¹ Paulus, hamba, Yesus Kristus, da gat'n maba jadi rasul ge' gat'n ngasing ya' injil Jabata, ² Da laka Jabata janji da ti'nga nabo nabi-nabi-A ka sadat'n kitab suci ³ Tentang anak-A, da manurut dagin gat'n baranak umpat'n katurunan Daud, ⁴ ge' da gat'n nyata sabage Anak Jabata da bakuasa nabo kabangkitanumpat'n antara sok kabis manurut Roh kakudusan. Laka dakoh Kristus Yesus Tuhan te. ⁵ Nabo Ini', kai' kaat'n anugerah ge' Jabata karasulan ya' minsakng ka taatan Iman ka antara samaan bangsa inya Yahudi demi gaat'n'a, ⁶ tarmasuk imu' da gat'n maba ya' jadi umpu Kristus Yesus. ⁷ Ka imu' samaan da ani wak Roma, da gat'n nganyayang Jabata, ge' da gat'n maba ya' jadi ayo-sok kudus: Anugerah ge' dame sejahtera bagimu' umpat'n Jabata, Bapa te, ge' umpat'n Tuhan Yesus Kristus! Paulus ngate mangunjungi Jamaat wak Roma ⁸ Partama-tama, iko' basyukur ka Jabatako' nabo Kristus Yesus ka samo imu' samaan barang imanmu' laka gat'n nyata ka saluruh dunia. ⁹ Barang, Jabata, da ko'layani nige rohko' ka sadat'n Injil Anak-A, manjadi saksiko' kalo iko' ti' henti-henti'a ngingat imu' samaan; ¹⁰ wak sadat'n doako', iko' slalu bamohon supaya sakira'a mati', uleh kahendak Jabata, akhir'a iko' brasil mangunjungi imu'. ¹¹ Iko' malar ngate badaput nigemu' supaya iko' kaat'n mangkat'n tarut'n karunia rohani ya' manguatkan imu', ¹² diu'ta supaya ite kaat'n gat'n neguh samahu-mahu uleh iman masing-masing, bait imanmu' maupun imanko'. ¹³ Ayo-age, iko' ngate imu' pane kalo iko' laka bakali-kali barancana ya' mangunjungimu', tapi masih tarhalang sampe mati', supaya iko' uga manuai hasil panen umpat'n antara imu' sabageume umpat'n antara bangsa-bansa inya Yahudi lait'n'a. ¹⁴ Iko' barutankang ka sok Yahudi ge' ka sok barbar, ka da bahikmat maupun ka da baga. ¹⁵ barang dakohlah, iko' malar ngate nyarita Injil ka imu' da ani wak Roma. ¹⁶ Iko' kati mangun aok Injil diu'ta kuasa Jabata ya' kasalamatan satiap sok da pacaya; partama-tama ya' sok Yahudi, laka dakoh uga ya' sok Yunani. ¹⁷ Barang wak sadat'n'a, Kabanaran Jabata gat'n nyata umpat'n iman ka iman, ulah ani tatulis: "Sok taman aok idup uleh iman." Jabata Baji tradap Parbuatan Duse Talino ¹⁸ Barang, murka Jabata gat'n nyata umpat'n saruga tradap samaan kafasikan ge' da jahe talino da manakan da taman nige da jahe ayo'a. ¹⁹ Barang dakoh, jai da kaat'n gat'n pane tentang Jabata laka jelas bagi ayo'a barang Jabata laka muji'a ka ayo'a. ²⁰ Memang, sejak dunia gat'n mancipta, sifat-sifat Jabata da kati kaat'n gat'n mile, diu'ta kuasa-A da kekal ge' sifat keilahian-A, laka gat'n mile jelas ya' gat'n pahami nabo hal-hal gat'n mancipta-A sahingga ayo'a kati kaat'n badalih. ²¹ Tapi aok'a, sakalipun ayo'a ngenal Jabata, ayo'a kati manghormati-A sabage Jabata ato basyukur ka-Ini'; sabalik'a, pikiran ayo'a jadi kati bagune ge' ate ayo'a da baga jadi patakng. ²² Ayo'a manganggap adup'a bijaksana, tapi jadi baga, ²³ ge' manukar kamuliaan Jabata da ti banoda nige gambaran-gambaran talino da fana, manuk-manuk, binatang bakaja ampat, ato binatang-binatang malata ²⁴ Barang dakoh, Jabata manyarahkan ayo'a ka kainginan ate ayo'a da ngate kacemaran sahingga ayo'a saling mancemari ungan ayo'a wak antara ayo'a sadi. ²⁵ Barang, ayo'a manukar kabanaran Jabata nige da laceh, ge' sujud gae manyembah makhluk ciptaan, inya sang Pancipta da tarpuji salama-lama'a. Amin! ²⁶ Barang dakoh, Jabata manyarah ayo'a ka nafsu-nafsu da hina, barang mahu-mahu ayo'a manukar hubungan da wajar nige hubungan da kati wajar. ²⁷ Ladakoh uga da are-are, ayo'a ngagat'n hubungan da wajar nige mahu, tapi manyala-nyala ka sadat'n nafsu tradap nyungan nige da lait'n; are-are nige are-are bulah parbuatan-parbuatan da manyangun ge' wak sadat'n ungan'a masing-masing, ayo'a narima hukuman ka samo duse-duse ayo'a. ²⁸ Ge', barang ayo'a kati ituh mangakui Jabata ka sadat'n pangetahuan ayo'a, maka Jabata manyarahkan ayo'a ka pikiran-pikiran da bobrok sahingga ayo'a bulah hal-hal da saharus'a kati ayo'a bulah. ²⁹ Ayo'a gat'n ngampahnu nige sagala macam da kati taman, da jahe, kasarakahan, ge' badangki; pahnu nige iri ate, pangamis, badaru, tipu muslihat, ge' badangki; ayo'a diu'ta panggosip, ³⁰ pamfitnah, pambanci Jabata, kasar, sumbong, bababa aihyo, amput da jahe, kati taat ka sok dama, ³¹ baga, kati setia, ti baprasaan, ge' kejam. ³² Ge' sakalipun ayo'a pane paraturan Jabata nyansana kalo sok da bulah hal-hal samacam dakoh pantas kabis, ayo'a inya hanya tatap bulah, tapi uga ngadukung ayo-sok da bulah hal-hal dakoh.