¹ Laka dakoh mani ano, jangkah Yesus malik ka Kapernaum, dangahlah barita kalo Ini' madi wak ramin. ² Lalu, karah sok bakubu sampe kati ani ruangan agi, bahkan wak suut'n pintu sakalipun, ge' firman ka ayo'a. ³ Lalu, ayo'a utukng ka Ini', minsakng sook da lumpuh da gat'n ngusung uleh ampat ungan. ⁴ Jangkah ayo'a kati kaat'n minsakng sok dakoh ka riket Yesus barang sok karah, ayo'a pun muka aro wak samo Yesus. Ngalaka muka'a, ayo'a ngadisah tilam tampat sok lumpuh dakoh gurikng. ⁵ Jangkah Yesus mile iman ayo'a, Ini' nyansana ka sok lumpuh dakoh, "Hei anak-Ko', duse-dusemu' laka gat'n ngampun." ⁶ Barang, mani ungan ahli Taurat da unyung wak teet'n mule bapikir ka sadat'n ate ayo'a, ⁷ "Nyai Sok diah nyansana ulah dakoh? Ini' sadakng manghujat! Asi da kaat'n ngampun duse-duse kacuali Jabata sandiri?" ⁸ Yesus langsung pane umpat'n sadat'n Roh-A kalo ayo'a bapikir-pikir ka sadat'n ate ayo'a, "Nyai imu' bapikir ulah dakoh ka sadat'n ate mu'? ⁹ Ume ta da labih mudah, muji' ka sok lumpuh dakoh, 'Duse-dusemu' gat'n ngampun ', ato muji', 'Umpatlah, ngantat'nlah kasormu' ge' bajalat'nlah'? ¹⁰ Tapi aok'a, panelah kalo Anak Talino umpu kuasa wak bumi ya' ngampun duse-dusemu'." Yesus nyansana ka sok lumpuh dakoh, ¹¹ Iko' nyansana ka imu': umpat, ngantat'n kasormu', ge' urelah ka raminmu'." ¹² Sok lumpuh dakoh sagera agut'n, naap kasor'a, ge' anu mungkas, wak tura samaan sok. Ayo'a samaan takjub ge' mamuliakan Jabata, gae nyansana, "Kai' ti'nga parnah mile hal da ulah diah!" Lewi Nganang Yesus ¹³ Yesus anu agi ka tabikng timu', ge' samaan sok bajujut-jujut utukng ka-Ini', ge' Ini' ngajar ayo'a. ¹⁴ jangkah Ini' lewat, Ini' mile Lewi, sadakng unyung wak tampat pambayaran pajak. Lalu, Yesus nyansana ka Ini', "Ngananglah Iko'." Lalu, Lewi pun agut'n ge' nganang-A. ¹⁵ Ge', samantara Yesus unyung uman wak ramin sok Lewi dakoh, ani karah pangumpul pajak ge' ayo-sok baduse da uga uman samahu nige Yesus gae murid-murid-A, barang wak teet'n ani karah sok, ge' ayo'a nganang Yesus. ¹⁶ Jangkah mani ungan ahli Taurat umpat'n kalumpok Farisi mile Yesus sadakng uman samahu nige ayo-sok baduse, ge' pangumpul-pangumpul pajak, ayo'a mansikat'n ka murid-murid-A, "Nyai Ini' uman samahu ayo panagih pajak ge' ayo-sok baduse?" ¹⁷ Jangkah Yesus dangah'a, Ini' nyansana ka ayo'a, "Ayo'a da sehat kati marlu dokter, malait'nkan ayo'a da anap'm. Iko' utukng inya yak maba ayo-sok taman, malait'nkan ayo-sok baduse." Partanyaan tentang Bapuasa ¹⁸ Murid-murid Yohanes ge' ayo-sok Farisi sadakng bapuasa. Mani ungan sok utukng ge' mansikat'n ka-Ini', "Nyai murid-murid Yohanes ge' murid-murid sok Farisi bapuasa, tapi murid-murid-Mu' kati bapuasa?" ¹⁹ Lalu, Yesus nyansana ka ayo'a, "Kaat'n ta ayo'a pangirikng panganten bapuasa samantara panganten ayo-are masih samahu ayo'a? Salama panganten ayo-are dakoh masih samahu-mahu nige ayo'a, ayo'a kati kaat'n bapuasa. ²⁰ Sa', ano'a aok utukng jangkah panganten ayo-are gat'n naap umpat'n ayo'a, ge' pas ano dakohlah ayo'a aok bapuasa. ²¹ Kati ani sok da namal pangiak ama da rujet nige saput da bahu. Kalo ladakoh, tamal saput da bahu aok rujet pangiak da ama, ge' rujet'a aok batambah aihyo. ²² Ge', kati ani sok da nuntokng anggur da bahu ka sadat'n kantong kurit da ama. Sa' ladakoh, anggur dakoh aokngarujet kantong kurit dakoh sahingga bait anggur maupun kantong'a aok rusak. Sabalik'a, anggur da bahu gat'n mana' wak sadat'n kantong kurit da bahu." Yesus diu'ta Tuhan ka samo Ano Sabat ²³ Ge', pas ano Sabat, Yesus nabo uma gandum, ge' ka sadat'n pajalat'n'a, murid-murid-A mule ngutup'm iteng-iteng gandum. ²⁴ Lalu, aso-sok Farisi nyansana ka-Ini', "Ile, nyai ayo'a umas jai da malanggar hukum ano Sabat?" ²⁵ Lalu, Ini' nyansana ka ayo'a, "Ti'nga suah imu' maca jai da gat'n Daud umas jangkah ini' ge' ayo-sok samahu'a sadakng kakurangan ge' saburuk? ²⁶ Langkina ini' maruh ka Ramin Jabata ka masa Abyatar manjabat sabage Imam da Aihyo, ge' uman roti parsembahan, da hanya buleh gat'n uman uleh ayo imam, ge' uga mangkat'n roti dakoh ka ayo-sok da samahu'a?" ²⁷ Lakadakoh, Yesus nyansana ka ayo-sok Farisi dakoh, "Ano Sabat gat'n bulah yak talino, inya talino yak ano Sabat. ²⁸ Jadi, Anak Talino diu'ta Tuhan, uga ka samo ano Sabat."