¹ Parnyataan umpatn Yesus Kristus, da gatn Jabata mangkatn wa-Ini' ya' gatn nyua' ka hamba-hamba-A manganai hal-hal da sacapat a' arus tajadi. Yesus Kristus mangkatn parnyataan diah nabo' malaikat-A ya' gatnnyampe wa' Yohanes, hamba-A. ² Yohanes laka jadi saksi firman Jabata ge' uga' Yesus Kristus, samoo sagala jaipun da laka gatna' mile'. ³ Gatn mamberkatta sok da maca nige' saratn da kuat firman nubuatan diah ge' gatn memberkat uga' ayoa' da ngadangah ge' da umas jai da tatulis ka sadatn a', karna waktu a' nga jiket. Salam Yohanes Wa Kaijo' Jemaat ka Asia ⁴ Umpatn Yohanes, wa' kaijo' jemaat da ani ka Asia. Anugerah ge' damai sejahtera ya' dimu' umpatn Ini' Da Ani, Da Laka Ani ge' Da ao' Utukng; ge' uga' umpatn kaijo' roh da ani ka hadapan-A, ⁵ ge' umpatn Kristus Yesus, Saksi da setia, da partama kali bangkit umpatn antara sok kabis ge' panguasa samo raja-raja ka bumi. Ya' Ini'' da nyayang ite' ge' dangarapas ite' umpatn duse-duse ite' nige' daya-A, ⁶ ge' laka umas ite' jadi nyiteng karajaan, imam-imam ya' Jabata ge' Sama'-A, ya' Initalah kamuliaan ge' kuasa sampe salama-lama a'! Amin. ⁷ Mile'talah , Yesus utukng nige' rahu'-rahu', ge' tiap matu ao' mile' Ini', bahkan ayoa' da nga nusuk-A; ge' samaan bangsa ka bumi ao' rahu-rahu karna Ini'. Ai, diah ao' tajadi! Amin. ⁸ "Iko anilah Alfa ge' Omega, firman Tuhan Jabata, Da Ani, ge' Da nga Ani, ge' Da ao' Utukng, Da Mahakuasa ." Pamile' Yohanes manganai Anak Talino ⁹ Iko', Yohanes, age ge' sesamu adup kupm da naap bagian sadatn kasusahan, sadatn Karajaan, ge' sadatn katekunan ka sadatn Yesus, madi' ka pulo da gatn muji' Patmos karna firman Jabata ge' kesaksian Yesus. ¹⁰ Iko' gatn Roh nguasa wa' Ano Tuhan, ge' iko' dangah saratn nyarekng umpatn bontotko' ulah mihu trumpet, ¹¹ da muji', " Nulistalah samaan da imu' mile' ka sadatn nyabuah buku ge' ngirimta dakoh wa' ijo' jemaat: Efesus, Smirna, Pergamus, Tiatira, Sardis, Filadelfia, ge' Laodikia." ¹² Lalu, iko' ngaringah ya' mile' saratn da nyansana ka iko'. Jangkah iko' ngaringah, iko'mile' ijo' kaki dian berawatn, ¹³ ge' ka tuda'-tuda' kaki dian dakoh, iko' mile' sook ulah Anak Talino, ngiak jubah sampe ka kaja' ge' nyabuah selendang berawatn ka sado-A. ¹⁴ Aba' ge' abok-A ranakng ulah burut domba, samu' ranakng salju; ge' matu-A ulah pua api. ¹⁵ Kaja'-A mangkilat ulah tamaga da mara sadatn tungko ge' saratn-A ulah guhukng paitn bah. ¹⁶ Kabarekng sentao' -A, Ini' minte ijo' bintang ge' umpatn baba-A mungkas nyabuah padang ruja' bamatu dua, ge' muka-A babalo ulah matuano da kuat. ¹⁷ Jangkah iko' mile' Ini', iko' jantu ka kaja'-A ulah sok kabis. Namun, Ini' mana' barekng sentao'-A ka tumukngko' ge' nyansana, "Iya' buut; Iko'ta Da Pamule ge' Da Pangkabas, ¹⁸ ge' Da Idup. Iko' laka kabis, tapi ile'talah Iko' idup sampe salama-lama a', ge' Iko' minte kunci maut ge' kunci Hades. ¹⁹ Karna dakoh, nulistalah hal-hal da laka imu' mile' , ge' hal-hal da tajadi mati' ge' hal-hal da ao' tajadi ngalaka a'. ²⁰ Diahta rasia manganai ijo' bintang da imu' ile' ka barekng sentao'-Ko ge' ijo' kaki dian berawatn dakoh. Ijo' bintang dakoh anilah ayo malaikat umpatn ijo' jemaat; ge' ijo' kaki dian dakoh anilah ijo' jemaat."