, ja̧'hua̧ta̧'a̧nö̧ ja̧a̧ta̧ra̧'a̧ päcui'ätucuä. ²² Ucututä yotucunä ichö päcuinä̧tu̧cuä̧cu̧sä̧: "Ujututtö yotöterö tä'canä̧ hue'i, rȩjȩ usäu tti̧'chä̧cua̧'a̧nö̧ ujutu ttiminä, i̧u̧ i̧hui̧pö̧'cotö, jittähuatö ti̧mä̧ mä̧nä̧nä̧ ti̧'chä̧cua̧'a̧ja̧ pä'ö rohuäumä ja̧'hua̧ta̧'a̧nö̧ ötahuiyämä dodetä̧cuä̧ ötö'cö'unä.' ²³ "Ucutu jicuähuätucumä juiyo adihuinä̧cu̧sä̧; ucututtumä̧ docenö huotörö pojopö ȩmi̧nö̧sä̧, ya̧tȩttö̧ yo'ähui'inä̧tö̧ttö̧mä̧ ya̧tȩpö̧nä̧tä̧. ²⁴ Jahuätömä̧ usäu 'chä̧nö̧mä̧ mö̧ä̧'quiyura̧'a̧cu̧ 'cha'achinä̧tö̧, Escol rȩjȩ pämärächi'ome rȩbȩhui̧pi̧nä̧tö̧ ju̧huȩnȩ rȩbȩhui̧pö̧mä̧ rȩjȩ o'cajuiyönä̧tä̧ usähuinä̧tö̧. ²⁵ Ja̧huä̧jä̧ rȩjȩttö̧ cuähuä u̧huä̧ju̧ 'to'äjä'cotö i'cächinä̧tö̧, ja̧'hua̧ta̧'a̧nö̧ jahuätömä ji'ähuinä̧tö̧: "TTÖ̧Ä̧NÄ̧HUA̧ tö̧ä̧nä̧hua̧ Dios i̧yä̧jä̧ rȩjȩmä̧ juiyo a̧di̧huä̧jä̧ jä̧ja̧'a̧ pä'ö". ²⁶ Ja̧'hua̧nö̧ ja̧'a̧nä̧'inä, ucutumä curohuähua pä'ocotö pinä̧tö̧jä̧, tturohuähuajueimä TÖ̧Ä̧NÄ̧HUA̧ Dios hueinötä ucuotö jȩpi̧nä̧tö̧jä̧. ²⁷ Cuoju odehuiyätucunä kä̧nö̧ jarodömä pä'inä̧tö̧jä̧: Isopäi'önä TÖ̧Ä̧NÄ̧HUA̧MÄ̧ öjö'cocoujä̧, Ja̧u̧tä̧ ja̧'a̧ Egipto rȩjȩttö̧ rä'epö icuinömä, amorreos ttö̧ja̧ ttö̧mö̧nä̧ iyö icuatö pä'ö, ujuturu si'epö tticuinä. ²⁸ ¿Jitämä totä ti̧'cha̧'a̧ttö̧? Tö̧jä̧hua̧tö̧mä̧ rö̧ä̧nä̧ yetecui'önä pa̧'a̧nö̧ ji̧ttä̧huä̧u̧jä̧: Jahuätö ttö̧ja̧mä̧ tä̧mö̧ ja̧'a̧, ujututtö'inä abonänö otopäjätö ja̧'hua̧ta̧'a̧nö̧ ötahuiyä'inä bäreö ja̧'a̧ jäyänä ttoecuä obämä juiyo ju'toju jä̧ji̧ mo̧ro̧jä̧ra̧'a̧ jubö päi'önä ja̧'hua̧ta̧'a̧nö̧ juhuorömä Anac i̧tti̧mö̧rö̧'inä topäjätöjä̧." ²⁹ Ja̧'hua̧nö̧ päcuiyätucuäcu ucuturu pä'äjisä: Yecuecui'ätucuä, ja̧'hua̧ta̧'a̧nö̧ jahuätörömä yecuecuätucuä. ³⁰ TÖ̧Ä̧NÄ̧HUA̧ cu̧ä̧nä̧hua̧tu̧cu̧ Dios, cuä'catucunä 'chömä, ucuturu ppä'ädö u̧ro̧huä̧huä̧cua̧, o'cajuiyötä Egipto rȩjȩttö̧ to̧'cuä̧rä̧tu̧cua̧'a̧nä̧ jȩi̧nö̧ta̧'a̧nö̧, ³¹ ja̧'hua̧ta̧'a̧nö̧ de'a jui̧yä̧jä̧ttö̧'i̧nä̧, TÖ̧Ä̧NÄ̧HUA̧MÄ̧ cu̧ä̧nä̧hua̧tu̧cu̧ Diosmä tta̧huä̧ra̧'a̧ to'cuinätucu ta'anö, ya̧tȩ i̧tti̧rö̧ cä̧'ȩpä̧rö̧ tta̧huä̧ra̧'a̧ jä̧'i̧ja̧'a̧nö̧, o'cajuiyönä cuecuächätucu o̧du̧nä̧mä̧ pȩnȩ cui̧rȩbȩhui̧'ä̧tu̧cuo̧mȩ jubö päi'önä. ³² Ja̧'hua̧nö̧ ja̧'a̧nä̧ CU̧Ä̧NÄ̧HUA̧TU̧CU̧ i̧huȩnȩmä̧ ucutumä cuju'cätucuocö ji̧nö̧ ja̧'hua̧nö̧ jo̧mȩttö̧ TÖ̧Ä̧NÄ̧HUA̧ cu̧ä̧nä̧hua̧tu̧cu̧ Diosrömä estocotö pinä̧tö̧jä̧, ³³ cuä'catucunä 'chi̧nö̧rö̧mä̧ cu̧jä̧tu̧cuä̧cuo̧mȩ ö̧'o̧cui̧'a̧ pä'ö, yodomä ocuränä ja̧'hua̧ta̧'a̧nö̧ mo̧ro̧tä̧ ajiya isoppanä. ³⁴ TÖ̧Ä̧NÄ̧HUA̧MÄ̧ cui̧huȩnȩtu̧cu̧ rä̧mi̧pa̧'a̧ ä̧ju̧cui̧nö̧ ja̧'hua̧nö̧ ä̧ju̧cu̧ rä̧huä̧ri̧nö̧; Ja̧u̧ ra̧huä̧rö̧mä̧ iminä huȩnȩcu̧ pä'inö: ³⁵ Isopäi'önä̧tä̧ pitö ttö̧ja̧ jitä mo̧ro̧ ka̧cuä̧tö̧ suropätömä̧ ttö̧tä̧mö̧mi̧nä̧rö̧ chi̧yä̧cuä̧jä̧ a̧di̧huä̧jä̧ rȩjȩmä̧ topocotö ttäcuotö, ³⁶ ya̧tȩ Caleb Jefone i̧tti̧tä jä̧cua̧'a̧, to̧ä̧cua̧mä̧. Ja̧u̧ ö̧jä̧dä̧jä̧mä̧ ja̧u̧rö̧tä̧ chi̧yä̧cua̧sä̧ ja̧'hua̧ta̧'a̧nö̧ i̧tti̧mö̧rö̧'inä, isopäi'önä ja̧u̧mä̧ jo̧mȩnö̧tä̧ Diosrö ucuotä'ija'attö. ³⁷ Ja̧'hua̧nö̧ ja̧'a̧ttö̧, ucutu jähuänä TÖ̧Ä̧NÄ̧HUA̧MÄ amisunä toinä̧cu̧sä̧, pa̧'a̧nö pä'ö: Ucu'inä do'ächocö cuäcua̧jä̧ juä̧nȩmä̧: ³⁸ Nun i̧tti̧ Josuétä ja̧'a̧ ucu cuä'canä kö̧mä̧, ja̧u̧tä̧ jä̧cua̧'a̧ juänȩ doächäcua̧mä̧: esehuächiönä jȩpi̧rö̧, ja̧u̧tä̧ ja̧'a̧ I̧srael ttö̧ja̧rö̧ juȩpä̧ra̧cua̧mä̧ ttemomejobu päi'önä. ³⁹ Ja̧'hua̧nö̧ ja̧'a̧nä̧'i̧nä̧, ucu cui̧tti̧mu̧ po̧'ä̧tö̧ ttotte'äcuotö päcuinä̧u̧mä̧, jitämä adiu'inä surojö'inä huo̧juo̧co̧tö̧ jahuätömä juhuäne dottächäcuotö. Jahuätörö chiyäcua̧sä̧ ja̧'hua̧nö̧ ja̧'a̧ttö̧ jahuätömä ttȩmä̧cuo̧tö̧. ⁴⁰ Ja̧'hua̧nö̧ ja̧'a̧nä̧ ucumä, ppa̧'a̧chi̧ täí de'a jui̧yä̧jära'acutä dubora tuhuora mänära̧'a̧cu̧. ⁴¹ Ja̧u̧nu̧ o'ca'a ucutu ädätö päcuinätu̧cuä̧cu̧sä̧: Suronä jȩpä̧'jä̧tö̧jä̧ TÖ̧Ä̧NÄ̧HUA̧ ä'cajo̧mȩttö̧; 'cha'chepö törohuähuäcuotöjä ja̧'hua̧ta̧'a̧nö̧ ujutu TÖ̧Ä̧NÄ̧HUA̧ Dios hueinö'anötä̧ jȩtä̧cuo̧tö̧jä̧. Ucutumä ya̧cu̧pö̧nä̧ curä rohuäcuähuä ku̧nä̧rä̧tö̧jä̧, ja̧'hua̧nö̧ ja̧'a̧ttö̧ jo̧mȩnö̧ kä̧tö̧jä̧ mö̧ä̧'quiyu de'a jo̧mȩ ko̧cuä̧tö̧rö̧ curohuähuätucua pä'ö. ⁴² CHÖ̧Ä̧NÄ̧HUA̧ päinäcu̧sä̧: Jahuätörö ji'ähui: "Jȩcu̧'ä̧tu̧cuä̧tö̧ rohuäu'inä curohuähuätucuä, TTÖMÄ ucutucu ko̧cö̧ kä̧cua̧sä̧, ja̧'hua̧nö̧ ja̧'a̧ttö̧ cuabo'iyotötä rohuäu tticuäcuotöjä." ⁴³ Ttömä päji ta'anö ji'ähuinösä̧, ja̧'hua̧nö̧ ja̧'a̧nä̧ ä̧ju̧cuo̧co̧tö̧ pinätö̧. Ucutumä TÖ̧Ä̧NÄ̧HUA̧ päinö'a̧nä̧ jȩpo̧co̧tö̧ pinätö̧jä̧; Ucutumä cua̧mo̧nä̧ cujurutucunätä muä'ca de'a jo̧mȩ ko̧cuä̧tö̧rö̧ rohuäu 'chi̧nä̧tö̧jä̧. ⁴⁴ Ja̧'hua̧nö̧ ja̧'a̧nä̧ muä'ca de'a jo̧mȩ ko̧cuä̧tö̧ amorreomä, ucuturutä rohuäu icuinätö̧ ja̧'hua̧nö̧tä̧ mayatö jä̧'i̧nö̧'a̧nö̧ ruttinä̧u̧jä̧, ttö̧ro̧huä̧hui̧nä̧u̧jä̧ Seir rȩjȩttö̧, Horna ötahuiyä jö̧ta̧'a̧nö̧ oto ja̧'a̧ juȩnȩmä̧. ⁴⁵ Ucutu ppa̧a̧chi̧nä̧tu̧jä̧ ja̧'hua̧ta̧'a̧nö̧ TÖ̧Ä̧NÄHUA̧ ö̧jo̧mȩttö̧ ajahuinätö̧jä̧, ja̧'hua̧nö̧ ja̧'a̧nä̧ ä̧ju̧co̧co̧pi̧nö̧ cuajahuätucumä TÖ̧Ä̧NÄHUA̧, ja̧'hua̧ta̧'a̧nö̧ ucuturu ja̧a̧tä̧ to̧i̧nä̧u̧jä̧. ⁴⁶ Ja̧'hua̧nö̧ ja̧'a̧ttö̧ ki̧i̧pi̧nä̧tö̧jä̧ Cades rȩjȩnä̧ recu'o moró̧, o'cajuiyönä moró̧ 'cuäcuopinätu̧cu̧mä.