¹ Pas jakap ano'a, Yesus anu bakalilikng ka kota-kota ge' desa-desa yak nyarita ge' nyatakan Injil Krajaan Jabata. Kadua balas rasul ani samahu-mahu nige Ini', ² ladakoh uga mani ungan mahu da laka gat'n nyembuh Yesus umpat'n roh-roh da jahe ge' barbagei pangkanap'm. Wak antara ayo'a diu'ta Maria, da gat'n nyabut Magdalena, da gat'n ngabebas Yesus umpat'n ijo' roh da jahe. ³ Ani uga Yohana saut'n Khuza bandahara Herodes, Susana, ge' masih karah mahu lait'n'a da ngiak kakayaan ayo'a sadi yak ngadukung Ini'. Parumpamaan tentang Panabur Bani ⁴ Jangkah sok karah bakumpul ge' ayo-sok umpat'n barbagei kota utukng ka Yesus, Ini' sarita ka ayo'a nige nyabuah parumpamaan: ⁵ "Sok petani anu ngamhur bani. Jangkah ini' ngamhur, ani sabagian da jantu wak suut'n pagala ge' gat'n nyinyak-nyinyak, gae gat'n uman uleh manuk-manuk wak udara. ⁶ Sabagian agi jantu wak samo tampat babatu, ge' jangkah bani dakoh mule tumbuh, bani dakoh jadi karikng barang kati ani pait'n. ⁷ Sabagian lait'n'a jantu wak tauda-uda rumpo unak ge' tumbuh samahu'a sahingga semak dakoh nyarukot'n'a. ⁸ Sisa bani lait'n'a jantu wak tana da subur ge' batumbuh sahingga mangkat'n hasil saratus kali lipat karah'a." Ngalaka mangakhiri parumpamaan dakoh Yesus baseru, "Ini' da umpu rajak yak dangah, hendaklah dangah bait-bait!" ⁹ Ngalaka dakoh, murid-murid Yesus mansikat'n ka-Ini' tentang arti'a parumpamaan dakoh. ¹⁰ Ini' nyansana, "Ka imu' gat'n mangkat'n pane rahasia Krajaan Jabata, tapi ka sok lait'n gat'n mangkat'n pane ka sadat'n parumpamaan supaya, 'Sakalipun mamandang, ayo'a kati mile, ge' sakalipun dangah, ayo'a kati ngarati."' Panjelasan Yesus tentang Parumpamaan Bani ¹¹ Diahlah arti Parumpamaan dakoh: "Bani dakoh diu'ta firman Jabata. ¹² Bani da jantu wak suut'n pagala dakoh diu'ta ayo'a da dangah firman Jabata. Laka dakoh, utuknglah sitan ge' nangkap firman dakoh umpat'n ate ayo'a supaya ayo'a iya'pacaya ge' gat'n nyalamat. ¹³ Bani da jantu wak samo tana babatu diu'ta ayo-sok da dangah firman Jabata ge' narima'a nige sukacita, tapi kati bauhat. Ayo'a hanya pacaya sabantar, tapi jangkah kasulitan utukng, ayo'a sagera malik umpat'n Jabata. ¹⁴ Bani da jantu wak antara rumpo unak diu'ta ayo-sok da dangah firman Jabata, tapi samantara ayo'a batumbuh, ayo'a gat'n nyarukot'n uleh rasa khawatir, kakayaan, gae kasenangan idup sahingga ayo'a kati manghasilkan buah da ansak. ¹⁵ Sadangkan tana da jantu wak tana da subur dakoh diu'ta ayo-sok da dangah firman Jabata ge' mana'a ka sadat'n ate da jujur ge' bait, gae barubah ka sadat'n katekunan." Pratikan Cahayamu ¹⁶ "Kati ani nyungan pun da ngalaka nutup'm palita, laka dakoh nutup'a nige gantang ato mana'a wak saroh tampat pabuus. Sabalik'a, ini' aok mana'a palita dakoh wak samo kaja palita supaya sok da maruh ka sadat'n ramin kaat'n mile balo'a. ¹⁷ Sabab, kati ani hal da basukat'n da kati aok gat'n nyata, ge' kati ani rahasia da kati aok gat'n ngungkap ge' gat'n minsakng ka tarakng. ¹⁸ Barang dakoh, pratikanlah langkina imu' dangah barang asi da umpu aok gat'n mangkat'n labih karah agi tapi aok'a asi da kati umpu, umpat'n'a aok gat'n naap, bahkan jai da ini' kira gat'n ni' umpu'a." Kaluarga Yesus da Sasungguh'a ¹⁹ Lalu, sino ge' ayo-age Yesus utukng amput-A, tapi ayo'a kati bisa ngariket'a barang sok bakubu. ²⁰ Jadi, gat'n muji' ka-Ini', "Sino' ge ayo-age-Mu' agi agut'n ka sato ayo'a ngate sadaput nige Akup'm." ²¹ Tapi aok'a Yesus naham ayo'a, "Sino-Ko' diu'ta da dangah firman Jabata ge' ngaraje'a." Yesus ngangkah Nyaru Kuat ²² Pas ano dakoh, Yesus maka' ka sadat'n parahu samahu murid-murid-A Ini' nyansana ge' ayo'a, "Kaeh te ngalangkah ka suut'n lait'n timu' diah." Maka, anu ta ayo'a ka pajah. ²³ Tapi, jangkah ayo'a balayar, Yesus buus. Lalu, batiuplah nyaru da kuat dakoh ka timo' dakoh ge' parahu ayo'a pait'n maruh sahingga ayo'a madi ka sadat'n bahaya. ²⁴ Laka dakoh, ayo murid utukng ka Yesus ge' ngias-A gae nyansana , "Guru! Guru! ite aok abas!" Lalu, Yesus pun umpat ge' ngarato' nyaru kuat nige galombang da bagalunsakng dakoh. Nyaru kuat dakoh pun angkah ge' timo' dakoh jadi tenang. ²⁵ Ge', Ini' nyansana ka ayo'a, "Kadume imanmu'?" Ayo'a jadi buut ge' heran gae nyansana nyungan ge' da lait'n, "Asi Sok diah? Bahkan Ini' mangkat'n parintah ka nyaru ge' pait'n, ge' ayo'a patuh ka-Ini'." sok Gerasa Gat'n ngabebas umpat'n Roh da Jahe ²⁶ Lalu utukng ta Yesus ge' murid-murid-A ka wilayah sok Gerasa, ka pajah Galilea. ²⁷ Pas saat Yesus disah ka tabikng, ini' gat'n amput uleh sok are umpat'n kota dakoh da gat'n ngarasuk uleh roh-roh da jahe. Sok dakoh nga tuhi kati ngiak pangiak ge' kati madi ka ramin, malait'nkan wak kuburan ²⁸ Jangkah sok dakoh mile Yesus, ini' pun ngampak ge' sujud wak hadapan-A. Nige' sarat'n da nyarekng ini' nyansana, "Diu'ta urusan antara Akup'm ge' iko', hei Yesus, Anak Jabata da Mahatinggi? Iko' mahi ka-Imu', iya' siksa iko''!" ²⁹ Hal dakoh tarjadi barang Yesus marintah roh da jahe dakoh mungkas umpat'n sok dakoh. Sitan dakoh sering kali ngarihit-rihit sok dakoh sahingga ini' gat'n ngarante, gat'n ningo, gat'n sok ngajaga, tapi ini' kaat'n nyantak rante'a ge' gat'n minsakng uleh sitan ka tampat-tampat da sepi. ³⁰ Laka dakoh, Yesus mansikat'n ka sok dakoh, "Asi gaat'nmu'?" Naham sok dakoh, "Legion" Barang ani karah sitan da marasuk'a. ³¹ Sitan-sitan dakoh mahi ka-Ini' supaya Ini' iya' marintah ayo'a yak anu ka jurang maut. ³² Wak tampat dakoh, ani kawanan aihyo uwe da sadang najo pangkuman ka lusur. Sitan-sitan dakoh mahi ka Yesus yak mambiar ayo'a maruh ka sadat'n tampat uwe dakoh, ge Yesus ngizin ayo'a. ³³ Maka, sitan-sitan dakoh pun mungkas umpat'n sok dakoh ge' maruh ka sadat'n uwe-uwe, lalu kawanan uwe dakoh boho disah lereng lusur da karibet nuju ka timo da tangulup'm. ³⁴ Jangkah ayo panggembala uwe mile'a, ayo'a boho adup'a ge' nyarita kajadian dakoh wak kota ge' wak kampong sakita'a. ³⁵ Jadi, sok karah utukng yak mile jai da terjadi. Ayo'a utukng ka Yesus ge' amput sok da ngabebas umpat'n sitan-sitan dakoh sadang unyung wak riket kaja Yesus, laka bapangiak, ge' laka waras pikiran'a. Hal diah umas ayo'a buut. ³⁶ Ayo'a da mile kajadian diah nyarita ka sok lait'n langkina sok da karasukan sitan dakoh gat'n nyembuh. ³⁷ Lalu, samaan sok da madi wak rapo Gerasa mahi Yesus yak ngagat'n ayo'a sabab ayo'a gat'n nyakam uleh buut da aihyo. Barang dakoh, Yesus maka ka parahu ge' malik ka Galilea. ³⁸ Tapi aok'a, sok da laka gat'n ngabebas umpat'n sitan-sitan dakoh mahi ka Yesus supaya nini' buleh samahu-mahu nige Yesus ngadu'a anu, wat'n-A, ³⁹ "Ure ta ka ramin mu' ge' nyarita ta lah hal-hal aihyo da laka Jabata bulah bagimu'." Sok dakoh pun anu ka samaan panjuru kota ge' nyarita jai da laka Yesus bulah bagi'a. Anak Yairus Gat'n ngabangkit ge' sok Mahu Gat'n nyembuh ⁴⁰ jangkah Yesus malik ka Galilea, sok karah nyambut-A barang ayo'a samaan laka nganti-A. ⁴¹ Wak teet'n ani sok bagaat'n Yairus da utukng ka-Ini', ini' diu'ta sok kapala sinagoge. Sambil sujud sambah wak kaja Yesus, Yairus bamuhon supaya Ini' utukng ka ramin'a ⁴² barang ini' umpu sok putri tunggal da kira-kira baumur dua balas taun, ge' anak dakoh hampir kabis. Ge', jangkah Yesus nuju ka teet'n, sok karah badesak-desak wak kalilikng-A. ⁴³ Wak dakoh ani sok mahu da laka manderita pandarahan bahat salama 12 taun, ge' kati nyungan pun sok da kaat'n nyembuh'a. ⁴⁴ Mahu dakoh ngariket Yesus umpat'n buntot ge' marap ujukng jubah-A, maka jangkah dakoh uga pandarahan'a angkah. ⁴⁵ Lalu, Yesus nyansana, "Asi da marap-Ko'?" Barang samaan sok basankal, Petrus nyansana, "Guru, sok karah bakubu ngangkalilikng-Mu' ge' badesak-desak nige-Mu'!" ⁴⁶ Tapi aok'a, Yesus nyansana, "Sok marap-Ko' barang Iko' marasa ani kuasa da mungkas umpat'n-Ko'." ⁴⁷ Jangkah mahu dakoh mile kalo ini' kati kaat'n nyukat'n adup, ini' utukng ka Yesus nige bakutur ge' basujud wak hadapan-A. Wak depan samaan sok, ini' nyarita nyai ini' marap Yesus, ge' langkina ini' nige jangkah gat'n nyembuh. ⁴⁸ Laka dakoh, Yesus nyansana ka ini', "Anak-Ko', imanmu' laka nyembuhmu'. Anu ta ka sadat'n dame sejahtera." ⁴⁹ Jangkah Yesus masih nyansana, sok umpat'n ramin kapala Sinagoge dakoh utukng ge' nyansana ka Yairus, "Putrimu' laka kabis. Iya' agi ngarepot Guru." ⁵⁰ Tapi aok'a, dangah hal dakoh Yesus nyansana ka Yairus, "Iya' buut. Pacaya saja ge' anakmu' aok salamat." ⁵¹ Jangkah Yesus sampe wak ramin Yairus, Ini' kati ngadu asi pun maruh samahu-A kacuali Petrus, Yohanes, Yakobus, sama' ge' sino' kangot dakoh. ⁵² Samaan sok munse ge' ngawang kangot mahu, tapi Yesus nyansana, "Iya' munse, ini' kati kabis tapi buus." ⁵³ Sok karah dakoh pun ngalukat'n-A barang ayo'a pane kangot mahu dakoh laka kabis. ⁵⁴ Tapi aok'a, Yesus nyinte barekng kangot dakoh ge' maba'a, "Umpatlah, nak!" ⁵⁵ Maka, kambalilah roh kangot dakoh jangkah dakoh uga ini' agut'n. Lalu Yesus marintah supaya kangot dakoh gat'n mangkat'n tarut'n yak ni' uman'a. ⁵⁶ Dua ungan sok dama' dakoh takjub, tapi Yesus mingat ayo'a yak muji' asi pun tentang jai da laka terjadi.