(Yesus honggate ahuba) ¹ Yohanis honggate hewa, oko mehine mbai nekaikoke heyae, Kaisar Agustus ukeumi Roma kani kabamna ro miyae nanemene mere nulenaibondere. ² Rake nabeme heleyae me nulaeiboke, Siria kanine, Kirenius Ondofolo kabamre nekewoye heyae me nuleiboke. ³ Rone miyaene narore molonaterene, naete-naete na yore yande bukewate eubate. ⁴ Ro mbai naro Yusuf, Galilea kanina Nazaret yore kulum uke Yudea kanira Betlehem yore na miyae Mariare eubote. ⁵ Yusuf na miyae ehere kaikokeyaele eubote, belehe Maria u yaele yeuboke nekewoye. ⁶ Yusufre Mariare Betlehem yore ekete, Maria naei fa hononde ya nobeungeboke, ⁷ Maria kelu yae na kou eme yahi emene hongge. Maria roke malone ruleufike, kolo imae mae-mae koukene, o hote dombayae sapiyae hamamre anate einye nekeunge. Domba kayayo Yesus honggate itayaeiboke ⁸ Yudea kanine, Betlehem yo kelaunge domba kayare hebate yo reniyaijae na dombane kaya hebatemo, ⁹ Allahre malaikat na u meumi yakalaumiboke, Allah na u inukui jae hehe naumikoke, domba kayare hebewateyo feyae-wakuyae mae-mae koumikoke. ¹⁰ Beleyaere malaikatyae weumi, "Fe efaeijae, Reyae a foi-faeu foijae rokale mekale, mare ukembere, namekai ro miyae nenemene ukemmilere. Meyae rei mai kombe, bele mekai mbai ro miyae konate. ¹¹ Manaya Walilo Henalo, Daudre yone honggate. Neyae Tuhan Allahyae oro umau heraweungeboke, Wali Ondofolo kiyae (Yunani afaeunge), Kristusyae kaenainyele. ¹² Na mekai, rake mekaijae erennnele - Rake Fa, malo raitaijae rulenaisinde, domba maei sapimaie o hote hamamre anate einye nenainyele." ¹³ Belerabae, malaikat kelaeunge, surgara mekate malaikat-felayo yaele helemsele yakalaiboke - Allahre buma hananyele, na a yaele elate, ¹⁴ Allah na buma hele ekenekaye kiyaere hili akau hebenanyele konanyele, namekai rake kani kelana ro miyae Naei kenare kojaimile yore, Allah beleyore rei maijae yemmile." ¹⁵ Beleramo, malaikat-malaikat domba kayare hebate yore nukaimiboke, surgare baeiboke eubatemo, domba kayayo naete-naetene elate, "Mem, eyae Betlehem yore ema, Allahyae meke weumi a ema erembom." ¹⁶ Nahibi beleyo uhale-mehale kulum hayaeikoke ekate, ekate Mariamre Yusupre bele Fayaele hubayaeikoke, o hote kabam einye, nekainyele honowoye. ¹⁷ Erewanyele, malaikat Rake Fa na are elewate wanenhele hubayaeikoke, ¹⁸ Domba kayayo elewate are borowate rone miyaene fayae bougwate. ¹⁹ Beleyaere Maria bele a elewatere na kena einye auboke nekewoye. ²⁰ Domba kayayo baeiboke na domba bokore eugwate, Allare bumayae kolowainye, mekanebam, na ijoko ekai erewate, naei anggaeijae borowate wanen nehale bele wanem beugwate yakalawate. ²¹ Belera, ya, mehaembai mehine nameyaele mejeubokemo, bele Fa na huba nanyehakemo, Naro Yesusyae wanyele, nenakere kobulu yahibuluna malaikatyae ranyeboke, rokanyele yo imae ralo imae ete mekaite. ²² Ya ro u bee Tauratne eleye mekai u meijeubokemo, Mariare Yusupre naei akauha yaele Allahre yo imae-ralo imaere Yesus rokainyele mekate, Naekore. Inyanyelere. ²³ Tauratne naei mekai moloukoke, "Kelu bena hononate kiyae, Allahreyae kinyenaibonde!" ²⁴ Namekai Tauratne molaikoke mekai, Maria fa honggemaei u fanyeiboite, Allah na imae-ralo imaere na akauha niyae, roungate namene menate, tekukur aye bee roungate namene menate. Simeonre Hanare Yesusre eranyeboke. ²⁵ Ro mbai naro Simeon, Yerusalem yone nekejeye. Simeon na wali nime haba hele himaleungeboke Israel yoyam maie onomi rakeweke nekeweke namekai Roh Kudus na wali einye mae-maehele aungeboke. ²⁶ Allahre Rohya na waline aungeboke weunge, Simeon na walimo nekewende, Kristus waei ijokoyae ereungebonde wa weyae hereye. ²⁷ Simeon Allah na imae-ralo imaere Roh Allahyae keleungeboke meke, Yusupre Mariare, Tauratne eleye mekai Yesus rokeinyele imae eite mete, ²⁸ Simeon Yesusre namene roukeunge, Allahre buma kolounge, weunge, ²⁹ "Mana ninae, na rei maijae hererele, makanebam, Waei ayem re kolowoyae kiyae Walilo, raei ijokoyae erekanale, Rake fa hehe mekaija, ro miyae wawana nekeijate yo wali enaijaronde, namekai Israel yore Waei nene waewae kelemmile. ³⁰ Raei ijokoyae Walifa ninae erekanale, ³¹ weyae mokoungehake rake kani-kelana mai bene; ³² yake Fa hehe mekaijae, rake kani kela nanemene hehe naemmikonde ro ronanyebonde, namekai Waei nene wae-wae israel yore, emmikelende." ³³ Yusupre Rake Fa nenakere, Simeon a weuboumilere fayae bougote, ³⁴ Beleramo Simeon onomiyae yeumimo na a weumi, "Anggaei borobo, Rake Fa, Allahyae eleuboke, Israel yoho enduwendemaei, annundemaei namekai Naro aerene ro miyae helem sele kena himi enaibende.. ³⁵ (Rake Fa aerene, waei kena himi hele ejeubonde, wa kena rame yomoyae nenate mekai eungehubande), namekai ro miyae helem maei ubene wabene enaijakalanate. ³⁶ Allahre yendo kayalo mbai miyae nale hele na ralo yakame nekewoye, Fanuelre maengge, Asyur yohona. Namolore ralo yakama mehaembaei mehi ne bee mo na wali nekeikoke, ³⁷ Namolo hereke nekewoye ralo yakama 84 yeuboke. Rake miyae nale, yo imae ralo imae enukeiboi nekeweke, reniai-tai Ako hubalo mandoremo na wali nekeweke. ³⁸ Hana meke Ako hubalo mando buma kolowounge namekai ro miyae arileufikere Yesusre ahuba, Yerusalem yore onomi yemmile ahubaeyae kelemoumi. Yusupre Mariare Nazaret yore bukeiboke eugwote ³⁹ Yusupre Mariare, Tauratre moloukoke mekai nanemene mokoikokemo, bukeiboke Galilea kanire, nayo Nazaretre eugwote. ⁴⁰ Rake Fa, ketewoye kabam yeuboke, elae wake, itaei-saba namekai Ako hubalo mandorena onomi mae-mae na waline hayewounge. Yesus Allahre yo imae-ralo imae einye. ⁴¹ Naralone yakamane baei, Yesus naekore ne nakere Yerusalem yore (Mesir kanine, Allahyae Yehudi kelu fafa bena onomi ikeumi maei u bene nekeisite), ya kabam Paskahre eugwate. ⁴² Yesus ralo yakama me bee orone bee yaele yeuboke, Yerusalem yore eugwate. ⁴³ Bele ya kabam u yeubokemo, baeiboke nayore anatere. Beleyaere Yesus na Yerusalem yone nekewoye, nakore nenakere nataeibam. ⁴⁴ Naekore nenakere elete Yesus ro miyae helem nolona nambele mateha, meugwate ya mbai yeuboke. Naekore nenakere ro miyae nolore hinewoteyaere, Yesusre ehubayeikoi. ⁴⁵ Yesusre ehubayekoinyeyae, beiboke Yerusalem yore mekete baeubounyele. ⁴⁶ Baeubounyele, namenem ya, Yesus hubayaeikoke, Akore yo imae ralo imaene, Yahudi falem-falem nembainye nuwaikoke borowanyele, namekai a yae Yahudi falem-falemre hineumi. ⁴⁷ Ro miyae borowanyele yoyae, fangge-nggeyae koubanyele, mekanebam, Yesus itaei sabayae mae-mae hele kelewoumilene. ⁴⁸ Yesus naekore nenakere erewonyele faengge-nggeyae koubote. Nenakeyae hineunge, "Kelu, mekane rake u mekai maere mokoumibokae? Ataeite rambele elumbo halumbo Waere hubayeikote ahire-ahire erewoyete, beleyare ehubayeikoi. ⁴⁹ Yesusyae weumi, "Mekane meyae bee Raere baeukele? Meyae mataeibam, Reyae Akore imaena?" ⁵⁰ Beleyaere naekore nenakere na kobumo kote, mekayaere Yesus weumi. ⁵¹ Beleramo, Yesus nakore nenakere hakoumiboke nembainye Nazaret yore eugate. Beleyaere Yesus nenake na ubenenemo bele a faeu elewoyere haugoye. ⁵² Yesus kete woye kabam hele yeuboye, itaei saba, me u harawounge, Allahyae namekai rone miyaene helem sele Naere kena kowainyele.