¹ Jjuakujinae petujjanenu barukuikuijaí Moises. Bajará ponu jumaítsi. ² "Itsamonae pebijivi itorobaremedia poponaenejjalia peyaenebinepa Canaán nakua, pa ira baja rajutaju Israelitavi. Nejjata itapetsianame kaenu kaebitsauto kanakujitsia Israel pijinu pejji yajavünüvi. Itapetsianame pamonae peevectsivi yajavuvunivi pijamonae tuatuajuta". ³ Moises itoroba parán nakuatusatojabelia peponaenejja Canaán nakuajavabelia. Baja rá pakuemia baja rá pomonae pejume kovunutsinejja petujjanenu. Dajjita baja rá pamonae penamata kaitoroba vanapacui yavajunuvi Israel tomarajavata. ⁴ Marapamonaeje peponaevi pevünuanu: Rubén pijinümi pemomojji, Samúa pejjunato Zacur. ⁵ Simeón pemomojji, Safat pejjünato Hori, ⁶ Judá pemomojji, Caleb pejjunato Jefone, ⁷ Isacar pemomojji, Igal pejjünato José, ⁸ Efrain pemomojji, Oseas pejjünato Nún, ⁹ Benjamín pemomojji, Palti pejjúnato Rafú, ¹⁰ Zabulón pemomojji yavajününü, Gadiel pejjünato Sodi, ¹¹ José pemomojji yavajününün (baiatsi Manasses pemomojji), Gadi pejjünato Susi, ¹² Dan pemomojji yavajúnünü, Amiel pejjunato Gemali, ¹³ Aser pemomojji yavajününü, Setur pejjúnato Micael, ¹⁴ Neftalí pemomojji yavajününü, Nahbi pejjünato vapsi, ¹⁵ Gad pemomojji yavajününü, Geuel pejjünato Maqui. ¹⁶ Marapamonaeje pevünüanüje papebijivi itorobalia Moisés petaenejja ira. Moises vünü junata Oaeas pejjünato Nun Josué vünüta junata. ¹⁷ Moisés itorobalia peya enebinejja Canaán ira. Baja rá ponü jumaitsi bajarapamonaejavabelia: "Negue javalia paimojjoyotsianame bajarajjuakujinae paponaename unü nakua tsutonü javabetsia. ¹⁸ Payaenebare ira panetaenejja pakuenia itsi. Payorobare jjaniavaetsia jivi bajarajota pejinavanapaevi, itsa pekuene aitatsavi o pekuene aitejepaebijivi, itsa ayaibitsaütonü o kaejivibeje. ¹⁹ Pataema jjaniavaetsia pa iranuta jinavanapa. ¿Itsa jjanepana o abeje? ¿Depatomaranü bajarajota ena? ¿Itsa saya be tajjünaebonü pepa tomaranü penayaitakaratsijava jjaina? ²⁰ Pataema pakuenia ira tsi, itsa jjanepana vaja ubinejja o jume itsa bajarajota naejavanü vajataenejjà̀". Bajava ma pamatakabitaje kopiaya uva ruanu tsobia maje. ²¹ Nejjata pabijivi pomalia petaenejja Zin vunü tusato nakuajavabelia pa iranü Rehob javabelia ata, Lebo Hamat imojjoyo javabelia. ²² Neguev javabelia pona palía Hebrón javabelia. Ahiman, sesai, y Talmai, pemomojji Anac pijinümi bajará jota jinonopa. Hebron kopiaya nakuenebeta siete pavaibeje pevajünaya Zoán Egipto javata. ²³ Nejjata bajarapomonae pata Escol nakuajavata, bajarapota bajarapomonae yamajjürana ukuta uvakuimajjürana. Nejjata anija nubeje yavatakaraponabeje naebota. Bajará jotanua ukuba higokuai, granadakuai yajaba pekaponaenejja. ²⁴ Nejjata bajarapamonae bajarajota vunuruba Escol, piniji uvaru peukutsijamatabukuene Israelitamonae. ²⁵ Pepua ya enebiveretsi bajara pa ira, cuarentena pamatakabibejekujinae naviabarena. ²⁶ Pata otjoparena ikaitsa cades javaberena, Parán nakua tusatojavaberena itsajotarena Moisés, Aarón beje dajjita Israelitavi yajava ponaponabeje. Nejjata bajarapamonae tsipaeba piajamonaejavabelia jjua taevananapa bajaraponakuatalia. Bajarajota janebaja tsitajüba pakuijavanu kapata bajara pa ira javarena. ²⁷ Najjata jumaitsi Moisés javabelia, "papaliaü rabaja pa irabelia pane irotobame patataenejja. Pepakuene bajavajotalia navitsia kapitsapa dajjita jjuanü pejjaekuene. Marapakuijavanü bajarapanakuapijijava. ²⁸ Itsiata baitsi jane bajarapanakuata pejinavanapaevi bitso piakujirasaüvi, pijatomaranü ata bitso ayaitomaranü, ikaitsa jjainanua peyama itakaranatsijavanü piajavajabitsauvivekua. Patanijinua Anac pijinumi pemomojji bajarajota pijinavanapaejava. ²⁹ Neguev nakuajavata pijinia jinavanapa amalecitavi. Petsutonujavata pijinia jinavanapa kititavi, jebuseovi amorreovi. Cananeovi pijinia jinavanapa mar javatalia dajjita Jordán itapa yakaüjüpa. ³⁰ Bajarajjuakujinae Caleb moya ajjana Moisés pitabarata penubenaivi jumaitsi: "Peneponacejjanare bajarabelia pata baru navajabitsaütsinejja bajara pairanü yabara, vajjaitsi kajena nakakuene kaüjüpa vajavekuapitsinejja piaja iranümi". ³¹ Baitsijane penajua ponaevi bajaraponüta jumaitsi: "Vajjaitsi akuenebi vaja barunabejava bajarapamonae tsipaji bajarapamonae bitso piakuenesaüvi vajjaitsi motatojjenetsia". ³² Nejjata tsipaeba najetarubena Israelitamonaejava apo pejjanepanaenakuakene peya enebinakua. bajarapamonae jumaitsi: "Bajarapanokua pibicia nakua itsajota pataniji bitso piapianüjjanetonü ³³ Bajarajota potaniji piapianüjjanetonü pemomojji Anac pijinümi, piapianüjjanetonü javavaverena pepitsapaevi. Bajarapamonae pitajjutua Saya be pa tübütojjinü. Bajarapamonae pitabarata, bajara pakuenia kajena paitsinu.