¹ Bang ungpa, Yesus lupompong kelei jeng ung. Kaimpa Ke lupompong keleleng, teangku-teangku faing keung lungte-Ke, ''Tata lupompongka menapung ne ana Yohanis nalung teangku-teangku keke.'' ² Kaimpa Yesus lungte tea, ''Ana lupompong elele le, lupompong elena wea 'Ai,bati Meme tuwo Jeng Tete Meme tete tu. ³ Mepepengla newe tete jajong patafa bangfa-bangfa, ⁴ Pa memofa-fata neleng nene peanya newofa nera teba tuho tera nenofa fata jafeng tetemotu ne. Pa newe mepe mameme ka ifu teteri ete.''' Mewaung, Mejuung, pa Mefiung ⁵ Kaimpa Yesus lengte tea, ''Anaing-ang eba aling ung teba hela keke pa ere keba hela paake wana rapangte e lengte ke, 'Meba hela, niwe hang ong hengtongka mepe peng-peng pe, ⁶ peapa keba hela nine ung kekaile leng ke tete paa nine, peapa niwe ja lelepa paafu katafa ana nileng-lengke.' ⁷ Penoing tuka keba helaing keleng paa i kengtete tu, 'Ni ele luluka! Tilong long nile pa nipa koko nine ne ene nete jeng neluweng nete. Ni halung-lung kale kojaung niwe era niwe lengleng le.' ⁸ Niwe lengtete ea anara keba helaing kekalungka pa me jaung kewelengka meing bato keke,peapa ewe ewafae e, ke kalengleng le pa e ja kewe lengleng le e ja epungtu. ⁹ Pea, Ni leng tete ea ewaung, ewe kewe lengleng le. Ejuung, ewe e wewele. Efiung, tilong e e kejejele. ¹⁰ Peana mebaung mewa me kewe lengleng le Mebaung meju mepe pepe. Pa mebaung mefi, tilong meme ke jejele. ¹¹ Keing kebaung ai ebafaing ke ikeleng ko keke ana koing mu kewa? ¹² Keputi fuling keweleng, ana ke ojingko kewa? ¹³ Ana ebafeng elu tunane ja efeng ewe lengleng ko ko e e, anate ing-angra Ai e e mele surga. Ke Feng Tu kekeleng teba-teba tewapate-Ke.'' Ai Efengke Yesus we ¹⁴ Bang teung, Yesus bate kekaju kebaleng lepe. Poing bate muna pengti, keba lepeing kepi kele pa teba nawo teeng tape. ¹⁵ Anaing-angra, teba narangrang pite e, ''Ke bate kekaju wa efeng Beelzebul,bate rube.'' ¹⁶ Tebafa hing ung pungtu Yesus ahate te,tekaung tewa Ke jari wa surga kewena lunglung. ¹⁷ Anaing-angra, Yesus kelu ja tehieng ete pa kepi kelete te,''Ana jeng tafa tekote-tekote pa tewowo pingtete petakukutu. Pa tebapa tewowo-tewowo ing terapute tehe fengfeng teheke wowo-wowo. ¹⁸ Pea,Iblis kera teje-teje pa tewowo pitejaji ne tete wowo, tunane tuko jeng tete tete perona taroro? Ni pi nilena ing-ang peapa ea pi elete eleng Ni Beelzebul wawuwuke nikekole bate-bate nihajuele. ¹⁹ Ana Ni bate-bate nihajula beelzebul wawuwuke ba wawuwuke teangku-teangku meme te tetuju. Peate, tea pute ea pi teririte. ²⁰ Anaing-angra, Ni ana Ai wawuwuke ni kekoko bate nihaju, Ai Jeng Teteke petete ea. ²¹ Ana kebaung nafeng tetang tate pata paa kekewo kewekamule, ja lelepa keke peja tutukatu. ²² Peate, ana kebaung ke nafengwo pete kebaing kekala pa ke kekeli, keba nafeng tetang tate tetang tate pitenie keba kelepa kolekole jahenglo jatatete. ²³ Baung kang Nine mepaka, me Ni pime mami. Pa baung mene jaung mefu Ni lupaka, me nemeko pemepe.'' Bate Feng Kepute ²⁴ ''Jaungka tebate feng tekengtu teja kebaung neke, feng ing kepako kele jengjeng upe kejuko jeng kei ile, peapa ke kefika. Peanya ke pikele, 'Ni mupuna paa nike litimunya.' ²⁵ Kaimpa ke kemupute, keti paa keke kefi kekengti to pe jatefuko totafa pa tetupi efengwo. ²⁶ Anaing-angra,bate feng keti pa kelengko bate feng napanghengtong teing fengtafa tekengte pa tete e paa ing-ang ko kebaing nepara keke ing fengwo anara lopa ketukanya.'' Teba-teba temu Huhufa ²⁷ Kaimpa Yesus piti kelanawe, pebaung peume pehetero hou hou teba nawo tenipate, ''Makele ampi ko mepepe Kea pa no ing mepepengpa Ke kungkung.'' ²⁸ Anaing-angra, Yesus pikele,''Efeng tafa teba-teba Ai hohoke teri ete pa telaete.'' Jari Yunuske ²⁹ Kaimpa teba-teba ing teleko nawo, Yesus pikele, ''Tebamowe teing tebamofeng; teing tewa jari, peapa jari aling ungra kewenalungka kote tea jahingka Yunus jarikefa. ³⁰ Anara Yunus keing ana jari kotu teba-teba Niniwe peing ana Ba Ko kera ana jarikoko teba moung-ang. ³¹ ''Wakotu bang takukutu Ratu pewa lope pewaleng telupa teba-teba moung-angwe pa pe arite perowiwitu pewako petupewa fitong hope petu lewawa Salomo efengke, era kewera kebaung keing bapalewo anateSalomoke. ³² Bang takukutu, teba-teba Niniwe tepa teba moung-angwe pa ari kelokikile, peapa teba-teba Niniwe kengtepa kaimpa Yunus pifengwe kele teho, kewe kebaung ke bapalewo ke eti muleho Yunus kohete.'' Lutowe Ne Ra ³³ Mebaung me ra mefako eha mame be peng i jeng wengkotu na mame bei patang. Puna weatu, te raing teketute tekei tang e raing ehaung teba-teba tekengpatu fefekeke tefie. ³⁴ Luto ing ra ne meme. Ana luto meme efeng, ne meme tupa fefe keheti kewe tupa. Anaing-angra, ana luto meme feng, ne meme tupa lopang keheti kewe tupa. ³⁵ Peanya, meeng huhufa meme fefe mule ne meme lopang-pangka. ³⁶ Ana ne meme fefewe tupa pa loung lopang keweka, ne memeing fefe pewe tupa anara ra ing-ang ne meme wa fefe tupa.'' Yesus Hekelu Teba Farisi pa ropu Taurat fojang ³⁷ Poing Yesus pi kelekoka, keba Farisi kewa-Ke ja tetangtang. Ketetakung pa jatetang. ³⁸ Anaing-angra, keba Farisi ke engtape kaimpa kekalengte Yesus no kelolekaka Ke jakekang. ³⁹ Peanya, Tata pikelete tea, ''Teba-teba Farisi te aname jaa pa apolo penglowenya elole, pa i ne meme takutafa pa fengwo. ⁴⁰ He teba-teba tupo! Peraka Keara penglo kelele ilora kelele. ⁴¹ Peanya, ja motu ilo meme mekopepe anara tupa taimbe meme. Noing-angpa, bamuang- bamuangwo metu. ⁴² Anaing-ang fengwo teba-teba Farisi Peana, taimbe nahingpang panghingtung eleleng wa jana jata, pa jalelepa meme wa lehe meme, peanya ewe epe pepe pa noja Aike. Peing, ewe ja ele-ele nalungpa wo hing ing pe epengpengka. ⁴³ Fengwo newe, neba-neba Farisi peanya ne pungtu netanu meme jeng efeng sinagoge pa nepungtu tabengja nere nene jengjata tete ete. ⁴⁴ Fengwo newe peanya newe anara fulu penojengka, teba langlang te ete pehu teengka.'' ⁴⁵ Kaimpa, keba tuhoung ropu Taurat fojang kelengte, ''Koru, peana Me pengkotu lelepaing, Mera newe menami.'' ⁴⁶ Peapa, Yesus lengte,Fengwo eba, he eba-eba ropu Taurat folang. Ana, ewe ja reng-reng ewefe ba hing wekukule, peanya ne memewo ja reng-reng ing nokangkang aling fifika. ⁴⁷ Fengwo ewe ana ewe fulu nabi-nabi jobe e eji pea elete haele. ⁴⁸ Poing, ewe ne are nalung teba nawo anara ewe pungtu janopa jobe e e; tea nabi-nabi we teji, peanya ewe fulu tete ele ete haele. ⁴⁹ Kawe peanya, Ai kejawa hupalang Ke keleng, 'Niwe nabi-nabi pa rasul-rasul nilefe tejaja te te tete tea, peapa teba- teba narangrang ung Ni lefeing tejiko tebing- bingte pa jano lelepa tete te te,' ⁵⁰ Wakotu hi nabi nawo tajuheti po fitong kelelang, patu teba moung-ang tewawate, ⁵¹ wa Habel hike pate Zakharia, wa altar pa Ai paaike. Ea, Ni lengte me neba moung-angwe jawe ewehuhule jawe ewe- wele. ⁵² Fengwo ewe, he eba-eba ropu Taurat folang long lelepa motufu eake, peapa ewoing ekngrere ong e pa teba hing keng- kengte etope-tope e.'' ⁵³ Poing Yesus jeng ing kewelite, teba-teba ropu Taurat fojang pa teba-teba Farisi Ke pipotelae pa Ke tejape e nolelepa tejeng e. ⁵⁴ Tete telupa ko Yesus tekeke te wala piti Ke lapate.