(Wari Bu Ongko Baye Kiranaipine) ¹ Yesus (Sawalriyei) bu ongkore baya meke, tetero besika nenei yaunate Yesus (Sawalriyei ) sangkeme "Guru, (Sawalriyei) da oru me piyambanya tepeu!" ² Yesus (Sawalriyei) sangkeme, "Wei dou da me piyambanya tepunate tanu? Da oru sidamba-damba sinawkai tepanya, apabirnaiyernai." (Memetena Pekote) ³ Yesus (Sawalriyei) Zaitun mekone bete walri bu ongko pa burusuku Petrus ye, Yakobus ye, Yohanes ye Andreas pre Yesus (Sawalriyei ) nebeite sengkaine ⁴ "Dete ate sanimime modaite ne yeko kiyanai, nena yeko beyamane mekone, meyenamane tupute mekombine ?" ⁵ Yesus ( Sawalriyei )nete sangkeme, "Wa sema bete , tetero wete pekote, wete amoumou wapeneme. ⁶ Tetero kasopere dena wadone menai ate seinaine, 'De Neyei.' Netetero, tetero terente amoumou wapenami. ⁷ Ne yane betonde pera akurung warene, pera menena, endikitena dekoipenya. Da yeko nepete mekonena. ⁸ Serai-serai bebeite titinai, kani tipinene nou bete-betene, munu kiambine. Metena peko menena tupute mekonena. ⁹ Nemnatena eyei wasema bete. Netetero wete atonaime atekainya diyapa, wete meka titinai, Sinagoge-sinagoge ne, Sanhedrin kena bekoune tepende, andewapo-andewapo kena bene, De tante, nenei nerone seinanemenai. ¹⁰ Da A Walri, memete seraipa-seraipa seinaine mene. ¹¹ Wete atonaime, sarenaime, endikitene dekoipenya, we ate seyunena , wei wake beinya ambai Ayomire kena wakene. ¹² Da tetero yei , nenei tetente tetenipipa sarenai awa yei kena domba, yei inai yemine awa, na wate titinai. ¹³ We meyename yembe ekri bikinami. Dena wado tante sime nemna beite noune tepenena walri nena damne tenonemena." (Peko Nipi Poite Baye Dingkerembine) ¹⁴ "Date tente pekote tenu, ne tepeipeinya noune tepenena (semote beyena nepete arlombuke ). Yudea yone kainya tetero, mekopa nawende. ¹⁵ Me yang damne keuna tetero apana mipeinya me eyupana epeinya, me eyurna satena olripeinya. ¹⁶ Tetero mikane warenena, metopa birlsipenya mayong te mudoneperna. ¹⁷ Yei te yasene tepanya mirle pre yei te konte ataminya mirle peko neyane kiyanena. ¹⁸ Allah (Mang waliyei) te ate sanemane ne yeko-yeko ning seuw na kiyaipeinya. ¹⁹ Neyana peko dere tere menena, mem etena da kerla te mekekona, tekaypeinya yeko dagapa mekena ambai. ²⁰ Allah (Mang waliyei) yate pone sensina, da tetero warlitena keipei, nemane keu, tetero duwa erlupukuna ne tante, yate pone sensina. ²¹ Tetero ye wete sanenewa, 'Doute tei Kristus dapene da keu!' atau, 'Bei ne dipene di keu!' Nena atena sawipenya. ²² Tetero peko-peko inaiyemina nena yeko-yekote mekonai, kenate yeponai, duwa erlupukuna teterote puku neropa atonaim. ²³ Wa semate kende! Dena a nepete duwa sanumpuka. ²⁴ Nemnate neyapa menenatena, peko deretere te tukanendena, 'Soning kepe-kepe orlambine, oko kiya ambai. ²⁵ Meya manolre apayonai, wake deretere ma dambre tipinene.'" (Tetero Yei Dewamenena) ²⁶ "Nemenakaye, tetero doute tenai, tetero yei ma burure mene, nena wake dambre kiya dere damne. ²⁷ Yesus ( Sawalriyei ) nenai malaikat-malaikat senampuku, duwa erupukuna tetero aru nipi aprawbeinya ye yo tupuna, ye matupuna te nebeipa koprinende. ²⁸ "Ara o pa aropuku : nena mise marnainya, nena kepei denainya, nepere nemeinde dinya watoupa dewa mena. ²⁹ Nemena yeko kiyananyatena doute tende ne yeko menenatena aronembinde teprei ye watoupa dewama numbru toune meke tepeu. ³⁰ Dena a nou terenate wete da mekasename , da sirinu kerainu metopa duwa nai, ne yeko bekoune mene mekombine. ³¹ Da ma pre, kani kela pre metopa nai. Dena A Walri nemna berte tenone mene." (Semate Kende) ³² "Neya tena tetero aroipei, malaikat-malaikat aroipei, Yesus (Walriyei) aroipei, awa bei nemeyumbuku. ³³ Semate kende! We aroipei ne modaite mene. ³⁴ Da yeko bete tetero besika otote ke, mete tembuku nenei kembari teterote sanumpuku semate kinyate, numbru semana te sanumbuku semate kene. ³⁵ Nemenatena semate kende, we aroipei, modaite me pre na tetero dewamene, weyene mene denene romirine mene, awe dernainane mene. ³⁶ Neye nemei tanembine menepeina, we yukute tenon deperna. ³⁷ Dena wete senamena, teterote meyenamane sename : 'Semate Kende!'"