(Enblru sa Detelro Telreng Lima Ribu Tena) ¹ Nena muku nepe,Walri Yei dekayei Galilea buteposuku,ne bu delre pe Tiberias kani pone. ² Detelro doplre nete tauka nalre nepelrena.Metelrena tiyaye nena kembalri delre mekoyo wena sane teno yaye nate poye meko youmu. ³ Nemane,Walri Yei dekayei nenei ototounaplre mekote eilrai peko dipene eke niki yaye. ⁴ Ne yapo,Yahudi Kena ya Delre nepe nopi ye puko. ⁵ Nemane doute dite date te yowe neplre detelro doplre nekote miyaye,Walri Yei dekayei Filipus te sane youne,mepena piyeu te ate mapone nemane da detelro telreng nete ane naye?" ⁶ Walri Yei dekaiyei saneyounu Filipus nena kena te tuwayounu neplrena noulrena ne nimeyenbuko ne kembalri ne mekombona. ⁷ Filipus ate sauke,"Piyeu naitena nena sentelreng 200 dinar,nena elrikoipai detelro telreng tena,nepelrena mbei-mbei piyeu po kekau bete." ⁸ Nenei Ototouna detelro mbei,ne Andreas,Simon Petrus kena do keka,Walri Yei dekayei te saneyounu, ⁹ "depene yei besika nena piyeu mesi nepelre ka be selrei nena elrikoipai detelro telreng tena?" ¹⁰ Walri Yei dekayei saneyoumu,Detelro telreng miyayenate sane menbomde ane neke naye.Nenouna sepo telreng doplre,ne detelro do motena 5000 selrei. ¹¹ Nepelrena walri Yei dekayei piyeute yatupuko mendote mekopuko,detelro ane niki yaye nate waseyoumu,nemane lati kanete waseyoumu. ¹² Nemane metelrena detelro sa nepe anai peko,Walri Yei dekayei nenei ototouna tesaneyoumu,sa ani yainate koplri nembe baitena yelrou painya." ¹³ Nemane, nenei oto touna sa aniyai na te koplri yaine na nena telreng ongkoi telreng 12 ne sa koplri yai nena pe piyeu mesi lre nalre. ¹⁴ Nemane ne detelro telreng Walri Yei deka yei kena kembalri mekopukona te taimbuko, ne metelre elri yaye, da detelro Nabi a yekoplre kelropuko da anen da tenowena te mendena. ¹⁵ Nemane ne nimeyen buko metelrena detelro miya yena nete Andewapi te kenan sina te, nete nate nenei eute mekote yowe. ¹⁶ Nemane a nepeneko duwe, nenei oto touna ate bu delre te miyaye ¹⁷ Neplre ei bulrate sekai puko, ne metelrena bu delre bulralre paisiki Kapernaum yote nate. Ya nepe neko duwe, Walri Yei dekayei nenei oto tounaplre tupei pai. ¹⁸ Bu delre alru alrma telre sekepuko olrso dite date kingklri-kingklri mane. ¹⁹ Nemane, ne ei bulralre den te auka yaye nena tiki 25 bai 30 nena bu kena kulra, ne metelrena Walri Yei dekayei bu bulralre eutoute meyowe nate taimbuko ne metelrena endiki te dekaikuko. ²⁰ Neplrena, Walri Yei dekayei nete sane youmu, da de, endiki tena dekoipainya. ²¹ Nemane mukuna mane nepe, nate ei bulrate sakokai nelre neplre ei lre neme yaye nou elrai peko nane tikeimbuko. ²² Wambeya tena ya kiya puko, detelro doplre bu delre disuna sune tiyaye ei mena ambai ne su selrei nape ei bei mo nenei oto touna plre esute miyaye. Nemane Walri Yei dekayei ne ei bulrana oto tounaplre mena ambai. ²³ Ei doplre Tiberias lrena miyaye detelro doplresa aniyaina noute, nenou Walri Yei dekayei mendo kalro te mekopukona. ²⁴ Ne suselrei detelro doplre tiaye Walri Yei dekayei nenei ototounaplre mena ambai, ne metelrena ei bulrate sakoyaye Kapernaum te yaye Walri Yei dekayei duwei te WALRI YEI DEKAYEI NE WALRI PIYEU ²⁵ Ya mbei detelro doplre Walri Yei dekayei te bu delre di sune tupeye kai nelre, ne metelrena nete simiyaine, kilri-kilri na meyane we dapete miye?" ²⁶ Walri Yei dekaye ate sauke sane youmu, Telreplretlre, de wete sena malre, we dete duwe wuna pedena kembalri poi meko yolre tang mote, nemane w piyeu te ani yauwe eselre te meko yauwe. ²⁷ Pekote yate malrena sa kembalri tena mekoipainya, netenate sa tena kembalritemeko malrena Walri sena te nemane mote nekemalre mende, neplre Man nuwei wete ini melrena, nembei mo Memai kilripuko, Walri, delre nenei ne. ²⁸ Neplre, detelro doplre Walri Yei dekayei te simiyaine, beya sate de meko malre, ne kembalri Man Walri kena nenei kenane? ²⁹ Walri Yei dekayei saneyoumu, da kembalri Man Walri nenei kenane neke wena, neplrena we nete telreplre te elre mbombene Man Walri kenalre meyowe. ³⁰ Ne metelrena nete saneyaine:We beya sate mekoupone,neplre de temanbonde telreplre te elre maponde?We beya kembalri te mekoye? ³¹ Dena angkyang sa te kisi pou kulra nelrone ani yaye,nena samone da melrai puko:Ne metelrena Wlari Yo dekayore piyeu te ani yaye." ³² Neplre Walri Yei dekayei nete sane youmu, " De wete sena malre nape, Musa wetena piyeu Walri dia deka dia lrena wetena yatipai nenape Man Walri dia deka dialrena piyeu te ate youmu. ³³ Neplrena piyeu Man Walri kena lrena nenape ne Walri dia deka diya lre meyowe neplre Walri ate da a nenda teno wena bulrate." ³⁴ Neplrena nete sane yaine, "Walri dete ne piyeu te piyambai nya te yati mime. ³⁵ Walri Yei dekayei nete saneyoumu,de welra lrena piyeu walri,detelro dekote mena yena monitena tuwaipai,nepelrena detelro dete telreplre te elre naipondena bu malri tena tuwaipai. ³⁶ Nemane delrati,De wete sena malri nepelrena we dete nepetau te,detena we metelrena telreplre tena elripai. ³⁷ Metelrena sasasi mai dete yotutena nena.Metelrena dekote menayena neplrena dekote menayena de nena tena baitena sekipai. ³⁸ Nemane de Walri Yo dekayo bulra lre ate miyalre na delrei mendo lrena kemblari tena mekoipai, neplrena dete tiyekukona detelro nenei kembalri te mekalre. ³⁹ Neplre, dana dete tiye kukona detelro nenei mendona: nemane metelrena dete ate kitelrena ne nelrona si mena nalri pai, neplrena tutena yatena de nete deye te melrena. ⁴⁰ Neplrena, dana Memai nenei kena na, nemane detelro mbei-mbei yei te tenai nena nete tlre plrete elre naipondena ne Walri senate yate naye na, neplrena yan sitena tutena yatena de nete deye te melrena." ⁴¹ Netenate,Yahudi detelro meselrei netena ate elri yaye nepelrena ne elreyowe,"De Walri piyeu Walri Yo deka yolre miyalrena." ⁴² Ne metelrena elri yaye,"Ambai dana Walri Yei,"Ambai dana Walri dekayei,Yusuf nuwei,nepelre neman neman plre e nimeyanenbuko?" ⁴³ Walri Yei dekayei metelrena te sane youmu, beya tena te dite date sulrau nu. ⁴⁴ Detelro deko tena mipai nya plre, nemane Memai dete tiye kekona netena yepoipanya, neplre ya tutena deye tempona. ⁴⁵ Nabi kena semone damane melrou puko: 'Neplre ne metelrena Man Walri kilri nemelre na detelro mbei-mbei beto yayena neplre Memai kena lre alroin bukona ne dekote menayena ⁴⁶ Ne a eu ambai nya, nemane detelro Memai te nepe taimbuko. Neplre ne mbei mo Man Walri kena lre meyowe, nembeimo Mai te tembuko. ⁴⁷ De wete sena malre, 'sime telre plre te elre mbondena, ne Walri sena nemane mote neken de mende. ⁴⁸ De Walri piyeu. ⁴⁹ Wena ankyang manna te pau nelrone ani yaye neplrene ne nepe sowepuko. ⁵⁰ Da piyeu bulralre walri dialre ate meyowe sime nenalre dowen de anen dena,ne tete ambai. ⁵¹ De walri piyeu dialre miyalrena nepelrena sime da piyeute anen dena,ne walri senate nemane mote nekende mende,nepelrena piyeu de iti nelrena nena dena eu engdung,nena muku Da anende tena." ⁵² Yahudi detelro ne nelrone nenei mote ate dite date kingklri yaywe ate elri yaye,"Beyamane nena eu engdong te ate yate nemelre engbulru ne ane malre. ⁵³ Nwmane Walri Yei dekayei nete saneyoumu de wete sena malrepe,telre pelre sime detelro yei kena eu engdung ani painya neplre eu sa tena anisi panya,we metelrena walri wenana nikipai. ⁵⁴ Simi dena eu endung te anen dena neplre eu sate anin sindena,ne walri senate nekene mende,neplre tute mekone na yede nete de yetempona. ⁵⁵ Telrepelre dena eu endung nena enblru sa nemane bu nena eusa. ⁵⁶ Sime dena eu endung te anen bondena neplre eusa te anen singdena,ne dena eu bulrune mane nekende neplrena de nena bulrune. ⁵⁷ Nemane mai walrite nekewena dete tiyekuko neplre dena walri mai kenalre,telreplre sime dete anen dena,nena walri denalre. ⁵⁸ Dana piyeu walri dialre meyowena,ambai piyeu wena angkyang aniyaye nepe diti sowe yowe. ⁵⁹ Dana metelrena Walri Yei dekayei Kapernaun yone,walri ongko miene kilriyoumu. (Doplre Walri Yei Dekayei te Taukai Nelrena Eute Sukai Siki) ⁶⁰ Nepelrena nenei ototouna da ate betaipekona,ne metelrena elriyaye,da ate beteipekona,alrma doplre.Sime wakeplrena dowen de. ⁶¹ Ninane nenei ototouna nimeyainbuko ne alrlo te diaine,Walri Yei dekayei saneyoumu,beyamane a elralrena we kenate yapawe? ⁶² Nename,beyamane detelro yeite tenembe nekoute bulrate nenei nou meyowena te? ⁶³ Alru mlro-mlro mbei walri te tamu,nepelrena eu endung nenelrona a ambai telre.Dena a wete sena malrena nena yambu walri alru mlro-mlro. ⁶⁴ Nemane,wena nelrona detelro meselrei telreplre elri pai.Nemane,tulru meyowena.Walri Yei dekayei nimeyen buko simenete telreplre elri pai nepelrena sime nete naite mekombonde. ⁶⁵ Walri Yei dekayei elreyowe,Netenate senamalre detelro simena dekotena mamana mipai,nenape detelro yambu poi mai kenalre dowendena." ⁶⁶ Neyapone,detelro doplre nete tau kainelrena ketai peko netena tawipai. ⁶⁷ Nemane delrati,Walri Yei dekayei nenei ototuna te saneyoumu,beyamane we metelrena dite embe?" ⁶⁸ Simon Petrus ate sauku,walri de singko te malre?Wena a belandena walri sena nemane motena. ⁶⁹ De metelrena wete telrepelre te elram beko nepelrena wete nimeyanen buko,wenbeimo detlro melro-melro mai Mang Walri kenalre." ⁷⁰ Walri Yei dekayei nenei ototou nate ate sauke ambai denbeimo wete elri pukalri,detelro metelrena mebe be pelre?Nemane detelro mbei wena nelrona masete dumbondena. ⁷¹ Nemane nena mendone mekou nenape Yudas,Simon Iskariot otnuwei,nemane nemane ne yan Walri Yei dekayei te naite mekombonde,menbei mebepelre na nelrone.