¹ Yesus Kapernaum yo nukeuboke Yudea kanire endere, Yordan wi eneramo Yudea kanire euboye. Romiyae helem sele arilewoye Yesus Re ele nanyeboke. Yesus Naei mokoweke mekai, nahibi ako faeukone huwewoumi. ² Farisi romiyae mekate, Yesusre u malire hubananyihindere, hinainyele, ”Mehae mekai Waei u benena nekete, ro mbai miyae rewendera, beta nennihinde?” ³ Yesus yae weumi, "Musa meka utaeijae moloukoke mmare wembe? ⁴ Farisi holona yo yae wainyele, ”Musa moloukoke ro na miyae nahinggi nennehinde beleyaere bele ro homo molonggonde bele miyae neungehikere yennele." ⁵ Beleyaere Yesus weumi, ”Mai kena elae hele nekewaubene Musa rake utaei mekai moloukoke. ⁶ Naei sele, rake kani kela mokowoye hee, Allah ro yaele miyae yaele mokoukoke. ⁷ Bele aerene ro mbai naekore nenakere nukemmibonde. Nenaeijae na maiyae yaele eneinekende. ⁸ Hokolo bee mbaite inyeibonde. ⁹ Bele wanemne, Allah yae mbainye mokoumiboke, romiyae yae ekelareijae. " ¹⁰ Betamo, imae ete ekatemo, namota ohowate yo yae benem bele a mbai yae Naere hinainyele. ¹¹ Belene, Yesus weumi, "Hinye namiyae nennihinde benem miyae ehire rewendena, bele ro yoko-kaimae yae koukoke, naei miyae helere nebam bae mokoungeboke. ¹² Bele mekai mbai, miyae kaye, namolore nukennebonde benem ro ehire eneinekendena bele miyae yoko-kaimae yae koukoke. " (Yesus Fafare Onomi Yeuboumile) ¹³ Fafa fele-fele yawaimile Yesus bokore yawaimile mate Yesus Naei me fafa na u rane koloumilere, bele yaere namota ohowate yo ahum kolowaimile. ¹⁴ Yesus bele mekai ijoko erewoumilene, Neyae a yarewoumi, weumi, "Waemmihi mai, ahum okoloijae, bele fafa Raei bokore mai, mekanebam, Allahre yo yam rake romiyae mekai jae enaeijembore wali hena hubayenaikonde. ¹⁵ Reyae mare a nehaleyae wamale, hinye na wali rake fa mekai na wali harannebondena, Allahre yo yam mokoungehake bele ete enennsinde." ¹⁶ Nahibi Yesus fafare hari aumiboke onomi ikeumi namekai Na me na uranne kolowoumi. (Robonilo Relalo Yesus Re Kinyewoye) ¹⁷ Yesus kulum wendere mokosa-mokosa nekewoye bae, ro mbai hakeuboke Yesus Na bokore meke, nahibi oro hele roroukoke, hineunge, "Foite mokoyeyae Kulu, meka me u yae mokorebonde, wali hena bona ere hubayenggonde?" ¹⁸ Yesus yae weunge, ”Mekane Rare foijae ware? Romiyae nanemene, foi bam mo nekande, Allah Nembai sele foito-moito. ¹⁹ Weyae wataeijae foi maei autaei, ro hosoi ohoijae, ro miyae yaele miyae ro yaele mbainye ohonoijae, yoko ebaeijae, romiyae maei ahele bam ehuwaijae, ame-ame ebeyeijae, anare ataeite fe faeumile. " ²⁰ Bele ro Yesus re weunge, ”Kulu, bele a ware nemene na hokolone hakowale mokowekale mo yae.” ²¹ Yesus bele rore erewounge kena buhae yae heubounge weunge, "Mbai sele waeinya kalore molote, eye, waei hambum nemene roi nate heukonde mo, bele roi jae kerebam-nalebam nekeijate yore waheimiyende, beleyae weyae kere-nale surgana yae eiyaronde. Belera meye Rare hakotebonde. " ²² Bele a ukeungere kena bam hele hubawounge, mekane, rake ro naei hambum helem sele, bele anuwauka rei bam-mai bam bae alongekoke euboye. ²³ Yesus Na ijoko ahira-ahira ereukokemo ajpkho namota ohawate yore weumi. ”Yabi-yabi hele romiyae kere yaele nale yaele nekeijate Raei me kele u kele na yore inyaibondere!” ²⁴ Namota ohowate yo fa yae boubate, belene benem Yesus a weumi, "Fafa rake a borombo, yabi-yabi hele romiyae Raei me kelere yore enaiyembondere. ²⁵ Obo unta mbai nasom wanem imake bulure aruleufibe beleyaere kere yaele nale yaele romiyae yabi-yabi hele Raei mekele u kelera na romiyae re inyaibondere!" ²⁶ Namota ohawate yo fa yae boubate, nenaei nate-nate hinate elate, ”Hinye naeijae onomi enaijaronde?” ²⁷ Yesus na mota ohowate yore ereumi, "Romiyae nahinggi bam elate kaye, Allah yae eleye namene anhinggimo benate!" (Yesus Re Hakomambonde Nasom Bam) ²⁸ Petrusyae Yesusre weunge, "Ijoko eramae, maei hambum nemene fomene nukandeboke hayaendeboke, mana Waremo hakayaeibokayete!" ²⁹ Yesus weumi, bhakhele a nahele yea wamale, hine neime obhe, neneua akho, nekhelu omi, nekhelei alei Rei khenane nukhende hayendena, ³⁰ Nanakhele heyea Isangnane Felarane naimene, nakhelu omi nolone, nei akhabhekhe nolone nekhenendena ro umbaina waneng rowende, bhena yane mendene, walihena rowende. ³¹ neibhokhate yo menaibhukhombonde, monyayeyea bhere enaiyembonde”. (Yesus Herende A Yae Elewole) ³² Yerusalem yore alanyokhokhate fowate Yesus bhere neugokhe, reimai khowate, romiyea ehiyorong bhele homne hakhaikokhate fowate Fe yes fenate. Yesus namota ohate yoyele yaweumibhokhe bheneng bhukhaibhokhate mewate, Yesus nare a iteiyeumibhokhe Naurang bhenate a romng weumi, ³³ Neyea alele, ”Jokho erauge, eyea Yerusalem re kheteimiyande Yesus faleng-faleng mere kinyenaibhondere Yehudi romiyeare inyaimilere. ³⁴ Akhoihoijea, eugekiyea honanyele Na urande bheta honaibhonde, nanemen yamo Nea angukhe.” (Yakobus re Yohanes re Khena re Khote Ha Yea Yesus Re Rinyele) ³⁵ Yakobus, Yohaner re, Zebedeus, fafabhe Yesus Re bhokhore mekhatemo a weunye, ”Khulu, mei khenare khonde ha ehe khoumikhondere bhelene wei bhokhore mekhande.” ³⁶ Yesus a weumi, ”Mekhayea khenare khouge Reyea hakhorobhobhere?” ³⁷ Neyebhe Nare a weumi, ”Ehere khoumikondere wei bhokhore mekhande ehikie wei meugerefine nuwembinde, nehikiyea wei melirefine nuwembonde nembanye Ateite Imeyeite obheyeinye.” ³⁸ Yesus a weumi, ”Meyea iteyeibhoi mekhayea meyabhe riyeuge meyea nahului bhakhe bhu Reyea anerehinde maijelea nahului anehibhe bhakhe bhu raukihike meyea nahului Nea nahibhi bhe?” ³⁹ Nare a weunye, ”Meyea nahului!” Yesus nare a weumi,” Rakhele bhu Reyea anerehinde meyeabhe nahului anehibhe, bhu Rare rakihikhe meyeabhe bhihe ranihibhe.” ⁴⁰ Meugemene, melimene nuwokhobhe arongbhele reyea ehe ekhoikoi hangga bhele anuau nehanine mokhonghakhe.” ⁴¹ Bhele a bhorokhhete, namota ohate yorong a re yengmibhokhe yarewongmile Yakobusre, Yohanesre. ⁴² Yesus kheningmikhokhe mo weumi, matei nekhembe falende hebhate yo romiyea Yehudi bhang elate yo nei khenana hangga mokhanaimile. ⁴³ Meyea bhele mekhaibhang. Neisele, hinye mairiyana khena khole khabgang Yembonde khaye, niyea nanemen ufoite nekhende, ⁴⁴ mairiyana hinyekhena khole bhere nembonde khayea, neyea nanemen nei ufoite yembonde ⁴⁵ Yesus rakhe khani khelare mekhe roware eyeibhoi, bheleyea nanemen nei ofoite yegokhe, mekhe Nei wali ikeumile walire enayaronde Nei Ro enye.” ⁴⁶ Yerikho yone mekhate. Yesus namota yoyelea romiyea ehiyeale yerikho eibhelekhate ewate, ro mbai jokho khumba naro Bartimeus Timeusre khelu nibhine nuwegokhe nekhewole. ⁴⁷ Neyea a bhorole Yesus Nazaret na Ro, neyea nahibhi kheneungele a lele, ”Yesus Daudre Khelu reijele kenabhuhe hetokho!” ⁴⁸ Ro miyea heleng ahung kholanyelea a wanyelea dohang Yeibho. Bheleyea neyea khela nahibhimo kheneunge,” Daudre khelu, khenabhuhe hetokho!” ⁴⁹ Nahibhi, Yesus hebhengukhe a weumi, ”Kenanenokhemew”. Mekhate mekhate mo wanyele,” Wakhena eleyea! Mana anyu, Neyea ware khenate”. ⁵⁰ Nahibhi nemalo nauna khulagokhe, bhelero angukhe YesusRe bhokhore mekhe. ⁵¹ Yesus nerea a weunge. ”Mekhayea wei khenare khoyea Reyea Hakhoroibhotere?” Bhelero yea elele, ”Khului rajokho onomi yetea ⁵² Yesus a wenge” Eyea, onomi honomi rakhe!” Bhelehera nahibhi jokho erewole, neyea Yesus homora nahibhi hakhogokhe nibhine oheyekhe reijele.