(Surga Bulrate Yesus Yowe Nepelre Roh Kudus Mendena A' tiyei) ¹ De' Teofilus, De'na semo memetena, nena Yesus kena kembalri pelre kilri-kilri kilri yomonate melroyahre. ² Ne' bulrate neyane Yowe, nepelre rasul-rasul Ne' elri pukona, Roh Kudus kena walrolre Ne' ate kimelre. ³ Ne metelre kote, nenei eute nepete kilriyomu nena walri te nekeyouna selreine, sete tuwa yoru, nepelre tu kilriyouna telreng dopne, do be tiki selreine, Nenei euwte ne metelre kote kiyayomu, nepelre, Allah kena moli sani yomu. ⁴ Ne metelre nemenane, Ne' a'te saniyomu we metelre Yerusalem tena tipaina nenetena memai kena a'tiyei nete tem be, Nenei a' denalre wemetelre nepe betoyauwe. ⁵ Nepelre Yohanis bu'lre bu'te kelroyomu, tiki mbai bete we metelre nena Roh Kudus ne bu'te kelronaimelre. (Surga Bulrate Yesus Yowe) ⁶ Nemandelrati, ne metelre nembei koplrimbuko, Ne' kote nemetelre simiyaine, Tuhan, beyamane da selreine, Israel tena moii emulre? ⁷ Ne' nemetelre kote saniyomu, we' nenatena nimei paina, ya pelre maii nena Memai, Nenei kuasa eine nepete sasuku. ⁸ Netenate, wametelrena kote Roh Kudus mende, telre ne kuasa te dowembe nepelre, De'na a keyana te dumbonbe Yerusalem ire, Yudea nena metelre nepelre Samaria neme ende bumi tutelrete. ⁹ Nepete Ne' a'te saniyomu nepelre ne metelre tiyaiye, Ne' bulrate kengsuku, ma Ne'te doku nelre, ne metelre kena be eilre nairupuko. ¹⁰ Nenate nemetelre, Ne' younate mano te neme tiyaiye, nepelre nemetelre kena euw yene mayong kelreu-kelreu na do besewei tipi yoiye. ¹¹ Nepelre saniyoime be Galilea detelro wemetelre danoune tepauna be yatenate mamote tau? Yesus, wemetelrena,nelrolre da youna, nepelre Ne' youna wemetelre nepete tiyauwe, nemande irati date nekoute bulrunsinde mende. (Rasul Detelro Site Elrinaiye) ¹² Nepelre nemetelre, nemeko Zaitun mekolre date Yerusalem temiyaiye ne mekolre Yerusalem tena nipi Sabat tiki selrei. ¹³ Nemouw nemete ire nikiyaina, nepete esute miyaiye, nemetelre bulrana dekosute yaiya, nena Petrus, Yohanis, Yakobus, Andreas, Filipus, Tomas, Bartolomeus, Matius, Yakobus, Alfeus kena yeiy, Simon zelot detelro nepelre Yudas, Yakobus kena yeiy. ¹⁴ Nemetelre a'sani-sani mendo kalrone kena membei te do kaiye, nepelre milre selrai delrati nena, Maria, Yesus kena nameng nepelre, Ne'nei dokeka metelre. ¹⁵ Ne'Yane, Petrus, nena dokeka kena nembei te nikiyaina nelrone tepeyowe a'te saniyomu (neselreine detelro nena telreng do mesi dombei pelre) nepelre saniyomu. ¹⁶ Dokeka dokeka da asna melro-melro nepe yewupuko, dina selrene Roh Kudus, Daud kena embulre walrolre Yudas tenate saniyomu, bene bisunde, detelro te yatenemelre Yesus te kelronaiye. ¹⁷ Nemandelrati, ne'ena nelrone mete beyaiye, nepelre kembalri walro te mekoyowe. ¹⁸ Nepelre da detelro kani te doi doku, nena peko walrolrena doi, netenate nena belrengka memete delreke, nepelre eselre nelirembuko, eselre eine saesi baite toyonu. ¹⁹ Nepelre, da a' Yerusalem ne nikiyaina metelrena detelro nepete nimeyaimbuko, netenate, ne kani nena euwdo tena Hakal Dama te Piyaime, a'sune, nena, Sa kani. ²⁰ Netenate, Mazmur semone nepete melraipeko : nepelre ne'nekoyou na nouw kulrung ambai, nepelre delrati, ne nouw detelro si, ne eine bete pelre nikipai, nemandelrati nena kembalri mekoyouna, detelro si donaiye. ²¹ Nemetelre miyaiye embelre nembeiye kopilrimbuko niki yandena, nepelre, Tuhan Yesus ena nelrone esu basute walri yandena, netenate nedetelro site alromansine. ²² Yohanis bute kelroiyomuma ya selrelre neme miyowe, surga bulrate Yesus ena nelrolre nepe yowe, ete tumupuko, metelre danelrolkena detelro sumbei, ete dikinemelre Yesus deyupukona a'keyate sanemamlre. ²³ Nenate, nemetelre, detelro beselrei te elrinainate a'te tuwayaine, nena Yusup nete simi yaina Barsabas, sidelrati Yustus nepelre Matias. ²⁴ Nepelrena, nemetelre a' sani-sani kalrone mendo tekemekoyaiye, Tuhan, metelrena detelro nena kena we' nimeine da detelro be, we' elri pukena sime demetelre kote kilrimpone. ²⁵ Nena, Rasul Walro pelre kembalri Yudas dane tumbuku na, nenei me elripukona nouw te nepe yowe. ²⁶ Netenate Rasul selrai ne' be' kena bulrate undi te meke yelroyaiye, nena undi Matias kena bulrate delreke, nenate Rasul me' be' bei pelre kena bulrate, nembei nepete alronsuku.