¹ Yesus bele ra aloungekoke airus le meangge Naei kotare, namoita ohowate yo yaele nembainye eubate. . ² Sabat ya yeuboke mo, Yesus ahuba raweuboke Allah Re eimom-mom imaene kelewoumi, romiyae helem sele borowate yo yae fa yae boubate, elewate "Rake nanemene mbelera yarowoye bam? Namekai itaeihaba, ha eme mehi-mehi hele Na me yae mokoye bam? ³ Naeisele Neyae o hane mokoweke, nenake Maria, Naei aka baeke Yakobus, Yoses namekai Yudas? Naei emamwa riyana rakene nembainye nare nekande yae? Bele mekaine Nare nanyehike. ⁴ Yesus yae bele yore weumi, "Mbele-mbelene yenjo kayaa ro re bumane hele kolojainyele, bele yaere naei yone, naei aka baeke nolone namekai naei imae obena naimekai hurenainyele. ⁵ Bele yone hambum eme mekai mbai sambai emokoiboi, bele yaere ehana bulona koubate yore onomi mokowoumile yarowate. . ⁶ Hila rabo bam nekewate erewoumine, Yesus Fa yea bowole. Yesus yoran-yoranda ohoweke romiyae keleumiyeke. (Yesus Na Moita Ohowate Yo Ukeumi Eubate) ⁷ Yesus na moita ohowate ro riya me bee oro hine bee beleramo kaeneumikoke, beere-beere waheukoke. Walobore hukenaimile naei elae na une keteumiboke, belera yo hire-yo hire ukeumi eubate. ⁸ Nibine enate ane weumi, ehanyale, feu, ru kangge, roi ninggi eyaroijae mo, mehukum mbai mo wamene reweye eye. ⁹ Oro memalu hireukonde, bele yaere malo bee eyaroijae, ehireijae. ¹⁰ Belera Yesus weumi, "Mbele imaene meyae emembombe, bele imaene nekenggombe mo, bele yora membalembe. ¹¹ Mbele yone mare anuwau eyei, nenayensimbena, embalembe hee, mai orona kani bahe rubommibombe, igwau wanem kelemmibombe neyae me u nebam hele kelaeyemboke ne." ¹² Belera moita ohowate yo alainyekoke eubate, romiyaere waimiyeke, wali osaenaibonde nekenate. ¹³ Rake yo walobo na u randa nekai sele hukewaimile, eha yo-bulo yo helem minyak yae hobewaimile onomi beubate yarowate. (Herodes Yesusre A Borouboke) ¹⁴ Herodes anggaei boroke, Yesus ha eme helem hele mokowoye ne, romiyae elate, "Neyae Yohanes bure kolowoumi kiyae herekera waleuboke, hambum eme re Yesusre royae bele hambum eme mokoye. ¹⁵ Romiyae ehiyo elate, "Neyae Elia ya," bele yaere ehi yoyae elate, "Neyae yendo kayaalo hi bena yenjo kayaalo wanem. ¹⁶ Herodes, bele anggaei borokene eleye, "Yohanes bure kolowoumi kiyae, na falem reyae neufakale, benem waleuboke!" Yohanes Bure Koloumi Kijae Haiboke ¹⁷ Herodes u benere nekewainyele, namiyea Herodias kenare koye mekai ekeunge Yohanis re kilaiboke kawane hilainyekoke hebeweke, Herodias naugwake Filipus re miyae, beleyaere Herodes kena koungene roke naei miyaere yeuboke. ¹⁸ Yohanis nahibi-hibi Herodesre a wengeke, “Na ije bam sele weyae waugakere miyae yae roukae nekeube. ¹⁹ Bele aerene, Herodias na kena einye auboke ikele hele Yohanesre koungeke, hombondere merau koloungeke bele yaere nahinggi bam hubawounge. ²⁰ Herodes Yohanesre fe hele faeungeke belene weuboimi, Yohanesre kayaa foi sele hebenate, nataei nekeweke Yohanesre wali himaleungeboke namekai Allah re holona ro ne. Herodes boroke Yohanesre ro, onewoye-handawoye, bele yaere kena hele Yohanesre koubonge. ²¹ Ya foi sele hubayeukoke, Herodes naei rohu-royae meijeuboke hamam bulau kabam mokouboke, na beyu-beyeba, fela falem-falem, namekai Galilea na beyu-beyeba nemene kaenewoumi mekate. ²² Bele hee yae Herodias re maengge aruleufike baene kouboye, Ondofolo Herodes bele yo kaenewoumi mekate yo yaele, bele maengge bae koye yaele mokowoumi na kena rewengehike nekewoye. Herodes yae bele maengge fare weunge, ”Meka hambum kenare koyae riyeufinde, reyae ware itete." ²³ Nehale yae wawale, "Mekaha yae rare riyeukehinde, bele ware itete, namekai rake yo waku nekale reufi riyeufindena, reyae ware kinyerete. ²⁴ Bele maengge fa eke nenakere hineunge weunge, “Ana, reyae meka yae riyerehindere?" Nenake yae weunge, ”Yohanes bure kolowoumi kiyaere ro falem yae riyeufinde!” ²⁵ Bele maengge fa na hasale mo beufoke, Herodesre bokore ekemo weunge, “Reyea riyawale na rake hee yae Yohanes bure kolowoumi Kiyaere falem, hote einye aubondemo rare yeukele." ²⁶ Bele a wanem riyeungehikene Herodes mehi neufake na kena nebam hele hubawounge, bele yae hokoumeke yo bene a holo yae heteungekoke boraibokene, bake maengge yae riyeufike hambum ahi ewei hangga. ²⁷ Nahibi kayaare hebewate felayo mbaite ukeunge Yohanes bure kolowoumi kiyaere na falem rewete eke. Bake ro kawa eite eke Yohanes na falem neufake. ²⁸ Belera hote einye Yohanes re falem hoite einye auboke beta meke bele maengge fare ikeunge. Bele maengge rouke nenakere ikeunge. ²⁹ Yohanes namoita ohowate yo hereke a anggaei borokatene, ekate na u bangkare mo elaeisake a bulune aimoloufake. (Yesus Romiyae 5000 Hangga Hamam Wahewoumi Annewate) ³⁰ Yesus namoita ohowate riyane arilaisike, mekaha yae ukeumi mokowate kelewaimile bele a yae weubainyele huwainyele. ³¹ Yesus namota ohowate yore weumi, “Mem, aemomo ema, anuwau akubam-naubam ijene no emayembom, meyae na wanem hamam re emaeneikoi mo nekaube." Rake anuwau romiyae helem sele elemele rikere-rakere ohate. ³² Nahibi Yesus namota ohowate yo yaele kayira hawaiboke anuwau akubam-naubam anuwauke eubate. ³³ Beleyae ro miyae helem erewaimile kayira hawaiboke. Romiyae na anuwau itayaeiboke, belene yau nibira hebaeyeke, yo-yam ehira-ehira moi hayaeyeke, Yesus namoita ohowate emeijae bere holoyae bele anuwauke ekate. ³⁴ Yesus na khayi yabare barauboke, Na ijoko erewoye romiyae helem sele erewoumile, Na kena buhae kouboumi, domba-domba wanem na kayaaro olo wanem. Belene huba ra weuboke ako faeuko kelewoumi. ³⁵ Hu akombondere yae, Yesus namoita ohowate yo mekate wainye, ”Rake anuwau haubihibam sele namekai reniyai jae beye. ³⁶ Rake romiyae weimi ai, rakena yo nekeijatere enate belene hamam ha roi jae yaronayende bele yae anenate. " ³⁷ Beleyae Yesus ye weumi.” Meyae hamam yemmile anenaikondere ya”. Na moita ohowate yo yae wainyele, “Bake romiyae helem sele arilewoye, meyae roi 200 dinar hangga yae few ema yaronggonde, romiyae anenate? ³⁸ Yesus beufoke hineumile, "Ma mena feu mehae-mehae honate? Emerembo!” Eraiboke mo mekate wainyele, “Feu mehaeimbai, kaa bee maemena honate”. ³⁹ Belera Yesus namoita ohowate yore ukeumi, ”Ro miyae nanemene wemmile ukaranne riyane-riyane mo nungaikonde” ⁴⁰ Riyane nuwaikoke yo holohi 100 nuweikiyate, holo ehi 50 nuweikiyate. ⁴¹ Yesus bele feu mehaembai yaele, ka bee yaele mene yaroukoke, Nabe bumare weke Allah re helemfoimo ukeunge, Betamo bele feu kayeweke na moita ohowate yore yeuboumi, ro miyae re wahewaimile anewate. Bele mekai mbai ka bee kayewoye, romiyae helem re waheimile anewate. ⁴² Romiyae helem anewate wande hele hubawainyele. ⁴³ Yesus Na moisa ohowate yo hamam kalum nanemene arilaisike kakali me bee orohine bee yaele. ⁴⁴ Feu ke anaikoke yo, ro mo nanemene 5.000 hangga. (Yesus Buranda Meuboye) ⁴⁵ Yesus namota ohowate yore ukeumi bere holo yae Betsaida yore fonatere, belera ro miyae helem na yore-yore enataere weuboumi. ⁴⁶ Here ukera Yesus homunggaere ebeli boisite ike. ⁴⁷ Huwae yeuboke, kayi mekate bu nolone meubate, Yesus yabane nukainyeboke. ⁴⁸ Yesus na moita owate erewoumi rem aubate am , mekanebam, reniyae nolo, alu kabam bera raweuboke ne. Yesus bu randa aloungekoke na bokore meke, enensinde mekai hareungele. ⁴⁹ Beleyae, na moita ohowate yo Yesus bu randa memoye erekainyele elate enaelo yae elewate, belene femako koubate, kelae yae kanewate. ⁵⁰ Bake yo erekainyelene nanemene kulu-kulu yeiboke. Beleyaere Yesus weumi, "Ma u osaembo, Reyae yae! Fe okoijae. " ⁵¹ Yesus bele kayi einye eweufike, alu rauboye uke kalaungeboke, nemene fa yae boubanyele. ⁵² Haubuhine bam, Yesus ha emeha feu mehaembai mokouboke hamam anewatere namoita ohowate yo namam eyitayeiboi nekate. (Yesus Ehana Bulo Na Yore Helem Onomi Yeuboumi) ⁵³ Bu habala reufire fokate, Genesaret yone nokate. ⁵⁴ Kayira akowate bae, ro miyae helem Yesusre ro rainyeboke. ⁵⁵ Romiyae hebaelewate yore ayeuboke, ehana-bulo na yo, na yum-yumake ranne yarowaimile Yesus bokore meubate, namekai anggaei borowate mbele kouke Yesus alongekoke eye, bele ijere yaraimile mate. ⁵⁶ Yesus yoranda-yoranda ohoweke, yo kabam yo kending nemene ohoweke, ehana yo bulo na yo, bele yo yanna nai nataei anuwaunge relaimiye honayeke, Yesusre riyainele, Na malo hubare kelungate. Nahului bamna, na malo hubare mo ikelenyaibonde yo nanemene onomi rewende.