(Yohaneswai wahyu semo kepei te ate seiyunue) ¹ Yei Yesus Kristus nena wahyu,Allah Awa mang tetero neye yei Yesus kna dambare yauna dero na kna damba nenei a keyana seraibrabra damena yeko waro te nou pa seraibeitie mekonaipinie nemane yei Yesus Kristus damena yeko waro te nena Malaikat kna dambere ne do Yohaneswai kna damba da a waro te sanumbuku nenei dou ye tembuku. ² Yohaneswai neye mang tetero nena Firman a sena ate seiyunue wande yei Yesus Kristus nena dambere,sasyaisi te meye dou ye tiyounue. ³ Piyambai tere tetero yei da Firman a sena kurung poi bende piyambai tie we seraibra ne te poi ye betonde waye dua da mekonde da semo ne ate meraipiki nena ya watou pa dewa noupuru. (Yohaneswai poi ate jemaat mekasu suna wau biserei Asia ne kainya pa) ⁴ De Yohaneswai kna waye meka jemaat mekasu suna bi Asia nekainya pa piyambaitie wande teme tere wena damba nedo A-I dua da kiyou,neye nou nue kiyou,nedo neye kiyou dewa damene;nemane aru Roh mekasu sunabiserei nenei dia ne dai dia dai meta kreu meta ne. ⁵ Yei Yesus Kristus nenei dou dambere pepoi tere ne ye metere te da tetero dua sou na tete nerore esua yembuku detere te keu andewapona seraibrabra da yo kani dambene kainya pa nedo A-I nena dambere,e seraibra te kena te da dereunu wande e seraibra te pepoi damba ena peko dambere nena saye da durupuku, ⁶ Nemane e seraibra te nenei diapa andewapo na te kene,Imam seraibra mane eiyei Awa mang tetero nena waye pa dua da ma,A-I nedo nena damba poi piyambai wande detere te kene nounue nemambei kene mene! tepreitere. ⁷ Dou tenende,yei Yesus ne ye dai dia dai meta kreu meta dambere apa da yo damba dewa mene na ma tu meri tu ma ongko meri ongko dambere dou dou ye tenende nedo A-I neye dayo damba mene neyo seraibra ne te ung yekene asekai;wande metere seraibrabra da yo kani dambena dimi kurung warene dou bu te baya sinai A-I nedo neye menena teperei damena nou da dua mekombinie!tepreitere.'' ⁸ ''De A-I nedo ne ye dina tupu Alfa wande dana tupu Omega,Firman Tuhan Awa mang tetero ne ye metere te kiyou dua da neye mete kiyou,wande nedo neye dewa da menena de neye da detere tere (Yohaneswai patmos ne kiyou neye A-I nedo nete dou tembuku) ⁹ De Yohaneswai,yau na dero na nerore moi ye dewa da meka,pepoi peko te tikane,dai dia dai meta kreu meta Awa kna dia nemane yei Yesus kna dambere patmos kepou ne dane da ka,Awa mang tetero nena Firman a se na wande nemane yei Yesus nena ayeko waro ne da wera. ¹⁰ Dete Tuhan mang tetero nena aru Roh nenei ya ne de ye akurung te beta dena meto sure toni kurung mane danu, ¹¹ Ate seiyunue wena dou ye tiyene na sasyaisi te meye semo kepei pa mereupunue nepe te baya moi moi ye wasumue jemaat mekasu suna biserei Efesus Smirna,Pergamus,Tiatira,Sardis,Filadelfia,wande Laodikia.'' ¹² Metopa buru suka dou te ta akurung dena wapa da sanute ne te beta deye dou te tepuka sing kiya oto kai mekasu suna biserei emas mro mro, ¹³ Sing kiya Kaki dian ne nerone esune tepeu tetero besika serei nedo A-I neye mayong jubah oto toupa sawekai nena nambo pa mari te seruku emas dou dou atainie. ¹⁴ A-I nedo nena tenai dambena nua kreu kreu Domba kna wa piye mane ma kreu kreu mane;A-I nedo nena dou na sing peu peu mane sekaipiki dekai. ¹⁵ Nena oto tembaga mane sing mane nenseng dambe ne nimi tere wande A-I nedo nena akurung bu oro kurung mane yembune. ¹⁶ Nena meka metere suna A-I nedo tupuna meya mekasu suna biserei A-I nena emburu ne baipa dewa kiyapa meke sa yemo nena yemou biserei sune sune A-I nedo nena be soning kiya mane sawune ¹⁷ Deye nepere A-I nete tembuka,deye nena oto toupa apa erumbuka tetero no mane da tena.nepere nedo A-I neye nenei meka metere su te dena wa damba da sesuku dete ate sanute,endikitena dekoipeinya;de pe daye dina tupure dana tupu pa deye wera, ¹⁸ Wande yereu tupu,de dua teteupuka,nekwa yereu orupuka nemambei neme da kete mene de na meka ne tepa na kani mau tung numburu pere Hades mau tung numburu pere. ¹⁹ Weye dou tiyene na sasyaisi te semo kepei pa mereupunue,nemane neperei dua mekonena sa pere nekwa metosure mekone na sasyaisipere. ²⁰ Da nou bete yene keu na meya mekasu suna biserei wena dou ye tiye ne nemane sing oto emas mro mro tere.meya mekasu suna biserei dena meka metere sune da tepa na nepe Malaikat seraibra jemaat mekasu suna biserei nepe re na;wande sing oto mekasu suna biserei neyo nepe dayo jemaat seraibrabra mekasu suna biserei.''