¹ Pakujinae nejjata jumetane dajjita reyewi amoreowi pamonae pemotowetsika Jordán mene jinawanapa dajjita cananeo pija reyewi pejinawanapawi manuemene Mediterráneo itapaya jumetane jjua Dioso, Jordán merra tsewia ejjana dajjita tomarra Israel itsapabelia penikabi jawabelia, tsijamatabü patatsi pejunawi jawa apo jitsipae ata pe barra nabejawa, pe ya jume taejja ajarrapa tomara Israel. ² Ajarra matakabi Dioso jumaitsi Josué jawabelia: itsimüre kusiupa ibotojawa kaewüalia Israeliwi bo upikajjiukaename. ³ Nejjata Josué ibotota kusiupa ejjana bowa upi kajjiuka dajjita pebijiwi Israel piajiwi Aralot colina jota. ⁴ Jjua yabara nejjataje Josué boupi kajjiuka: Dajjita pebijiwi pepitsa paewi Egipto jawerrena, tüpa desierto jawa pepitsapae kujinae Egipto jawerena. ⁵ Dajjita pebijiwi bowa upi kajjiu kae atatsi pepitsa paewi Egipto jawerrena, kae nakueto ata pendetajjutsiwi desierto jawata apo bowa upi kajjiunaetsi. ⁶ Israel tomarra desierto namutua najetarrubena petajjuta cuarenta (40) pa wai beje dajjita jiwi, penaweretsiwi, peka pane paewi wajabitsaü nüanü nejja Egipto jawerena pamonae pitsa parrena pe werewerekae jawabelia. Apo pe jume kuwünütsi jjae Dioso pe jume. ⁷ Dioso najumerruta pejoné ejjanae yenewa pa irra to najumerruta pija monaewini perrajutsi ⁸ Dajjita pebo upi kajjiukae kujinatsi, nakopaba jawata petó nakütsi jawabeliatsi pejamota bejemá jawabelia. ⁹ Dioso jumeitsi Josué jawabelia: Ajena pa matakabi jjanü ajibia ejjanajü jjua pebisia kuene payajawa najetarubename pajjamü Egipto jawarena. Ajarra jjuitsia pewunü tsane jotate Gilgal ajena jawabelia pa matakabi. ¹⁰ Israel tomarra pijiwi nakopaba Gilgal jawata. Ajarra pa matakabi kaniwiyo catorce (14) pa juemetota paskua pejana juemeto, jawata itoma Jericó pija wayafota penúbenae jawata. ¹¹ Paskua kujinae kujinae itsa matakabi jawabelia, pa matakabi jjane pe ubijawanü irrata, paün pe yajinaeya ejjanae jawa nejewa trico pe karru nae jawa. ¹² Maná jawa were wereka pa matakabi, pe jjae kujinae ira jawata pe ubijawa ajibi baja maná Israeliwi nejja, dajjitaa ajara pa wai jawalia jjane jjua Canaán ira jawata uba. ¹³ Pakujinae Josué Jericó imojjoyo jawata nuka, ajarra ponü inawü yota jjuaba tane, taénuta jiwitonü penukaenü pitabara yabelia, waeta bakuna espada. Josué imojjoyotsia ajaraponü jawabetsia, jumaitsi: ¿Pa jjnüta tsaja o pataja wajabitsaüta? ¹⁴ Ajarra ponü jume kanawiata: jume raja jjua nejja najjetarukajü. Nejjata Josué boka najetsia, namata bueta irabelia ajara ponü pita jjutua peyaiyataetajjae, jumaitsi nejjota: ¿jjainame istakuene jawa tane rajutsi nejjamü?, nija piani nünü raja. ¹⁵ Pe mata kapona ponaenü Dioso pija wajabitsaü jumaitsi Josué jawabelia: "Ne natajju jjatatsi jawa natajju jonarre, tsajota ra nukame, Santo raja bitso pejjania kuene". Ajara pakuenia nejjata itsi Josué.