¹ . Wakotu febang ing, Yesus kekapa kepako kota-kota pa bame-bame pifeng pa anakele peng-pengfa Ropu Paai Tatake. Teangku-teangku hampa Kepa telupa, ² ana ing-angra teume narang-rang ung Yesus lekohae wa tebate feng-feng pa totolelepae. tebafaing Maria teniete Magdalena, peing Yesus tebate napang hentong batefeng kekofa. ³ . Peung pera Yohana pampe Khuza ke Herodes taimbeke kelemotu, Susana,pa nawo tafa teume hing ing teing jatetewo tehemo ko Ke tekeke. Ahatela ana Keba jato waile lehe. ⁴ . Poing teba nawo telu pa teba-teba teja lo-lo kota ing-ang tetee Yesus, Ke pikele pate tea ahakelei: ⁵ ''Keba lehe leile keti jale kepu. Jaleing kepu, narang-rang ung ihete lengmafa pa lang-lang tete, kaung tang-tang jing eteho tetang. ⁶ Narang-rang ung ihete etefe jengwungra, pa jatoing ee, jaleing ang jeng ing paka. ⁷ Narang-rang ung ihe hou-hou atang kongpa pa tehe lupafa kaimpa atang ing a petu. ⁸ Jato kaung ing ihete hangto hefeng pa tehe kaimpa jana pewenu mambirerefa nawo pepe. Wakote pepa ahakelai ing Yesus kewaete, ''Meing lepa mepupu, pera mepupu huhufa.'' ⁹ Poing,teangku-teangku Yesuske tejengte Ke jaung-ang aha mepeme ingja. ¹⁰ Ke lungte, ''Ewe elulu jawengkotu Tata Paake, ana tewe tebahing ipepe nileng-lengte aha nilala ung, 'Ana ing-angra tekareng ete tera tefuka,pa ana ing-angra teriete, tera jana pepe terika.''' Yesaya 6:9 Yesus Pina pepe kele ana Ahakela jaTo ¹¹ Kawe pina ahanila ing: ''Jato peing Tata hohoke. ¹² Jato ung koheti lengmafa keing anara Tata hohoke tewe teriete. Kaimpa kebate kete pa hohoing kelewapung tete ung teririka pa hefeng raka. ¹³ Jato koheti etife hangto wungra peing anara neba-neba nerunetiTata hohoke nere huhufa pung hefeng ne hanglingka. Newela huhufaka, ana ing-angra jafeng ungkatu, newe nekokofa nepuna Tata. ¹⁴ jatoung koheti atangkongpa peing anara neba-neba Tata hohoke neruneti, newe nehunete, newe keatete pungkofa koka, lelepafu, pungle memumu newe ana jato huhufa pewenunu jato uukatu. ¹⁵ Ana ing-angra jatoung koheti hangto hefeng keing ana neba-neba Tata hohoke nerunete pa nereteng huhufa memahete motu pung jamepe huhufa pa hefeng, pe topepe napewe nunu po memumeme.'' Fefe meme Penapung ¹⁶ ''Kebaung keka pelita ing rakefa, kaimpa kepola pabu ko kekei jeng keluweng ile nakung. Kerapute kekeko kekei tang e pelita ra ung teba tekengpate paai ung fefe keke tefifi. ¹⁷ Peana jaungka wengkoka jaingpe u angfata, pa keweleng raka pe engfata pa tewe tujana fefete. ¹⁸ Peanya, efute wekoko tunaneko neweru peing baingba mepe me nawo keweleng-lengle. Ana ing-angra baingba mepeka meme ing kewewele, peing me ja mepekotu.'' Teba Bamuangwo watupa Yesus ¹⁹ Kaimpa,make pa Yesus lentuke-lentuke tete Ke tefifi, peapa tera Ke tutelaka teba telume. ²⁰ Pea elungna ing-ang tete Ke, ''Make pa lentuke-lentuke Keke tereti peng, tera pungtu tete Me tefifi.'' ²¹ Ana ing-angra, Yesus lungte tea, ''Ani Nine pa lentu-lentu Nine teing tera Tata hohoke teririte pa jano tere-rete.'' Yesus Feng Hoi Kelu ²² Bang ungpa, Yesus keetihe tangto kepa teangku-teangku Keke pa kelungte tea,''Ele nelele lohing pato wea.'' Kaimpa, kepateja tetekang fua. ²³ Peanya, poing tejae, Yesus keluweng i. Kaimpa, fengho kekana pato ing-ang pa tangtete pahe teheme jafeng. ²⁴ Kaimpa, teangku kekefaing tetu tete Yesus pa Ke teje pa tenie, ''Koru! Koru! Newe feng newewete!'' Kaimpa, Yesus kera kaleng pa hengkeku feng hoi ing wala tio kera wetakui. Feng hoi keralu pa patora ketiafa. ²⁵ Pa Ke lungte tea, ''Wananete iman ee ? Tewe terafe pa teengtape pa kealing lungpate tehing, ''Meba Ba kawe ? Ke pikelete kelungte feng pa paaa, pa tela Ke.'' Keba Gerasa kekofa- fata Bate feng ²⁶ Kaimpa Yesus kekakoti pa teangk-teangku Keke tete e jeng teba Gerasa, kangfu lo Galilea. ²⁷ Poing Yesus rapuheti lope, ke ketifi kebaung kebaleng keka kota ing-ang teba-teba feng-feng teheteme ne. Kebaing jotafa rokefaka pa ke paa ing keleika, kelei fulu. ²⁸ Po kebaing kekalengte Yesus kefu, kera kehiwa pa kepa hoKeke. Ana pina letapa ke lengte, '' jahaka tukotu Me pa ni, he Yesus Tata Oke me Eme mupe ? Niwe waete Me,ni japopo mepapaka !'' ²⁹ Jaing lewang peing Yesus kelengko kebate feng ing kekengtu keka keba ing-ang. Kebate ing bang-bangfa kebaing kekalo kalo kaimpa ke rantai a tete, borgol tete, pa teba jaga tete, ke rantai kelu pa kebate ke keke kati jeng-jeng ing roropa. ³⁰ Kaimpa, Yesus kekengte keba ing-ang, ''Me batiha ?'' Ke lungte,''Legion'' peapa ke tebate nawo tehete mete. ³¹ Tebate-tebate ing tewapa ete Ke ana Ke pikeleleka te kelungkote teteteka jeng kupa fengwo. ³² Jeng ing, pale fabapale tejapa jaju tangtang peheng. Tebate-tebate tewapa ete Yesus ko te tete keng-keng pale fanana pa Yesus long keweleng te. ³³ Peapa, tebate-tebate ing tekengna pengte keba ng-ang pa tetekeng pale-pale nete, kaimpa pale fanana ing tejata rapuhe hengpe ingpa hangfeng tafa tejana pato pa teute. ³⁴ Poing tebafa pale tuwatete jaing tefu, netete wowo temejata pa jalewang hoho tetewa kota pa bame tutu ing-ang. ³⁵ Peanya, teba nawo tetu tefufu jaing jalewang. Tewe tetu tete Yesus pa tetefi keba tebate-tebate kekofa fata ketime watu tang e Yesus, ke rokehe, pa kera pungti hefeng. Jaweing lewang tewe fefata. ³⁶ Tewe jalewang ing tefu hoho tete te tebahing tunane keba kebate hetimu ing haena. ³⁷ Kaimpa, teba nawo temete jeng ing wa Gerasa tetewa Yesus ko jeng tete ing keleika tehete mete tefe nofeng bapalewo. Peanya, Yesus ke etihe tang pa kemupuna Galilea. ³⁸ Ana ing-angra keba keing kekofa fata wa tebate-tebate kewapa te e Yesus ke pungle tena Yesus lupa. Peapa, Yesus kelung meme, pina-Ke, ³⁹ Mumeme paa meme pa hoho jaja bapale lewang Tata lene meme.'' Kebaing kera keka kepako lolo kota pa hoho kele ja Yesus lekea. Yairus Koke Keleko kelefute pa Pebaung Peume Keleko hae ⁴⁰ Poing Yesus keputi Galilea, teba nawo Ke teke tera nalungpa Kefa tejeng e. ⁴¹ Kaing kebaung keba kebati Yairus keti Kea, keing keba rube sinagoge. neparale kepaheti tang e Yesus, Yairus kewa Ke titi paa keke ⁴² Peapa ke ko keke peume nale aling pefelangro hampa,(12 ) pa koing katalera pepang-pangtu. Pa, poing Yesus kekana fua, teba nawo tefaja-faja tepajoe Kea. ⁴³ Keing pebaung peume pefeng ke pefu hitaju pepupape felangro hampa, (12 ) pa baungra leko haeraka. ⁴⁴ Peume ing pewakotetu Yesus wana kuete pa nepenawang rohupe Keke,peapa poing-angra hi ing kitalu. ⁴⁵ Kaimpa, Yesus lungte,''Ebawe ba kitafi Ni?'' Peanya teba nawo tepa, Petrus lungte,''Koru, teba nawo telu tepajo-Me pa tefaja-tefajana- Me'' ⁴⁶ Anaing-angra Yesus lungte, Kebaing kekitafi-Ni peana Niwe ana jaung pekengna pengte wane Nine.'' ⁴⁷ Poing peume ing pefu pe nepepe pewewengka, pe petu pete Yesus netete jaketu pa pepa ho-Keke. Peteto teba nawo, pe hoho petu jatuko pewitafi Yesus, pa tunako pe poing-angra pe hae. ⁴⁸ Kaimpa, Yesus lungte pea, ''Ko-Nine, iman meme keko me hae. Memula ifu pepe me tutang petu .'' ⁴⁹ Poing Yesus hoho keleilefa kebaung kebaka paa rube sinagoge keing ketu pa kelungte Yairus, ''Kopeume meme peing pepang. Jaleungra nileko ana Koru weweka.'' ⁵⁰ Anaing-angra jaing pe Yesus kelu kelungte Yairus, '' Mefufuka, Meeng nafengkoko pa ko meme hefeng pewewetu.'' ⁵¹ Poing Yesus kekakoti Yairus paake, Kera pungleka baungra tena-Ketekeng tete Petrus wofa, Yohanis, Yakobus kepa ai pa ani koing. ⁵² Teba nawo te futete e pa funafai ko ume, peapa Yesus lungte, ''Fu eleleka, pepangka pa pe loweng etu.'' ⁵³ Teba nawoing terauteja-Ke peapa teri ko umeing pepang. ⁵⁴ Anaing-angra, Yesus no pepe kela pa pe kehiwa, ''Malungra, ko!'' ⁵⁵ Peapa,fengkoing kepute pa joraka pe walung. Kaimpa Yesus pipakele jajongka teweni koing pepang-pang. ⁵⁶ Teba huhu hintung telengho, peing Yesus te pekekaku ko baungra teninika jaing lewang.