¹ Allah yea romiyeare wali himalainyeboke yo yea me beammile, nibi neme wali ondofolo yea mokoubokene, rake hee Yesus wali ondofolo yeale mbainye nekate romiyeare Allah me onoyoi. ² Haubihine bang wali ondofolo walora Allahre roh wali nemere ikeume kiyea neai eleayea eai nebangde kena kandeke haraime namekai Allah yeale wahemakonde eleara buleareumeboke. ³ Romiyea Tauratere walora wali heere foloukoke hakowainiyele walora wali himalainyeboke romiyea inyaibondere nahului bang, haubihine bang neai kena uw elea banne, pele wali heere foloukoke arehubara heaita eineikoi hului. ⁴ Taurat yae are weume mekai aei waline bomande nekemale, beleyaere Roh Naei keleume mekai jaemo nekemayende. ⁵ Romiyea nanebangde kena katere haraimi elaere hakoijate yo, bele u mekai mokonatere u benemo nekeijaimile, beleyaere Allahre Rohyae weumi are hakoijate yo, Allah Roh yae kenare koye huluinye u bene nekeyaimile mokoijate. ⁶ Nebangde kena kateharaimi elea huluinye uw bene nekaimi romiyea Allah yeale wahenaikonde, peleyeare Allahre Roh huluinye uw bene nekaimi romiyea wali hena bona uw mekai nawaneng reimai hubanainyende. ⁷ Uw mekai nebang neai uw bene nekaimi romiyea Allah neai yokeijokai nekate Allahre na wali heere foloukoke huluinye ehakoiboi namekai ehakoboi hului. ⁸ Nebangde kena katere haraimi elea huluinye wali nekate romiyea Allahre kena foite omokoiboi hului. ⁹ Peleyeare mai kena uw einye Allah Roh nahele nekendena, meyea nebangde kena kaube harayembe elea huluinye wali emeikai, peleyeare Allahre Roh yea wembe huluinye wali nekembe. Namekai wali ondofolo yea yeumi Roh kena uw einye enekei romiyea, wali ondofolore holona yo bang. ¹⁰ Yesus wali ondofolo mai uw einye nekendena, uw nebang mokaube earene mai uw herende, peleyeare Allah yea wali himalainyeboke yo yea mare me beambe earene mai kena uw einye wali hena bona uw mekai hubaunge. ¹¹ Namekai Allahre Roh Yesus wali ondofolo uw nulu yo mahe yora aungunuke kiyea, mai kena uw einye nekendena, pele rohyea mai uw einye nekeye here yeale uw kayeero beneng wali neme inyembe. ¹² Pelene akaneai, eai baka rannare Allahre Roh weumi huluinye nekemale uw mekai nebangde kena kandere haraime elea huluinye bang. ¹³ Meyea nebangde kena kaubere harayembe elea huhluinye nekembena - meyea Allah yeale wahenggombe. Peleyeare Allahre Roh wembe a huluinye nekembe nebangde kena kaubere harayembe eleare ehakoyeina, meyea wali hena bona yeale nekembe. ¹⁴ Allahre Roh a weumi huluinye hakainye romiyea nanemene Allahre keluomi. ¹⁵ Haubihine bang yebeai bubeai neai roware fee waku kainye waneng Allahrena Roh mare ikembe meyea Allahre beneng fee waku konembere omokoiboi, peleyeare Allahre keluomire mokombokembe neai Roh elea yea eyea Allahre, ako yea kaneanne. ¹⁶ Allahre Rohyea eai uw re rake a mbai feaumbai jea eleye, meyea Allahre kelu omi. ¹⁷ Eyea pelemekai nekemalena, na me einya hambung eare emmewahendere, wali ondofolo one henggone yeale yea kiteungeboke waneng mea eare kitemmebonde neaite eyea neainya hului nebang hubamande hele. (Allahre Fafa Wali Nehale Hubainyate) ¹⁸ Reyea hubanale rake hee na nebang hubannele, pele wali one henggo eare emmekelembonde bele huluite ehaisi. ¹⁹ Allah yea rake kelana mokowoye hambung hambung, neai keluomi helere yakalam bonde neai ya yea kena roweumihike rakeijate. ²⁰ Haubihinebang Allah nuleuboke, hambung hambung na mekai jea foi mokonatere peleyeare Allah mehau bea mokouboke Allah kenare koye pele hambung-hambung rakeya yembonde neaite rabo elea halena yende. ²¹ Neyea kakare inyaibondere uw mekaite hole emmolombonde nawaneng Allahre kelu omi nambele mbainye one henggo emmikitende. ²² Eatei ele miyea fare honondere hiyau koye kiyea pele fa hononde neai uw buhea koyene elekali koye waneng rake hee releyea Allah rake kani kelana mokowoye nemene ele kali kate. ²³ Bele mo ban, beleyaere eyea Allahre roh ikeume, mendeneai kelu omi yae no ne henggone yaele emmikitembonde yo, eai uw neme yemmebonde yare kena roweumihike rakeimeyande yea, kena ei uw eita ele ele kali kali kande. ²⁴ Eare hole moloumeboke heera rabo elea halewanne Allah yea pele hambungde mokongkonde, peleyeare ijokoyea erekande hambungde rabo eleare omokoi hului meahea mekai jea romiyea mbai neai me einya hambungde nammang rabo halende? ²⁵ Peleyeare eyea ijokoyea eyereiboi hambungde emayaronde, neaite rabo elea halemalene, eai kena uw na hebean sebean mea rakeimeyande. ²⁶ Eai rabo elea haleande yea earene hakoiboyeume waneng mbai, Allahre Roh yea eai kena uw yambire hakoiboyeume. Allahre ebeli bomande amekai eateai bang ne romiyea a eleikoi huluinye ele kali yea Allahre roh neneaijea eai neaite Allahre ebeli boijeunge. ²⁷ Namekai romiyea neai kena einyare iteayeuboke Allah, neai Roh yea Haraungebokere neaiteai, haubihi ne bang Allah kenare koye huluinye Yesus eleuboke wekeumi romiyea earene. ²⁸ Eyea iteayeandeboke Allah meraukev raungeike huluinye kaneumikoke namekai nare kena buheare heyainye romiyea neai foite, nemene fomene benate hambungde Allah nambele yea hakouboke mokoimiyeye. ²⁹ Wali ondofolo hakonainye romiyeare Allah na peme fomona ro roumiboke namekai a hokoukoke, na'aka beake uw nolo uw ikainye, neai hinafa hoifana bena kiyea re yembonde neaite, neare hakonainyele romiyea nahinafa haifa uw mekai waneng inyaibondere. ³⁰ Nai bena fomore Allah na hinafa hoi fa u mekai waneng inyaibondere a hokoukoke holona ro miyaere kaeneumikoke. Bele kaeneumikoke yo mbai Allah yae wali himalaineboke yo yae me baeumiboke. ³¹ Pelene, eyea maka a yea elemakondere? Pele Allah neai neneai eai elu earere relenmele, hinye yea nobenenggonde? ³² Allah neai kelu mbai keng hele, neyea eheweiboi enekei, peleyeare eai earene kinyeumiboke. Pele earene mbainye nekemale me uw mokomale neai hambung hambung yeale, nawaneng nakenalo buhealo nekeyere, neyea eare nou eheikoi sului? ³³ Allah na romiyea me re beaumi, hinyeyea hinenmilere? Pelere Allah neneai neai nahele einye hole molonemile. ³⁴ Romiyea mbaijea eare me onoyoi hului, haubihine bang kendang wamerang reufine ekenekeye kiyea, neyea eai earene olenaijeye. ³⁵ Ikele keang mea, kena nebang uw nebang yea, weitaisi kaimeye, moni mai jea eha isang mea, hambung mbai sambai Yesus kena buhea heijeumera eare kayee omoloiboi hului. ³⁶ Allahre homo keane rake waneng mea moloukoke, wea holana romiyea yea beaime earene, meai wali nayane beai here yeale mbebane nekeijande, meare foloinaimile domba domba waneng mea me beaimele. ³⁷ Peleyeare Yesus eare kena buhea heumekoke kiyeare walora pele uw mekai wa mekai nebangda eyea mandefeauboke. ³⁸ - Reyea naheleyea hubanale, Tuhan Yesus wali ondofolo walora Allah kena buhea heumekokere kayee moloiboite rake yoni yoni yea nahului bang sele, here, ³⁹ wali malaikat-malaikat, walobo yoni-yoni, rake hee beate yakalate hambung hambung bena ya honoifiyoyene benate hambung hambung nemene.