"Pajutukng Roh Kudus" ¹ Waktu ano Pentakosta utukng, ayo' a' samahu-mahu ani ka tempat da samu. ² Ge, tiba-tiba ta dangah ta umpatn rangit, miho samu ngampoh nyaru da laju, ge miho dakoh ngampanhu sa isi ramin tampat ayo' a' agi munyung. ³ Ge, tampak ka ayo' a' rata-rata samu pua api da da bertaburan ge singah ka samo' ayo' a' masing-masing. ⁴ Maka, ayo' a' samaan gatn panhu nige' Roh Kudus ge mule nyansana sadatn berbagai bahasa, samu da gatn mangkatn Roh Kudus yak ayo' a' muji a'. ⁵ Waktu ano dakoh, ani ayo-sok Yahudi da madi wak Yerusalem, ayo-sok saleh umpat'n tiap-tiap bangsa wak saroh rangit. ⁶ Ge', sa nik mihu dakoh gat'n dangah, sakumpulan sok karah utukng bariuh-riuh ge' bingung karna satiap sok sadakng dangah ayo'a dakoh nyansana ka sadat'n bahasa ayo'asadi. ⁷ Ayo'a takjub ge' heran, sambil nyansana. "Inya ayo'a samaan da sadakng nyansana diu'ta ayo-sok Galilea ? ⁸ Ge' langkina mungkin masing-masing ite dangah ayo'a nige bahasa tampat ite gat'n ngalahir? ⁹ Ayo-sok Partia, ge' Media, ge' Elam, ge' panduduk Mesopotamia, Yudea, ge' Kapadokia, Pontus, ge' Asia, ¹⁰ Frigia, ge' Pamfilia, Mesir, ge' daerah-daerah Libia riket Kirene, ge' pandatang-pandatang umpat'n Roma, bait ayo-sok proselit, ¹¹ ayo-sok Kreta ge' Arab. Ite dangah ayo'a nyansana nige bahasa ite tentang parbuatan-parbuatan da aihyo Jabata." ¹² Ge', ayo'a samaan takjub ge' bingung sambil nyansana nyiteng samu lait'n, "Jai arti samaan diah?' ¹³ Tapi aok'a sok lait'n guluk ge' nyansana, "Ayo'a gat'n mabuk uleh anggur bahu." Petrus Nyansana Ka Sok Karah ¹⁴ Barang, Petrus agut'n samahu sabalas rasul, ngangkat sarat'n'a ge' nyansana ka ayo'a, "Hei ayo-sok Yahudi ge' samaan da madi wak Yerusalem, kate'a gat'n pane ulehmu' ge' pratikan ucapako'. ¹⁵ Sa', ayo-sok diah kati mabuk, ulah da imu' ngira karna ano bahu jam taru, ¹⁶ Tapi diahlah da gat'n muji' nabo Nabi Yoel: ¹⁷ 'Ge, waktu ano-ano trakhir aok tarjadi, Jabata bafirman: Kalo iko' aok mancurahkan Roh-Ko' ka samo samaan talino. Ge' anak-anakmu' da are ge' anak-anakmu' da mahu aok banubuat, ge anak-anak mudamu' ao' mile penglihatan, ge ayo' sok tua ka antaramu' ao' agi pimha a' pimha-pimha. ¹⁸ Bahkan, ka samo hamba-hamba-Ko' da are ge hamba-hamba-Ko' da mahu waktu ano-ano dakoh, Iko' aok mancurahkan Roh-Ko', ge' ayo'a aok banubuat. ¹⁹ Ge', Iko' aok nujo mukjizat-mukjizat wak rangit, wak samo, ge' tande-tande ajaib wak bumi, wak saroh, daya' ge' api, ge' kabut asup. ²⁰ Matuano aok gat;'n ngubah jadi patakng ge' burat'n jadi daya', sabalum ano Tuhan da aihyo ge mulia utukng. ²¹ Ge', aok jadi, satiap sok da maba gaat'n Tuhan aok gat'n nyalamat."' ²² "Hei sok Israel, dangahnihparkataan diah. Yesus, Sok Nazaret, sook da gat'n nyata wak antara imu' uleh Jabata nige hal-hal ajaib, mukjizat-mukjizat, ge' tande-tande, da ngalaka Jabata nujo wak anataramu' nabo Ini', ulah da imu' sadi pane. ²³ Yesus diah, da gat'n nyarah manurut rancana da ngalaka gat'n nentu ge' pangetahuan Jabata sabalum'a, imu' ngamis nige nyalib-A nabobarekng ayo-sok durhaka. ²⁴ Tapi aok'a, Jabata ngalumpat-A, ge' ngarapas-A umpatn panderitaan maut karna kati mungkin bagi-A gat'n nguasa uleh da kabis. ²⁵ Sa', Daud parnah nyansana tentang Yesus, 'Iko mile Tuhan slalu ani wak depanko', barang Ini' madi wak sabalah kananko' sahingga iko' kati aok gat'n ngagoyah. ²⁶ Uleh sa' dakoh, ateko' bagembira, ge' rata'ko' basorak-sorak. unganko' uga aok madi ka sadat'n pangharapan, ²⁷ Barang Kup'm kati aok ngagat'n jiwako' barada wak dunia sok kabis, ato mambiar ungan Sok Kudus-Mu mile kabinasaan. ²⁸ Kup'm ngalaka muji' ka iko' jalat'n kaidupan. Kup'm aok umasko' pahnu sukacita nige bahas-Mu.' ²⁹ Age-age, iko' kaatn nyansana wak imu' nige' yakin tentang bapa leluhur ite, Daud, bahwa ni' laka kabis ge gatn nyibur, ge sibur a' masih ani sanahu nige' ite sampe ano diah. ³⁰ Jadi, karna ni' anilah sok Nabi ge panane bahwa Jabata laka bajanji nige' sumpah wak a' yak mangkunyung a' nyungan umpatn katurunan Daud ka samo' tahta a'. ³¹ Karna dakoh, Daud da mile hal diah sebelum a', ni' nyansana tentang pangkidup a' Kristus bahwa: 'Ni' kati ao' gatn ngagatn a' ka dunia sok kabis, ge ungan-A' kati mile kebinasaan.' ³² Yesus diahlah da Jabata ngalumpat ge' kai' samaan ani'ta saksi tentang hal dakoh. ³³ Uleh karna dakoh, ngalaka gat'n ngangkanyamo uleh barekng kanan Jabata ge' narima janji umpat'n Bapa tentang Roh Kudus, Ini' ngalaka gat'n curah, bait jai da imu' mile maupun dangah. ³⁴ Barang, Daud kati maka ka surga, tapi ini' sadi muji, "Tuhan muji' ka Tuanko', 'Unyung ta wak seblah kanan-Ko, ³⁵ sampe Iko' umas munsuh-munsuh-Mu' jadi tumpuan kaja-Mu."' ³⁶ "Uleh karna dakoh, kate'a samaan ramin Israel pane nige pasti kalo Jabata ngalaka jadi-A Tuhan ge' Kristus, diahlah Yesus da ngalaka imu' nyalib." ³⁷ Sa' ayo'a dangah hal diah, nusuk ta ate ayo'a, lalu muji' ka Petrus ge' para rasul lait'n'a, "Ayo-age, jai da harus kai bulah?" ³⁸ Lalu, Petrus muji' ka ayo'a, Batobatlah ge' baptislah adupmu' masing-masing ka sadat'n gaat'n Kristus Yesus ya' pangampunan duse-dusemu', ge' imu' aok narima karunia Roh Kudus. ³⁹ Barang, janji diah diu'ta ya' imu, ge' anak-anakmu', ge' ya' samaan sok da masih jauh, karah da Tuhan Jabata ite aok maba'a." ⁴⁰ Ge', nige karah sarat'n lait'n, Petrus basaksi nige sungguh-sungguh ge ngampak ka ayo'a, wat'n nak, "Salamat'talah adupmu' umpat'n ganarasi da bingkok diah!" ⁴¹ Ayo-sok da narima sarat'n Petrus gat'n baptis ge' waktu ano dakog jumlah ayo'a gat'n nambah sakitar taru ribu jiwa. Parsakutuan Ayo-Sok Pacaya ⁴² Ayo'a batekun ka sadat'n pangajaran rasul-rasul ge' ka sadat'n parsakutuan, ka sadat'n mucuh roti, ge' ka sadat'n badoa. ⁴³ Ge', buut utukng ka samo satiap jiwa, ge' karah hal ajaib nige tande-tande da tarjadi nabo para rasul. ⁴⁴ Samaan da pacaya bakumpul samahu ge' umpu sagala sasuatu'a samahu-mahu. ⁴⁵ Lalu, ayo'a nyual harta benda ge' umpu'a, lakadakoh magi-magi ka samaan sok, sasuai kabutuhan'a masing-masing. ⁴⁶ Satiap ano, nige basatu ate ayo'a bakumpul samahu wak Bait Jabata ge' mucuh-mucuh roti umpat'n ramin ka ramin. Ayo'a narima pangkuman ayo'a nige gambira ge' tulus ate, ⁴⁷ Sambil mamuji Jabata, ge' ayo'a gat'n nyuka uleh karah sok. Ge', satiap ano Tuhan nambah jumlah ayo'a, dakoh ta ayo-sok da gat'n nyalamat.