¹ Belene ya mehae-mehae nekaikokemo, romiyae helem Yesus bokone arilewoye, bele yaere anenaikonde maei hamam bam, Yesus na moita ohowate yo kaeneumikokemo weumi, ² Reyae kena buhae yae rake romiyae helem haemaele, ambele ya name yae yeuboke nekande namekai hamam emaneikoimo nekate. ³ Reyae ukemile na imaere-imaere enatena, ehi nibi nolone moni ne hokonnekonde ruwende, namekai ehi yo ahauka mekate. ⁴ Betamo namota ohowate yo wanyele, "Mehae mekai jae rake romiyae helem feu yae naremmikonde wande inyaibonde, namekai rake anuwau a haesaei-saei a kou-kou honoye?" ⁵ Beleramo, Yesus namota ohowate yore hineumile, "Ma mena feu mehae-mehae?" Namota ohowate yo wainyele, "Ma mena feu mehaembai mehine bee (tujuh) ⁶ Beleramo Yesus ukeumile bele romiyae kaniranne anggem nuwaikoke, feu nanemene yaroukoke mo, ebeli boungehike, kayewoye, namota ohowate yore yeuboumi romiyae helem wahewaimile anewate. ⁷ Bele namota ohowate yo namena ka fele-fele yaele. Yesus ebeli boungehike mo, namota ohowate yore ikeumile romiyae helem mekate yore wahewaimile. ⁸ Romiyae helem anewate wande hele koubate, namota ohowate yo hamam kulum arilewate, na helem 7 karanjang, mehaembai mehine bee yaele. ⁹ Romiyae nemene empat ribu hangga hamam anewate. Beleramo Yesus ukeumi eubate. ¹⁰ Yesus namota ohowate yo yaele nahibi kayi ete erulaiboke, naisike Dalmanuta kanire eubate. (Yesus A Riyewanyele Yaku Bumana Ha Emehare Kelembondere) ¹¹ Farisi holona yo Yesus bokore mekate, umali re hubanainyehindere, Yesus re wainyele surgana ha emeha re yakalamibondere. ¹² Yesus no yobouboke, Na kena eita mehi yae neufake eleye, "Mekane rake heena romiyae hambum emere mokorebondere riyatele? Reyae nehale yae wamale, rake heena romiyae hambum eme ekeleijae hele." ¹³ Belera, Yesus are riyewainyele yore nukeumiboke, namota ohowate yo yaele kayira hawaiboke naisike refire foubate. ¹⁴ Namota ohowate yo feu nundeumikoke, ehi ebaraiboi, kayi einye feu mbai mo nekewoye. ¹⁵ Betamo, Yesus ahuwe rorowoumile, "Mokosa-mokosa nekembe! Ma u kayaa hebembe, Farisi holona yo yaele Herodes holona yo yaele naei ragi." ¹⁶ Beleramo, nate-nate hinate elate, mekane eyae feu ebaraiboi. ¹⁷ Na kena einya hubawainyele Yesus itayeuboke weumi, "Mekane meyae feu ebaraiboi ane eleimiyaube? Meyae namam Raei elae eyitaeiboi? Mai u bene namam na nana yae namekai kena elae hele hebaube? ¹⁸ Meyae ijoko yaele, beleyae ijokoiboi nekaube? Meyae nggaejale beleyae eboroi nekaube? Meyae bene enekeesi?" ¹⁹ Reyae feu kayewale wahele 5000 romiyae anewate wande yaeiboke, na hamam kalum mehae-mehae meyae arilwaube?" Namota ohowate yo wainyele, "Na kalum arilewande keranjang me bee orone bee yaele ²⁰ Benem feu mehaembai me ehine bee yaele, romiyae 4000 anewate wande beubate, na kalum mehae-mehae meyae arilewaube?" "Na kalum meyae arilewande nemene keranjang mehoki mbai ehine bee yaele. " ²¹ Yesus benem weumi, "Meyae namam eyitaeiboi kaube?" (Betsaida Yona Ro Ijoko Kumba Yesus Onomi Ikeunge) ²² Yesus namota ohowate yo yaele kayira awayeke Betsaida yone anyoke. Betsaida yona ro mbai ijoko kumba, yawanyehoke Yesus bokore mekate a riyewainyele Yesus mere keluwennelere. ²³ Yesus bele ro kumba na mera kelukeunge, yawengehoke yo mote ekete. Yesus eugaki na ijokora houngeboke Na me ijoko ranne raufike. Yesus hineunge, "Weyae hambum-hambum ijoko ereyae?" ²⁴ Bele ro nabe bumare kaeboke weunge, "Reyae romiyae ijoko eramaele bele yaere o-ha mekai ohate?" ²⁵ Yesus benem Na me bele ro re ijoko ranne raufike, bele ro ijoko keleukoke, onomi rouke, hambum hambum na yakala hele erewoye. ²⁶ Yesus bele ro ukeunge na imaere euboye weunge, "Rake yore eijaemo nekeye." (Yesus Nehale Kristus) ²⁷ Beleramo, Yesus namota ohowate yo yaele, Kaisarea Filipi yore mekate. Nibi nolone meubate, Yesus namota ohowate yore hineumile, "Ro yae miyae yae Rare hinye yae elate?" ²⁸ Na mota ohowate yo yae wainyele, "Yohanes bure kolowoumi kiyae, ehiyo elate yendo kayaaro Elia yae elate, ehi yo yae elate Allah Naei yendo kayaaro mbaijae elate." ²⁹ Bele yae, Yesus hineumile, "Meyae bae Rare hinye yae elaube?" Petrus yae weunge, "Weyae Kristus." ³⁰ Beleyae Yesus namota ohowate yore ahum kolowoumi, Naei u maei Kaye, romiyae ehire ehuweyeijae. (Yesus Na U Nebam Bende Maei A Yakalauboke) ³¹ Beleramo, Yesus namoita ohowate yore Naei u nebam mokonainyele a yae kelewoumi, Yahudi falem-falem natehike, imam falem yae namekai Tauratre itayaeiboke yo yae, honatebonde, name nem ya Reyae walerebonde. ³² Yesus rake a namota ohowate yore na yakala weuboumi. Belene, Petrus Yesusre yobouboke elaere ekete weunge, bele a mekai eleyeijae. ³³ Yesus beufoke namota ohowate yore erewoumi, Petrusre a elae hele weunge, "Raei bokora eye, walobo falem! Waei u bene Allah hareungeboke mekai bam nekete, romiyae maei u bene yae haranae. ³⁴ Betamo, Yesus romiyae nemene namekai namota ohowate yo kaeneumikoke mo weumi, "Ro miyae Rare hakondebonde kiyae, bele ro miyae na wali nou eheijae nekenende, o hali kaembonde belera mo Rare hakondebonde. ³⁵ Hinye na wali hole molonebondena, bele kaye na wali hole emoloiboi hangga. Bele yaere hinye na wali Raei ako faeuko aerene Rare yendelena, onomi hena bona endewende. ³⁶ Na foi mekaha, ro mbai rake kani kelana hambum eme nemene fomene yaroube horo, na wali hole emoloiboi hangga. ³⁷ Meka hambum eme yae reweye yeungele rake wali henare emanekende nahinggi beneikonde? ³⁸ Belene yae, hinye Raei aerene, Raei ako faeuko aerene femako kondena, Allah Na kelu mende yane naei mekai Naei Akore bene, bele ro miyaere fe emmimokonde.