(Mang ( Allah ) Kena A Yeko Pre Tetero Yei Kena Yerew Yane-yane Mekate na) ¹ Nemena kaye, Parisi serai pre mendona-dona tetero woinyate Yerusalem yore mekainya Yesus (Sawalriyei ) pre tonai kromate. ² Ne dainya Yesus (Sawalriyei) kena deronate tekam mina sate meka nekine sate angkai, nen derati sikipeinya mekah. ³ Farisi serai Yahudi serai nenei yeko yansina yotipa kasipa neme tenko muna, meka iri meka tokipana duna sikipeinya ne sah tenya anipeinya. ⁴ Yahudi serai yau dere nerore menainyatena meke sikipeinya ne sah tenya anipeinya. Nenei yeko-yeko noune tepekai mu na, nepere baya sukunai nya sah cawan-cawan,kendi-kendi pre bejana-bejana tembaga. ⁵ Nemenakai Farisi serai pre mendona-mendona tetero pre Yesus ( Sawalriyei ) te a surani, "Beyamenapotenate wena derona wei a yeko sesewa kasi seikan mekainya watena ne yekotena waripei we da meka neki-neki pre sah te anau?" ⁶ Yesus (Sawalriyei ) ate sanumu, "Yesaya kena a yeko we dambana no ru ku ro puku weda pro-pro man da werau, semo kepeipa meraipiki na man : 'Da serai detena emburu damne kepate, nena keng netena bai terene keu. ⁷ Ne detena norona katimpei, nena a sianina tetero yei kena mendona yekote seiyaine.' ⁸ Nepena ye Mang (Allah) kena yekote baya serai, tetero yei kena mendona yekote dekau tepau." ⁹ Nemenakai Yesus (Sawalriyei) nete aye sanumu, "A peu-peu karone Mang (Allah) kena yekote baya semu wei niskorna yekote tepau. ¹⁰ Musa a dua senuyumo, 'Awate-nawate endikite dekom mu', dan 'Siniwai-sanuwai awate-nawate a peko-peko sanumpung weytena bayanai tombini.' ¹¹ Sinewai wapentene awa-nawa kena dampah damena ate donembini, 'Beyamena sapoi bete te we denare dou,' ¹² naperna kai we netena wipipey, sasitena awadamba nawadamba mokoipeinya, ¹³ nemena karore Mang (Allah ) kena Walri a kurungte timin tende yeko peko-peko yansine mekekau mekauna Mang (Allah ). Nemena kembari peko beite neme mekekau mau daya pa meke." ¹⁴ Yesus (Sawalriyei) teterote meye simumpuku mekai nete ate sanumu nete, "Meterna mane dete betotende, eyote nemei nindi. ¹⁵ Bairna sa wa eyupa menena nepena peko ambai, teteroyei kena kenare bayanenasa nepene peko keu." ¹⁶ "Simi bentekeiprena bentekei beite betone!" ¹⁷ Yesus (sawalriyei) teterote neme temupuku, ne me eyupa dua kei nena derona nete sirani ne a aroi-aroi beyamena ate ariye. ¹⁸ Neye ate dua sanumu, "We mendo poinya mena doipei deramu? We aroipei bairnasa teteroyei kena waburupa menena peko nepena kepei? ¹⁹ Nesa wa eyupa meke na sa kena pana eripeinyasa ne yasepa kena sa bumane bayama barine," (Nemena sa satena re Yesus (Sawalriyei) ate mekou puku sa menamane poi bei). ²⁰ Nemenakai neye at mekoupuku, "kena medekore baya munasa peko. ²¹ tetero kena kenayeurung kiyapa mendo peko-peko menai, kame mendo, bisi mendo, teterotitinya mendo. ²² Mirete dote kaimepa we panminya, kena sue, yeko peko, a peu-peu, kena peko, yembe, a peko-peko, wa kari pro-pro. ²³ Peko meterna mane teteroyei kena mie dekore mene, ne keuna nekimane keuna yeko. (Siro- Fenisia Mire Besikana Tepereinya) ²⁴ Yesus (Sawalriyei) ne noure yemuke Tirus yo pre Sidon yo pre nepa ke, neye miesi yeu pa ke, nena mendo mekoyon na tetero netena aroipeitay. ²⁵ Yesus Sawalriyei) tena ate dua betekai, mire besika nenayei mine aru peko nena waburupe kiriki ne mire neme meke Yesus (Sawalriyei) nena oto toupa apa oto butu apa dusun kroke. ²⁶ Ne mire Yunani mire, Siro-Fenisia yone sengkainya. Ne Yesus (Sawalriyei) sanun nena yei kena wana aru pekote baya tikenensini. ²⁷ Nemenakai, Yesus (Sawalriyei) ne minete ate sanune, "Tua yei deroute atamru yasete mekai piri nemenaikai yeko kopeinya" yeitena sate yuku kena emburupa baring yem. ²⁸ Nemenakai, nemire ate saweke nakai Yesus (Sawalriyei) te ate sanun ne "Teperei, Allah (Mang). Nepernakai, da yei derou kena sah menen apa yewainyate anai," ²⁹ Nemenakai, Yesus (Sawalriyei) ne mirete ate sanune," Nemena a seiyenate we dua waru, ne aru peko wena yei kena wau baya dua ke." ³⁰ Namenakai, ne mire nenei mepa dua ke yeiteke ane tenoungte keten nu, ne aru peko nena warena bai dua ke. (Bentekei Dua Tiapikina Teterote Yesus Poi Mekombuku) ³¹ Nemenakai, Yesus (Sawalriyei) Tirus yore kenakai Sidon yopa meu akeko neper meke Galilea bupa meu akoke, Dekapolis kena kerapa meu akoke. ³² Nepere, Yesus (Sawalriyei) kewa bentekei dua tiaipiki atute kekena teterote, Yesus (Sawalriyei) kewa dekani mekai Yesuste (Sawalriyei) ate mekai senan ni da tetero kena damba wena mekate nenadamba mu tepun bunu. ³³ Nepere, Yesus (Sawalriyei) ne teterote tetero teren nerore nebete baya dekon neke, Yesus (Sawalriyei) nena meka waute ne tetero kena bentekei burupa mekate nensuku, wande ekite toupukes nakai, Yesus (Sawalriyei) netetero kena peute meka semberune. ³⁴ Nepere, Yesus (Sawalriyei) seropa doute teu, ne arute timokopa yepou puku na kai ate mekou puku, "Efata!" nena yeko "Baya tunaipini". ³⁵ Ne soning deratine netero kena bentekei baya aitupuku, nena peu ate poiduake seyonne. ³⁶ Nepere Yesus (Sawalriyei) neyole ate tumteke da kembari mekoupukanatena, teterositina sanimpeinya. Nepernakai nemena bete Yesus (Sawalriyei) nete aye tumu da atena seimpenye, neye ne ate dekai neme dua seikan eu. ³⁷ Neye meternamane poi dua mekou puku. Neye tetere bentekeite beteyai, a tute kiyainya tetero ate seyani."