(Petrus Mendaina Detelrote Poye Mekombuko) ¹ Yasina kaya, Petrus pelre Yohanis pelre Mang Walri kena miyete mendo melro-melro suselreinane mesi kilrimbei pelre nane. ² Nemenakaye, do simbei nenang rena esire nelre erle mendai mekombuko nate metulre doukai nelre yate ( meye tapekainelre yaye), ya yun- yune mang walri kena gerbang mau nena eudo Gerbang Indah, detelro mang walri kena miete esute naye nate sate diyimu. ³ Petrus pelre Yohanis pelrete teke pelre nakaye, ne satena mete kilriyoloe. ⁴ Nakaye, Petrus Yohanis pelre nembeyena kaye nete saneyonye, "Debekote tewe". ⁵ Peteus pelre Yohanis pelre teyopu mendote mekoyowe, menalre sasi mente ineinelre. ⁶ Neperle nakaye, Petrus ate kepuko denana perak mbai emas ambai, Denan nekewenate nenate wete iteloerle Kristus Yesus kena eudone, esuemiwe otote ewe. ⁷ Nemenakaye, Petrus ne detelro kena metelre mesune mena dokunakaye nete esuye lini kenelre ne suslrei lati nena oto kintou pelre oto pelre suwei peko. ⁸ Bulralre sepu kona kaye, esu emike otote yowe. Nakaye Petrus pelre Yohanis pelre takupelre Mang Walri kena miyete bulralre alre balreke yowenakae Mang Walrite kapeyonu. ⁹ Metelrena detelro tiyanyenakaye Mang Walrite kapiyanye, ¹⁰ Nepelre ne nime yambeko ne detelro ya yun-yune Mang Walri kena Gerbang Indah ne nekeyowe adiyi diyite diyiyowe, nemenakaye Neyo endiki pelre mutuku nepelre kembengte bitiyeye menane netu kilri pukonate. (Petrus Detelro Telreng Kena Nelrone Ate Saneyoumu) ¹¹ Nepelre nakaye ne detelro Petrus pelre Yohanis pelre kena mete neme kelrouku tepeyowe. Detelro mukunamane nekote selrambi Salomo ne tipiyayena kote belrai peko yaye, telre-telre mane olruyaye. ¹² Nekaye, Petrus nenate teyomu, detelro telreng tipiyayenate saneyomu, "Hai Israel detelro, beyamena pote we da kalrote kembengte bitouwe nepelte dete doumo kelraumu puko taumu, deye da detelrote poye mekonembeko beya delre poye nepelre melro-melro eine? ¹³ Abraham, Isak, nepelre Yakub kena Mang Walri ena nenek moyang kena Mang Walri nenei kembalri detelrote, moi eine Yesus baite selraupuko Pilatus kena mebulrate tambuko nenalre tiyekeko baite tanm bon denate. ¹⁴ Nemenakaye, weye ne melro- melro pelrena nepelre telre pelre nate baite seraupuko, nakaye detelrote tutyowena detelrote wetenate baite taneme ponde. ¹⁵ Nepelre, Walri tou pelre nate weye baite tapuko, nakaye Mang Walri ye detelro tetekena nelrolre deyembuko. Da kalro tena deye nena akeyana nepe. ¹⁶ Nepelre nena eudone dena telrepelre saukande nenaye da detelrote pote mekanembekonate nepete tanu nepelre nepe nimeyambuko. Nepelre, telre pelre nena walrolre meyowenalre. Neya wena bukoune noulrena poitute douku. ¹⁷ Netenate, delrei dokeka ele nepete nimeyem bukalre wena yeko kilraupekona wei euna nimeyipai nena wei belrengka-belrengka selrau mekaipeko na mena. ¹⁸ Nemenakaye, Mang Walri ye metelrena, Nabi kena embulrulre Kristus Ne sete elrin tinde, nepe noulre mekopuko. ¹⁹ Netenate, mendo poite mekombonde nepelre date bulrun sunde wena pekote baite sumbonde. ²⁰ Nepelrena Tuhan kenalrena poi kalro mendena, nepelre Kristus wetenate tiyekuko, nena Yesus nepe. ^{23 21} Nena walri diyalre poite elrembonde nepelrena nenei ya metelrena sate poye mekombonde Mang Walriye nenei Nabi selrai melro-melro einya yansine niki yayenate. ²² Musa saneyaoumu, Mang Walri ye wena nelrolre Nabi simbeite elrimbonde detenamane, we nena a elrenadengtena poi telreye betombe ²⁴ Nepelre, damena yatena Nabi-Nabi selrai meyowe Samuel kenalre nepelre memetena selrai nikiyayena neoete saniyaime. ²⁵ We nekewena Nabi selrai kenalrena mena otona, nepelre Mang Walri kena ayeko wei nenek moyang kenane sasuku nepelrena Abraham te saneyounu wena welrolre metelrena selrai da yobulrane tenowena poitute dounaye. ²⁶ Mang Walri, nenei kembalri detelrote deyembuko, wekote nepete tambuko memetelrete wete poitute inemelre nepelre wena nelrolre detelro mbei-mbei peko nelrolre date bulrunaye